প্রধানমন্ত্রীগী লোইশঙ

পি.এম.না তামিল নাদুগী মরু ওইবা প্রোজেক্তশিং শঙ্গাখ্রে অমসুং উরেপ উয়ুং তমখ্রে

আর্মীদা অর্জুন মেন বেত্তল তেঙ্ক (এম.কে.-১এ) খুৎশিন্নখ্রে

পুলৱামা এতেক্তা থৱায় থাখ্রবশিংদা ইকাই খুম্নবা উৎখ্রে

দিফেন্স সেক্তরদা ভারতপু আত্মানির্ভর ওইহন্নবা মীৎয়েং চংলি

প্রোজেক্তশিং অসি ইন্নোবেসন অমসুং লমদম অসি চাউখৎপগী খুদমশিংনি। প্রোজেক্তশিং অসিনা তামিল নাদু হেন্না চাউখৎহল্লগনি: পি.এম

দেবেন্দ্রকুলা ভেলালর কাংলুপ হৌজিক্তি মখোয়গী পুৱারীদা শাগোন্নরবা মমিংনা খঙনরগনি, মতম শাংনা ধাবি তৌদুনা লাকখিবা অদু থুংহনখ্রে

সরকার অসিনা স্রী লঙ্কাদা লৈরিবা তামিল ইচিল-ইনাওশিংগী য়াইফনবা অমসুং অনীংবশিং থুংহন্নবা হোৎনদুনা লাকখি: পি.এম.

তামিল নাদুগী কলচর য়োকখৎপা অমসুং ঙাকশেনবা থবক পাইখৎপা অসি ঐখোয়গী লাইবক ফবনি। তামিল নাদুগী কলচর অসি মালেমদা মমিং চৎলি: পি.এম.

Posted On: 14 FEB 2021 3:09PM by PIB Imphal

প্রধান মন্ত্রী, শ্রী নরেন্দ্র মোদীনা ঙসি চেন্নাইদা মরু ওইবা প্রোজেক্ত কয়া শঙ্গাখ্রে অমসুং উরেপ উয়ুং তমখ্রে অমদি আর্মীদা অর্জুন মেন বেত্তল তেঙ্ক (এম.কে.-১এ) খুৎশিন্নখ্রে।

থৌরম অসিদা ৱা ঙাংলদুনা প্রধান মন্ত্রীনা হায় “প্রোজেক্তশিং অসি ইন্নোবেসন অমসুং লমদম অসিগী ওইবা চাউখৎলকপগী খুদমশিংনি। প্রোজেক্তশিং অসিনা তামিল নাদুবু হেন্না চাউখৎহল্লগনি।” মহাক্না হায় তঞ্জাভুর অমসুং পুদুক্কোত্তাই অসি অখন্ননা কান্নবা ফংলগনি মরমদি ঙসি কিলোমিতর ৬৩৬ শাংবা গ্রান্দ এনিকৎ কেনেল সিস্তেম মতমগা চুন্নবা মওংদা ওন্নবা উরেপ উয়ুং তমখ্রে। মসিনা চাউনা কান্নবা ফংহল্লগনি। লম এক্কর লাখ ২.২৭দা ঈথৈ-লৌখোংগী খুদোংচাবশিং ফংহল্লগনি। শ্রী মোদীনা তামিল নাদুগী লৌমীশিংবু রিকোর্দ ওইনা চেং-হৱায় পুথোকখিবা অমসুং ৱাতর রিসোর্সশিং নীংথিজনা শিজিন্নবগীদমক থাগৎপা ফোঙদোকখ্রে। মহাক্না হায় “গ্রান্দ এনিকৎ অসি ঐখোয়গী পুৱারীগী হিংদুনা লৈরিবা খুদম অমনি। মসি ঐখোয়গী লৈবাক অসিগী ‘আত্মানির্ভর ভারত’কী পান্দমশিংদা ইনোৎ হাপ্পি।” তামিলগী কবি অব্বায়রবু পল্লদুনা প্রধান মন্ত্রীনা ঈশিং য়োকখৎপা তঙাই ফদে মসি লৈবাক্কী ওইবা সমস্যা খক্তা নত্তনা মালেমগীসু সমস্যা অমা ওইরি। মহাক্না পর দ্রোপ মোর ক্রোপকী লাইৱা অদুবুসু নীংশিংবা মথৌ তাই হায়না ফোঙদোকখ্রে।

