নুংশিরবা লৌমী ইচিল-ইনাওশিং,

পুৱারী ওইরবা ফার্ম রিফোর্মশিং অসিগী মতাংদা হৌখিবা নুমিৎ খরনিদগী ঐ লেপ্তনা অদোমগা লোইনদুনা লাক্লি। হৌখিবা নুমিৎ খরনিদা ঐ রাজ্য কয়ামরুমগী লৌমী লুপশিংগা ৱারী শানখ্রে। লৌমী লুপ কয়ানা ফার্ম রিফোর্মশিং অসিবু তরাম্না ওক্লি, মখোয় মসিদা য়াম্না হরাওবা পোক্লি, লৌমীশিংদা আশা অমা পোক্লি। লৈবাক্কী তোঙান তোঙানবা লৈবাকশিংদগী অসিগুম্বা কাংলোনশিং অসিগী কান্নবা লৌবা হৌখ্রবা লৌমীশিংগী মতাংদসু পাউ তারি।

অদুবু ফার্ম রিফোর্মশিং অসিগী অতোপ্পা নাকল অমসু লৈরি মদুদি লৌমী লুপ খরদা মসিগী মতাংদা চমম্নবা অমা পোকহল্লি।

লৈবাক্কী লৌউ-শিংউগী মন্ত্রী ওইরুবনা লৌমী খুদিংমক্কী চম্নমবা কোকহনবা, লৌমীশিংগী অৱাবা কোকহনবা অসি ঐগী থৌদাংনি। সরকার অমসুং লৌমীশিংগী মরক্তা দিল্লী অমসুং মসিগী অকোইবদা মীনম্বগী চেকপল অমা খানবগী থৌরাং তৌরিবা অসিগী অচুম্বা অমসুং ফিভম অদু অদোমগী মাংদা থম্বা অসি ঐগী ইথৌদাংনি।

ঐ লৌমীগী ইমুংদগী লাকপনি। লৌউ-শিংউগী অকুপ্পশিং অমসুং লৌউ-শিংউগী শিংনবশিং, অনিমকপু উজদুনা, খঙজদুনা, ঐ চাউরকখিবনি। লৌবুক্তা ঈশিং চন্নবগীদমক অহিং অথেংবা ফাওবা মিশেল খাংখিব, ঈশিং চল্লিঙৈদা পল কাইবা থিংনবা চেনখিবা, মতম চাদনা নোং চুবগী অকিবা, মতম চানা নোং চুবগী নুংঙাইবা – পুম্নমক অসি ঐগীসু পুন্সিগী শরুক অমা ওইরক্লি। লৌ লোক্লবা মতুংদা মদু য়োন্নবগীদমক চয়োল কয়া ঙাইখিবা অদুসু ঐনা উরে।

অদুগুম্বা ফিভমশিং অদুগী মরক্তসু লৈবাক অসিগী লৌমীশিংনা লৈবাক্ অসিগীদমক্তা খ্বাইদগী য়াম্না পোত্থোক পুথোক্নবা হোৎনরি। ভারতকী লৌমীশিংগী হোৎনরিবা অসিবু, মখোয়গী অনীংবগী পাঙ্গল অসিবু ঐখোয়না কোরোনাগী মতম অসিদসু উবা ফংলি। লৌমীশিংনা পোৎথোক য়াম্না পুথোক্তুনা লৈবাক্কী শেন্মিৎলোনগী খোংজেল হাপ্পদা মতেং পাংলি। মতম অসিদা রিকোর্দ থুগাইবা মওংদা মরু-মরাং হুন্দুনা তুংলমচৎতা হেন্না পোৎথোক পুথোক্নবা হোৎনরি।

লৌউ-শিংউগী মন্ত্রী অমা ওইনা ঐগীদমক্তদি মসি য়াম্না পেঞ্জনীংঙাইগী ৱাফম্নি মদুদি অনৌবা কাংলোন চৎনরবা মতুংদা হন্দক এম.এস.পি.দা সরকারনা লৈখিবদসু মমাংগী রিকোর্দ খুদিংমক থুগাইখ্রে। ঐখোয়গী সরকারনা এম.এস.পি.দা অনৌবা রিকোর্দ থম্লিবা, লৈননবা সেন্তরশিংগী মশিং হেনগৎলক্লিবা অসিগুম্বা মতম অসিদা, মীওই খরনা লৌমীশিংদা এম.এস.পি. অসি থিংজিনখ্রগনি হায়না মীনম্বা ঙাংলি।

