মহারাস্ত্র, পঞ্জাব, গুজরাত, মধ্য প্রদেশ, ছত্তিসগর, ৱেস্ত বেঙ্গল, তেলঙ্গনা অমসুং জম্মু অমসুং কাশ্মির রাজ্যশিং/য়ু.তি.শিং অসিগী চীফ সেক্রেতরীশিংগা লোইননা পাঙথোকপা অৱাংবা থাক্কী য়েংশিন মীফম অমদা কেবিনিৎ সেক্রেতরী শ্রী রাজিব গৌবানা ময়াই তাংবল লৌখ্রে। রাজ্যশিং/য়ু.তি.শিং অসিদা এক্তিব কেসলোদ ৱাংনা নত্ত্রগা হৌখিবা চয়োল অমা অসিদা অনৌবা কেসশিংগী মশিং হেনগৎলকপী রিপোর্ত তৌরকখি। ভিদিও কনফরেন্সকী খুত্থাংদা পাঙথোকখিবা কোবিদ মেনেজমেন্ত অমসুং রেস্পোন্সকী লালোং য়েংশিন্নবা অমসুং খন্ননবা মীফম অসি কেন্দ্রগী হেল্থ সেক্রেতরী, দি.জি. আই.সি.এম.আর., নিতি আয়োগ এম্পাৱর্দ গ্রুপ মেম্বরশিং অমসুং গৃহ মন্ত্রালয়গী মীহুৎশিংগা লোইননা রাজ্যশিং/য়ু.তি.শিংগী চীফ সেক্রেতরীশিং অমসুং মকোক থোংবা হেল্থ প্রোফেস্নেলশিংনা শরুক য়াখি।

রাজ্য ৬তা –মহারাস্ত্র, কেরেলা, পঞ্জাব, কর্নাতকা, তামিল নাদু অমসুং গুজাত – হৌখিবা পুং ২৪ অসিদা অনৌবা কেসশিং ৱাংখৎলকপা উবা ফংখ্রে। অনৌবা কেস ৮,৩৩৩গা লোইননা মহারাস্ত্রনা খ্বাইদগী ৱাংনা রিপোর্ত তৌরক্লি। মসিগী মতুংদা হৌখিবা পুং ২৪দা কেরেলাদা কেস ৩,৬৭১ অমরোমদা পঞ্জাবতা অনৌবা কেস ৬২২ রিপোর্ত তৌরকখ্রে। হৌখিবা চয়োল অনি অসিদা মহারাস্ত্রনা ফেব্রুৱারী ১৪দা ৩৪,৪৪৯ ওইরম্বদগী হৌজিক-হৌজিক ৬৮,৮১০ ওইদুনা এক্তিব কেসশিং খ্বাইদগী ৱাংলে হায়বা উৎবা ফংখি।

অনৌবা কেসশিংৱাংনা রিপোর্ত তোরক্লিবা জিলাশিং, পোজিতিবিগী মওংদা হেনগৎলক্লিবা অমসুং মীৎয়েং চংবা মথৌ তারিবা তেস্ত তৌবগী মওমশিং  অসিদা মীৎয়েং চংবগা লোইননা রাজ্যশিং অসিদা হৌজিক ওইরক্লিবা কোবিদ-১৯গী ফীভম অসিগী অকুপ্পা মরোলশিং য়াওবা প্রজেন্তেসন অমা পীখ্রে। মসিগী মতুংদা রাজ্য/য়ু.তি. পুম্নমক্কা লোইননা পাক শন্না য়েংশিনখ্রে। চীফ সেক্রেতরীশিংনা রাজ্যশিংদা হৌজিক ওইরিবা ফীভম অমসুং কোবিদ কেসশিং হন্দক ৱাংখৎলক্লিবা অসি লাকশিন্নবা মখোয়না শেম-শারিবা অসিগী মতাংদা পাউদমখি। মখোয়না চাউনা ফাইন থিহন্দুনা অমদি চল্লানশিং কক্তুনা কোবিদকা চুনবা চৎন-লোনচৎ ঙাক্না চৎহনবা, দিস্ত্রিক্ত কল্লেক্তরশিংগা লোইননা সর্ভিলেন্স অমসুং কন্তেনমেন্তগী থবক-থৌরমশিং কুপ্না য়েংশিল্লিবা অমসুং এম.ও.ঐচ.এফ.দবল্যু. অমসুং এম.ঐচ.এ.না পীবা গাইদলাইনশিংগী মখাদা লৌখৎলিবা অতোপ্পা খোঙথাংশিংগী মতাংদা পাউদমখ্রে।

