কেন্দ্রগী এজুকেসন মন্ত্রী শ্রী রমেশ পোখ্রিয়াল ‘নিশাঙ্ক’না নাগপুরগী বিসবেস্বারায়া নেস্নেল ইন্সতিত্যুৎ ওফ তেক্নোলোজীগী ১৮শুবা কনভোকেসনগী থৌরমদা মহৈরোইশিংদা ভর্চুএলগী খুত্থাংদা ৱা ঙাংখ্রে। এজুকেসনগী রাজ্য মন্ত্রী, শ্রী সঞ্জয় ধোত্রেনা থৌরম অদুগী ইকায় খুম্নরবা মীথুংলেন ওইখি। এল. অমসুং তি.গী দিফেন্স ব্যুজিনেস অমসুং এল. অমসুং তি.-এন.এক্স.তি.গী মতম পুম্বগী দাইরেক্তর অমসুং সেনিয়র একজেক্যুতিব ভাইস প্রসিদেন্ত, শ্রী জে.দি. পাতিলসু থৌরম অদুদা শরুক য়াখি।

থৌরম অসিগী অথোইবা মীথুংলেন ওইখিবা শ্রী রমেশ পোখ্রিয়াল ‘নিশাঙ্ক’না মহাক্কী ভিদিওগী ৱারোল অদুদা মহৈরোই অমসুং মখোয়গী মমা-মপাশিংবু থাগৎপা ফোংদোকখি। মহাক্না লৈবাক অসিদা লৈরিবা দি. ৩গী মতাংদা পনখি। দিমোক্রেসী, দেমোগ্রাফিক্স অমসুং দিমান্দ। মহাক্না মহৈরোইশিংনা হায়রিবা দি. ৩ অসি শিজিন্নদুনা লৈবাক অসিবু আত্মানির্ভর ওইহন্দুনা দোল্লর ত্রিলিয়ন ৫গী শেন্মিৎলোন ওইহন্নবা হোৎননবা হায়খি। লৈবাক অমা শেমগত-শাগৎপদা ইঞ্জিন্যারিংনা লৌরিবা থৌদাংগী মতাংদসু মহাক্না মিৎয়েং চঙখি। ভারত সরকারনা হৌদোকখিবা দিজিতেল ইন্দিয়া, স্তার্ত-অপ ইন্দিয়া, মেক ইন ইন্দিয়ানচিংবা স্কিমশিংগী মতাংদা মহাক্না পাউদমখি। মহাক্না মহৈরোইশিংনা অনৌবা ভারত – স্বচ্ছ ভারত, স্বস্থ ভারত অমসুং সশক্ত ভারত অমা শেম্নবসু হায়খি। মন্ত্রীনা খুন্নাই অমসুং লৈবাক্কীদমক্তা শক্নাইরবা তেংবাংবগী থৌওং কয়া পাংথোকখিবা এল্মনি খরগী মতাংদা মহৈরোইশিংগী পুক্নিং চীংশিনখি। দাঃ পোখ্রিয়ালনা ইন্সতিত্যুৎ অসিনা কোরোনাগী লাইচৎ মনুংদা পাংথোকখিবা থবক-থৌরম কয়াবুসু থাগৎপা ফোংদোকখি।

শ্রী সঞ্জয় ধোত্রেনা মহাক্কী ৱারোলগী মনুংদা মহৈরোইশিংদা মখোয়গী মমা-মপাশিংনা মখোয়বু ঙসিগী মশক থোক্লবা থাক অসিদা য়ৌহল্লক্নবা কত্থোকপগী থৌওংশিংবু নীংশিংগদবনি হায়খি। মহাক্না মহৈরোইশিংনা হৌজিক্তি মখোয়না মহৈ-তম্লিঙৈদা তমখিবা ৱাখল্লোন অমসুং লৌশিং কয়া অদু শিজিন্নবগী মতম লাক্লবনি হায়খি। হৌখিবা চহি খরা অসিদা অয়াঙবা খোঙজেলদা হোংলক্লিবা ভারতকী শক্তাক অসিগী মতাংদসু মন্ত্রীনা মহৈরোইশিংগী পুক্নিং চীংশিনখি। মহাক্না মহৈরোইশিংনা চাংয়েংনবগী থাক ৱাংলবা মালেম অসিগী মরক্তা মখোয়গী ভেল্যুশিং মাঙদনা লৈহন্নবসু হায়খি।