ঐগী লৌমীশিংদা হায়জরি মদুদি রাজনীতিগী কান্নবা য়েংদুনা মীওই খরনা শন্দোক্লিবা মীনম্বা অসিবু খঙদোকপীয়ু অমসুং মদুবু মকোক্তগী হৌনা থৌওইবীগনু। লৌমীশিংদা চংখিবা অদুদগী শরুক অমা মখাই হেন্না এম.এস.পি. পীখিবা সরকার অসিনা, হৌখিবা চহি ৬তা এম.এস.পি.গী খুৎথাংদা চাউরাক্না শেনফম শরুক অনি লৌমীশিংগী একাউন্তা য়ৌহনখিবা সরকার অসিনা, এম.এস.পি. অসি কৈদৌঙৈদসু থিংজিল্লোই। এম.এস.পি. লৈরি অমসুং লৈখিগনি।

প্রধান মন্ত্রী শ্রী নরেন্দ্র মোদীজীগীদমক্তদি লৌমীশিংগী য়াইফ-থৌরাং অসি মহাক্কী পুন্সিগী খ্বাইদগী মরুওইবা ফিরেপশিংগী মনুংদা অমনি। লৌমীশিংগী চাগা হেনগৎহন্নবা, মখোয়গী পুন্সিদা চাউখৎপা পুরক্নবগীদমক্তা প্রধান মন্ত্রীগী মিৎয়েং মখাদা সরকারনা অসিনা লেপ্তনা ৱারেপ লৌরি।

হৌখিবা চহি ৬লোম অসিদা লৌমীশিংবু মপাঙ্গল কলহন্নবগীদমক্তা ঐখোয়গী সরকারনা মরু-মরাংদগী কৈথেল ফাওবগী মতাংদা লৌখিবা ৱারেপশিং অদু লৌমীশিংনা লৌ উবদা হেন্না লাইহন্নবনি, মখোয়গী অৱাবা হন্থহন্নবা অমসুং হেন্না শেন্দোং লৈহন্নবনি।

অদোমসু খঙবীরি মদুদি ঐখোয়গী লৈবাক্তা চাদা ৮০দি অপীকপা লৌউবশিংনি, মখোয়গী লৌফম একর অমা-অনিখক্কীনি। অসিগুম্বা লৌমীশিং অসিনা নীং-খা তম্লবা মতুংদগী শুপ্নগী পুক থাক্নবগীদমক লৌ উরক্লি। সরকারনা পাইখৎলিবা খোংথাংশিং অসিগী খ্বাইদগী চাউবা কান্নবদি, অসিগুম্বা অপীকপা লৌমীশিং অসিনা ফংলি।

পি.এম. কিসান সম্মান নিধিগী থোংদা চহি খুদিংগী অদোমদা লুপা লিশিং ৬ পীবগী মরম অৱাবা তারবা মতমদা অদোম্না শেল অমত্তা পুরুদনবনি। ক্রোপ ইন্সুরেন্সকী চুঙ্গোইনা অদোম্বু মহৌশানা থোকহনবা অমাং-অতানা মরম ওইদুনা মহৈ-মরোং মাং তাকপা অদু মেনখৎলি। সোইল হেল্থ কার্দতগী লৌমীশিংদা মখোয়গী লৌফমগী অশেংবা মগুন খঙবা ঙমহল্লি। নীম তোৎলবা য়ুরিয়ানা হারবু লোন্না য়োন্থোকপা থিংদুনা লৌমীশিংদা য়াম্না চাউনা মতেং পাংই। অন্নদাতা অসি উর্জাদাতা (পাঙ্গল পীনবীবা)সু ওইনবা, লৈবাক অসিনা পান্দম অসিগা লোইননা মাংদা চংশিল্লি।

