ঙসি কোবিদ-১৯গী মতাংদা অৱাংবা থাক্কী গ্রুপ ওফ মিনিস্তর্স (জি.ও.এম.)গী ২২শুবা মীফমদা ভিদিও-কনফরেন্সকী থোংদা হকশেল অমসুং য়াইফ-য়ুম্বালগী কেন্দ্রগী মন্ত্রী দা. হর্শ বর্ধন্না ময়াই তাংবল লৌখ্রে। মহাক্কা লোইননা মীফম অসিদা মপাল থৌরম মন্ত্রী দা. এস. জয়শঙ্কর, সিবিল এভিএসন মন্ত্রী শ্রী হর্দীপ এস. পুরি, হকশেল অমসুং য়াইফ য়ুম্বালগী রাজ্য মন্ত্রী শ্রী অশ্বিনি কুমার চৌবে অমসুং গৃহ মন্ত্রালয়গী রাজ্য মন্ত্রী শ্রী নিত্যানন্দ রাই য়াওখি। নিতি আয়োগকী মেম্বর (হকশেল) দা. বিনোদ কে পোল, ইকাইখুম্নরবা প্রধান মন্ত্রীগী এদভাইজর শ্রী অমর্জীৎ সিনহা অমসুং ইকাইখুম্নরবা প্রধান মন্ত্রীগী এদভাইজর শ্রী ভাস্কর খুলবেনা ভর্চ্যুএল ওইনা শরুক য়াখি।

দা. হর্শ বর্ধন্না থা তরানিথোই চুপ্না লাইচৎ অসি শোকথবা লৈতনা মখোয়গী থৌদাং খোঙফম চেৎনা পাঙথোক্লিবা কোবিদকী ৱারিয়র পুম্নমক্তা তৌবীমল খঙবা উদুনা মীফম অসি হৌখি। মহাক্কা লোইননা থবক তৌমিন্নরিবশিংদা লৈবাক অসিগী পব্লিক হেল্থ সিস্তেমনা কোবিদ থেংনবদা খুমাং চাউশিনখিবশিং অমসুং পুক্নিং থৌগৎনীংঙাই ওইরবা ফলশিং অসিগী মতাংদা মহাক্না পাউদমখি। “ভারতকী কোবিদ-১৯ লাইচৎকী গ্রোথ অসি ২%দা হন্থখ্রে অমসুং কেস ফেতেলিতী রেৎনা ১.৪৫% ওইদুনা মালেমগী ওইনা খ্বাইদগী নেম্বা ওইরি” হায়না মহাক্না ফোঙদোকখি। “ভারতকী নাবা ফগৎলকপগী চাং অসি ৯৫.৪৬%দা হেনগৎখ্রে অমরোমদা সেম্পল মিলিয়ন ১ তেস্ত তৌনবগী লালোং অসিনা অপুনবা পোজিতিব রেৎ ৬.২৫%দা হন্থহনখি” হায়না মহাক্না মখা তাখি।

পাক্তকননা তেস্ত তৌবা, ত্রেক তৌবা অমসুং লায়েংবগী পোলিসী তৌখিবনা মতম ওইরগা হরাও কুমহৈগী মতম ওইরবসু ওক্তোবর, নোবেম্বরগী থাদা অনৌবা কেসশিং হেনগৎলকপা উবা ফংখিদবা অসি য়েংলগা কেন্দ্রগী হকশেল মন্ত্রী অমসুং জি.ও.এম.গী চিয়রপর্সননা লৈবাক অসি বেক্সিনগী অহানবা সেৎ ওথোরাইজ তৌরগদবা মতম অসিদসু কোবিদকা চুনবা চৎন-লোনচৎশিং চেকশিন্না ঙাক্না চৎনবা মহাক্না ফোঙদোকখি। মহাক্না তার্গেৎ পোপুলেসন ওইরিবা করোর ৩০ অসি য়ৌশিনবা ঙম্বা বেক্সিনেসনগী দ্রাইব খনশিনবা মথৌ তাই হায়না ফোঙদোকখি।

দা. সুজীৎ কে সিংহ, দিরেক্তর (এন.সি.দি.সি.)না ভারতনা লাইচৎ অসি শীংথানিংঙাই ওইবা মওংদা লাকশিনবা ঙমখিবদা দেতাদা য়ুম্ফম ওইবা তাঙ্কক নাইবা সরকারগী পোলিসীশিং করম্না মতেং পাংখিবগে হায়বগী অকুপ্পা মরোল য়াওবা রিপোর্ত অমা উৎখি। মহাক্না কেস মশিং, শীখিবগী মশিং, মখোয়গী হেনগৎলকপগী চাং অমসুং পেরামিতরশিং অসিদা থুংনা মশিং হেনগৎলক্লিবা মালেমগী লেমহৌরিবা শরুক্কা করম্না চাংদম্নবগে হায়বগা মরী লৈনবা ফিগরশিং উৎখি। পোজিতিবিতী, আর.এ.তি. অমসুং আর.তি.-পি.সি.আর. পর্সেন্ত খাইদোকপা, অকক্নবা জিলাশিংদা কেসশিংগী লৈরিবা মশিং অসিগুম্বা মরু ওইবা  পেরামিতরশিং অমসুং শীখিবা, অমসুং হোস্পিতালদা পুখৎলবা মতুংদা পুং ৪৮ অমসুং ৭২গী মনুংদা শীখিবা অসিগুম্বশিং অসি রাজ্য অমমমগী ওইনা পুথোক্তুনা লাইচৎ অসিগী ত্রেজেক্তরীগী গ্রেনুলর এনালাইসিস অমা উৎখি। মহাক্না লৈবাক অসিদা লৈরিবা অপুনবা দেদিকেতেদ কোবিদ-১৯ ফেসিলিতীশিংগী দেতাসু উৎখি।