চেন্নাই মেত্রো রেল ফেস ৱানগী কিলোমিতর মপান শাংবা অসি ঙসি শঙ্গাবদা ৱা ঙাংবদা, প্রধান মন্ত্রীনা হায় লাইচৎ অসি লৈজরবসু লোইশিন্নবা লেপখিবা মতমদা প্রোজেক্ত অসি লোইশিনবা ঙমখি। প্রোজেক্ত অসি আত্মানির্ভর ভারত থৌগৎপগী মখাদা পাইখৎপা অমনি মরমদি রোলিং স্তোক অসি লমদম অসিদগী লৈখি অমসুং সিবিল কনস্ত্রক্সনগী থবক থৌরমশিং ভারতকী কন্ত্রেক্তরশিংনা তৌখি। শ্রী মোদীনা হায় চহি অসিগী বজেৎতা প্রজেক্ত অসিগী অনিশুবা ফেসকী কিলোমিতর ১১৯ অসিগীদমক লুপা করোর ৬৩,০০০ হেন্না তোখাইনা থমখ্রে। মসি সহর অমগীদমক অমুক্তদা সেঙ্কসন তৌখিবা খ্বাইদগী চাউবা প্রোজেক্ত অমনি। অর্বান ত্রান্সপোর্ত্তা মীৎয়েং চংবা অসিনা প্রজাশিংগী ‘ইজ ওফ লিবিং’ হেনগৎহনগনি হায়না শ্রী মোদীনা ফোঙদোকখ্রে।

প্রধান মন্ত্রীনা হায় কন্নেক্তিবিতী হেনগৎহনবনা খুদোংচাবা হেনগৎহনগনি। মসিনা ললোন-ইতিক্তা মতেং পাংগনি। চেন্নাই বীচ, গোল্দন ক্বাদ্রিলেতরেলগী ইন্নোর অত্তীপত্তু স্ত্রেচ অসি ত্রাফিক দেন্সিতী য়াম্না ৱাংবা লম্বেল অমনি। মহাক্না হায় চেন্নাই পোর্ত অমসুং কামরাজার পোর্তকী মরক্তা লৈরিবা ফ্রৈৎ মুফমেন্ত অসি হেন্না য়াংখৎহনবা মথৌ তাই অমসুং চেন্নাই বীচ অমসুং অত্তিপত্তুগী মরক্তা লৈরিবা মরীশুবা লাইন অসিনা হিরম অসিদা মতেং পাংলগনি হায়না থাজবা ফোঙদোকখ্রে। মহাক্না হায় ভেল্লপুরম তঞ্জাভুর তিরুভরুর প্রোজেক্ত ইলেক্ত্রিফিকেসন অসিনা দেল্তা জিলাশিংদা অচৌবা কান্নবা অমা ওইরগনি।

প্রধান মন্ত্রীনা পুলৱামা এতেক্কী চহি অনি ফাবগী কুমওন অসিদা ঙসি পুলৱামা এতেক্তা থৱায় থাখ্রবশিংদা ইকাই খুম্নবা উৎখ্রে। মহাক্না হায় “এতেক অসিদা থৱায় থাখ্রবা পুম্নমক্তা ঐখোয়না ইকাই খুম্নবা উৎলি। ঐখোয়গী সেক্যুরিতী ফোর্সশিংগীদমক চাউথোকচৈ। মখোয়গী থৌনা-লিংজেলঅসিনা তুংগী চারোনশিংদা ইনোৎ হাপকনি।”

প্রধান মন্ত্রী হায় ভারতনা দিফেন্স সেক্তরদা মরোমদোম লেপচনবা অচৌবা খোঙথাং কয়া লৌখৎখি। মহাক্না হায় মসি মালেমগী খ্বাইদগী অরিবা লোল তামিলগী মহাকবি সুব্রমনিয়া ভারতিনা ইরমখিবা ঐখোয়না খুৎলাই শাসি; ঐখোয়না চে শাসি হায়বা অসিনা ইনোৎ হাপখি। ঐখোয়না ফেক্তরীশিং শাসি; ঐখোয়না স্কুলশিং শাসি। ঐখোয়না লেংবা অমসুং পাইবা ঙম্বা গারিশিং শাসি। ঐখোয়না মালেমদা অহোংবা পুরক্কদবা জহাজশিং শাসি। শ্রী মোদীনা হায় দিফেন্স কোরিদোর অনিগী মনুংদা অমদি তামিল নাদুদা লৈ। কোরিদোর অসিনা লুপা করোর ৮১০০ হেন্নবগী ইনবেস্তমেন্ত তৌরক্নবা থাজবা ফংখ্রে।