মসিগী ১৮শুবা কনভোকেসনগী মনুংদা ভি.এন.আই.তি.না মখাগীশিং অসি য়াওনা পুন্না দিগ্রী ১১৩৪ য়েন্থোকখিঃ

• • দাক্তর ওফ ফিলোসোফী ৬১
  • মাস্তর ওফ তেক্নোলোজী ২৬৮,
  • মাস্তর ওফ সাইন্স ৯৪,
  • তোঙান-তোঙানবা ইঞ্জিন্যারিংগী কাঙলুপশিংদা বেচলর ওফ তেক্নোলোজী ৬৪৮ অমসুং
  • বেচলর ওফ আর্কিতেকচর ৬৩

হন্দক্কী চহিসিদা ভি.এন.আই.তি.না মহৈরোই অমসুং রিসর্চ স্কোলরশিংদা মেদল ৪৫, মনা-মথুম কয়া অমগা পীদুনা মখোয়না মহৈ তম্বদা হৈথোই শিংথোইদুনা মাই পাকপগীদমক্তা ইকায় খুম্নখি।

হন্দক্কী চহিগী ইকায় খুম্ননীংঙাই ওইরবা সর বিসবেস্বারায়া মেদল অসি বি.তেক. প্রোগ্রামশিংগী হীরম খুদিংদা খ্বাইদগী ৱাংবা জি.পি.এ. ফংখিবা কম্প্যুতর সাইন্স ইঞ্জিন্যারিংদা বি.তেক. তৌখিবা অব্দুল সত্তর মোহম্মদ অশ্রফ মপারাদা পীখি। মহাক্না লৈখিদ্রবা শ্রী এন.জি. জোশী মনা, লৈখিদ্রবা দাঃ এ.জি. পাইথঙ্কর মেদল অমসুং লৈখিদ্রবা মহামাহোপাধ্যায় পদ্মভিবুশন দাঃ ভি.ভি. মিরাশী মেদলসু ফংখি। কম্প্যুতর সাইন্স ইঞ্জিন্যারিংগী বি.তেক.তা খ্বাইদগী ৱাংবা সি.জি.পি.এ. ফংবা মীওইদা পীবা একাদমিক এক্সেলেন্স প্রাইজ অমসুং লৈখিদ্রবা শ্রী পরাগ তিজারে মনা অনি অসিসু মহাক্না ফংখি।

সিবিল ইঞ্জিন্যারিংদা বি.তেক. তৌবা মহৈরোই অমা, মিস চেত্না স্রিভাস্তবনা মেদল অমসুং মনা মশিং খ্বাইদগী য়াম্না ফংখি। মহাক্না ইন্সতিত্যুৎ মেদল, একাদমিক এক্সেলেন্স প্রাইজ, ৱাত্বে এজুকেসন ত্রস্ত প্রাইজ, লৈখিদ্রবা শ্রী বিষ্ণু দিৱাকর এলিএজ ভাওসাহেব গিজ্রে প্রাইজ, পি.জে. সহাস্ত্রাবুধে মেমোরিএল প্রাইজ, লৈখিদ্রবা শ্রী সি.তি. ঘরপুরে প্রাইজ, লৈখিদ্রবা প্রোফঃ এম.এস. জোশী মেদল, লৈখিদ্রবা অমোল কৃষ্ণরাও কৱাদকর মেদল অমসুং সিবিল ইঞ্জিন্যারিংগী বি.তেক্তা খ্বাইদগী ৱাংবা সি.জি.পি.এ. ফংবগী লৈখিদ্রবা শ্রী সাদিক বালি মেদল ফংখি। মহাক্না এদভান্স স্ত্রকচরেল এনালাইসিসকী সবজেক্ততা খ্বাইদগী ৱাংবা মার্ক ফংবগীদমক্তা দাঃ এস.এস. অমিন প্রাইজসু ফংখি। বি.তেক. প্রোগ্রামশিংগী হীরম খুদিংগী মনুংদা সি.জি.পি.এ.গী মার্ক অনিশুবা খ্বাইদগী য়াম্না ৱাংনা ফংবগীদমক্তা লৈখিদ্রবা শ্রী বিশ্রমজী জমদারবু নীংশিংবা ওইনা ইনৌ নৌনা শেমখিবা মনা অসিসু মিস চেত্নানা ফংখি।

