২০২৫ ফাওবদা চাদা ২৫ ব্লেন্দিং তৌবগী পান্দম ফংনবা লোয়ননা লৈবাকসিদা ইথানোল পুথোকপগী মথৌ তাবা চাং ফংবা ঙম্ননবগীদমক দিপার্তমেন্ত ওফ ফুদ অমসুং পব্লিক দিস্ত্রিব্যুসন্না হান্নগী স্কিম শেমদোক্লগা সিরিএল (চেঙ, গেহু, বার্লী, চুজাক অমসুং সোর্ঘুম), চু অমসুং সুগর বীতনচিংবা চীঞ্জাক্কী স্তোকশিংদগী নৎত্রগা চিনি অঙাঙবদা য়ুম্ফম ওইবা দিস্তিলরীশিং দুএল ফীদস্তোক ওইনা শেমদোক্লগা ১বা জেনেরেসনগী (১জি) ইথানোল পুথোক্ননবা দিস্তিলরীশিং লিংখৎপগী নৎত্রগা ইথানোল দিস্তিলেসন কেপাসিতী হেনগৎহনবগী প্রোজেক্ত প্রপোনেন্তশিংদা শেন্থং পীননবা শেমদোক্লবা স্কিমগী নোতিফিকেসন অমা জনুৱারী ১৪, ২০২১দা থোকখ্রে‍। স্কিম অসিগী মখাদা শেন্থং ফংননবগীদমক চিনিগী মিলশিং/দিস্তিলরীশিং/ওন্ত্রপ্রিন্যুরশিংনা নোতিফিকেসন থোকখিবা মতুং নুমিৎ ৩০গী মনুংদা দি.এফ.পি.দি.গী ওন্লাইন পোর্তেল (https://sugarethanol.nic.in)দা অপীবা প্রফোর্মাদা এপ্লিকেসন অমা থাজিল্লকপা মথৌ তাগনি‍।

স্তেত/য়ু.তি. লৈঙাকশিংগী চীফ সেক্রেতরীশিংদা লৈঙাক্না থম্লিবা পান্দম অসি পাম্লিবা মতমসিগী মনুংদা ফংবা ঙম্নবগীদমক মখোয় মখোয়গী স্তেতশিংদা লৈরিবা ওন্ত্রপ্রিন্যুরশিংবু স্কিম অসিদা শরুক য়াহন্নবা পুক্নীং থৌগৎনব ৱাফম থমখ্রে‍। স্তেত লৈঙাকশিংদসু হীরম অসিগী মতাঙদা ওন্ত্রপ্রিন্যুরশিংদা প্রোজক্ত অসিগী মথৌ তাবা লম পীবদা, থুনা এনভাইরনমেন্ত ক্লিয়রেন্স ফংহন্নবা অমদি দিস্তিলরীশিং লিংখৎপদা মতেং পাংননবা ৱাফম থমখ্রে‍। ইন্দস্ত্রী লূপশিংদসু স্কিম অসি য়োকখৎনবা অমদি মখোয়গী লূপলোয়শিংবু মসিদা শরুক য়াহন্নবা ৱাফমশিং থমখ্রে‍।

স্কিম অসিগী মখাদা অনৌবা দিস্তিলরী লিংখৎনবা নৎত্রগা হান্না লৈরবা দিস্তিলরীশিং চাউথোকহন্নবা নৎত্রগা চিনি অঙাবদা য়ুম্ফম ওইবা দিস্তিলরীশিং দুএল ফীদস্তোক ওন্থোক্নবগীদমক প্রোজেক্ত প্রপোনেন্তশিংনা বেঙ্কতগী ফংলিবা শেন্থংগী চহীদা চাদা ৬কী চাংদা চহী অমগী মোরেতরিয়ম য়াওনা চহী মঙাগী শেন্দোয় সবভেন্সন নৎত্রগা বেঙ্কনা লৌরিবা শেন্দোয়গী চাদা ৫০ অনিসিগী মরক্তা হন্থবা অমা লৈঙাক্না পুগনি‍। মসিনা লুপা করোর ৪০,০০০রোমগী শেন থাদবা ঙমহনগনি‍। কেপাসিতী হেনগৎহনবা/অনৌবা দিস্তিলরী লিংখৎলক্কদৌরিবশিং অসিনা মরম ওইরগা খুঙ্গংগী মফমশিংদা থবক পীবগী খুদোংচাবা কয়ামরুম শেম্লগনি‍। ইথানোল পুথোক্নবা ফীদস্তোক মরাং কায়না লৈরি; অমদি তোঙান তোঙানবা ফীদ স্কোকশিংদগী ইথানোল পুথোকপগী রিম্যুনরেতিব ওইবা মমলসু লৈঙাক্না লেপথোক্লে‍। মসিগী মথক্তা ইথানোল শকশোয় শোয়দনা লৈগদৌরিবা ও.এম.সি.শিংনা মথংগী চহী ১০ ফাওবদি ইথানোল লৈননবা থাজবা পীরে‍। অসুম্না পায়খৎকদৌরিবা ইথানোল প্রোজেক্তশিং অসি কান্ননিংঙাই ওই‍।