প্রধান মন্ত্রীনা হায় ভারতকী ওতোমোবাইল মেন্যুফেকচরিং হবতা হান্নদগী মাংজিল থারি। প্রধান মন্ত্রীনা হায় হৌজিক্তি তামিল নাদু অসি ভারতকী তেঙ্ক মেন্যুফেকচরিং হব অমা ওইরক্লি। এম.বি.তি. অর্জুন মার্ক ১এগী মতাংদা প্রধান মন্ত্রীনা হায় “লমদম অসিদা দিজাইন তৌবা অমসুং শাবা ‘মেন বেত্তল তেঙ্ক অর্জুন মার্ক ১এ’ অসি খুৎশিন্নবদা চাউথোকচবা পোকই”। মসিনা লমদম অসিগী ওইবা এম্ম্যুনিসন শিজিন্নৈ। তামিল নাদুদা শাবা তেঙ্ক অমা লৈবাক অসি ঙাকশেন্নবা অৱাং থংবা ঐখোয়গী ঙমখৈশিংদা থম্লগনি। মসিনা ভারতকী অপুনবগী থৌনা-লিংজেল – ভারতকী এক্তা দর্শন অদু উথোক্লি।”

প্রধান মন্ত্রীনা হায় দিফেন্স সেক্তরদা ভারতপু আত্মানির্ভর ভারত ওইহন্নবা মীৎয়েং চংলিবা অসি খোঙজেল য়াংখৎপগা লোইননা মাংদা চংশিল্লগনি।

ঐখোয়গী আর্ম ফোর্সশিং অসিনা ভারতকী থৌনা অদু মশক তাক্লি। মখোয়না ঐখোয়গী ইমা লৈবাক অসি ঙাকশেনবা ঙম্বগী মথৌনা লৈ হায়না হঞ্জিন-হঞ্জিন উৎখি। ভারতনা শান্তিদা থাজবা থম্মি হায়বা অসিসু মখোয়না হঞ্জিন-হঞ্জিন উৎখি। ভারতনা ঐখোয়গী সোভরেন্তী অসি অঙম্বা থাক্তা ঙাক শেনগনি হায়না প্রধান মন্ত্রীনা ফোঙদোকখ্রে।

প্রধান মন্ত্রীনা হায় আই.আই.তি. মদ্রাসতা মালেমগী থাক্কী রিসর্চ সেন্তরশিং লৈগদবা সক্বের মিতর লাখ ২গী ইনফ্রাস্ত্রকচর দিস্কভরী কেম্পস অসিনা দিস্কভরীগী মাংজিল থারিবা সেন্তর অমা ওইরগনি অমসুং ভারত পুম্বদগী খ্বাইদগী অফবা তেলেন্তশিং পুশিল্লকপা ঙম্লগনি।

শ্রী মোদীনা হায় চহি অসিগী বজেৎনা সরকারনা অওনবা পুরক্নবা হোৎনরিবা অসি অমুক হন্না উৎখ্রে। বজেৎ অসিনা ভারতকী সমুদ্র মপাল চাউখৎনবা অখন্নবা মীৎয়েং চংলি। ঙামীগী কাংলুপশিংগী এক্সত্রা ক্রেদিৎ মেকানিজমশিং, চেন্নাই অমসুং সীৱিদ ফার্মিং য়াওনা মতমগা চুন্নবা ফিশিং হর্বরগী সেন্তর মঙাগা লোইননা ঙা ফাবগা মরী লৈনবা ইনফ্রাস্ত্রকচর অপগ্রেদ তৌবা অসিনা সমুদ্র মপালদা লৈরিবা কাংলুপশিংগী পুন্সি ফগৎহল্লগনি। মহাক্না হায় সীৱিদ কল্তিবেসনগীদমক মল্তি-পর্পজ সী-ৱিদ পার্ক তামিল নাদুদা শারগনি।

দেবেন্দ্রকুলা বেলালর কাংলুপকী দেবেন্দ্রকুলা বেলেলর ওইনা শকখঙনবা মতম শাংনা ধাবি তৌদুনা লাখখিবা অদু কেন্দ্র সরকারনা অয়াবা পীরে প্রধান মন্ত্রীনা লাউথোকখ্রে। মখোয়বু হৌজিক্তি সম্বিধানগী সেদ্যুলদা য়াওবা মমিং তুরক তগী তরেৎ নত্তনা মখোয়গী পুৱারীগা শাগোন্নরবা মীথোলনা মশক খঙনরগনি। মখোয়গী মমিং দেবেন্দ্রকুলা বেলালর হায়না মমিং শেমদোক্নবা সম্বিধানগী সেদ্যুল অমেন্দ তৌনবা দ্রাফ গেজেৎ অদু কেন্দ্র সরকারনা অয়াবা পীখ্রে। মথংগী সেসন হৌবদা মসি পার্লিয়ামেন্দদা পুথোক্কনি। মহাক্না ধাবি অসিদা কুপ্না স্তদী তৌখিবা অদুগীদমক মহাক্না তামিল নাদু সরকারবু থাগৎখ্রে। শ্রী মোদীনা হায় ৱারেপ অসি মমিং ওনবা খক্তগী ৱাফম নত্তে। মসি ৱায়েল পীবা, ইজৎ ঙাকপা অমসুং খুদোংচাবগী মতাংদনি। “তামিল নাদুগী চৎনবী-নাৎ অসি ঙাক শেন্নবা অমসুং য়োকখৎনবা হোৎনবা হায়বা অসি ঐখোয়গী থৌদাংনি। তামিল নাদুগী চৎনবী-নাৎ অসি মালেম পুম্বদা খঙনরি”, হায়না শ্রী মোদীনা ফোঙদোকখ্রে।

