খুরুমজরি!

এক্সিলেন্সীজ,

বঙ্গলাদেশকী রাস্ত্রপতি

অব্দুল হামিদজী,

প্রধান মন্ত্রী

শেখ হসীনাজী,

লৌউ-শিংউগী মন্ত্রী
দাক্তর মোহম্মদ অব্দুর রজ্জাকজী,

মেদম শেখ রেহানাজী,

অতোপ্পা মশক নাইবা মীথুংলেনশিং,

শোনর বাংলাদেশকী নুংশিরবা মরুপশিং,

ময়াম পুম্নমক্তগী ফংলিবা মীনুংশি অসি ঐহাক্কী পুন্সিগী অতাংবা মীকুপশিংগী মনুংদা অমনি। বঙ্গলাদেশকী চাউখৎ-থৌরাংগী খোঙচৎকী মরু ওইবা তাঙ্কক অসিদা ঐহাকপু য়াওহনবীবা অসিদা ঐহাক্না নুংঙাইবা পোকই। ঙসি অসি বঙ্গলাদেশকী জাতিগী নুমিৎনি অমসুং শাধী-নোতাগী চহি ৫০ শুবা নীংশিং কুমওনসু ওইরি। চহি অসিদা ভারত-বঙ্গলাদেশকী মরু ওইবগী মরিসু চহি ৫০ মপুং ফারগনি। জাতির পীতা বানগোবৌন্ধু শেখ মুজিবুর রাহমানগী চহি চামা শুবা মপোক কুমওন তারিবা চহি অসিনা লৈবাক অনিগী মরক্তা লৈনরিবা মরীশিং হেন্না চেৎশিনহল্লি।

এক্সিলেন্সীজ

রাস্ত্রপতি অব্দুল হামিদজী, প্রধান মন্ত্রী শেখ হসীনাজী অমসুং বঙ্লাদেশকী নাগরিকশিংদা ঐহাক্না তৌবিমল খঙবা উৎচরি। অদোমনা মরু ওইরবা মীকুপশিং অসিদা, থৌরম অসিদা শরুক য়ান্নবা ভারত্তা বর্তন তৌরকখি। ঐহাক্না ভারত পুম্নমক্কী মহুৎ শিন্দুনা ময়াম পুম্নমক্তা, বঙ্গলাদেশকী নাগরিক খুদিংমক্তা থম্মোই শেংনা নুংঙাইবা ফোঙদোকচরি। বঙ্গলাদেশ অমসুং মাগী মীয়ামগীদমক থৱায় থাখ্রবা বানগোবৌন্ধু শেখ মুজিবুর রাহমান্দা ঐহাক্না ইকাই খুম্নবা উৎচরি। ঐখোয়না শেখ মুজিবুর রাহমান্দা গান্ধী শান্তিগী ইকাই খুম্নবা পীনবা খুদোংচাবা অমা ফংজবা অসি ভারত মচা ঐখোয়গীদমক চাউথোকচবা পোকই। মফম অসিদা পাঙথোক্লিবা থৌরম অসিদা মরু ওইবা পর্ফোর্মেন্স উৎখিবা কলাকার পুম্নমকপু ঐহাক্না থাগৎপা ফোঙদোকচরি।

বোন্ধুগোন, ঙসি ঐহাক্না বঙ্গলাদেশকী মচানুপা অমসুং মচানুপী লাক কয়ানা মখোয়গী লৈবাক, মখোয়গী লোল, মখোয়গী চৎনবী অসি কন্নবগীদমক্তা মশিং থিঙমদ্রবা মীওৎ-মীনৈ কয়া খাঙদুনা লাকখিবা অমসুং মখোয়গী পুন্সিবু কত্থোকখিবা কয়া অদু নীংশিংজরি। ঙসি ঐহাক্না মুক্তিজুদ্দোগী লান্মীশিংবু নীংশিংলি। ঙসি ঐহাক্না শহীদ ধীরেন্দ্রোনাথ দত্তো, এজুকেস্নিস্ত রাফিকুদ্দিন অহমদ, লোলগীদমক থাৱাই থাখিবা সলাম, রাফীক, বরকত অমসিং জব্বার অমসুং শফিউরজীবু নীংশিংলি!