স্কিম অসিনা অহেনবা চিনিশিং ইথানোল শুংবদা শীজিন্নহনবতা নত্তনা লৌমীশিংদা মখোয়গী মহৈ মরোং মখল মখল থাহন্নবা, চু অমসুং ফৌগা চাংদম্নবা ঈশিং হন্থনা চঙবা চুকাক্নচিংবা মহৈ মরোংশিং থাহন্নবা পুক্নিং থৌগৎকনি‍। মসিনা তোঙান তোঙানবা ফীদস্তোকশিংদগী ইথানোল পুথোকপগী চাং হেনগৎহন্দুনা পেত্রোলদা ইথানোল য়ানশিনবগী পান্দম অদু ফংহনগনি অমদি মপানদগী পুশিল্লকপা শুংদোক্ত্রিবা থাউদা তাংবগী ফীভম হন্থহন্দুনা মরোমদোম লেপচবা ভারতকী পান্দম ফংবদা মতেং ওইগনি‍। অনৌবা দিস্তিলরীশিং লিংখৎপনা মহৈ মরোংগী দিমান্দ হেনগৎহনবতা নত্তনা লৌমীশিংদা মখোয়গী মহৈ মরোংশিংগী হেন্না ফবা মমল ফংহন্দুনা লৌমীশিংগী শেন্থোকসু হেনগৎহনগনি‍।

চু অমসুং ইথানোল মরুওইনা স্তেত অহুম উত্তর প্রদেশ, মহরাস্ত্র অমসুং কর্নাতকাদা পুথোকই‍। হায়রিবা স্তেত অহুমসিদগী অরাপ্পা স্তেতশিংদা ইথানোল পুবদা পুথোক পুশিনগী শেল য়াম্না চঙই‍। লৈবাক শিনবা থুংনা মরু মরাংদা য়ুম্ফম ওইবা দিস্তিলরীশিং লিংখৎপনা ইথানোল মফম শিনবা থুংনা পুথোকপা ঙমহন্দুনা পুথোক পুশিনগী শেলজঙ য়াম্না হন্থহন্দুনা ব্লেন্দিংগী পান্দম ফংবা থিন্থবআ কোকহনগনি অমদি লৈবাক শিনবা থুংনা লৈরিবা লৌমীশিংদা কান্নহনগনি‍।

লৌউ শিংউবগী শেন্মিৎলোনগী ফীভম ফগৎহন্নবা, মপান্দগী পুশিল্লকপা ফোসিল ফ্যুলদা তাংবা হন্থহন্নবা শুংদোক্ত্রিবা থাউ পুশিল্লকপগী বিলদা ফোরেন এক্সচেঞ্জ হন্থহন্নবা অমদি নুংশিৎ মোৎশিলহনবা হন্থহন্নবা লৈঙাক অসিনা ২০২২ ফাওবদা পেত্রোলদা ইথানোল চাদা ১০ য়ানশিন্নবা অমদি ২০৩০ ফাওবদা চাদা ২০ য়ানশিন্নবা পান্দম থম্লি‍। চৎলিবা ইথানোল সপ্লাই তৌবগী চহী ২০২০-২১সিদা চাদা ৮.৫গী চাংদা য়ানশিনবগী থাক য়ৌবা ঙম্ননবা ও.এম.সি.শিংদা ইথানোল লিতর করোর ৩২৫রোম সপ্লাই তৌবা য়াই হায়ন পানরি‍। ইথানোল লিতর করোর ৪০০ সপ্লাই তৌদুনা ২০২২ ফাওবদা চাদা ১০গী চাং য়ানশিনবগী পান্দম ফংবা ঙমগনি হায়বা থাজরি‍।

