অত্মানির্ভর ভারতকী মখাদা, ভারতনা মখল কয়াগী ঙাক-শেনগী খুৎলায়শিং অমসুং মিসাইলশিং পুথোকপা ঙম্বগী থৌনা হেনগৎলক্লি। অকাস মিসাইল অসি লৈবাক অসিগী মশাগী ওইবা মচাক-মথুম অমসুং তেক্নোলোজি চাদা ৯৬ হেন্না শীজিন্নদুনা পুথোকপা মরুওইবা মিসাইল অমনি।

অকাস অসি লৈমায়দগী নোংথক্তা কিলোমিতর ২৫ শান্না কাপ্পা ঙম্বা মিসাইল অমনি। মিসাইল অসি ২০১৪দা ইন্দিয়ান এয়র ফোর্সতা অমসুং ২০১৫দা ভারত লান্মীদা শীজিন্নবা হৌখি।

মিসাইল অসি সর্বিসশিংনা শীজিন্নবা হৌরবা মতুংদা, মালেমগী একজিবিসনশিং/দিফেন্স এক্সপো/এরো ইন্দিয়াদা মরুপ-মপাং ওইবা লৈবাকশিংনা অকাস মিসাইল লৈনিংবগী অপাম্বা উৎখি। তোঙান-তোঙানবা লৈবাকশিংগী আর.এফ.আই/আর.এফ.পিদা ভারতকী কম্পেনিশিং শরুক য়ানবা খুদোংচাবা মন্ত্রীমন্দলগী অয়াবা অসিনা পীগনি।

হৌজিক ফাওবগী ওইনা, ভারতনা মপান্দা য়োল্লিবা দিফেন্সকী পোৎলমশিংগী মনুংদা পার্তশিং/কম্পোনেন্তশিং য়াওরি। অচৌবা খুৎলায়শিং মপান্দা য়োনবগী চাং য়াম্না নেম্লি। মন্ত্রীমন্দলনা লৌরিবা ৱারেপ অসিনা লৈবাক অসিগী ঙাক-শেনগী পোৎথোকশিং ফিবম ফগৎহনবা অমসুং মখোয় মালেমগী ওইনা চাংদম্নবদা মতেং পাংগনি।

মপান লৈবাকশিংদা য়োন্নবা অকাস মিসাইল অসি হৌজিক ভারতকী লান্মীশিংনা শীজিন্নরিবা সিস্তেম অসিদগী খেন্নগনি।

অকাসকী মথক্তা, অচৌবা প্লেতফোর্মশিং হায়বদি কোস্তেল সর্ভিলিয়েন্স সিস্তেম, রাদারশিং অমসুং এয়র প্লেতফোর্মশিং লৈনিংবগী অপাম্বা লৈরে। অসিগুম্বা প্লেতফোর্মশিং মপান্দা য়োন্নবা অথুবদা অয়াবা পীনবা দিফেন্স মিনিস্তর, এক্সতর্নেল এফেয়ার্স মিনিস্তর অমসুং নেসনেল সেকুরিতি এদভাইজর য়াওবা কমিতি অমা শেম্লে।

কমিতি অসিনা লৈবাক অসিনা পুথোকপা অচৌবা প্লেতফোর্মশিং তোঙান-তোঙানবা লৈবাকশিংদা য়োন্নবা অয়াবা পীগনি। সরকার অমদগী সরকার অমদা য়োন্নবগী লম্বী য়াওনা মপান্দা থাদোক্নবা তোঙান-তোঙানবা লম্বীশিং কমিতি অসিনা থিদোক্কনি। য়ু.এস.দোল্লর বিল্লিয়ন ৫গী ঙাক-শেনগী খুৎলায়শিং মপান্দা য়োন্নবগী পান্দম ফংনবা অমসুং মরুপ-মপাং ওইবা লৈবাকশিংগা লৈনরিবা মরীশিং ফগৎনবা মমল য়াম্বা ঙাক-শেনগী প্লেতফোর্মশিং মপান্দা থাদোক্নবা মিৎয়েং চঙনবা ভারত সরকারগী অপাম্বা লৈরি।

*****