প্রধান মন্ত্রীনা হায় সরকার অসিনা স্রী লঙ্কাদা লৈরিবা ঐখোয়গী ইচিল-ইনাওশিংগী য়াইফনবা অমসুং অনীংবশিং থুংহন্নবা হোৎনদুনা লাকখি। শ্রী মোদী অসি জাফনা চৎলুবা অমত্তা ঙাইরবা ভারতকী প্রধান মন্ত্রীনি। তামিলশিংগীদমক সরকারনা ফংহনখিবা রিসোর্সশিং অসি মমাংদা ফংহনখিবদগী হেনখি। প্রোজেক্তশিং অদুদা য়াওরিবা অদুদি: স্রী লঙ্কাগী অৱাং-নোংপোক্তা লৈবা তামিলশিং অদুগীদমক য়ুম ৫০,০০০ শাখি। প্লান্তেসন এরিয়াশিংদা য়ুম ৪০০০। হকশেলগী হিরমদনা তামিল কাংলুপনা শিজিন্নবা লেম্না এম্বুলেন্স সর্ভিস অমা ফাইনান্স তৌখি। দিক্কোয়াদা হোস্পিতাল অমা শাখ্রে। কন্নেক্তিবিতী হেনগৎহন্নবা জাফনা অমসুং মন্নার ফাওবগী রেলৱে নেৎৱার্ক অসি অমুক হন্না শেমগৎখি। চেন্নাই অমসুং জাফনা ফাওবগী ফ্লাইৎশিং লৈহনখ্রে। ভারতনা শরিবা জাফনা কলচরেল সেন্তর অসি অথুবদা হাংলগনি। “ঐখোয়না স্রী লঙ্কন লুচিংবশিংগা লোইননা তোইনা তামিলগী হকশিংগী সমস্যা অসি  খন্নখি। মখোয়না চপ মান্নবা হক, ৱায়েল, শান্তি অমসুং ইজৎ লৈনা হিংবা ঙম্নবা ঐখোয়না হোৎনরি” হায়না প্রধান মন্ত্রীনা ফোঙদোকখ্রে।

প্রধান মন্ত্রীনা হায় সরকার অসিনা ঙামীশিংগী ফংফম থোকপা হকশিং কন্নবা মতম পুম্বদা ঙাকশেল পীরি অমসুং স্রী লঙ্কাদা ঙামীশিং ফংখিবা মতমদা অথুবদা থাদোক্নবা হোৎনদুনা লাকখি। সরকার অসিগী তেনর মনুংদা ঙামী ১৬০০ হেন্না থাদোকহনখ্রে অমসুং স্রী লঙ্কনগী কস্তদীদা ভারতকী ঙামী অমত্তা লৈত্রে। মসিগা মান্ননা হি ৩১৩সু থাদোরকখ্রে হায়না প্রধান মন্ত্রীনা ফোঙদোকখ্রে।

প্রধান মন্ত্রীনা চেন্নাই মেত্রো রেল ফেস-I এক্সতেন্সন, চেন্নাই বীচ অমসুং অত্তিপত্তুগী মরক্তা মরিশুবা রেলৱে লাইন, ভিল্লুপুরম – কুদ্দালুর –মায়িলাদুথুরাই – তঞ্জাভুর অমসুং মাইয়িলাদুতুরাই – তিরুভারুরদা সিঙ্গল লাইন সেক্সন ইলেক্ত্রিফিকেসন শঙ্গাখ্রে। প্রধান মন্ত্রীনা গ্রান্দ এনীকৎ কেনেল সিস্তেম অমসুং আই.আই.তি. মদ্রাসকী দিস্কভরী কেম্পসকী এক্সতেন্সন, রিনোভেসন অমসুং মোদর্নাইজেসনগী উরেপ উয়ুং তমখ্রে।

থৌরম অসিদা তামিল নাদুগী গভর্নর, তামিল নাদুগী মুখ্য মন্ত্রী, উপ মুখ্য মন্ত্রী, তামিল নাদুগী স্পীকর, তামিল নাদুগী ইন্দস্ত্রীজকী মন্ত্রী শরুক য়াখি।

*****



(Release ID: 1698053) Visitor Counter : 42