লৈবাক শিনবা থুংনা কোবিদ১৯গী বেক্সিন কাপথোকপগী কুনমঙা শুবা নুমিৎতা কোবিদ-১৯গী মায়োক্তা বেক্সিন কাপখিবা হেল্থকিয়র অমসুং ফ্রন্তলাইন ৱার্কর লাখ ৬৫.২৮ য়ৌখ্রে। ভারত অসি নুমিৎ ২৪ খক্তদা কোবিদ বেক্সিনেসনগী মিলিয়ন ৬ মার্ক য়ৌখিবা মকোকথোংবা লৈবাক ওইরে।

উত্তর প্রদেশ নত্তনা রাজ্য/য়ু.তি. পুম্নমক্তা ঙসি তিকা থাবগী থবক চত্থখি।

প্রোবিজনেল রিপোর্তকী মতুং ইন্না, কোবিদ ১৯গী মায়োক্তা হেল্থকিয়র ৱার্কর অমসুং ফ্রন্তলাইন ৱার্কর ৬৫,২৮,২১০ (ঙসি নুমিদাং পুং ৬:৩০ ফাওবদা) বেক্সিন কাপখ্রে। হৌজিক ফাওবদা সেসন পুন্না ১,৩৪,৬১৬ পাংথোকখ্রে। ঙসি নুমিদাং পুং ৬:৩০ ফাওবদা সেসন ৭,৮৬০ পাংথোকখি।

অপুনবা কভর তৌখিবশিংগী মনুংদা ৫৫,৮৫,০৪৩না হেল্থকেয়র ৱার্করশিংনি অমদি ৯,৪৩,১৬৭না ফ্রন্তলাইন ৱার্করশিংনি।

ঙসি নুমিদাং পুং ৬:৩০ ফাওবদা বেনেফিসরী ২,৬৯,২০২দা তিকা থাখি। মসিগী মনুংদা ১,০২,৯৪১না হেল্থকেয়র ৱার্করশিংনি, অদুগা অতোপ্পা বেনেফিসরী ১,৬৬,২৬১না ফ্রন্তলাইন ৱার্করশিংনি। নোংমগী ওইবা ফাইনেল রিপোর্ত নুমিদাং অথেংবদা মপুং ফাগনি।

বেক্সিনেসন দ্রাইবকী কুনমঙাশুবা নুমিৎতা নুমিদাং পুং ৬.৩০ ফাওবদা এ.ই.এফ.আই. ২৫ রিপোর্ত তৌরকখি।

****