লৈবাক অপুনবদগী পুনবীররিবা লৌমী ইচিল-ইনাওশিং, থৌরম অসিদা লৈবাক অসিগী তোঙান তোঙানবা মফমদগী পুনবীররিবা কেন্দ্র সরকারগী মন্ত্রীমন্দল, রাজ্য সরকাশিংগী মন্ত্রীশিং, পঞ্চায়ত্তগী হৌরগা পার্লিয়মেন্ত ফাওবা খল্লবা মীয়ামগী মীহুৎশিং অমসুং খুঙ্গং খুদিংমক্তা চৎতুনা লৌমীশিংগী মরক্তা ফম্বীরিবশিং পুম্নমক্তা ঐনা অদোম্বু অমসুং ঐগী লৌমী ইচিল-ইনাওশিংবু ঐগী মায়কৈদগী খুরুমজরি।

লৌমীশিংগী পুন্সিদা নুংঙাইবা অসিনা, ঐখোয় পুম্নমক্কী পুন্সিদা নুংঙাইবা হেনগৎহল্লি অমসুং ঙসিগী থৌরম অসিদি য়াম্নমক শেংলবা নুমিৎ অমসুনি। লৌমীশিংনা ঙসি সম্মান নিধি ফংলিবা অসিগা লোইননা ঙসিগী নুমিৎ অসি তাঞ্জা কয়াগী ইতিনফম ওইনসু লাক্লি। ইরৈবাকচা পুম্নমক্তা ঙসি খৃস্তমসকীসু হন্না হন্না নুংঙাই পাউজেল পীজরি। খৃস্তমসকী থৌরম অসিনা, মালেমদা নুংশিবা, ইংথবা অমসুং শান্তি অমসুং ইং তপ্পা পুরকপা ওইরসনু।

মরূপশা,

ঙসি মোক্ষদা একাদশীনি, গীতা জয়েন্তিনি। ঙসি অসিমক ভারত রত্ন মহামনা মদন মোহন মালবীয়জীগী মপোক নুমিৎসুনি। লৈবাক অসিগী অফাওবা কর্ময়োগী, ঐখোয়গী ইথিল লৌজফম ওইরিবা মীশক লাইওইখ্রবা অতল বিহারী ভাজপেয়ীজীগীসু ঙসি মপোক নুমিৎনি। মহাকপু নীংশিংদুনা ঙসি লৈবাক অসিনা গুদ গবর্নান্স দেসু পাংথোক্লি।

মরূপশা,

অতলজীনা গীতাগী পাউজেলশিংগী মতুং ইন্না পুন্সি হিংননবা লেপ্তনা হোৎনখি। গীতাদা হায়রি মদুদি স্বে স্বে কর্মনি অভিরতঃ সংসিদ্ধিম লভতে নরঃ। হায়বদি মথৌ নীংথিজনা পাংথোকপা অদুনা মঙাল ফংই। অতলজীনসু মহাক্কী পুন্সি চুপ্পা লৈবাক্কীদমক্তা মহাক্কী থবক অদু থমোই শেংনা পাংথোক্নবা কৎথোকখি। খুঙ্গং অমসুং লাইরবশিংগী চাউখৎপদা অতলজীনা মরুওইবা ওইনা লৌখি। প্রধান মন্ত্রী শরক য়োজনাবু ওইরো নত্ত্রগা স্বর্নিম চতুর্ভুজ য়োজনাবু ওইরো, অন্ত্যোদয় অন্ন য়োজনাবু ওইরো নত্ত্রগা সর্ব শিক্ষা অভিয়ানবু ওইরো, লৈবাক অসিগী পুন্সিদা অফবা অহোংবা পুরক্কদা খোংথাং কয়া অমা অতলজীনা পায়খৎপীরম্মি। ঙসি লৈবাক অপুনবা অসিনা মহাকপু নীংশিংলি, অতলজীবু খুরুমজরি। ঙসি লৈবাক অসিনা পুরক্লিবা লৌউ-শিংউগী রিফোর্মশিং অসিগী লময়ানবসু অমরোমদা অতল বিহারী ভাজপেয়ীসু ওইরি।

মরূপশা,

পি.এম. কিসান সম্মান য়োজনা, য়োজনা অসি হেক হৌদোকখিবদগী লুপা করোর লাখ ১ লিশিং ১০দগী হেনবা শেনফম লৌমীশিংগী একাউন্তা য়ৌখ্রে অমসুং মসিবুনি গুদ গবর্নান্স হায়রিবসি। মসিনি তোক্নোলোজীগী থোংদা শিজিন্নখিবা গুদ গবর্নান্স। লুপা করোর লিশিং ১৮দগী হেনবা শেনফম মিৎকুপ্তা, মিৎকুপ খরগী মনুংদা লৌমীশিংগী বেঙ্ক একাউন্তা চুমদ্রিং চংখ্রে। রাজ্য সরকারশিংগী থোংদা লৌমীশিংগী ওনলাইন রেজিস্ত্রেসন তৌরবা মতুংদা, মখোয়গী আধার নম্বর অমসুং বেঙ্ক একাউন্তগী ভেরিফিকেসন তৌরবা মতুংদা থৌরাং অসি শেম্মি।

