দোনরগী রাজ্য মন্ত্রী(মনিংতম্বা), পি.এম.ও, পর্সোনেল, পব্লিক গ্রিভান্সেস, পেন্সন্স, এতোমিক ইনর্জি অমসুং স্পেসকী রাজ্য মন্ত্রী দোক্তর জিতেন্দ্র সিংহনা ঙসি নোর্থ ইস্ত কেন এন্দ বেম্বু দিবলপমেন্ত কাউন্সিলগী কমপ্লেক্সতা খ্বাইদগী নৌবা তেক্নোলোজিগী ইন্তেগ্রেতেদ বেম্বু ত্রিৎমেন্ত প্লান্ত শঙ্গাখ্রে। তুংদা মহাক্না প্লান্ত অদুগী তেক্নিসিয়ানশিং অমসুং আর্তিস্তশিংগা উনখি অমসুং অৱাং-নোংপোক্তা ৱাগী মরমদা থিজিনবা লাকপা জে অমসুং কেগী ওফিসার কাংবু অমগশু উনখি।

মিনিস্তরগা লোয়ন্না এন.ই.সিগী এদভাইজর, এয়র মার্সেল(পোথারবা)অঞ্জন গোগোই অমসুং সেন্তর অসিগী সি.এম.দি সাইলেন্দ্রা চৌধুরি থৌরম অদুদা শরুক য়াখি। থৌরম অদুদা তোঙান-তোঙানবা ৱাগী পোৎথোকশিং উৎখি।

তুংদা পাউগী মীফম অমদা দোক্তর জিতেন্দ্রনা হায়খি অৱাং-নোংপোক খক নত্তনা ভারত পুম্নমক্কী ওইনা কোবিদ মতুংগী শেন-থুমগী ফিবমদা ৱানা অচৌবা থৌদাং অমা লৌগনি। কোবিদ মনুংদা শেন-থুমগী ফিবম ফগৎনবা ললোন-ইতিক্কী অনৌবা খুদোংচাবশিং থিগদবনি অমসুং চহি কয়া শীজিন্নদনা লাক্লবা য়াম্লবা ৱা অৱাং-নোংপোক্কী ওইনা লৈরে অমসুং মসিনা শেন-থুম তান্নবা খুৎলায় ওইরে।

মিনিস্তরনা মখা তানা হায়খি ৱাগী তোঙান-তোঙানবা শীজিন্নফমশিং অমসুং মসিনা শাবা মমল হোঙবা পোৎথোকশিং মীয়ামদা খঙহন্নবা নোর্থ ইস্তর্ন কাউন্সিল অমসুং দোনর মিনিস্ত্রিনা লৈবাক শীনবা থুংনা খোঙজং অমা পায়খৎলে অমসুং ৱাগী মতেংদগী ললোন-ইতিক্কী খুদোংচাবশিং খঙদোক্নবা স্তার্দ-অপশিং অমসুং অনৌবা ওন্ত্রেপ্রেনিউয়রশিং পুক্নিং থৌগৎলি। নোর্থ ইস্ত কেন এন্দ বেম্বু দিবলপমেন্ত কাউন্সিলগী তেক্নোলোজিগী মতেংগা লোয়ন্না জে অমসুং কেদা বেম্বু ক্লস্তর অহুম লিংখৎলগনি। হায়রিবা ক্লস্তর অহুম অসিনা অগরবতি, থুম্মোক অমসুং মৈতাল পুথোক্নবা থবক পায়খৎকনি।

দোক্তর জিতেন্দ্রনা হায়খি অৱাং-নোংপোক লমদম চাউখৎনবা প্রধান মন্ত্রী নরেন্দ্র মোদীনা অকনবা মিৎয়েং চঙলি অমসুং মহাক্কী লুচিং মখাদা চহি ১০০শুরবা ইন্দিয়ান ফোরেস্ত এক্তকী মখাদা ৱা অসি উমংগী পোৎথোক অমা ওইহন্দ্রে। মসিনা নহা ওইরিবা ওন্ত্রেপ্রেনিউয়রশিং ৱাগী ললোন-ইতিক য়াম্না লাইনা পাংথোকপা ঙমহল্লগনি।

মিনিস্তরনা হায়খি কোবিদ-১৯ লাইচৎ মনুংদা অতোপ্পা লৈবাকশিংদগী পুশিল্লকপা অগরবতিদা ইমপোর্ত দিউতি চাদা ৩৫ রোম হেনগৎখি। মসিনা ৱানা শাবা অগরবতি পুশিল্লকপা নিংহন্নবা পোকহনগনি অমসুং প্রধান মন্ত্রী মোদীগী “অত্মানির্ভর ভারত”কী পান্দমগা লোয়ন্না লৈবাক অসিদা পোৎথোক পুথোকপা হেনগৎহনবা ঙমগনি।

*****

 

(Release ID: 1701115) Visitor Counter : 150