ঙসি পাংথোকখিবা আই.সি.এ.আর সোসাইতিগী ৯২শুবা চহিগী মীফমদা এগ্রিকলচর অমসুং ফার্মরস ৱেলফিয়ারগী য়ুনিয়ন মিনিস্তর শ্রী নরেন্দ্র সিংহ তোমার ৱা ঙাংখ্রে। ইং ২০২২ ফাওবগী মনুংদা লৌমীশিংগী শেন্থোক শরুক অনিদা হেনগৎনবা সরকারগী স্কিমশিংগা লোয়ন্না লৌউ-শিংউ অমসুং লৌমীশিংগী তোঙান-তোঙানবা খুদোংচাদবশিং কোকহন্নবা আই.সি.এ.আরনা পায়খৎলিবা সাইন্সনা লমজিংবা থবকশিংগী মতাংদা শ্রী তোমারনা পাউদমখি। কাউন্সিল অসিগী মরী লৈনবা লৌউ-শিংউগী সাইন্তিস্তশিং, ওজাশিং, মহৈরোয়শিং অমসুং লৌমীশিংগী থবকশিং য়ুনিয়ন মিনিস্তরনা থাগৎখি। মালেমগী থাক্তা শঙ্গোম অমসুং ঙা পুথোকপদা মরুওইবা মফম অমা কন্নবা লৌমীশিংনা থবক কন্না শুদুনা অমসুং লৌউ-শিংউগী সাইন্তিস্তশিংগী খ্বাইদগী নৌবা তেক্নোলোজিশিংনা লৈবাক অসিগী মতেং পাংনবা মহাক্না তকশিনখি।

য়ুনিয়ন মিনিস্তরনা হায়খি লৌউ-শিংউগী থবক চাউখৎপা খোঙজেল য়াংনবা অমসুং লৈবাক অসিগী লৌমীশিং ফিবম ফগৎহন্নবা পোৎথোক হেনগৎহন্নবা কেন্দ্র সরকারনা তোঙান-তোঙানবা স্কিম কয়া পায়খৎলে। লৈবাক অসিদা থেংনরিবা লৌউ-শিংউগী তোঙান-তোঙানবা খুদোংচাদবশিং কোকহনবদা ফার্মরস প্রদুসর ওর্গনাইজেসনশিংনা মরুওইবা থৌদাং অমা লৌগনি। কোবিদ-১৯গী অৱাবা মতমদা ফাওবদা তোঙান-তোঙানবা চানবা মহৈ-মরোংশিং পুথোকপদা কাউন্সিলনা মাইপাক্না থবক পাংথোকখি। কাউন্সিল অসিনা পুথোকপা তোঙান-তোঙানবা মখলগী অনৌবা মহৈ-মরোশিংনা হিরম কয়াদা লৈবাক অসি কান্নবা পীরি।

য়ুনিয়ন মিনিস্তরনা হায়খি কাউন্সিল অমসুং এগ্রিকলচরেল য়ুনিভর্সিতিশিংগী থবকশিংনা লৌউ-শিংউগী হিরম অসিনা থবক হেন্না ফংহনবদা অনৌবা ইজুকেসন পোলিসিনা মতেং পাংগনি। অপুনবা থবকশিং অসিনা লৈবাক অসিগী লৌউ-শিংউ চাউখৎহনবা, লৌমীশিং ফিবম ফগৎহনবা অমসুং মখোয়গী শেন্থোক হেনগৎহনবদা মতেং পাংগনি।