মরুপশা,

মখোয়না চহি ৩০-৩০ ফাওবা বঙ্গালদা পাল্লম্মি, অসিগুম্বা রাজনীতিগী ৱাখল্লোন অমা পুদুনা বঙ্গালবু কদাইদগী কদাইদা পুরক্তুনা মসিবু করি ফিভমদা থম্বীরিবনো, লৈবাক পুম্নমক্না খঙই অমসুং মমতাজীগী চহি ১৫ লিরবা ভাশন তারগদি খঙগনি মদুদি রাজনীতিগী ৱাখল্লোন অসিনা বঙ্গালবু কয়াদা মাং-তাকহনখ্রবনো। হৌজিক মখোয়শিং অসি করম্বা মীওইনো বঙ্গালদা মখোয়গী পার্তী লৈরি, মখোয়গী লুপ লৈরি, চহি ৩০ সরকার পায়রি, মীখোয়গী মীওই কয়াম্না লৈরমগনি? অমুক্কা হন্না মখোয় অসিনা লৌমীশিংগী লুপা লিশিং ২ ফংলিবা থৌরম অসি বঙ্গালগী মনুংদা খোংজং অমত্তা চংশিনখিদে, অদুবু অদোমগী থমোইদা লৌমীশিংগীদমক অদুক্কী মতিক মীনুংশি লৈরবা, বঙ্গালদা অদোমগী লমদমদা অদু ওইরবদি অদোম্না বঙ্গালদা লৌমীশিংদা অচুম্বা ৱায়েল ফংহন্নবা প্রধান মন্ত্রী কিসান সম্মান য়োজনাগী পৈশা অদু লৌমীশিংনা ফংননবা মসিগীদমক খোংজং করিগী চংশিন্দ্রিবনো? করিগী অদোম্না হৌজিক লাওরক্ত্রিবনো? অমসুং অদোম্না মদুদগী হৌগৎখিদুনা পঞ্জাব য়ৌখি, মতমদুদা ৱাহং হংলকই অমসুং নোংচুপ বঙ্গালগী সরকারসু য়েংবীয়ু অদোমগী রাজ্যদা অদুক্কী মতিক য়ামখ্রবা লৌমীশিংদা কান্নগদবা লৌমী লাখ ৭০দা শেনফম অসি ফংননবা, লুপা করোর লিশিং কয়া ফংননবা, মদু পীবদা মখোয়গী রাজনীতি পুশিল্লক্লিবা, অদুগা বঙ্গালদা লানফম শোক্নরিবা অদুনা পঞ্জাবতা চৎতুনা মীয়াম অদুগা লোইননা, মফম অসিদা লাক্লগা মখোয়গা অরোনবা ৱারী তৌনরি। গেম অদু লৈবাক অসিগী মীয়াম্না খঙলোইদ্রা?

মরূপশা,

রাজনীতিগী ইচেল অসিদা লৈবাক অসিগী মীয়াম্না মখোয়ু ইন্থোরকপদগী করিগুম্বা ইভেন্ত খরদি তৌরি, ইভেন্ত মেনেজমেন্ত ওইরি মরমদি কনানা সেল্ফী লৌনবা, কনানা ফোতো থেৎনবা, কনানা তি.ভি.দা উৎনবা অমসুং মখোয়গী রাজনীতি চৎননবা, হৌজিক লৈবাক অসিনা মখোয়শিং অদুসু উরে। মখোয় লৈবাক্কী মাংদা এক্সপোজ তৌরে। নোংচুপ বঙ্গালদা লৌমীশিংগী মাং-তাকপদা করিসু হায়খিদবা দল অদুনা দিল্লীগী মীয়ামদা অৱাবা পীরি। বঙ্গালবু মাং তাকহনখিবা দল অদুমক, ফিরাল অদুমক, ৱাখল্লোন অদুমক ওইরিবা মখোয়না লৈবাক্কী শেন্মিৎলোনবু মাং-তাকহন্নবা হোৎনরি অমসুং মদুসু লৌমীশিংগী মিংদা। কেরলদা মখোয়গী সরকার লৈরি, মদুগী মমাংদা চহি ৫০ চহি ৬০ ফাওবা পাল্লম্বা মখোয়গী সরকারনি। কেরলদা এ.পি.এম.সি. লৈতে, মন্দিশিং লৈতে। ঐনা, ফোতো নম্বগী থৌরম পাংথোক্লিবা মখোয়দা হংবা পাম্মি মদুদি কেরলদা খোংজং চংশিন্দুনা মফম অদুদা এ.পি.এম.সি. চৎনহল্লুদনা। পঞ্জাবকী লৌমীশিংবু লম্মাংনহন্নবগীদমক অদোমদা মতম ফংই, কেরলদা থৌরাং অদু লৈতে, থৌরাং অসি অফবনি হায়রগদি কেরলদা করিগী লৈত্রিবনো?