চিনিগী সেক্তরদা ঙাক্লৌ পীননবা অমদি চু থারিবা লৌমীশিংগী ইন্তরেস্ত ঙাক্তুনা থম্ননবগীদমক লৈঙাক্না বি-হেভী মোলাস, চুহিং, চিনি সাইরপ অমসুং চিনিদগী ইথানোল পুথোকপসু য়াহল্লি; অমদি সি-হেভী মোলাস, বি-হেভী মোলাসতগী পুথোকপা ইথানোল অমসুং চুহিং/চিনি/চিনি সাইরপ্তগী পুথোকপা ইথানোলগী রিম্যুনরেতিব মমলসু লেপথোক্লি‍। থাউগী থাক্কী ইথানোল পুথোকপগী চাং হেনগৎহন্নবগীদমক লৈঙাক অসিনা দিস্তিলরীশিংদা চুজাক; অমসুং ফুদ কোর্পোরেসন ওফ ইন্দিয়াদগী ফংবা চেঙদগী ইথানোল পুথোক্নবগীদমকসু পুক্নিং থৌগৎলি‍।

হৌজিক্তি পেত্রোলদা ইথানোল চাদা ২০ য়ানশিনবগী পান্দম ২০২৫ ফাওবদা ওইনা য়ৈখৎখ্রে‍। ২০২৫ ফাওবদা চাদা ২০ য়ানশিনববগী পান্দম ফংননবা অমদি কেমিকেল অমসুং অতৈ সেক্তরশিংগী মথৌ তাবা পীবা ঙম্নবগীদমক অল্কোহোল/ইথানোল লিতর করোর ১২০০রোমগী ময়াদা মথৌ তাগনি; মসিগী মনুংদা লিতর করোর ৯০০দি চাদা ২০ ইথানোল য়ানশিন্নবগীদমক মথৌ তাগনি অমদি লিতর করোর ৩০০না কেমিকেল অমসুং অতৈ সেক্তরশিংগীদমক মথৌ তাগনি‍। অপুনবা মথৌ তারিবা লিতর করোর ১২০০সিগী মনুংদগী লিতর করোর ৭০০না চিনিগী ইন্দস্ত্রীশিংনা পীবা মথৌ তাই অদুগা অতোপ্পা লিতর করোর ৫০০ অমনা চীঞ্জাক মরুদা য়ুম্ফম ওইবা দিস্তিলরীশিংদগী সপ্লাই তৌবা মথৌ তাগনি‍। চিনিগী ইন্দস্ত্রীনা ইথানোল লিতর করোর ৭০০ পুথোক্নবগীদমক মেত্রিক তন লাখ (এল.এম.তি.) ৬০রোমগী অহেনবা চিনি ইথানোল শুংবরোমদা থৈদোরকপা মথৌ তাগনি অমদি মসিনা চিনি হেন্দুনা লৈবগী ৱাফমসু কোকহন্দুনা চিনিগী ইন্দস্ত্রীশিংনা থেংনরিবা অহেনবা চিনি থম্ফমগী খুদোংচাদবা কোকহন্দুনা চিনি মিলশিংনা শেন ওন্থোকপগী চাং হেনগৎহনগনি অমদি মদুনা মরম ওইরগা মখোয়না অমুক চু থারিবা লৌমীশিংদা শেল মতম চানা পীথোকপা ঙমহনগনি‍। চাউরাক্না চু থাবা লৌমী করোর ৫রোম অমদি মখোয়গী ইমুং মনুং অমসুং চিনি মিলশিংদা অমদি অতৈ মরী লৈনবা থবকশিংদা থবক শুরিবা শিন্মী লাখ ৫রোম্না মসিদগী কান্নবা ফংগনি‍। চেং হৱাইদগী ইথানোল/অল্কোহোল লিতর করোর ৫০০ পথোক্নবগীদমক চেং হৱাই এল.এম.তি. ১২৫রোম মথৌ তাগনি; অসুম্না মশিং হেন্না শীজিন্নরকপা অসিনা লৌমীশিংদা মখোয়গী পোত্থোকশিংগী মমল হেন্না ফংহন্দুনা অমদি শোয়দনা লৈগদবা মীওই ফংহন্দুনা হেন্না কান্নহনগনি; অমদি লৈবাক শিনবা থুংনা লৌমীশিংগী শেন্থোক হেনগৎহনগন‍ি‍।

****