লৌমীশিংগীদি মসিসু অৱাবা অমনি মদুদি অনম্বা গোদাম, কোল্দ স্তোরেজ অমসুং প্রোসেসিং সেন্তর, খুঙ্গংগী কৈথেল অচৌবা শহরশিংদা ওইনা লৈ। মসিগী মরমদগী লৌমীশিংনা মসিগী কান্নবা মপুং ফানা ফংবা ঙমদে। মসিগী খল মান্নদবা অসি কোকহন্নবা হৌজিক লুপা করোর লাখ ১গী লৌউ-শিংউগী ইনফ্রাস্ত্রকচর ফন্দ শেমখ্রে।

হোৎনরিবশিং অসিগী মরক্তা ঐখোয়না মসিসু উরি মদুদি লৌমীশিংগী হুমাং মমলনা পুথোকপা পোৎথোকশিং অসিবু মীওই খরনা কৈথেল ফংহন্দবনা মরম ওইদুনা করিসু লৈতবা মমলদা লৈনরি। ভারতকী লৌমীশিংনা মখোয়গী লৌবুক্তগী পুথোকচবা পোৎথোক্কী মমল ফাওবা লেপচবা, অপাম্বা মফমদা য়োন্নবগী হক ফাওবা লৈরমদে।

লৌমীশিংগী অৱাবশিং অসি পুম্নমক্না খঙনরম্মি। ঐখোয়গী মমাংদা লৈরম্বা সরকার অদুসু লৌমীশিংদা কৈথেলগা লোইননা ওপন মার্কেৎ পীনবা তাল্লম্মি। মসিগী মতাংদা অতলজীগী সরকারগী মতমদা কুমজা ২০০১দা ৱারী শানবা হৌখি। অতলজীগী মতুংদা চহি ১০ কেন্দ্রদা কংগ্রেসকী সরকার পানখি অমসুং মখোয়সু রিফোর্মশিং অসিবু শৌগৎখি, রিফোর্মশিং অসি মখোয়গী মেনিফেস্তোদা ইদুনা লাকখি।

অশেংবা ৱাফমদি লৌমীশিংবু ফাজিন্দুনা থম্বা অরিবা থৌরাং অদুদা কনানসু খক শৌগৎখিদে হায়বসিনি। ঐনা ঙসি চিথী অসিগী থোংদা ৱাফম অসি হায়জবা পাম্মি মদুদি হৌখিবা চহি ২০-২৫দা লৌমীশিংদা মখোয়গী পোৎথোক য়োন্ননবগীদমক অতোপ্পা পাম্বৈ অমত্তা ফংহল্লোইদবনি, হান্নদগী চৎনদুনা লাক্লিবা থৌরাং অসিনা হেন্না ফৈ হায়না হায়খিবা কনাগুম্বা লৌমীশিংগী লুচিংবা নত্ত্রগা লুপ অমগী মীওই অমত্তা পুথোকপীরকউ। ঐখোয়গী লৈবাক অসিদা লৌমীশিংগী অচৌ অচৌবা লুপশিংনা, অসিগুম্বা অফা-অপুনশিং অসিদগী নান্থোক্নবা খোংজং চংশিন্দুনা লাক্লি। লৌউ-শিংউগী অখঙ-অহৈশিংনা হায়দুনা লাক্লি মদুদি রিফোর্মশিং য়াওদনা ভারতকী লৌমীশিংগী পুন্সিদা অহোংবা পুরকপা ৱাগনি।

কুমজা ২০১৪দা এন.দি.এ.না সরকার পায়রকপগা ঐখোয়না রিফোর্মশিং অসিদা মকোক্তগী খন্ন-নৈনবা হৌখি। রাজ্য সরকারশিংদা মোদেল লো থাখি। মুখ্যমন্ত্রীশিংগী মীফমদা খন্ন-নৈনখি। থা ৬কী মনুংদা ঐখোয়না লৈবাক অসিগী লৌমী করোর কয়াগী মনাক্তা ৱাফম অসি পুদুনা চৎখি। চাউরাক্না ত্রেনিং অমসুং ৱেবিনার সেসন লাখ অমা মখাইরোম পাংথোক্তুনা লৌমীশিংগা মরী লৈনবা মতাংশিং অমসুং অনৌবা ফার্ম লোগী ৱারোলশিংগী মতাংদা খন্ন-নৈনখি। অমসুং মদুগী তুংদা অনৌবা ফার্ম লো অসি লাকখিবনি।