ইচিল-ইনাওশিং,

মখোয় অসিনা দেমোক্রেসীগী থাক অমত্তবু, পিরামীতর অমত্তবু য়াবা তৌদ্রি। মখোয়না শুপ্নগী মখোয়গী কান্নবা খক্তমক উরি অমসুং ঙাংলিবা ৱা পুম্নমক লৌমীশিংগীদমক্তা ওইদ্রি, লৌমীশিংগী মিংদা মখোয়গী ফিরাল পায়দুনা মশান্না অমা শান্নরিবা মখোয় হৌজিক অচুম্বা অসি তাবা তাই। পাউ-চে অমসুং মীদিয়াদা মফম শেম্দুনা রাজনীতিগী লম্পাক্তা মশাবু হিংজনবগীদমক্তা মনা-মশিংগী হিদাংক-লাংথক থিরি। অদুবু লৈবাক অসিগী লৌমীনা মখোয়বু মশক খঙখ্রে হৌজিক লৈবাক অসিনা লৌমীনা মখোয়বু হিদাক-লাংথক কৈদৌঙৈদসু পীররোই।

মরূপশা,

চহি কয়া সরকার পায়দুনা লাকখিবা মখোয়না লৌমীশিংবু মখোয়গী ফিভমদা অদুম্মক হুন্দোক্তুনা থম্বীখি। মীখল পাংথোকখি, সরকার শেমখি, রিপোর্ত লাকখি, অয়োগ শেমখি, ৱাশক কয়া শকউ, কাওথোকখো, তৌ, কাওথোকখো, মসি তৌদুনা লাকখি, অদুবু লৌমীশিংগী ফিভমদি অহোংবা লৈখিদে। মদুগী মরম্না করি ওইখি? লাইরবা লৌমী হেন্না লাইরবা ওইখি। লৈবাক অসিদা ফিভম অদুবু হোংদোকপা মথৌ তাখিদবরা? ঐগী লৌমী ইচিল-ইনাওশা, ২০১৪দা সরকার শেম্লবা মতুংদা, ঐখোয়গী সরকারনা অনৌবা এপ্রোচকা লোইননা থবক তৌবা হৌখি। ঐখোয়না লৈবাক্কী লৌমীগী অপীক অপীকপা অৱাবশিং অমসুং লৌউ-শিংউবু নৌথোকহন্নবা, মদুবু তুংলমচৎকী মথৌ তাবশিংগীদমক শেম শানবা, অনি অসিদা অমুক্তদা পুক্নীং চংখি। ঐখোয় য়াম্না তাখি।

মরূপশা,

মহৈ-মরোং য়োন্নবগীদমক্তা লৌমীশিংগী মন্দী অমখক্তা লৈগদবা নত্তে মখোয়দী অপাম্বা ওপ্সনসিং পীগদবনি, কৈথেল ফংহনগদবনি। ঐখোয়না লৈবাক অসিগী লিশিংদগী হেনবা মন্দীশিং ওনলাইনদা শম্নহনখি।

মরূপশা,

মখোয়না মখোয়গী লমদমদা অপুনবা পাঙ্গল অমা শেমদুনা থবক তৌবা ঙম্ননবা অপীকপা লৌমীশিংগী কাংলুপশিং শেমখি। ঙসি লৈবাক অসিদা লিশিং ১০দগী হেনবা ফার্মর প্রদ্যুসর ওর্গনাইজেস - এফ.পি.ও. শেম্ননবা খোংজং চংশিল্লি, মখোয়দা শেলগী তেংবাং পীরি। খুংঙ্গংগী মনাক মক্তদা স্তোরেজ, কোল্দ স্তোরেজ মসিগী অনৌবা খুদোংচাবা অহোংবা মমলদা ঐখোয়গী লৌমীশিংদা ফংহন্নবা, ঐখোয়গী সরকারনা মসিসু মরুওইবা ওইনা লৌরি।

মরূপশা,

ঐখোয়না লৌউ-শিংউগী তাইবংদা করি তৌরি, মসিগীদমক্তা লৈবাক অসিদা অনৌবা লৌউ-শিংউগী ইন্সতিত্যুসন লিংখৎনবগী পান্দম অসিদসু থবক তৌরি। হৌখিবা চহিশিংদা লৈবাক অসিদা অনৌবা লৌউ-শিংউগী ইন্সতিত্যুৎ কয়া অমা শারে, লৌউ-শিংউগী মহৈ-মশিংগী সীৎ হেনগৎহল্লে।

অমসুং মরূপশা,

লৌউ-শিংউগা মরী লৈনবা হোৎনরিবা ময়ামশিং অসিগা লোইননা ঐখোয়না অতোপ্পা পান্দম অমদসু থবক তৌরি। পান্দম অদুদি – খুঙ্গংদা লৈরিবা লৌমীশিংগী পুন্সি লাইথোকহনবনি।

মরূপশা,

ঙসি-ঙরাং অসি মীওই খরনা লৌমীগী লমগী মতাংদা তৌশিন্নবা অৱাবা উৎথোক্নরি। লৌমীশিংগী লম মৎপদা করম-করম্বা মিং মীয়ামগী মিং পাউ-চেদা লংত্রিক লংনা চোংথোক্লি, ঐখোয়না খঙই। মপু ওইবগী চে-চাং ৱাৎপনা মরম ওইদুনা লৌমীশিংগী ময়ুম-মকৈ অরানবা মওংদা লৌশিনকিখিবা মতম অদুদা মখোয় অদু কদাইদা লৈখিবগে? খুঙ্গংগী অপীকপা অমসুং ঙমখৈ নাইবা লৌমীশিংদা, লৌবুক্কী শিন্মীশিংবু হক অসিদগী অসুক কুইবা চহি কয়া অসি ফংহন্দনা কনানা থমখিবগে, মসিগী পাউখুম মখোয়গী মনাক্তা লৈতে। খুঙ্গংদা লৈবা ঐখোয়গী ইচিল-ইনাওশিংগীদমক্তা থবক অসি ঙসি পাংথোক্লি। হৌজিক খুঙ্গংদা লৌমীশিংবু, মখোয়গী ময়ুমগী, লমগী মেপ অমসুং কাংলোনগী ওইবা পাতা (চা-চাং) পীরি। তেক্নোলোজীগী মতেংদগী স্বামিত্ব য়োজনাগী মতুংদা হৌজিক খুঙ্গংগী লৌমীশিংবুসু লম অমসুং য়ুমগী মিংদা বেঙ্কতগী লোন লৌবা লাইহল্লে।

ঐগী নুংশিরবা লৌমী ইচিল-ইনাওশিং,

অদোম্না অদোমগী পোৎথোকশিং অদু অপাম্বা মফমদা য়োনবা য়ারে। অদোম্না হেন্না ফবা মমল ফংবা মফমদুদা অদোমগী পোৎথোক য়োনবা য়ারে। অদোম্না মিনিমম সপোর্ত প্রাইস হায়বদি এম.এস.পি.দা অদোমগী পোৎথোক য়োনবা পাম্বীবরা? অদোম্না মদু য়োনবা য়ারে। অদোম্না মন্দীদা অদোমগী পোৎথোক য়োনবা পাম্বীবরা? অদোম য়োনবা য়ারে। অদোমগী পোৎথোক অদু এক্সপোর্ত তৌবা পাম্ববরা? অদোম্না এক্সপোর্ত তৌবা য়ারে। অদোম্না মদু ত্রেদরদা য়োনবা পাম্বীবরা? অদোম্না য়োনবা য়ারে। অদোম্না অদোমগী পোৎথোক অদু অতোপ্পা রাজ্যদা য়োনবা পাম্বীবরা? অদোম্না য়োনবা য়ারে। অদোম্না খুঙ্গং অপুনবা অদুগী এফ.পি.আই.গী থোংদা অমত্তা ওইনা খোমজিন্দুনা পোৎথোক পুম্নমক অদু অমুক্তদা য়োনবা পাম্বীবরা? অদোম্না য়োনবা য়ারে। অদোম্না বিস্কুইৎ, চিপ্স, জেম, অতোপ্পা কঞ্জ্যুমর প্রদক্তশিংগী ভেল্যু চেনগী শরুক অমা ওইবা পাম্বীবরা? অদোম্না মসিসু তৌবা য়ারে। লৈবাক অসিগী লৌমীনা হক ময়াম অসি ফংবদা মসিদা করি লানবগে?

