ঙসি আই.সি.এ.আর. সোসাইতীগী ৯২শুবা চহীগী ওইনা পাংথোকপা জেনেরেল মীফমদা লৌউ-শিংউ অমসুং লৌমীশিংগী য়াইফ থৌরাংগী কেন্দ্রগী মন্ত্রী শ্রী নরেন্দ্র সিংহ তোমারনা ৱা ঙাংখ্রে৷ ২০২০ ফাওবগী মনুংদা লৌমীশিংগী চাগা অসি শরুক অনি হেনগৎনবা সরকারগী স্কিমশিং অসিগা লোইননা লৌউবদা লৌমীশিংনা থেংনরিবা তোঙানবা তোঙানবা প্রোব্লেমশিং অসি থেংননবা আই.সি.এ.আর.না শেম্বা সাইন্স দ্রিভন পাথ অদুগী মতাংদা তেন্তক্না শ্রী তোমারনা ফোংদোকখ্রে৷ লৌউ-শিংউগী সাইন্তিস্তশিং, কাউন্সিল অসিগা মরী লৈনবা ওজাশিং, মহৈরোইশিং অসিনা হোৎনরিবশিং অসি কেন্দ্রগী মন্ত্রীনা থাগৎখ্রে৷ লৌমীশিং অসিনা য়াম্না কন্না হোৎনবা অমসুং লৌউ-শিংউগী সাইন্তিস্তশিং অসিনা অনৌ অনৌবা তেক্নেলোজীশিং শেম্লকপা অসিনা লৈবাক অসিনা মালেমগী ওইবা থাক্তা শঙ্গোম পুথোকপদা অমসুং ঙা য়োকপগী সেক্তরদা য়াম্না মরু ওইবা মফম অমা কন্নবা হোৎনবদা মতেং পাংখ্রে হায়না মহাক্না ফোংদোকখ্রে৷

লৈবাক অসিগী লৌউ-শিংফগী খোঙচৎ অসি ফগৎনবা অমসুং লৌমীশিং অসি হেন্না য়োকখৎতুনা পোত্থোক হেন্না পুথোক্নবগীদমক কেন্দ্র সরকারনা তোঙান তোঙানবা স্কিমশিং চৎনখিবা অসিগী মতাংদা কেন্দ্রগী মন্ত্রী অসিনা পনখ্রে৷ লৈবাক অসিদা লৈরিবা লৌউ-শিংউ অমসুং লৌমীশিংনা থেংনরিবা প্রোব্লেমশিং অসি থেংনবদা ফার্মর্স প্রদ্যুসর্স ওর্গনাইজেসনশিং অসিনা য়াম্না মরু ওইবা থৌদাং লৌরগনি হায়না মহাক্না ফোংদোকখ্রে৷ কোবিদ-১৯গী লুরবা মতম অসি ফাওবদা তোঙান তোঙানবা মহৈ-মরোংশিং চাং ৱাংনা পুথোক্তুনা কাউন্সিল অসিনা মহাক্কী রিলিভেন্স অদু কাইহন্দনা থম্বা ঙমখ্রে হায়না শ্রী তোমারনা ফোংদোকখ্রে৷

এগ্রিকল্চরেল য়ুনিভর্সিতীশিং অমসুং কাউন্সিল অসিনা লৌরিবা মমল নাইদ্রবা থৌদাংশিং অসি পল্লদুনা লৌউ-শিংউগী সেক্তর অসি অনৌবা এদজুকেস্নেল পোলিসী অসিগী মতেংদগী হেন্না থবক পীবা ঙমহন্নবা কেন্দ্রগী মন্ত্রী অসিনা হায়খ্রে৷ পুন্না থৌদাং লৌমিন্নদুনা হোৎনবা অসিনা লৈবাক অসিগী লৌউ-শিংউ সেক্তর অসি চাওখৎপদা, লৌমীশিং য়োকখৎপদা অমসুং মখোয়গী চাগা হেনগৎহনবদা মতেং ওইরগনি হায়না শ্রী তোমারনা ফোংদোকখ্রে৷

প্রধান মন্ত্রী শ্রী নরেন্দ্র মোদীগী খোল্লাউ “জাই কিসান, জাই কিসান, জাই বিগ্যান, জাই অনুসন্ধন” অসি পল্লদুনা লৌউ-শিংউবগী মতাংদা পাংথোকপা রিসর্চ অমসুং এদজুকেসন অসিদা কাউন্সিল অসিনা লৌরিবা মরু ওইবা থৌদাং অদু রেল্ৱেজ, কম্মর্জ অমসুং ইন্দস্ত্রী অমসুং কঞ্জুমর এফিয়র্স, ফুদ অমসুং পব্লিক দিস্ত্রিব্যুসনগী কেন্দ্রী মন্ত্রী শ্রী পিয়ুশ গোয়লনা ফোংদোকখ্রে৷ অত্মনির্ভর ভারত অভিয়নদা আই.সি.এ.আর.গী তৎনা থানবা য়াদ্রবা থৌদাং অদুসু শ্রী গোয়লনা পনখ্রে৷ ইশিং-নুশিৎকী ফিভম হোংলকপা অসিগী মতুং ইন্না চান্নবা তোঙানবা তোঙানবা মহৈ-মরোংশিং অসিগী মতাংদসু কেন্দ্রগী মন্ত্রী অসিনা পনখ্রে৷

তোঙান তোঙানবা আই.সি.এ.আর. পোত্থোকশিং অমসুং পব্লিকেসনশিং অদুসু থৌরম অসিদা পুথোকখ্রে৷

*****