লৌমী ইচিল-ইনাওশিং,

মন্দী/কৈথেলশিং চৎথরি অমসুং অসুম্মক চৎথখিগনি। এ.পি.এম.সি.বু হেন্না মপাঙ্গল কলহন্নবা হোৎনরি। মসিগা লোইননা ওপন মার্কেৎনা অদোম্বু অদোমগী য়ুম্মক্তদা অদোমগী পোৎথোকশিং অদু হেন্না ফবা মমলদা য়োন্ননবগী পাম্বৈসু ফংহল্লগনি। লোইননা মসিনা লৌবুক্তগী কৈথেল ফাওবা পোৎথোকশিং পুবগী চাদিং অদুসু হন্থহল্লগনি। অদুগা অপাম্বা কৈথেল খঞ্জবা অদুসু লৈরি। লৌউ-শিংউগী পোৎথোকশিংগী কৈথেলশিং হান্নগুম অদুম্মক থবক তৌদুনা লৈগনি। হৌখিবা চহি ৫-৬তা লৌউ-শিংউগী কৈথেলশিংবু অনৌবা মওংদা শেমগৎনবা সরকারনা লুপা করোর কয়া চাদিং তৌখি। মখোয় অসি লাক্কদৌরিবা মতম অসিদা হেন্না অনৌবা মওংদা শেমগৎকনি।

রাজনীতিগী লাংদা থুরবা মীওইশিং অদুনা, মফুং ফানা শেমজিল-শাজিল্লবা অরানবশিং শন্দোক্লি মদুদি লৌমীশিংগী লম মৎপীখ্রগনি। লৌমীশিং অমসুং ললোনবশিংগী মরক্তা শুপ্নগী পোৎথোকশিংগী এগ্রীমেন্ত তৌনরগা লম করম্না মৎখিগদৌরিবনো? অনৌবা কাংলোন্দা ময়েক শেংনা পল্লি মদুদি লৌফমদা শুপ্নগী লৌমীশিংতনা মপু ওইবগা হক লৈগনি। খুঙ্গংদা লৈরিবা ইমুং খুদিংমকপু স্বামিত্ব য়োজনাগী মখাদা মখোয়গী য়ুমগীসু মপু ওইবগী হক ফংহল্লিবা সরকার অসিনা, লৌমীশিংগী লম ইঞ্চী অম ফাওবা কনানসু মুলহল্লোই।

ঐখোয়গী সরকারগী অনীংবা অমসুং থৌরাং অনিমক লৌমীশিংগীদমক্তা লেপ্লি।

ইচিল ইনাওশা,

এম.এস.পি., কৈথেল অমসুং লম/লৌফম লৌশিনবগী মতাংদা মীনম্বা শন্দোক্লিবশিং অসি থিংনবগীদমক সরকারনা লেপ্তনা হোৎনরি।

ঐখোয়না লৌমীশিং অমদি মখোয়গী লুপশিংগা লেপ্তনা ৱারী শানরি অমসুং মখোয়গী অৱাবা খুদিংমক কোহন্নবা মতম পুম্নমক্তা শেম-শাদুনা লৈরি।

অদুবু লৌমীশিংগী মরুমদা রাজনীতি দল খরনা অমসুং লুপশিংনা থাকপা লৌনম লাং অসি খঙবসু অদুক্কী মতিক মথৌ তাই।

লৈবাক অসিগী লাইবক থিবনি মদুদি ঙসি মশানা মশাবু ন্যুত্রেন্নি হায়জবা, খঙ-হৈরে লৌজবা মীওই খরনা ইকাই খঙদবগা লোইননা মখোয় মশানা হায়রম্বা ৱাহৈ অদুগী ওন্ন-তৈননা ঙাংলি। অদুবু মীয়ামদদি খক লোৎপা ঙমদে। লৈবাক অসিনা মখোয়গী মমাংগী ৱারোল অদুসু য়েংলি অমসুং ঙসিগী মখোয়গী অশেংবা মশকসু উরি।