মরূপশা,

ঙসি অনৌবা লৌউ-শিংউগী রিফোর্মশিংগী মতাংদা মশিং থিঙমদনা অরানবা শন্দোক্লি। মীওই খরনা লৌমীশিংগী মরক্তা চম্ননবা পোকহল্লি মদুদি এম.এস.পি. লোইশিনখিগদৌরে। অদুগা খরনা তোকঙা শন্দোক্লি মদুদি মন্দিশিং থিংজিনখ্রগনি। ঐনা অদোম্বু অমুক্কা হন্না পুক্নীং চিংশিঞ্জরি মদুদি কাংলোন চৎনখিবা থা কয়া হৌখ্রে। অদোম্না ঐখোয়গী লৈবাক্কী মফম অমা হেক্তদা মন্দী অমা ফাওবা থিংজিনখিবগী পাউ তাবরা। অদুগা এম.এস.পি.গী মতাংদদি হনদক নুমিৎ খরনিদা সরকারনা মহৈ-মরোং কয়া অমগী এম.এস.পি.সু হেনগৎহনখ্রে। মসি লৌউ-শিংউগী রিফোর্ম মতুংদা তৌরিবনি, অনৌবা কাংলোনশিংগী মতুংদা তৌরিবনি। মসিদা নত্তনা, লৌমীশিংগী মতাংদা ৱা ঙাংলিবা মীওইশিং, খোংজংসু চংশিল্লিবা, মদুদা মীওই কয়া অমদি অশেংবা অমসুং লাঞ্জদ্রবা লৌমীশিংসু য়াওরি। পুম্নমক রাজনীতিগী ৱাখল্লোন চেনবা লুচিংবশিং ঙাক্তনি হায়বগী ৱা নত্তে মদুদা ইচম চমজবা লৌমীসু য়াওরি। মখোয়গী মনাক্তা চৎলগা তুমিন্না হংলুরবা মদুদি অদোমগী লৌফম কয়াম্না লৈবগে? করি পুথোকই/থাই? হন্দক্কী য়োল্লবরা য়োন্দ্রিবরা? মদুদা মখোয়না হায়রক্কনি মদুদি মখোয় এম.এস.পি.দা য়োল্লুরে অমসুং এম.এস.পি.গী লৈবা-য়োনবা চৎথরিঙৈদদি খোংজং অদু মখোয়না নেমথহনখি মরমদি মখোয়না খঙই মদুদি হৌজিক লৌমীশিংনা মন্দীদা চৎতুনা পোৎ য়োল্লি। পুম্নমক য়োল্লবা, থবক লোইশিল্লবা মতুংদা খোংজং অমুক হোরকই।

মরূপশা,

তশেংবদি মসিনি হেনগৎলক্লিবা এম.এস.পি.দা সরকারনা লৌমীশিংগী পোৎথোক রিকোর্দকী থাক্তা লৈরি অমসুং মদুসু অনৌবা কাংলোন শেম্লবা মতুংদা। অমসুং মরু ওইবা ৱাফম অমনা, হায়রিবা লৌউ-শিংউগী রিফোর্মশিং অসিদগী সরকারনা মখোয়গী থৌদাংশিংসু হেনগৎহল্লে! খুদম ওইনা এগ্রীমেন্ত ফার্মিং অসিমক য়েংসি। রাজ্য খরদা কাংলোন অসি, ৱারোল অসি চহি কয়াদগী লৈরক্লি, পঞ্জাবতসু লৈরক্লি। মফম অদুদদি প্রাইবেৎ কম্পনীশিং এগ্রীমেন্ত তৌনদুনা লৌ উনরি। অদোম খঙবীবরা হান্নগী কাংলোনশিংদা এগ্রীমেন্ত থুগাইবদা লৌমীশিংনা পেনাল্তী ফংলম্মি! ঐগী লৌমী ইচিল-ইনাওশিংদা মসি কনানসু তাকপীরম্লোই। অদুবু ঐখোয়গী সরকারনা শেমদোক্লে অমসুং মসি লেপখি মদুদি লৌমী ইচিল-ইনাওশিংদা পেনাল্তী নত্ত্রগা করিগুম্বা মখল অমত্তগী ফাইন তারোই।

মরূপশা,

অদোম্না মসি নীংথিজনা খঙবীরি মদুদি হান্না করিগুম্বা মরম অমদগী লৌমীশিংনা মন্দীদা চৎপা ঙম্লমদবদা, করি তৌরম্বগে? মখোয়না কনাগুম্বা ত্রেদরদা মখোয়গী পোৎ অদু য়োল্লম্মি। মদুদা মীওই অদুনা লৌমীদগী খুদোংচাবা লৌখিবা ঙমদনবগীদমকসু ঐখোয়গী সরকারনা কাংলোনগী পাম্বৈ শিজিন্নখি। লৈবা মতমদগী হৌরগা অদোমগী পেমেন্ত তৌনবগীদমক হৌজিক কাংলোনগী অথিংবা লৈরে। মখোয়না রিসিপ ককপসু তাই অমসুং নুমিৎ ৩নিগী মনুংদা পেমেন্তসু তৌগদবনি নত্ত্রবদি কাংলোনশিং অসিনা লৌমীশিংদা থৌনা অদু পীরি মদুদি মখোয়না ওথোরিতীশিংগী মনাক্তা চৎতুনা কাংলোনগী ওইবা মেকানিজমগী মতেং লৌদুনা মখোয়গী পৈশা ফংবা য়ারে।