ঙসি ঐহাক্না মুক্তিজুদ্দোদা বঙ্গলাদেশকী ইচিল-ইনাওশিংগীদমক লেপখিবা ভারত লান্মীগী থৌনা ফবা লান্মীশিং অদুবুসু থাগৎচরি। মুক্তিজুদ্দোদা মখোয়না ঈখেং তাখি, মশাবু কত্থোকখি অমসুং নীংতম্বা বঙ্গলাদেশকী মঙলান অদু মঙ ফাওনহনবদা য়াম্না চাউবা থৌদাং লৌখি। ফীল্দ মার্শল সেম মানেকশা, জেনরেল অরোরা, জেনরেল জেকব, লান্স নায়ক অল্বর্ত এক্কা, গ্রুপ কেপ্তেন চন্দন সিংহ, কেপ্তেন মোহন নারায়ন রাও সামন্ত, অসিগুম্বা মশিং থীঙমদ্রবা অথৌবশিংগী লুচিং পুরেল অমসুং থৌনাগী ৱারীশিংনা ঐখোয়দা ইনোৎ হাপ্পী। বঙ্গলাদেশ সরকারনা অথৌবশিং অসিবু নীংশিংনবা আশুগাঞ্জতা ৱার মেমোরিএল অমা কত্থোকখি।

মসিগীদমক ঐহাক্না অদোমবু থাগৎচরি। মুক্তিজুদ্দোদা শরুক য়াখিবা ভারতকী লান্মী কয়া ঐহাক্কা লোইননা অখন্ননা থৌরম অসিদা শরুক য়াবা অসিদা নুংঙাইবা পোকই। বঙ্গলাদেশকী ঐহাক্কী ইচিল-ইনাওশিং, ঐহাক্না মফম অসিগী নহারোলশিংদা য়াম্না চাউথোকচবা পোক্তুনা  ৱাফম অমদি ফোঙদোকচনীংঙি। বঙ্গলাদেশকী নীংতম ইহৌদা শরুক য়াখিবা অদু ঐহাক্কী পুন্সিগী ওইনা ইহৌদা শরুক য়াবা অহানবা ওইখি। বঙ্গলাদেশ মীয়ামগী নীংতম্নবগীদমক ঐহাক অমসুং ঐহাক্কী মরুপশিংনা সত্যাগ্রহ চত্থখিবা মতম অদুদা ঐহাক চহি ২০-২২রোম শুরম্লগনি।

বঙ্গলাদেশকী নীংতম্বা ফংনবা শৌগৎপা ওইনা ঐহাক ফাজিনখি অমসুং কৈশুমশঙদা চংবগী খুদোংচাবসু ফংখি। হায়বদি বঙ্গলাদেশকী নীংতম্নবগীদমক মফম অসিদা খৌরাংনা ঙাইখিবা অদুগুম্না ঙাইনখি। মফম অসিদা পাকিস্তানগী লান্মীনা চত্থখিবা মীওৎ-মীনৈ অদুনা নুমিৎ কয়ানি অহিংবা তুম্বা য়াহনখিদে।

গোবিন্দো হালদরজীনা হায়রমখি-

‘এক শাগোর রোক্তের বিনিমোয়ে,
বাঙ্গলার শাধীনোতা আনলে জারা,
আমরা তোমাদের ভুলবো না,
আমরা তোমাদের ভুলবো না’,

হায়বদি, ঈখেংগী ইপাক্তগী বঙ্গলাদেশপু নীংতম্বা ফংহনখিবা মীওইশিং অদু ঐখোয়না কাওবা লৈররোই। ঐখোয়না মখোয়বু কাওথোক্লরোই। মরুপশিং, ওতোক্রেতিক ওইবা সরকার অসিনা মশাগী নাগরিকশিংবু মীনুংশি খঙদনা হাৎপীখি।

মখোয়না মখোয় মশাগী লোল, খোলাউ অমসুং মখোয়গী মীয়ামগী শক্তমবু নমথখি। মালেম অসিদা ওপরেসন সর্চ-লাইৎকী তমথীবা, মীওৎ-মীনৈ অসি খন্নফম থোকপা মওং অদুদা খন্নদে। মরুপশিং পুম্নমক অসিগী মরক্তা বাঙ্গোবৌন্ধু শেখ মুজিবুর রাহমান অসি মফম অসিগী মীয়ামগী অমসুং ঐখোয় ভারত মচাশিংগীসু আশাগী মঙাল অমা ওইনা থোরকখি।