মখোয়শিং অসিনা খল্লি মদুদি মখোয়গী রাজনীতিগী কান্নবা য়েংদুনা সরকার অসিগী মাংনবা তৌগে। অদুবু অচুম্বদি মখোয়গী পান্দম অদোমদা, লৈবাক অসিগী লৌমীশিংদা, লৈবাক অসিগী নহাশিংদা তারি হায়বসিনি। মখোয়শিং অসিনা লাঞ্জদ্রবা লৌমীশিং অসিবু রাজনীতিগী খুৎলাই ওইনা শিজিন্নরি।

কংগ্রেসনা মখোয়গী সরকারদা স্বামীনাথন কমিতীগী রিপোর্ত অদু চহি ৮ ফাওবা নমশিন্দুনা থমখি, অদুগুম্বা কংগ্রেস অদু লৌমীশিংগী অফবা তৌবা পাম্বা করম্না ওইগদৌরিবনো?

লৌমীশিংনা কৈথেলদা নত্তনা মখোয়গী পোৎথোক য়োঞ্জনবা অতোপ্পা পাম্বৈসু লৈগদবনি হায়বসি কংগ্রেসনা মখোয়গী মেনিফেস্তোদা হায়দুনতা লাক্লগা হৌজিক মখোয়না লৌমীশিংবু করিগী অফা-অপুন্ননা থম্বা পাম্লিবনো। রিফোর্মশিংগী মায়কৈদা চিথী ইদুনতা লাকখিবা য়ু.পি.এ.গী লৌউ-শিংউগী মন্ত্রীনা হৌজিক করিগী য়ু-তর্ন তৌখ্রিবনো?

পঞ্জাবকী মীখলগী মতমদা মখোয়গী মেনিফেস্তোদা লৌমীশিংবু কৈথেলগী মপান্দসু পোৎথোকশিং য়োন্ননবা পাম্বৈ ফংহনগনি হায়না ইখিবা আম আদমী পার্তীনা হৌজিক করিগী ওন্ন-তৈননা ঙাংলিবনো?

হুদ্দা কমিতীনা ফার্ম রিফোর্মগী মতাংদা ৱাফম ফোংদোকখি, কমিতী অদুদা অকালী দলগী অচৌবা লুচিংবশিংসু য়াওখি অদুগা হৌজিক করিগী মখোয় তোঙানবা খোঞ্জেলদা ঙাংলিবনো?

থা অনি-অহুমগী মমাং ফাওবা রিফোর্মশিং অসিবু শৌগৎলম্বা, ঐখোয়গী সরকারবু থাগৎলম্বা লৌউ-শিংউগী লুপ অদুনা হৌজিক খঙহৌদনা খোংজং করিগী চংশিল্লিবনো?

ঐগী লৌমী ইচি-ইনাওশিং,

চহি কয়ামরুম অসি ঐখোয়গী লৈবাক অসিদা শুপ্নগী লাওথোকলগা ভোত খোমজিনবগী রাজনীতি তৌদুনা লাক্লি। লাওথোক্লগা খুদম উৎপগা লোইননা মদুবু মপুং ফাহনবা সরকার লৈবাক অসিনা হৌজিক উরে।

লৈবাক অসিগী মীয়াম্না ঐখোয়দা থৌজানবীবা অসি হেনগৎলকপা উবদা, পার্তী খরনা মসিসু খনবা হৌরক্লি মদুদি মখোয়গী মাংখ্রবা রাজনীতিগী মফম অসি লৌমীশিংবু লান্না লমজিংলগা ফংবা ঙমগনি।

অরানবা অসি কোকহনবা ঐখোয়গী থৌদাংনি। মরম অসিনা খোংজং চংশিল্লিবা লৌমীশিংগা লোইননা হিরম খুদিংগী পাম্বৈ পুথোক্নবা লেপ্তনা হোৎনরি।