কেবিনেৎ সেক্রেতরীনা লাইনা শন্দোকপা লাকশিন্নবা মখা তানা অকনবা খোঙথাংশিং লৌখৎনবা অমসুং হৌখিবা চহিদগী পুন্না কন্না হোৎনমিন্নদুনা ফংলকখিবা কান্নবশিং অসি অরেম্বা তাহন্নদনবা রাজ্যশিংদা অমুক হন্না নীংশিংখ্রে। রাজ্যশিংদা চেকশিনবা লেপ্তনবা, কোবিদকা চুনবা চৎন-লোনচৎ ঙাক্না চৎনবা অমসুং মসি থুগাইবশিং হকচিন্না লৌনবা পাউতাক পীখ্রে। রাজ্যশিংনা য়াম্না খোঙজেল য়াংনা শন্দোক্লিবা অসি য়েংলগা মপুং ফানা সর্ভিলেন্স চত্থনবা অমসুং ত্রেকিংগী লালোংশিং পাইখৎনবা অকনবা ৱাফম থমখ্রে। মপুং ফানা তেস্ত তৌবা, পাক শন্না ত্রেক ঔবা, পোজিতিব কেসশিং খুদক্তা আইসোলেসন তৌবা অমসুং নকশিন্নরুবা মীওইশিং থুনা ক্বারন্তাইন তৌনবা খঙহনখ্রে।

রাজ্যশিংদা মখাদা পীরিবা খোঙথাংশিং অসি লৌখৎনবা য়াথং পীখ্রে:

১. তেস্ত তৌবা হন্থবগী রিপোর্ত তৌরক্লিবা জিলাশিংদা অপুনবগী তেস্ত তৌবগী চাং হেনগৎহনবা।

২. এন্তিজেন তেস্তিং চাং ৱাংনা তৌরিবা রাজ্যশিং অমসুং জিলাশিংদা আর.তি.-পি.সি.আর. তেস্তশিং তৌবা হেনগৎহনবা।

৩. তেস্ত তৌবা হন্থবা/পোজিতিব ওইবগী চাং ৱাংবা অমসুং কেসশিং হেনগৎলক্লিবা খনগৎলবা জিলাশিংদা অমুক হন্না সর্ভিলেন্স অমদি অকনবা মওংদা কন্তেনমেন্ত তৌবদা মীৎয়েং চংবা।

৪. ঙন্না হোৎস্পোৎ খঙদোক্নবা অমসুং লাকশিন্নবা ম্যুতেন্ত স্ত্রেন অমসুং কেসশিং ক্লস্তর তৌরকপা য়েংশিনবা ।

৫. শীবগী চাং ৱাংনা রিপোর্ত তৌরক্লিবা জিলাশিংদা ক্লিনিকেল মেনেজমেন্তদা মীৎয়েং চংবা।

৬. কেসশিং ৱাংনা রিপোর্ত তৌরক্লিবা জিলাশিংদা বেক্সিনেসন হান্না পাঙথোকপা।

৭. মরু ওইনা বেক্সিনেসন দ্রাইভ অসিনা মথংগী ফেস য়ৌরকপা অসিদা কোবিদকা চুনবা চৎন-লোনচৎ থৌগৎতুনা প্রজাশিংগী নীংথিজনা পাউ ফাওন্দুনা লাইথোকপা তৌরোইদবনি; অমসুং সোসিএল দিস্তেন্সিংগী কাংলোনশিং অকনবা মওংদা ঙাক্ন চৎহনগনিবনি।

****