ভারতকী সাইন্তিস্তশিংনা লাপ্না লৈবা ক্বাসারশিং অমসুং য়াম্না নৌরিবা য়ুনিভর্সশিংগী গেলেক্সীশিং, গেলেক্সীশিংগী অকোয়বদা লৈবা হায়নীংঙাই লৈতনা চাউবা ব্লেক হোলশিং অমসুং কোস্মিক পোকখায়বদগী থোক্লকপা অপাবা মঙালশিংগী লৈফম খঙবা ঙম্বা শেল য়াম্না চঙদবা ওপ্তিকেল স্পেক্তোগ্রাফ অমা শেম-শাখ্রে।

অসিগুম্বা স্পেক্ত্রোস্কোপশিং অসি হৌজিক ফাওবগী ওইনদি মীরমদগী শেল য়াম্না চঙদুনা পুশিল্লক্লম্বনি। ভারত সরকারগী সাইন্স অমসুং তেক্নোলোজী বিভাগকী মনিং তম্বা ইন্সতিত্যুৎ অমা ওইরিবা আর্য়াভত্তা রিসর্চ ইন্সতিত্যুৎ ওফ ওবজর্বেস্নেল সাইন্স (এ.আর.আই.ই.এস.)না মওং-মতৌ শেমদুনা লমদম অসিদা শাজবা এরিস-দেবাস্থাল ফেন্ত ওবজেক্ত স্পেক্তোগ্রাফ অমসুং কেমেরা (এ.দি.এফ.এস.ও.সি.) হায়না মিংথোনবা ‘ভারত্তা শাবা’ ওপ্তিকেল স্পেক্তোগ্রাফ অসিনা মীরমদগী পুশিল্লকপা অসিগুম্বা মখলগী খুৎলায়শিংগা চাংদম্নবদা ২.৫কী শরুক্কী মমলদা হন্থৈ অমসুং চাউরাক্না সেকেন্দ অমদা ফোতোন ১গী নেম্লবা ফোতোনগী চাংগা লোয়নবা মঙাল থোক্লকফম্বু খঙবা ঙম্মি।

লৈবাক অসিদা লৈরিবা এস্ত্রোনোমীগী স্পেক্তোগ্রাফশিংগী মনুংদা খ্বাইদগী চাউবা ওইরিবা স্পেক্তোগ্রাফ অসি উত্তরাখন্দগী নাইনিতালগী মনাক্তা লৈবা অমসুং এসিয়া অমসুং লৈবাক অসিগী খ্বাইদগী চাউবা ৩.৬ এম. দেবাস্থাল ওপ্তিকেল তেলেস্কোপ (দি.ও.তি.)তা মাই পাক্না শিজিন্নবা হৌখ্রে।

সেলেস্তিএল হৌরকফমগী থোক্লকপা য়াম্না শোনবা মঙালশিংবু য়েংশিন্নবা ৩.৬-এম. দি.ও.তি.গী য়াংলেন শরু ওইরিবা খুৎলায় অসিনা সেলেস্তিএল স্কাইগী ময়েক শেংবা মমি পুথোক্নবগীদমক্তা নেনোমীতর ৫গী অনানবদগী হেন্না নালহল্লবা অখন্নবা গ্লাসশিংদগী শাবা লেন্স কয়াবু য়াম্না লুবা মওংদা শিন-লাঙবগী থৌওং শিজিন্নৈ। তেলেস্কোপনা খোমজিনবা সেলেস্তিএল সোর্সশিংদগী লাকপা ফোতোনশিংবু স্পেক্তোগ্রাফ অসিনা তোঙান-তোঙানবা মচুশিংদা খন্দোকই অমসুং -১২০^০ সি.গী চাংদা অয়ৌবী থাক্তা ইংথহল্লবা মশানা শাজবা চার্জ-কপল্দ দিভাইস (সি.সি.দি.) কেমেরা শিজিন্নদুনা ইলেক্ত্রোনিক সিগ্নেলদা অরোইবা ওইনা ওন্থোকই। মসিগী খুৎলায় অসিগী অপুনবা শেনফম অসি চাউরাক্না লুপা করোর ৪নি।

এ.আর.আই.ই.এস.তা সাইন্তিস্ত ওইবা দাঃ অমিতেশ ওমারনা তেক্নিকেল অমসুং সাইন্তিফিক্কী কাঙবুগা লোয়ননা প্রোজেক্ত অসিবু লুচিংখি অমসুং মখোয়না পুন্দুনা রিসর্চ তৌদুনা স্পেক্তোগ্রাফ অমসুং কেমেরা অসিগী তোঙান-তোঙানবা ওপ্তিকেল, মেকানিকেল অমসুং ইলেক্ত্রিকেল সবসীস্তেমশিং পুথোকখি। মসিগী স্পেক্তোগ্রাফ অসি হৌজিক-হৌজিক ভারত অমসুং মীরমগী এস্ত্রোনোমর্শিংনা থাপ্না লৈবা য়াম্না নৌরিবা য়ুনিভর্সশিংগী ক্বাসার অমসুং গেলেক্সীশিং, গেলেক্সীশিংগী অকোয়বদা লৈবা হায়নীংঙাই লৈতনা চাউবা ব্লেক হোলশিংগী নক্নবদা লৈবা মফমশিং, সুপর্নোভা অমসুং ইনর্জী য়াম্না পুথোকপা গম্মা-রে পোকখায়বগুম্বা কোস্মিক পোকখায়বা, অনৌবা অমসুং অচৌবা থৱানমিচাকশিং অমসুং মম্লপ্না উবা অপিকপা গেলেক্সীশিংগী মরমদা থিজিনবা অমসুং নৈনবদা শিজিন্নরি।