বি.তেক. (মেতাল্লর্জিকেল অমসুং মেতরিএল ইঞ্জিন্যারিং)কী সি.জি.পি.এ.গী খ্বাইদগী অনিশুবা ৱাংবা মার্ক ফংবগীদমক্তা পীনবা নৌনা শেমখিবা লৈখিদ্রবা শ্রী বিশ্রমজী জমদার মেদলনা সাগর কুল্করনীনা ফংখি। থৌরম লোইশিল্লকপা ওইনা, রেজিস্ত্রার, দাঃ এস.আর. শাথেনা থাগৎ ৱাহৈ পীবগী থৌওং হৌদোকখি।

বি.ও.জি.গী চেয়রমেন অমসুং ভি.এন.আই.তি.গী দাইরেক্তর, প্রোফঃ পি.এম. পাদোলেনা মহাক্কী ৱারোলগী মনুংদা ইন্সতিত্যুৎকী রীপোর্ত লান্থোকখি। মহাক্কী ৱারোলগী মনুংদা, মহাক্না ইন্সতিত্যুৎ অসিগী মাই পাকপশিংগী মতাংদা মীয়ামগী পুক্নিং চীংশিনখি। মহাক্না ইন্সতিত্যুৎ অসিনা ইন্দস্ত্রী-ইন্সতিত্যুৎ-ইন্তরএক্সন্দা চাউনা থাজবা থম্মি অমসুং এয়রক্রাফ শাবা ফ্রান্সকী দাসাউল্ৎ এভিএসন য়াওনা ইন্দস্ত্রী কয়া অমগা সেন্তর ওফ এক্সেলেন্স অমসুং এক্সেলেন্সকী করিকলম শানবা, ইন্দস্ত্রী ৪.০গী লমদা সিএমেন্সকা লোয়ননা সেন্তর ওফ এক্সেলেন্স (সি.ও.ই.) শাবা অমসুং মেদিকেল ইঞ্জিন্যারিংগী মতাংদা পাংথোক্লিবা রিসর্চ কয়াবু মপাঙ্গল হেন্না কলহন্নবা নাগপুরগী এমসকগী মরক্তা এম.ও.য়ু. কয়াগী খুৎয়েক পীনখ্রে হায়না পাউদমখি। মহাক্না মখা তানা হায়খিবদা, হৌখিবা চহিদা ইন্সতিত্যুৎ অসিনা মসিগী মমাংগী চহিদগী ১৮৫%গী চাংদা হেনগত্তুনা তোঙান-তোঙানবা লুপশিংদগী লুপা করোর ৫৫গী শেনফমগী আর. অমসুং দি.গী প্রোজেক্ত কয়া অমসু ফংখ্রে হায়না হায়খি।

শ্রী জে.দি. পাতিলনা মহৈরোইশিংদা ৱা ঙাংখিবগী মনুংদা লৈবাক অমসুং খুন্নাই অসিনা মখোয়বু থাক অসিদা য়ৌহনবদা তেংবাংবা ওইনা মখোয়দা পীখিবা কয়া অমগী লমন শিংবগী মতম অদু হৌজিক ওইরক্লে হায়খি। মহাক্না মহৈরোইশিংদা অপুনবগী ৱাখল চেনবা অমসুং খুন্নাই অমসুং লৈবাক অসিগীদমক্তা অচুম্বা থৌওং পাংথোক্নবা মখোয়গী থৌদাংশিংগী মতাংদসু মখোয়দা নৌহৌননা নীংশিংহনখি। মহাক্না মহৈরোইশিংদা মখোয়গী ইন্সতিত্যুৎ অসিনা মখোয়বু ঙসিগী নুমিৎ অসিদা ওইহল্লিবা মশাগী ফিভম অসি ওইহনবগীদমক্তা ইন্সতিত্যুৎ অসিগীদমক্তা করি তৌফম থোকই হায়বা খন্দুনা য়েংউ হায়না হায়খি।

******