অকুপ্পা মরোল য়াওবা প্রজেন্তেসন অমগী খুত্থাংদা নিতি আয়োগকী মেম্বর (হকশেল) দা. বিনোদ কে পোলনা জি.ও.এম.দা বেক্সিনেসনগী মরু ওইবা হিরম অহুমগী মতাংদা খঙহনখি; বেক্সিন পুম্নমক্কী প্রি-ক্লিনিকেল অমসুং ক্লিনিকেল ত্রাইএলগী প্রোসেস, ভারত্তা ত্রাইএল চত্থরিবা বেক্সিন কেন্দিদেৎ তরুক্কী অকুপ্পা মরোল (কম্পোজিসন, মেন্যুফেকচর্র অমসুং তেক্নিকেল পার্তনরশিং, দোজকী মশিংশিং, স্তোরেককী কন্দিসনশিং অমসুং কান্নবা ফংবা অসিগী মতাংদা) অমসুং ভারতকী তার্গেৎ পোপুলেসনগী কম্পোজিসনগী, মখোয়গী চহি, শিনফম অমসুং কো-মোর্বিতিতীশিংগী মতাংদা অমসুং মখোয়বু অতোপ্পা লৈবাকশিং অমদি দবল্যু.ঐচ.ও.গী রিক্কমেন্দেসনশিংগা লোইননা করম্না চাংদম্নবগে হায়বা অদুসু উৎখি। মহাক্না জি.ও.এম.দা অতোপ্পা লৈবাক ১২দগী মপাল থৌরম মন্ত্রালয়না বেক্সিন পীবিনবা হায়জরকপশিংগী মতাংদা পাউদমখি।

কেন্দ্রগী হকশেল সেক্রেতরী শ্রী রাজেশ ভুশন্না মীয়ামগী মরক্তা হকচাং ফনা থম্নবগী চৎন-লোনচৎনা শীবগী চাং য়েংশিন্নবা মরু ওইবা দ্রাইবর অমা ওইবদা মরু ওই হায়না ফোঙদোকখি। রাজ্য/য়ু.তি. খরানা কেস য়াম্না ৱাংনা রিপোর্ত তৌরকখি অদুবু শীবগী চাংদি নেমখি অমরোমদা খরনা কেস হন্থনা রিপোর্ত তৌরক্লি অদুগী শীবগী চাংনা ৱাংলিবা অসিগী খেৎনবগী মতাংদা শন্দোক্না তাক্লদুনা মহাক্না হায় মসিগী ফীভম অসি অনিশুবা কেতগোরী ওইরিবা রাজ্যশিংদা মখোয় লাইওং উথোক্লবসু মীয়াম্না তেস্ত তৌনবা থোরক্তবা অসিনা ওইহল্লিবনি হায়না ফোঙদোকখি। পব্লিক হেল্থকিয়র সিস্তেম মশিং য়াম্না লৈবা রাজ্যশিং/য়ু.তি.শিংগী মীয়াম অসি ত্রেক তৌখি অমসুং গ্রাসরুৎ হেল্থ ৱার্করশিংনা তেস্ত তৌনবা থৌগৎখি মসিনা রাজ্যশিং অসিদা পেসেন্তগী কোবিদকী ফীভম অসি এদভান্স স্তেজতা লৈহনদুনা শীবগী চাং হন্থনা থমখি। হিরম অসিদা মহাক্না মন্ত্রীশিংদা সরকারগী তেস্তিং ওন দিমান্দগী পোলিসীগী মতাংদা পাউদমখি; করিগুম্বা লাইওং উৎলকপা তারবদি মখোয়না প্রেসক্রিপসন য়াওদনা মশাবু তেস্ত তৌথোকচবা য়াহল্লি। মহাক্না শীবগী চাং ৱাংনা রিপোর্ত তৌরক্লিবা রাজ্যশিং/য়ু.তি.শিং.গী মীয়ামগী মরক্তা হকচাং থম্নবগী চৎন-লোনচৎ লৈহহন্নবা আই.ই.সি.গী থবক থৌরমশিংগী কান্নবা অদুসু থমখি।

ভর্চ্যুএল মীদিয়াগী খুত্থাংদা শ্রী রবি কপুর, সেক্রেতরী (তেক্সতাইল্স), মিস এস অপর্না, সেক্রেতরী (ফার্মা), শ্রী অমিতাব কান্ত, সি.ই.ও., নিতি আয়োগ, শ্রী গোবিন্দ মোহন, এদিস্নেল সেক্রেতরী (হোম এফিয়র্স), শ্রী দম্মু রবি, এদিস্নেল সেক্রেতরী (এম.ই.এ.), শ্রী অরুন কুমার, দি.জি.সি.এ. (সিবিল এভিএসন), শ্রী অমিৎ য়াদব, দি.জি., ফোরেন ত্রেদ (দি.জি.এফ.তি.), সুনিল কুমার, দি.জি.ঐচ.এস. অমসিং অতোপ্পা মকোক থোংবা সরকারগী ওফিসিএলশিংনা  শরুক য়াখি। দা. সমিরন পন্দা (এন.আই.সি.ই.দি.)না দি.জি. (আই.সি.এম.আর.)গী ওফিসকী মীহুৎ ওইখি।

****