অদুবু, অদোম ৱাফম অসিগী মতাংদসু চেকশিনবীগদবনি মদুদি খোংজং অসিদা মখোয়গী পান্দম অদু লৌমীশিংগী য়াইফনবা নত্তবা অদুগুম্বা মীওইশিং অদুসু য়াওশিনখ্রে। হৌখিবা চহি তরুকলোম অসিদা অদোম্না উবীরমগনি মদুদি শাগৈ অমত্তগী, চৎনরোল অমত্তগী মীওই কাংলুপ্না করিগুম্বদা মহৈরোইশিংগী, করিগুম্বদা দলিৎকী খুন্নাইগী, করিগুম্বদা নুপীশিংগী, করিগুম্বদা মোইনোরিতী – তোঙান-তোঙানবা কাংলুপশিংগী মরুমদা লোৎতুনা খুন্নাই অসিদা তংদু-লৈতাদবা অমসুং লৈবাক অসিবু মপু পান্দবা ওইহন্নবা হোৎনদুনা লাক্লি।

ঙসি মখোয়শিং অসিনা অমুক্কা হন্না লৈবাক অসিগী অন্নদাতাশিংগী মরুমদা লোৎতুনা মখোয়গী রাজনীতিগী কান্নবা লৌনবগীদমক হিংসা অমসুং চরাংনবদা হকথেংননা অমদি নাকোইননা পাঙ্গল হাপ্লি।

মখোয়শিং অসিনা অন্নদাতাশিংগী মরুমদা লোৎতুনা ইরাং শাগৎপদা মরাল লৈরবশিং, হিংসা শন্দোকপগী মরাল লৈরবশিংবু থুনা থাদোক্নবা শাফু পীরি।

মখোয়শিং অসিনা অন্নদাতাশিংগী মরুমদা লোৎতুনা গান্ধীজীগী মীতম অমাং-অতা থোকহল্লি, পুজা তৌনীংঙাইগী মশক ওইরবা বাপুগী মিংচৎ থিহল্লি, চম্পারন্দা লৌমীশিংগীমক সত্যগ্রগী য়াম্না চাউবা খোংজং অমা হৌদোকখিবা অদুগুম্বা বাপু অদুগী।

ইথৈ-লৌখোংগী ঈশিং লৌমীশিংদা ফংহন্দনবগীদমক মখোয়না হোৎদুনা লাকখি, কাংলোনগী ওইবা হোৎনবা য়াবা হোৎনখি। মখোয়শিং অসিনা লৌমীশিংদা ইলেক্ত্রিক ফংহনবগী থবক্তা অমসুং দামশিং শাবগী থবক্তা চহি কয়া অপনবা পীদুনা লাকখি। মখোয়শিং অদুনা ঙসি লৌমীশিংগী খনবা শাদুনা লৌনম লাং থাক্লি।

লৈবাক অসিনা আত্মনির্ভর ভারতকী ফিরেপ অদুগা লোইননা মাংদা চংশিল্লিবা অসিদা, ভোকেল ফোর লোকেল পাংথোক্লিবা অসিদা, ভারতকী পোৎথোকশিংবু ইন্থোক্নবা লাওরিবা মখোয়শিং অসিগী ৱাখল্লোন অদু খঙবা মথৌ তাই।

লেহ-লদ্দাখতা ঙমখৈদা শিংনবশিং হেনগৎলিঙৈ অসিদা, ফুৎ কয়া উন তারকপা মতম অসিদা, ঙমখৈদা জৱানশিংগী রাসন পুদুনা চৎপা ত্রেনশিংবু থিংলিবা মখোয়শিং অসি লৌমী ওইরোই।

মখোয়শিং অসিগী মরমদগী ঐখোয়না ঐখোয়গী লান্মীশিংগী রাসন অমসুং অতৈ মরুওইবা পোৎলমশিং নোংথক্কী লম্বীদা অমসুং অতোপ্পা পাম্বৈশিংগী মতেংনা পুবা তারি। মীয়াম্না তাঞ্জবা লন অসিগুম্বা অতোপ্পা পাম্বৈশিং অসিদা চৎহল্লে।

ফিজং মরুমদা লোৎতুনা লৌমীশিংবু লান্না লমজিংলিবা মখোয়শিং অসিগী ৱাখল্লোন কুমজা ৬২গী লানফমদসু লৈবাক অসিগী মীচংদা লৈখিদে।

ঙসি মখোয়শিং অসিনা অমুক হন্না কুমজা ৬২গী ