সাইন্তিফিক তেম্পর পুরক্নবা, অমদি লেপ্পা লৈতনা তমশিনবগী চৎনবী অমা পুরক্নবা লোয়ননা সাইন্স অমসুং তেক্নোলোজীবু মাঙদা পুরক্নবগীদমক মহৈরোয়শিং, ওজাশিং, প্রিন্সিপালশিং অমসুং লীদর্সিপশিং এঙ্গেজ তৌনবগী থৌরম অমা হৌদোকখ্রে‍।

“মহৈ তম্ফমশঙশিংদা সাইন্সকী লমদা এঙ্গেজ তৌননবা প্রোগ্রাম মশিং য়ামদে, অমদি ঐখোয়না থৌরাংসিগী মখাদা মহৈ তম্ফমশঙ মশিং হেন্না হেন্না এঙ্গেজ তৌননবা পান্দম থম্লি‍। মসিদা মচাক অহুম – মহৈরোয়, ওজা অমসুং মহৈতম্ফমশঙশিংগী লুতিংবশিংগী মরুওইবা থৌদাংশিং মথৌ তাগনি অমদি মসিনা নহা ওইরিবশিংবু অমসুং মখোয়গী হৈ শিংববু লৈবাকসিগী অমদি খুন্নাইগী লন ওইনা শেমগৎপদা মতেং ওইগনি,” হায়না হন্দক্তা ওনলাইন ইনিসিএসন প্রোগ্রাম অমদা দিপার্তমেন্ত ওফ সাইন্স এন্দ তেক্নোলোজী (দি.এস.তি.)গী সেক্রেতরী প্রোফেসর অসুতোস শর্মনা হায়খ্রে‍। প্রোগ্রাম অসিনা স্তেত ৮দগী মহৈতম্ফমশঙ ১০০ হেনবদগী মহৈরোয়শিং, ওজাশিং অমসুং প্রিন্সিপালশিং ফম্পাক অমত্তদা পুরকখি‍।

সাইন্সকী পাউ ফাওনবগী মওংসি পুক্নিং থৌগৎনিংঙাই, ৱাখল্লোন হোংহন্নিংঙাই অমদি মীশিং য়াম্না পুক্নিং চিংশিন্নিংঙাই মওং ওইহনবা মথৌ তাই হায়বা ৱাফম থম্লদুনা মসিগীদমক মহৈ তম্ফমশঙ লাখ ৩দগী ৱাখল্লোন লাখ ১০রোম পুথোকখ্রবা দি.এস.তি.গী প্রোজেক্ত মানক্তগী কান্নবা লৌবা য়াই হায়না মহাক্না ফোঙদোকখি‍। আই.বি.এম.গা খোঙবু ওইদুনা বিগ্যান প্রসারনা পাঙথোকখিবা থৌরম অদুদা এস.তি.ই.এম.বু ২০২১দা স্কুলগী মহৈরোয়শিংগীদমক কমদৌনা পুক্নিং থৌগৎনিংঙাই ওইহনগদগে হায়বা ৱাফম ‘এঙ্গেজ মেন্তর দাইলোগ’ সেসন্দা খন্নখি‍।

সি.বি.এস.ই.গী স্কিল অমসুং ত্রেনিং দাইরেক্তর দোক্তর বিস্বজিক সাহানা স্কুল অঙাঙশিংদা চহী নৌরিঙৈ মতমদগী হৌনা সাইন্তিফিক তেম্পর শেমগৎপগী মথৌ তাবা ৱাফমশিং থমখি‍। “অসিগুম্বা মখলগী প্রোগ্রামশিংনা মহৈ তম্ফমশঙশিংদা তম্নিংবগী ফীভম অমা শেমগৎপদা মতেং পাংদুনা খঙনিং-হৈনিংহনবা হেনগৎহনগনি,” হায়না মহাক্না ফোঙদোকখি‍।

“মহৈ তম্ফমশঙশিং অসি তঙাই ফদ্রবা য়ুম্ফম অমনি, অমসুং মহৈরোয়শিংদা সাইন্তিফিক ওইবা মওংদা ৱাখল খলহনবদা ওজাশিং অমদি মহৈরোয়শিংগী থৌদাং য়াম্না মরু ওই‍। অসিগুম্বা মখলগী থৌরমশিংনা নহা ওইরিবশিংবু মখোঙ শোম্বিবদা অমদি সাইন্তিফিক তেম্পর শেমগৎপদা মতেং চাউনা ওইগনি,” হায়না বিগ্যা প্রসারকী দাইরেক্তর দোক্তর নকুল পরাসরনা হায়খি‍।

“তেক্নোলোজী অমসুং সাইন্সনা মালেম অসিবু তশেংনমক হোংহল্লে অমদি পুনশিন্নহল্লে‍। এস.তি.ই.এম. অসি স্কিলখক্তগী নত্তে, মপুং ফানা মরোমদোম লেপচবা ঙম্নবা ৱাখল্লোন হোংদোকপসুনি‍। থৌরম অসিনা হায়রিবা অহোংবা অদু পুরক্নবগীদমক মহৈ তম্ফমশঙশিংগী প্রিন্সিপালশিং, ওজাশিং অমসুং মহৈরোয়শিংগী মরক্তা হেন্না চেৎপা পরী শেমগৎলগনি,” হায়না আই.বি.এম. ইন্দিয়া অমসুং সাউথ ইন্দিয়াগী এম.তি. সন্দিপ পতেলনা হায়খি‍।

“নহা ওইরিবশিংবু সাইন্স অমসুং মহৈ তম্ফমশঙগী মায়কৈদা পুক্নিং চিংশিন্নবা লম্বী থিনবগীদমক ‘এঙ্গেজ ৱিথ সাসন্স’ প্রোগ্রামগী মখাদা ইন্তরেক্তিব সেসন চাং নাইনা পাঙথোক্কনি,” হায়না থৌরমদুবু পাঙথোক্লিবা বিগ্যান প্রসারগী কন্সল্তেন্ত সৌরব সেন্না ফোঙদোকখি‍।

******