পানাজি, ২০২১ জানুৱারীগী ২০

“অঙাংশিং নত্ত্রগা ছাত্রশিং অসি মওং-মরিল মান্নদবা বোত্তল অমসুং মখল কয়াগী মখুম ওইবগা মান্নৈ। মখোয়না লাইরিক তম্বা শোইবদা মখোয়দা তাইনবা চুমদে অদুবু ওজা অমসুং সমাজ অসিনি মখোয়না মখুম অসি হাংদোক্তুনা বোত্তল অসিদা হাপ্লিবা অসি শোইবদগীনি”। মসিগী পাওজেল অসি আই.এফ.এফ.আই. ৫১ ইন্দিয়ন পানোরামা নন ফিচর ফিল্ম, জাদুগী দাইরেক্তর শুরবির ত্যাগীনা পীবনি। মহাক্না ঙসি ২০২১গী জানুৱারীগী ২০দা গৌৱাগী পানাজিদা পাংথোকপা ৫১শুবা ইন্তর্নেস্নেল ফিল্ম ফেস্তিবেল ওফ ইন্দিয়াগী প্রেস কনফরেন্স অমদা ৱা ঙাংখি।

জাদু অসি মরোং য়াম্না লোংবা অঙাংগী ওইবা সংসার, মখোয়গী ইথিল অমসুং ৱাখলগী ওইবা ফিল্ম অমনি। মসিনা পিক্লিবা নুপীমচা অনি বিশা অমসুং ভক্তিনা মতৌ করম্না য়াম্না খেন্নবদগী হৌরকপা অসিনা মরুপ-মপাং ওইরকপা অমসুং চপ মান্নবা ফিবম অমা লাকপদা মখোয়গী হৌরকফম কাওনখিবা।

দাইরেক্তর অসগী মতুং ইন্না, অঙাং অমা শেম্বদা সমাজ অসিনা মমা মপা অমসুং ওজাদগী হেন্না থৌদাং লৌরি। “মহৈ অমসুং লাইরিক তম্বদগী মথক্তা অঙাংশিংদা পীগদবা তঙাইফদবা মচাক কয়া অমা লৈরি। হৌগৎলক্লিবা অঙাং অমগী থৌদাং অসি মমা-মপা অমসুং ওজা খক্তনা য়াদে। শেংনা হায়রবদা, পুম্নমক সমাজ অসিগী চাওরবা থৌদাং য়াম্না লৈরি। অদুবু, হায়রিবা অসিদা মসিশু অচুম্বা অমনি মদুদি মমা-মপানা অহানবা ওজানি। মখোয়না অঙাংশিগী নুংগী ওইবা ৱাখল্লোল অসি খঙবিগদবনি। অঙাংশিং অসিদা ঐখোয়না করি পীবা পাম্বগে হায়বা অসি খঙহন্নবা, অহানবদা ঐখোয়না মখোয়গী থাক্তা লৈবা তাই অমসুং মখোয়গী থম্মোয় ফাওবা য়ৌগদবনি। মসিগীদমক ঐখোয়না মখোয়গী লোল অসি খঙবা মথৌ তাই”।

মসিগী মতাং অসিদা মপু-মবেনগী থৌদাং অসি মরু ওইরকই, অঙাংশিংগীদমক থেতর অমসুং এক্তিং ৱার্কশোপ শিল্লিবা দাইরেক্তর অসিনা হায়খি। “হায়নবা লৈ অহল ওইরবা মীওই অমা শিখিবদা, লাইরিক লিশিং কয়া লৈবা লাইব্রেরী অমা মৈনা চাকখিবগা মান্নৈ। লৌশিং য়াম্না লৈরবা মপু-মবেনগী অমনা অঙাংশি শেম্বদা চাওরবা থৌদাং কয়া লৌরি। ঐখোয়না ঐখোয়গী হৌরকফম অমসুং মীরোল খেন্নবা অসি হন্না অমুক য়েংবা চংই। অরিবা অমসুং অনৌবা মীরোল অসি থেংনরবা মতমদা, অফবা অমা থোক্লক্কনি”।

কোবিদ-১৯ মনুং ফাওবদা ফেস্তিবেল অসি পাংথোকখিবা অসিদা ত্যাগীনা হরাওবা ফোদোকখি। “ঐখোয়না ফিল্ম শেম্বদা, ভাবোক য়ৌদ্রিবা ফাওবা মপুং ফাদ্রি। ঐহাক্না আই.এফ.এফ.আই. অমসুং দি.এফ.এফ.বু লায়চৎ মনুং অসিদা ফিল্ম ফেস্তিবেল শিন্দুনা সাইকল অসি মপুং ফাহনবগীদমক থাগৎপা ফোংদোক্লি।

জাদুগী মরমদা

বিশা অমসুং ভক্তি খুঙ্গংগী মতাই ওইবা স্কুল অমদা তম্মিনৈ। নুমিৎ খুদিংগী মরম অমদগী হেক্তা মখোয় অনিবু দন্দি পীদুনা ক্লাসরুমদগী তান্থোকই। অঙাং খর ওইবা বিশানা নোকমী তৌবা অমসুং মশা খিঙই অমসুং ভক্তিনা কিথি-কিরুম তৌদুনা ইকাই থিগল্লি। মখোয় অনি অদুক খেন্নরবসু, তপ্না-তপ্না তিন্নরকখি। স্কুলগী মপালদা, ভক্তিনা উমংগী মফম অমদা অরোৎপা মফম অমা থেংনখি, মদুদগী য়াম্না থুনা বিশা য়াওনা মখোয় অসি মীত্রং য়েংনবা য়াম্না ৱানা ঙাইদুনা লৈখি।

***