বাঙ্গোবৌন্ধু গী লুচিং পুরেল, অমসুং মহাক্কী মথৌনা-মরিংজেল অদুনা বঙ্গলাদেশবু শক্তি অমত্তনা নমথবা ঙমহনখিদে।

বাঙ্গোবৌন্ধু না লাউথোকখি-

এবারের শোনগ্রাম আমাদের মুক্তীর শোনগ্রাম,

এবারের শোনগ্রাম শাধিনোতার শোনগ্রাম ।

হন্দক্তি লাঞ্জং অসি অফা-অপুনদগী নানথোক্নবনি, হন্দক্তি লাঞ্জং অসি নীংতম্নবনি। মহাক্কী লুচিং মখাদা মীচম প্রজানা, নুপা নত্ত্রগা নুপী, লৌমীশিং, মহারোলশিং, ওজাশিং, শিন্মীশিং, পুম্নমক্না মুক্তিৱাহিনি ওইন্না পুনশিনখি।

অমসুং ঙসি অসি মুজিব বোর্শো, বাঙ্গোবৌন্ধুগী মঙলান, মহাক্কী ৱাখল্লোনশিং অমসুং মহাক্কী মথৌনা-মরিংজেল নীংশিংনবা নুমিৎসু ওইরি। “চিরো বিদ্রোহি” অমসুং মুক্তিজুদ্দোগী থৌনা লিংজেল নীংশিংনবা তানফম অমনি। মরুপশিং বঙ্গলাদেশকী নীংতম ইহৌ অসি ভারতকী কাচিন-কোয়া খুদিংমক্না, দল খুদিংমক্না অমসুং খুন্নাইগী শরুক খুদিংমক্না শৌগৎখি।

মতম অদুগী প্রধান মন্ত্রী শ্রীমতি ইন্দিরা গান্ধীনা হোৎনখিবশিং অমসুং মহাক্না লৌখিবা মরু ওইবা থৌদাং অদু মীপুম খুদিংমক্না খঙনখি। হায়রিবা মতম অসিগী মনুংদা ১৯৭১গী দিসেম্বর ৬তা অতল বিহারী বাজপায়ীজীনা হায়- “ঐখোয়না নীংতম ইহৌদা মখোয়গী পুন্সিশিং কত্থোকখিবা মীওইশিংগা লোইননা লান্থেংনবা খক্তা নত্তনা ঐখোয়না পুৱারীদা অনৌবা মায়োক অমা পীনবা হোৎনরি।” ঙসি বঙ্গলাদেশতা মখোয়গী নীংতম্নবা লান্থেংনখিবা মীওইশিং অমসুং ভারতকী লান্মীশিংগী ঈখেং নাকেল অমমমদা চেনথমিন্নরি।

ঈখেং অসিনা শুপনম শাশনগী মখাদা লৈরোইদবা, মখল অমতগী দিপ্লোমেসীগী মখাদা লৈরোইদবা মরীশিং শেমগৎলগনি। ঐখোয়গী হান্নগী রাস্ত্রপতি প্রনাব মুখর্জীজীনা বাঙ্গোবৌন্ধুবু চোকথবা লৈতবা লৈবাক ঙাকপা নুপা অমনি হায়না হায়রমখি। মহাক্না হায় শেখ মুজিবুর রাহমানগী পুন্সি অসি অখাং কনবা, কত্থোকপা অমসুং ৱাশক চেৎপগী খুদম অমনি হায়না ফোঙদোক্লমখি।

মরুপশিং বঙ্গলাদেশকী নীংতম্বা ফংখিবা চহি ৫০ শুরকপা অমসুং ভারতনা নীংতম্বা ফংখিবা চহি ৭৫ শুরকপা অসি পুন্না পাল্লন তৌরিবা অসি নুংঙাইবা অমনি। ঐখোয়গী লৈবাক অনিমক্কী ওইনা ২১শুবা চহিচা অসিগী মথংগী চহি ২৫গী খোঙচৎ অসি য়াম্না মরু ওই। ঐখোয়গী হেরিতেজ অমসুং ঐখোয়গী চাউখৎ-খোঙথাং অসি পুল্লি।