মরূপশা,

লৈবাক্কী মফম কয়াদা এগ্রীমেন্ত ফার্মিং অসি হান্ননা তৌনখ্রে, মসি চাংয়েং ওইনা পাংথোক্নখ্রে। অদোম খঙবীবরা, মালেমদা ঙসি শঙ্গোমগী পোৎথোক খ্বাইদগী য়াম্না পুথোকপা লৈবাক করম্বনো? লৈবাক অদু অতোপ্পা অমা নত্তে ঐখোয়গী হিন্দুস্তান্নি! ঐখোয়গী শা-শন য়োকপা, ঐখোয়গী লৌমীশিংগী হোৎনজবনি। ঙসি দাইরী সেক্তরদা সরকারগী অমসুং লনাইগী কম্পনী কয়ানা লৌমীশিংদগী শঙ্গোম লৈরি অমসুং মদু কৈথেলদা য়োল্লি। মেদেল অসি চহি কয়াদগী চৎথরক্লি, অদোম্না করিগুম্বদা তাবীবরা মদুদি কম্পনী অমনা নত্ত্রগা সরকারগী ইন্সতিত্যুৎ অমনা কৈথেল লৌশিন্দুনা মপু ওইবা? অদোম্না দাইরী সেক্তরগী থবক অসিদগী কান্নবা ফংখিবা অদুগুম্বা শঙ্গোম পুথোকপগী মায় পাকপা লৌমীশিংগী মরমদা খঙবীদবরা? সেক্তর অমগা লৈরি মদুদা ঐখোয়গী লৈবাক অসি য়াম্না মাংজিল থারি -  মদুদি পাউল্ত্রী হায়বদি য়েন লোইবা। ঙসি ভারত্তা খ্বাইদগী য়েরুম য়াম্না পুথোক্লি। পাউল্ত্রী সেক্তর অপুনবদা য়াম্না চাউবা কম্পনী কয়া থবক তৌরি, অপীকপা কম্পনী খরসু লৈরি অদুনা মফম অদুগী অরৈবা খরসু বিজিনেস অসিদা য়াওরি। সেক্তর অসিগী মরী লৈনবা মীওইশিং, মখোয়গী প্রদক্ত অদু কনাগুম্বা মীওই অমা হেক্তদা, মফম অমা হেক্তদা মনীং তম্না য়োনবা য়াই। হেন্না ফংবা মফম অদুদা মখোয়না য়েরুম য়োনবা য়াই।

মরূপশা,

অনৌবা লৌউ-শিংউগী রিফোর্মশিংগী থোংদা ভারতকী লৌউ-শিংউদা অনৌবা তেক্নোলোজীসু চংলক্লগনি। অনৌবা তেক্নিক্কী থোংদা ঐখোয়গী লৌমীনা মখোয়গী পোৎথোক হেনগৎহনবা ঙম্লগনি, মখোয়গী পোৎথোকশিংদা মখল-মখা পীবা ঙম্লগনি, মখোয়গী পোৎথোকশিং হেন্না ফবা মওংদা পেকেজিং তৌবা ঙম্লগনি, মখোয়গী পোৎথোক্তা ভেল্যু এদিশন তৌবা ঙম্লগনি। অসুম্না অমুকপু তৌখ্রবদি ঐখোয়গী লৌমীশিংগী পোৎথোকশিং অসি মালেম অপুনবদা তান্নরক্কনি অমসুং তাননরকপা অসি লেপ্তনা হেনগৎলক্কনি। ঐখোয়গী লৌমী শুপ্নগী পোৎথোক পুথোকপা খক নত্তনা মশামক ৱারেপ লৌবা ঙম্বা ওইরগনি। মালেমদা কনাগুম্বনা লৌউ-শিংউগী পোৎথোকশিংগী থোংদা কৈথেলদা মখোয়গী শক্তম শাগৎপা পাম্লবদি মখোয় অদু ভারত্তা লাকপা তারগনি। করিগুম্বা মালেমদা ক্বালিতী অমসুং ক্বান্তিতী অনিমক্কী মথৌ তারকপদা মখোয় ভারতকী লৌমীশিংগা লোইননা পর্তনরশিপ তৌবা তারক্লগনি। ঐখোয়না অতোপ্পা সেক্তরদা ইনভেস্তমেন্ত অমসুং ইনোভেসন হেনগৎহনবদা ঐখোয়না ইনকম হেনগৎহনবগা লোইননা সেক্তর অদুদা ব্রান্দ ইন্দিয়াসু শেমগৎলি। হৌজিক ব্রান্দ ইন্দিয়া অসি মালেমগী লৌউ-শিংউগী কৈথেলশিংদসু মশাবু অদুক্কী মীংচৎ লৈহনবগা লোইননা লিংখৎপগী মতম অদু লাক্লে।