“এ.দি.এফ.ও.এস.সি.গুম্বা অরূবা খুৎলায় কয়া অমা ভারত্তা মরোমদোম শাজনবা হোৎনরিবা অসি এস্ত্রোনোমী অমসুং এস্ত্রোফিজিক্সকী লমদা ‘আত্মানির্ভর’ ওইনবগী মরু ওইবা খোঙথাং অমনি”, হায়না এ.আর.আই.ই.এস.কী দাইরেক্তর, প্রোফঃ দিপাঙ্কর বেনর্জীনা ফোংদোকখি।

ইন্দিয়ন স্পেস রিসর্চ ওর্গনাইজেসন (আই.এস.আর.ও.) অমসুং অতোপ্পা মাইক্রো-স্মোল-মেদিয়ম-ইন্তর্প্রাইস য়াওনা লৈবাক্কী তোঙান-তোঙানবা ইন্সতিত্যুৎ, লুপশিংগী অখঙ-অহৈ কয়ানা খুৎলায় অসিগী পোৎলম কয়া য়েংশিনবা অমসুং শাবগী থৌওংদা শরুক য়াদুনা নীংথিনা তেংবাংমিন্নদুনা থবক শুমিন্নবগী খুদম অমসু উৎপা ঙমখি। মসিগী হৈ-শিংবগী মতিক অসিগা লোয়ননা, এরিসনা হৌজিক লাক্কদৌরিবা মতমশিংদা ৩.৬ এম. দেবাস্থাল তেলেস্কোপ্তা স্পেক্ত্রো-পোলারিমীতর অমসুং অৱাংবা স্পেক্ত্রেল রিজোল্যুসন স্পেক্তোগ্রাফগুম্বা হেন্না লুবা খুৎলায় কয়া শিজিন্ননবা থৌরাং য়াৎলি।

মসিগী কোলাজ অসিনা ৩.৬-এম. দেবাস্থাল ওপ্তিকেল তেলেস্কোপ (দি.ও.তি.), ‘ভারত্তা শাবা’ এরিস-দেবাস্থাল ফেন্ত ওবজেক্ত স্পেক্তোগ্রাফ অমসুং কেমেরা (এ.দি.এফ.ও.এস.সি.) অমসুং তেলেস্কোপ্তগী ফংবা সেলেস্তিএল সোর্সকী মমি উৎলি। ক্রেব নেবুলাগী মমি অসিনা ইং ১০৫৪দা মিল্কী-ৱে গেলেক্সীদা থোকখিবা থৱানমিচাক পোকখায়বগী মতুংদা ওইবা ফিভম উৎলি। মসিদা উৎলিবা এ.দি.এফ.ও.এস.সি.দগী ফংবা মচুদা য়ুমফম ওইদুনা কোদ তৌরবা ওপ্তিকেল স্পেক্ত্রম অসিনা মপুন্সি লোইরবা অচৌবা থৱানমিচাক অমা অমসুং মসিগী মনুংদা হান্না লৈরম্বা অমসুং হৌজিক্না মপান্দা চাইথোরক্লবা হাইদ্রোজেন, আইরন, সোদিয়ম, কেলসিয়ম্নচিংবা তোঙান-তোঙানবা ইলিমেন্তশিং অমসুং মসিগা লোয়নবা মওং-মতৌশিংনি। মসিগী পোৎলমশিং অসিনা তুংদা অনৌবা থৱানমিচাক অমসুং গ্রহ শেম্বগী পোৎলম অমুক ওইরবনি অমসুং মতৌ অসুম্না হেভনলী বোদীশিংগী পোকপা অমসুং শিবগী লেপ্তনা চত্থবা কাঙলোন শেম্লিবনি।

[৩.৬-এম. দি.ও.তি. অমসুং এ.দি.এফ.ও.এস.সি.গী অহেনবা অকুপ্পা ৱারোলশিং অসি য়ু.আর.এল. https://www.aries.res.in/facilities/astronomical-telescopes/36m-telescope

https://www.currentscience.ac.in/Volumes/116/09/1472.pdf  অসিদগী ফংবা য়াগনি। মখা তাবা অকুপ্পা ৱারোলগী ওইনদি, দাঃ অমিতেশ ওমার, সাইন্তিস্ত-এফ. (ইমেলঃaomar[at]aries[dot]res[dot]in , ৯০১২৫৭০০১১)দা পাউ ফাওবা য়াগনি]

******