ঙসি ইলেকত্রোনিক্স অমসুং ইনফোর্মেসন তেক্নোলোজি, কম্মুনিকেসন অমসুং লো অমসুং জজতিসকী য়ুনিয়ন মিনিস্তর শ্রী রবি সঙ্কর প্রসাদনা অমাজোনগী গ্লোবেল সেনিয়র ভাইস প্রসিদেন্ত অমসুং ভারতকী কন্ত্রি হেদ অমিত অগরৱালগা ভর্চুএল ওইনা মীফম অমা পাংথোকখ্রে। মীফম অদুদা দিজিতেল সেক্তরগা মরী লৈনবা ৱাফম কয়া খন্নখি। মীফম অসিগী মতুংদা ভারত্তা ইলেকত্রোনিক্সকী পোৎথোকশিং শাবা হৌরগনি হায়না অমাজোন ইন্দিয়ানা লাউথোকখি। অহানবা ওইনা, অমাজোন ইন্দিয়ানা ভারত্তা অমাজোন ফাইয়র স্তিক শাবা হৌরগনি।

মীফম অদুদা মিনিস্তরনা হায়খি ভারত অসি শেন থাদনিংবা মফম অমনি অমসুং ইলেকত্রোনিক্স অমসুং আই.তি ইন্দস্ত্রিগী পোৎথোকশিং মালেমগী ওইনা ফংহন্নবা মরুওইবা মফম অমা ওইনবা থৌরাং তৌরি। প্রদক্সন লিঙ্ক ইন্সেন্তিপ(পি.এল.আই)স্কিম অমা হৌদোক্নবা ঐখোয়গী সরকারনা লৌখিবা ৱারেপ মালেমগী ওইনা য়াম্না পাম্নরে। চেন্নাইদা পোৎ-চৈ শাফম অমা লিংখৎনবা অমাজোনগী ৱারেপ ঐখোয়না তরাম্না ওক্লি অমসুং মসিনা লৈবাক অসিগী ওইনা পোৎলম কয়া পুথোকপা হেনগৎহনগনি অমসুং থবকশু ফংহনগনি। মসিনা অত্মানির্ভর ভারত অমা শেমগৎনবা ঐখোয়গী পান্দমদা মখা তানা দিজিতেল ওইনা মতেং পাংলগনি। মসি ভারত্তা ভারতকীদমক অমসুং মপান্দা থাদোক্নবা অমাজোন্না ইলেকত্রোনিক্সকী পোৎলমশিং শানবগী অহানবা খোঙথাংনি।

ফোক্সকোনকী সবসিদিয়ারি অমা ওইরিবা কন্ত্রেক মেনুফেকচরর ক্লাউদ নেতৱার্ক তেক্নোলোজিগা লোয়ন্না চেন্নাইদা অমাজোন্না মসিগী পোৎলমশিং শাবা চহি অসিগী হৌরগনি। ভারতকী কস্তমরশিংগী দরকার ওইবশিং পীবা ঙম্নবা চহি খুদিংগী ফাইয়র তি.ভি স্তিক লিশিং কয়া শাবা হৌরগনি। লৈবাক অসিগী দরকার ওইবগী মতুংইন্না পোৎথোক পুথোকপা হেনগৎহন্নবা অমাজোন্না মখা তানা হোৎনগনি।

ভারত্তা ইলেকত্রোনিক্সকী পোৎলমশিং শাবা পুক্নিং থৌগৎনবা ভারতনা মরুওইবা থবক কয়া পায়খৎলে। পাক-শন্না ইলেকত্রোনিক্সকী পোৎলমশিং পুথোক্নবগীদমক প্রদক্সন লিঙ্ক মেনুফেকচরিং(পি এল আই) অসি অচৌবা মাইপাকপা অমা ওইবদগী মালেমগী কম্পেনি কয়া ভারত্তগী ইলেকত্রোনিক্সকী পোৎলমশিং শাবা হৌরে। লম অসিদা অমাজোন চঙলকপা অসিনা ভারত্তা ইলেকত্রোনিক্সকী পোৎলমশিং শাবগী মাইপাকপগী ৱারি অমা হৌরে।

কুদা আই.তি মিনিস্তরনা ইখি-“ প্রধান মন্ত্রী নরেন্দ্র মোদীগী লমজিং মখাদা, হন্দক ভারত্তা ইলেকত্রোনিক্সকী পোৎলমশিং শানবা মালেমগী অচৌবা কম্পেনিশিংদগী শেন য়াম্না থাদরক্লে। ভারতকী মাইপাকপগী ৱারি অসিদা নৌনা চঙলকপা অমাজোন ইন্দিয়াগী নুংঙাইবদা শরুক য়াজরি”।

https://www.kooapp.com/koo/RaviShankarPrasad-J1VB/CDKEH

ই-কমর্স প্লেতফোর্মগী খুৎথাংদা ভারতকী খুৎহৈবশিংনা শাবা পোৎথোকশিং অমসুং অয়ুর্বেদাগী পোৎথোকশিং মালেমগী কৈথেলশিংদা য়ৌহন্নবা মিনিস্তরনা অমাজোন ইন্দিয়াদা পাউতাক পীখি। মহাক্না হায়খি অমাজোন অসি মালেমগী কম্পেনি অমনি অদুবু ভারতকী ললোন-ইতিক্কী মীয়াম অমসুং কলচরগা অচেৎপা মরী লৈনবা অশেংবা ভারতকী কম্পেনি অমা ওইগদবনি।  

*****