ঐখোয়গী পান্দমশিং অদুসু পুল্লি, ঐখোয়গী শীংনবশিংসু পুল্লি। ঐখোয়না নীংশিংগদবনি লালোন-ইতিক অমসুং ইন্দস্ত্রীদা ঐখোয়গী মান্নবা ওইথোকপা য়াবশিং লৈরিবা অসিগা লোইননা তেরোরিজমদগীসু চপ মান্নবা অকি-অখংশিংসু লৈ। অসিগুম্বা তমথিরবা থবক-থৌওংশিং চত্থরিবা ৱাখল্লোনশিং অমসুং শক্তিশিং অসি হৌজিকসু য়াম্না এক্তিব ওইরি।

ঐখোয়না চেকশিনবা অমসুং মখোয়গা লান্থেংনবা ঙম্নবা শিল-লাংদুনা লৈবসু তঙাই ফদে। ঐখোয়গী লৈবাক অনিমক্তা দেমোক্রেসীগী শক্তি লৈ অমসুং মাংদা চংশিন্নবা ময়েক শেংলবা মঙলান অমা লৈজৈ। ভারত অমসুং বঙ্গলাদেশ পুন্না মাংদা চংশিনমিন্নবা ওইরসনু মরমদি লমদম পুম্নমক অসিদা চাউখৎপা পুরকপা চপ মান্নবা মরু ওই।

অমসুং মরম অসিনা ভারত অমসুং বঙ্গলাদেশ অনিমক্কী সরকারশিংনা সমস্যা অসি খংঙি অমসুং হীরম অসিদা কন্না হোৎনরি। হীরম খুদিংমক্তা অমনা অমবু থাজবা অমসুং মতেং পাংনবা অসিনা পাম্বৈশিং পুথোকপা ঙম্মি হায়বা ঐখোয়না উৎখ্রে। ঐখোয়গী লেন্দ বাউন্দরী এগ্রীমেন্ত অসি মসিগী খুদম অমনি। কোরোনাগী মতম অসিদসু লৈবাক অনিগী মরক্তা অফবা মরী থম্নরি।

ঐখোয়না এস.এ.এ.আর.সি. কোবিদ ফন্দ থম্বদা শৌগৎখি, ঐখোয়গী হ্যুমেন রিদোর্সশিং ত্রেনিং পীবদা শৌগৎখি। ভারত্তা শাজবা বেক্সিনশিং বঙ্গলাদেশকী ঐখোয়গী ইচিল-ইনাওশিংদা কান্নবা ফংহনখিবা অসিদা ঐহাক্না য়াম্না নুংঙাইবা পোকই। ঐহাক্না চহি অসিগী জনুৱারী ২৬তা ভারতকী রিপাব্লিক নুমিৎতা উখিবা শক্তম অদু নীংশিংলি, বঙ্গলাদেশকী আর্মদ ফোর্সেসকী ত্রাই-সর্ভিস কন্তিঞ্জেন্তনা “শোনো এক্তা মুজিবোরের থেকে”গী তান্থাদা পরেদ চৎখি।

ভারত অমসুং বঙ্গলাদেশকী তুংলমচৎনা অসিগুম্বা মীকুপশিং, নুংশি চানবনা থল্লবা অমসুং অমনা অমবু থাজনবা কয়ানা ঙাইদুনা লৈরি। মরুপশিং, ভারত-বঙ্গলাদেশকী মরীশিং চেৎশিনহন্নবা, লৈবাক অনিগী লৈরিবা নহারোলশিংগী মরক্তা হেন্না ফবা মরী থম্বা মথৌ তাই। ভারত-বঙ্গলাদেশকী চহি ৫০ শুবগী থৌরম অসিদা ঐহাক্না বঙ্গলাদেশকী ওন্তোপ্রিনোর ৫০ ভারত্তা লাক্নবা বর্তন তৌবা পামজৈ।