প্রধান মন্ত্রী শ্রী নরেন্দ্র মোদীগী খোল্লাউ “জয় কিসান, জয় বিগ্যান, জয় অনুসন্ধান” পল্লদুনা, রেলৱেজ, কমর্স অমসুং ইন্দস্ত্রি অমসুং কঞ্জুমর এফেয়ার্স, ফুদ অমসুং পব্লিক দিস্ত্রিবুসনগী য়ুনিয়ন মিনিস্তর শ্রী পিয়ুস গোয়ালনা হায়খি লৌউ-শিংউগী লমদা থিজিনবা  অমসুং লাইরিক তাকপী তম্বীবদা কাউন্সিলনা মরুওইবা থৌদাং অমা লৌরি। অত্মানির্ভর ভারত অভিয়ানদা আই.সি.এ.আরনা মরুওইবা থৌদাং লৌরি। অইং-অশাগী খল হোংলকপগা লোয়ন্না তোঙান-তোঙানবা মখলগী মহৈ-মরোংশিং থানবা য়ুনিয়ন মিনিস্তরনা তকশিনখি।  

এগ্রিকলচর অমসুং ফার্মরস ৱেলফিয়ারগী রাজ্য মন্ত্রী শ্রী পারসোত্তাম রুপালানা হায়খি কোবিদ-১৯ লোকদাউন মনুংদা লৌউ-শিংউগী থবক্তা রেকোর্দ ওইনা তোঙান-তোঙানবা দরকার ওইবা মহৈ-মরোংশিং পুথোকপা খক নত্তনা থবক ফংনবা খুদোংচাবশিংশু পীখি।

এগ্রিকলচর অমসুং ফার্মরস ৱেলফিয়ারগী রাজ্য মন্ত্রী শ্রী কাইলাস চৌধুরিনা হায়খি লৌমীশিংগী শেন্থোক হেনগৎহনবদা চাথোক লৈবা মরুশিং, পোৎথোকশিং ফজনা থম্বা, লৌ উবদা চঙবা শেনফম হন্থহনবা, হার ফংহনবা অমসুং য়োনফম ফংহনবা অসি য়াম্না মরুওই। লৌমীশিংনা ওর্গনিক লৌউ মখল পায়খৎনবা পুক্নিং থৌগৎনবা সরকারনা তোঙান-তোঙানবা থৌরম কয়া পাংথোক্লি।

থৌরম অদুদা নিতি অয়োগকী মেম্বর দোক্তর রমেস চান্দ অমসুং ভারত সরকারগী এগ্রিকলচর অমসুং ফার্মরস ৱেলফিয়ার মিনিস্ত্রিগী এগ্রিকলচর, কোওপরেসন অমসুং ফার্মরস ৱেলফিয়ার দিপার্তমেন্তগী সেক্রেতরি সঞ্জয় অগরৱালশু শরুক য়াখি।

সেক্রেতরি(দি এ আর ই) অমসুং দিরেক্তর জেনেরেল (আই সি এ আর) দোক্তর ত্রিলোচান মোহাপত্রানা চহি অসিদা কাউন্সিলগী মরুওইবা মাইপাকপশিং ফোঙদোকখি। মহাক্না হায়খি লৌউ-শিংউগী লমদা থিজিনবা অমসুং লাইরিক তাকপী-তম্বগী মথক্তা, লৌমীশিংদা খ্বাইদগী নৌবা তেক্নোলোজিশিং য়ৌহন্নবা কাউন্সিল অসিনা কৎথোক্লি।

থৌরম অদুদা আই.সি.এ.আরগী তোঙান-তোঙানবা পোৎথোকশিং অমসুং চেফোঙশিংশু ফোঙখি।

তোঙান-তোঙানবা রাজ্যশিংগী এগ্রিকলচর, হোর্তিকলচর, শা-ষন লোইবা অমসুং ঙা য়োকপগী মিনিস্তরশিং, আই.সি.এ.আর সোসাইতিগী সেনিয়র ওফিসিএলশিং, আই.সি.এ.আর গভর্নিং বোদিগী মেম্বরশিং, এদিসেনেল সেক্রেতরি(দি এ আর ই) অমসুং দিরেক্তর জেনেরেল (আই সি এ আর), শ্রী সঞ্জয় কুমার সিংহ অমসুং কাউন্সিলগী সেনিয়র ওফিসিএলশিং, লৌউ-শিংউগী সাইন্তিস্তশিং অমসুং স্তাফ মেম্বরশিং ভর্চুএল ওইনা মীফম অদু শরুক য়াখি।

*****