মরূপশা,

মখোয়বু লৈবাক অসিগী মীয়াম্না দেমোক্রেসীগী ওইবা মওংদা য়াদ্রবা, রাজনীতিগী দল খরনা, ঙসি লৌমীশিংবু লান্না লমজিংদুনা তৌনীংবা তৌরিবশিং অদুদা সরকারগী মায়কৈদগী হন্ন হন্না নোল্লুক্না কয়ারক হন্না হোৎনরবা ফাওবদা, করিগুম্বা রাজনীতিগী ওইবা মরম অমা নত্ত্রগা অমদগী, কনানা অফা-অপুন্নবা রাজনীতিগী ৱাখল্লোন্না মরম ওইদুনা ৱারী-ৱাতাই অসি পাংথোকহন্দ্রি। লৌউ-শিংগী কাংলোনশিংগা মতাংদা, পোলিতিকেল পার্তী অসিগী ৱাখল্লোন চেনবা মীওই খরা অসিনা, লৌমীশিংগী লোংবান্দা থমদুনা নোংমৈ কাপ্লিবা অসিনা লৌউ-শিংগী কাংলোনশিংগা মতাংদা মখোয়দা অচেৎপা মরৈ লৈতবনা মরম ওইদুনা, মখোয়না মখল মখলগী হিরম কয়া লৌমীশিংদা চাইথোক্লি। অদোম্না উবীরমগনি, হৌরকপদদি, মখোয়না অদুক্কী মতিক তাল্লম্মি এম.এস.পি.গী গরেন্তী পীয়ু হায়না, মখোয়গী পুক্নীংদা জেন্যুইন য়াওখি মরমদি মখোয় লৌমীশিং ওইরম্মি। অদুবু অসিগুম্বা রাজনীতিগী ৱাখল্লোন অসি মায় পাক্লে হায়বগী ফিভম উৎতুনা অমসুং হৌজিক্না এম.এস.পি. অসিনচিংবা নাকন্দা থৈদোক্তুনা হিংসা তৌবশিং অসিনা করিনো তৌরিবসে, মখোয়গুম্বশিং অসিবু জেলদগী থৌদোক্নবা তাল্লি। লৈবাক অসিদা অনৌবা হাইৱেশিং শেম্বা, শাগৎপা, মমাংগী সরকারনা তৌখিদবশিং অদু, মখোয়সু সরকাশিং অদুদা শৌগৎখি, শরুক য়ামিন্নখি। হৌজিক হায়রি তোল তেক্স লৌরোইদবনি, তোল লৌথোকখ্রো। লৌমীশিংগী ৱাফম তোকখ্রগা অতোপ্পা মফমদা করিগী চৎলিবনো? মমাংগী মতমদগী চৎনরক্লিবা পোলিসীশিং অদু, হৌজিক লৌমীগী খোংজংগী মরুমদা মদুগীসু মায়োক্তা লেপ্লরে, তোল পোইন্তশিংগী মায়োক্তা লৈরক্লে।

মরূপশা,

অসিগুম্বা ফিভম অসিদসু লৈবাক অপুনবগী লৌমীশিংনা লৌউ-শিংউগী রিফোর্মশিং অসিবু অদুক্কী মতিক শৌগৎপীরি, তরাম্না ওকপীরি। ঐনা লৌমী পুম্নমক্তা তৌবীমল খঙবা উৎচরি, ঐনা ইকোক নোঞ্জদুনা মখোয়বু খুরুমজরি মদুদি লৈবাক অসিবু মাংদা পুখৎনবা লৈবাক অসিগী লৌমী করোর কয়ানা ঙসি ৱারেপ অসিগা লোইননা থৌনা ফনা লেপ্লি অমসুং ঐনা ঐগী লৌমী ইচিল-ইনাওশিংদা থাজবা পীজরি মদুদি অদোমগী থাজবা ঐখোয়না খক মাংহল্লোই। হৌখিবা নুমিৎ খরনিদা রাজ্য কয়াদা, অমসুং ৱাফম অসি খঙবীগদবনি, রাজ্য কয়া, অসম ওইরো নত্ত্রগা রাজস্থান ওইরো, জম্মু-কশ্মীর ওইরো, অসিগুম্বা মফম কয়াদা পঞ্চায়ৎকী মীখল তৌখি। মদুদা মরুওইনা খুঙ্গংগী মীওইশিংনা ভোৎ পীখি, অমরোমদা লৌমীশিংনা ভোৎ পীখি। লান্না লমজিংনবা শন্নরিবা মরক অসিদা, অদুক্কী মতিক চাউখ্রবা আন্দোলনগী চংশিল্লিবা অসিদা, মখোয়গী নাক য়েৎতা পাংথোকপা মীখলশিংদা, মফম অদুগী খুঙ্গংগী লৌমীশিংনা খোংজং অদুবু চংশিল্লিবা মীওইশিং অদুবু নাথৈখি, মায়থিবা পীখি। মসিসু মখল অমরোমদা মখোয়না বেলোৎ বোক্সগী থোংদা অনৌবা কাংলোনশিং অসিবু ফোংনা শৌগৎপনি।  

