ফেব্রুৱারি ৭,২০২১দা প্রধান মন্ত্রী শ্রী নরেন্দ্র মোদী অসাম অমসুং নোংচুপ বঙ্গালদা চৎকনি। অয়ুক্কী পুং ১১:৪৫ রোম তাবদা প্রধান মন্ত্রীনা হোস্পিতাল অনিগী উরেপ-উয়ুং তমগনি অমসুং অসামগী সোনিতপুর জিলাগী ধেকিয়াজুলিদা রাজ্যগী হায়ৱেশিং অমসুং জিলাগী মরুওইবা লম্বীশিংগী থৌরম অমা, ‘অসোম মালা’ হৌদোক্কনি। মসিগী তুংদা, নুংথিলগী পুং ৪:৫০ রোম তাবা মতমদা প্রধান মন্ত্রীনা নোংচুপ বঙ্গালগী হালদিয়াদা মরুওইবা ইনফ্রাস্ত্রকচর প্রোজেকশিং মীয়ামদা কৎথোক্কনি অমসুং উরেপ-উয়ুং তমগনি।

নোংচুপ বঙ্গালদা প্রধান মন্ত্রী

ভারত পেত্রোলিয়ম কোর্পোরেসন লিমিতেদনা শাবা এল.পি.জি ইমপোর্ত তর্মিনেল প্রধান মন্ত্রীনা মীয়ামদা কৎথোক্কনি। মসি লুপা কোতি ১১০০ রোম চঙনা শাবনি অমসুং চহি অমদা মিল্লিয়ন মেত্রিক তন ১গী কেপাসিতি লৈ। মসিনা নোংচুপ বঙ্গাল অমসুং ভারতকী অতোপ্পা নোংপোক থংবা অমসুং অৱাং-নোংপোক রাজ্যশিংগী দরকার ওইবা এল.পি.জি পীবা ঙমগনি অমসুং য়ুমথোঙ খুদিংদা চাক থোঙনবা এল.পি.জি ফংহন্নবা প্রধান মন্ত্রীগী মঙলান মঙফাওন্নবা মাইকৈদা থাংজিনবা মরুওইবা খোঙথাং অমনি।

প্রধান মন্ত্রী উর্জা গঙ্গা প্রোজেক্কী শরুক অমা ওইরিবা কিলোমিতর ৩৪৮ শাংবা দোভি-দুর্গাপুর নেচরেল গ্যাস পাইপলাইন সেক্সন প্রধান মন্ত্রীনা মীয়ামদা কৎথোক্কনি। লুপা কোতি ২৪০০ রোম চঙনা শেমগৎপা পাইপলাইন অসিনা ঐচ.য়ু.আর.এল সিন্দ্রি(ঝারখান্দ) ফর্তিলাইজর প্লান্ত হিঙ্গৎহনবদা মতেং পাংগনি, দুর্গাপুর(নোংচুপ বঙ্গাল)গী মেতিক্স ফর্তিলাইজর প্লান্তদা গ্যাস পীগনি অমসুং রাজ্য অসিগী মরুওইবা তাউনশিং, ইন্দস্ত্রি, ললোন-ইতিক অমসুং ওতোমোবাইলগী থবকশিংগী দরকার ওইবা গ্যাস পীবা ঙমগনি।  

ইন্দিয়ান ওইল কোর্পোরেসনগী হালদিয়া রিফাইন্নরিগী অনিশুবা কেতালাইতিক আইসোদিৱেক্সিং য়ুনিত শানবা প্রধান মন্ত্রীনা উরেপ-উয়ুং তমগনি। য়ুনিত অসি চহি অমদা মেত্রিক তন লিশিং ২৭০ পুথোকপা ঙমগনি অমসুং মসি থবক হেক হৌবগা য়ু.এস দোল্লর মিল্লিয়ন ১৮৫গী ফোরেন একচেঞ্জ কনবা ঙমগনি হায়না পানরি।

নেসনেল হায়ৱে ৪১দা হালদিয়াগী রানিচক্তা লেন ৪গী আর.ও.বি-কম-ফ্লাইওভর প্রধান মন্ত্রীনা মীয়ামদা কৎথোক্কনি। মসি লুপা কোতি ১৯০ চঙনা শাবনি। মসিগী ফ্লাইওভর অসি থবক হৌবদগী কোলাঘাত্তগী হালদিয়া দোক কমপ্লেক্স ফাওবা অপনবা লৈতনা চৎথোক-চৎশিন য়ারগনি অমসুং হিথাংফম অসিগী মনুং অমসুং মপান্দা অচৌবা গারিশিং চেনবগী শেনফম অমসুং মতম কনবা ঙম্লগনি।

হায়রিবা প্রোজেকশিং অসি নোংপোক ভারত চাউখৎনবা প্রধান মন্ত্রীগী পুরভোদয়াগী পান্দম ফংনবা পায়খৎপনি। থৌরম অদুদা নোংচুপ বঙ্গালগী রাজ্যপাল অমসুং চীফ মিনিস্তর অমসুং পেত্রোলিয়ম অমসুং নেচরেল গ্যাসকী য়ুনিয়ন মিনিস্তর শরুক য়াগনি।

অসামদা প্রধান মন্ত্রী

রাজ্য অসিগী হায়ৱেশিং অমসুং জিলাগী মরুওইবা লম্বীশিংগী ফিবম ফগৎনবা পান্দম থম্লিবা ‘অসোম মালা’ প্রধান মন্ত্রীনা হৌদোক্কনি। থৌরম অসিগী মখাদা ফিল্দ দেতা খোমজিন্দুনা অমসুং মদুগা রোদ এসেত মেনেজমেন্ত সিস্তেমগা শম্নহন্দুনা লেপ্তনা লম্বীশিং ফজনা শেমজিন-শাজিনগনি। ‘অসোম মালা’না নেসনেল হায়ৱেশিং অমসুং খুঙ্গংগী লম্বীশিংগী মরক্তা শম্নবা অফবা লম্বীশিং শেমগৎকনি অমসুং মখল কয়াগী চৎথোক-চৎশিনগী খুদোংচাবশিং ফংহনগনি। মসিনা লম্বীশিং শেন-থুমগী তান্নবগী মরুওইবা মফমশিংদা শম্নহনগনি অমসুং রাজ্যশিংগী মরক্তা চৎথোক-চৎশিনগী থবক ফগৎহনগনি। থৌরম অদুদা অসামগী চীফ মিনিস্তর শরুক য়াগনি।

বিশ্বনাথ অমসুং চারাইদিওদা মেদিকেল কোলেজ অনি অমসুং হোস্পিতালশিং শানবা প্রধান মন্ত্রীনা উরেপ উয়ুং তমগনি। প্রোজেক অসি লুপা কোতি ১১০০ চঙগনি হায়না পানরি। হোস্পিতাল অমমমদা ফমুং ৫০০ অমসুং এম.বি.বি.এস সিত ১০০ লৈগনি। মেদিকেল কোলেজশিং অমসুং হোস্পিতালশিং মশিং হেনগৎলকপা অসিনা রাজ্য অসিগী দোক্তর ৱাৎলিবা অসি কোকহনবা খক নত্তনা অসাম অসি অৱাংবা থাক্কী অনা-লায়য়েংগী অমসুং অৱাং-নোংপোক পুম্নমক্কী মেদিকেল ইজুকেসনগী মফম অমা ওইহনগনি।

*****