কেন্দ্রগী হকশেল অমসুং য়াইফ-য়ুম্বাল মন্ত্রী দা. হর্শ বর্ধন্না ঙসি ভারতকী অহানবা ন্যুমোকোক্কল কঞ্জুগেৎ বেক্সিন (পি.সি.ভি.) পুথোকখ্রে। বেক্সিন “ন্যুমোসিল” অসি সিরম ইন্সতিত্যুত ওফ ইন্দিয়া প্রাইবেৎ লিমিতেদ (এস.আই.আই.পি.এল.)না বিল এন্দ মেলিন্দা গেৎ ফাউন্দেসনগুম্বা পার্তনরশিংগা লোইননা চুংশিন্নদুনা দিবেলপ তৌখি।

এস.আই.আই.পি.এল.না মাগী দোজশিং অসিনা মালেমগী খ্বাইদগী চাউবা বেক্সিনশিংগী মেন্যুফেকচর্চ ওইবা অমসুং ভারতকী শেন্মীৎলোনদা লৌখিবা থৌদাং অদুবু শক খঙলদুনা, দা. হর্শ বর্ধন্না হায়খি সিরম ইন্সতিত্যুতকী বেক্সিনশিং অসি লৈবাক ১৭০দা শীজিন্নৈ অমদি মালেমগী য়ুমথোং অমদা অঙাং অমদি মেন্যুফেকচর্রগী বেক্সিন অসিনা ইম্ম্যুনাইজ তৌই। মহাক্না মীয়ামদা এস.আই.আই.পি.এল.না ভারত সরকারদগী কোবিদ-১৯ লাইচৎকী লোকদাউন মনুংদা প্রধান মন্ত্রী শ্রী নরেন্দ্র মোদীগী ‘আত্মানির্ভর ভারত’কী মঙলান অসিগা ইরোইননা দেবেলপ তৌখি অমদি অহানবা লমদম অসিগী ন্যুমোকোক্কল কঞ্জুগেৎ বেক্সিন (পি.সি.ভি.) অসিগী লাইসেন্স ফংখি। মহাক্না হকশেল অমসুং য়াইফ-য়ুম্বাল মন্ত্রালয়না পি.সি.ভি.দা ভারতনা মরোমদোম লেপ্পা ঙমজনবা হোৎনবদা শীংথানিংঙাই ওইনা হোৎনখি হায়না ফোঙদোকখি।

এস.আই.আই.পি.এল.না ভারতকী মথৌ তাবা বেক্সিন অমা পুথোকপদা মাইপাকপগী মতাংদা দা. হর্শ বর্ধন্না হায়খি, “সিরম ইন্সতিত্যুতকী অহানবা লমদম অসিগী ন্যুমোকোক্কল কঞ্জুগেৎ বেক্সিন অসি কৈথেলদা “ন্যুমোসিল”গী ব্রান্দগী মমিংদা সিঙ্গল দোজ (ভাইএল অমসুং প্রি-ফিল্দ সীরিঞ্জ) অমসুং মল্তিদোজ (ভাইএল) প্রজেন্তেসনশিংদা অহোংবা মমল অমদা ফংহনগনি । ন্যুমোসিল অসি রেন্দমাইজ কন্ত্রোল্দ ক্লিনিকেল ত্রাইএল ৫দা পাক শন্না ইভাল্যুএৎ তৌখি অমদি  তোঙান তোঙানবা বেক্সিনেসন সেদ্যুলশিং শীজিন্নদুনা অহল, অঙাং অমসুং পোকপদা ঙাইরিবা অঙাংশিংদা ন্যুমোসিল অসি থাদুনা ভারত অমসুং অফ্রিকাগী মশিং য়াম্লবা মীয়ামদা কাপ্পা ন্যুমোকোক্কল বেক্সিনশিং লাইসেন্স পীখিবদা মসি খুদোংথিনীংঙাই ওইদে অমসুং ইম্ম্যুনোজেনিসিতী ওই হায়না উৎখি। “ক্লিনিকেল ত্রাইএলশিংগী মনুংদা, ন্যুমোসিল অসি খুদোংথিনীংঙাই ওইসে অমদি ন্যুমোনিয়া লাইনাদগী মপুং ফানা ঙাকথোকপা ঙম্মি হায়বা খঙখি অমসুং মসিদা য়ুম্ফম ওইরগা সবজেক্ত এক্সপর্ত কম্মিতি (এস.ই.সি.)দগী অয়াবা ফংদুনা জুলাই ২০২০দা দ্রগস কন্ত্রোলর জেনরেল (ইন্দিয়া)না লাইসেন্স পীখি,” হায়না মহাক্না মখা তাখি।