মখোয়না ভারত্তা লাক্তনা ঐখোয়গী স্তার্ত-অপশিং অমসুং ইন্নোভেসন ইকো-সিস্তেমগা লোইননা মরী থমদুনা ঐখোয়গী ভেঞ্চর কেপিতেলিস্তশিংগা উনসনু। ঐখোয়না মখোয়দগী তমশিলহৌসি, অমসুং মখোয়নসু তমশিলহৌনবা খুদোংচাবা অমসু ফংজরসনু। মসিগা লোইননা ঐহাক্না বঙ্গলাদেশকী নহারোলগীদমক শুবর্নো জয়েন্তি স্কোলরশিপশিংসু লাউথোক্লি।

মরুপশিং,

বাঙ্গোবৌন্ধু শেখ মুজিবুর রাহমানজীনা হায়রমখি -
 

বঙ্গলাদেশ ইতিহাশে, শাধিন রাস্ত্রো, হিশেবে তীকে থাকবে বাঙ্গলাকে দাবিএ রাখতে পারে, এমৌন কোনো শোক্তি নেই”বঙ্গলাদেশ স্বাধীন হোকর রহেগা ।

বঙ্গলাদেশপু নমথদুনা থম্বা ঙম্বা শক্তি অমত্তা লৈতে। বাঙ্গোবৌন্ধুনা ফোঙদোকখিবা অসি বঙ্গলাদেশপু নমথদুনা থম্লিবা মীওইশিংদা হায়খিবা চেকশিন ৱা অমা ওইবতা নত্তনা মসি মহাক্না বঙ্গলাদেশতা থম্লিবা থাজবা অদুগী মমি অমসু ওইখি। শেখ হসীনাজীগী লুচিং মখাদা মালেমদা বঙ্গলাদেশনা মাগী থৌনা উৎপা অসিদা ঐহাক্না হরাওবা পোকই। বঙ্গলাদেশ শেম্বদা য়ানিংদবা পোকখিবা, বঙ্গলাদেশ শেম্বদা চীংনবা পোকখিবা মীওইশিংদা বঙ্গলাদেশনা মখোয় লাল্লি হায়বা উৎখ্রে।

মরুপশিং,

ঐখোয়না কাজী নাজরুল ইস্লাম অমসুং গুরুদেব রাবিন্দ্রানাথ থাকুরগী মান্নবা হেরিতেজতগী ইহিল লৌরি।

গুরুদেবনা হায়রমখি-

কাল নাই,
আমাদের হাতে;
কারাকারী কোরে তাই,
শাবে মিলে;
দেরী কারো নাহী,
হাহু, কোভু

হায়বদি ঐখোয়না মতম মাংহনদনা অহোংবা পুরক্নবা মাংদা চংশিনবা তাই, হৌজিক পন্থদুনা লৈবা য়াদ্রে। মসি ভারত অমসুং বঙ্গলাদেশ অনিমক্কী চপ মান্ননা চৎনগদবনি।

ঐখোয়গী মীওই করোর কয়াগী, মখোয়গী তুংলমচৎকীদমক, ঐখোয়গনা লায়রবগী মায়োক্তা শোক্নরিবা লান অসিগীদমক, অকি-অখং পীবগী মায়োক্তা শোক্নরিবা লান অসিগীদমক, ঐখোয়গী পান্দম অসি অমত্তনি অমসুং ঐখোয়না হোৎনরিবশিং অসিসু পুনশিনবা তঙাই ফদে। ভারত-বঙ্গলাদেশা পুন্না খোঙজেল য়াংনা চাউখৎমিন্নগনি হায়না ঐহাক্না থাজবা থম্লি।

অমুক হন্না য়াইফরবা থৌরম অসিদা ঐহাক্না বঙ্গলাদেশকী প্রজা পুম্নমক্তা য়াইফ-পাউজেল পীজরি অমসুং থম্মোই নুংদগী থাগৎপা ফোঙদোকচরি।

ভারোৎ বঙ্গলাদেশ মোইত্রী চিরোজীবি হোখ।

(ভারত-বঙ্গলাদেশকী মরুপ ওইবগী মরী অসি তুংকোইবা ওইরসনু)

য়াইফ-পাউজেল অসিগা লোইননা মতাংদা অসিদা লোইশিনজরগে।

জয় বঙ্গলা!
জয় হিন্দ!

*****