মরূপশা,

মরৈ-য়েৎনবা অমদি অচুম্বদা য়ুম্ফম ওইদুনা, ঐখোয়গী ৱারেপ অসি চাংয়েং খুদিংমক চৎথবা য়াগনি। মসি অৱাৎপা লৈরগদি, মদুগী মতাংদা ফোংদোকপীগদবনি। দেমোক্রেসীনি, ঐখোয়দা ভগবান্না মখল খুদিংমক্কী লৌশিং পীরি হায়না ঐখোয় হায়জদে অদুবু ৱারীদি শানগদবনি! ৱাশক অসি মক্তদসু, দেমোক্রেসীদা অচেৎপা লাইনীং লৈজবা মরমনা, লৌমীশিংগী মফমদা ঐখোয়না কৎথোকচবনি মরম ওইদুনা, মতম পুম্নমক্তা, লৌমীশিংগী হিরম খুদিংমক্তা ৱারী শাননবগীদমক সরকারনা শেম-শাদুনা লৈরি। পাম্বৈগীদমক্তা ঐখোয় পুকচেল তিংনা চৎচরি। লৌউ-শিংউগী রিফোর্মশিং অসিগী মীচংদা লেপ্পা দল খরসু লৈ, মখোয়গী অইবা ৱারোলসু ঐখোয়না উখ্রবনি, মখোয় অদু ঙসিদি মখোয়গী ৱাদগী থৈদোকখ্রে, মখোয়গী লোন হোংদোকখ্রে। লৌমীশিংবু লান্না লমজিংনবা হোৎনরিবা রাজনীতিগী লুচিংবশিং অদুনা দেমোক্রেসীদা খজিক্তফাওবা থাজবা থমদ্রি, মালেমগী লৈবাক কয়াদা মখোয়বু মশক খঙনরি মরূপশা, অসিগুম্বা মীওইশিং অসিনা হৌখিবশিংদা হায়খিবশিং, মরাল শিখিবশিং, শিজিন্নখিবা লোন্দাশিং, করম করম্বা অনীংবা অপাম্বা ফোংদোকখিবা ঐ হায়বা ফাওবা ঙমজদে। ময়ামশিং অসি তৌজরবসু পুম্নমক অসি খঙজরবসু, মদুবু পুক্নুংদা হাপচিঞ্জদুনা, পুক্নীং ফাথদুনা, পুম্নমক অদু খাংজদুনা, ঐনা ঙসি অমুক্কা হন্না নোল্লুক্না ঐখোয়বু অদুক্কী মতিক ইকাইবা পীনবা হোৎনরিবশিং অদুদসু, ঐনা নোল্লুক্না হায়জরি মদুদি ঐখোয়গী সরকারনা সরকারগী কান্ননবগীদমক মখোয়গসু ৱারী শাননবা শেম-শাজরি অদুবু ৱাফম অদু হিরম অদুদা ওইগদবনি, খন্ন-নৈনবা অমসুং অচুম্বা অদুদা ওইগদবনি। 

মরূপশা,

ঐখোয়না লৈবাক অসিগী অন্নদাতাবু চাউখৎহন্নবগীদমক্তা ঙম্লিবমখৈ হোৎনগনি। অদোম্না চাউখৎলবদি লৈবাক অসিনা চাউখৎপা শোইদ্রবনি। শুপ্নগী মরোমদোম লেপচবা ঙম্বা লৌমী খক্তনা আত্মনির্ভর ভারতকী য়ুম্ফম থোনবা ঙমগনি। ঐনা লৈবাক অসিগী লৌমীশিংদা হায়জরি মদুদি – কনাগী ইনশিনবদা চৎপীগনু, খন্ন-নৈনবা অমদি অচুম্বা অদুদা য়ুম্ফম ওইরগা খন্নবীয়ু-নৈনবীয়ু অমসুং অমুক্কা হন্না লৈবাক অপুনবা অসিগী লৌমীশিংনা পুন্না ফোংনা শৌগৎপীরকপা অসি ঐগীদমক্তদি তশেংনা পেঞ্জনীংঙাই অমসুং চাউথোকচনীংঙাইগী মশক্নি। ঐহাক অদোম ময়ামগী লমন তোনশিঞ্জরবনি। অমুক্কা হন্না লৌমী ইমুং করোর কয়াদা পি.এম. কিসান নিধিগীদমক্তা হন্না হন্না নুংঙাইবা ফোংদোকচরি অমসুং ঐনা অদোমদা লেপ্তনা খুরুমজরি, অদোমগীদমক্তসু খুরুমজরি, অদোম নাদ-য়েক্তনা লৈবীয়ু, অদোমগী ইমুং নাদ-য়েক্তনা লৈবীয়ু, মসিগা লোইননা অদোম পুম্নমক্তা হন্না হন্না তৌবীমল খঙবা উৎচরি!

থাগৎচরি !

***