প্রধান মন্ত্রীনা আত্মানির্ভর ভারতকী হোৎনখিবা অমসুং ‘মালেমগীদমক্তা ভারত্তা শাবা’গী মঙলান অসিগী মতাংদা ৱা ঙাংলদুনা, দা. হর্শ বর্ধন্না হায়খি, “ন্যুমোসিল অসি ভারতনা রিসর্চ অমসুং দেবেলপমেন্ত অমসুং হাই এন্দ সোফিস্তিকেতেদ বেক্সিনশিং মেন্যুফেচরিং তৌবা ঙম্বগী মতিক ময়াই অদুগী খুদম অমনি। তশেংবদি মসি কোবিদ-১৯ লাইচৎ মনুংদা ইতিহাসিক ওইবা পন্দুপ অমা ফংখিবা অসি লৈবাক অসিগী চাউথোকচনীংঙাই ওই মরমদি হৌজিক ফাওবদা ঐখোয়না মপালদা শাবা মমল য়াম্না ৱাংবা ন্যুমোকোক্কল কঞ্জুগেৎতা মপুং ফানা মীপাল তাংদুনা লাকখি।” মহাক্না হিরম অসিদা মীয়ামদা ন্যুমোনিয়া অসি মালেম শিনবা থুংনা চহি মঙাগী মখাদা লৈবা অঙাংশিং শীবগী মরম ওইরিবা অমত্তা ঙাইরবা লাইনা অমনি মসিনা মালেমদা অঙাং মশিং লাখ ১০গী ময়াদা শীহল্লি।

লৈবাক অসিগী সাইন্তিফিক অমসুং মেদিকেল ফ্রেতর্নিতীবু থাগৎপা ফোঙদোক্লদুনা মন্ত্রীনা হায় “ সিরম ইন্সতিত্যুত ওফ ইন্দিয়া অমসুং অতোপ্পা সাইন্তিফিক অমসুং মেদিকেল কম্ম্যুনিতী পুম্বদা লৈরিবশিংনা তুংদা লাক্কদবা মতমদা পুন্সি কনগদবা ভেক্সিন কয়ামরুম দিবেলপ তৌনবা হোৎনরক্কনি হায়না ঐহাক্না থাজবা থম্মি’’।

দা.মনোহর অগনানি, এদিস্নেল সেক্রেতরী (এম.ও.ঐচ.এফ.দবল্যু.) অমসুং মন্ত্রালয় অসিগী  অতোপ্পা মকোকথোংবা ওফিসিএলনা থৌরম অসিদা শরুক য়াখি।

পূনাৱাল্লা গ্রুপ ওফ ইন্দস্ত্রিজগী চিয়র্মেন অমসুং সিরম ইন্সতিত্যুত ওফ ইন্দিয়া প্রাইভেৎ লিমিতেদ (এস.আই.আই.পি.এল.)গী ফাউন্দর দা .সাইরস পূনাৱাল্লা, এস.আই.আই.পি.এল.গী চীফ এক্সিক্যুতিব ওফিসর শ্রী আদর পূনাৱাল্লাসু শরুক য়াখি।

****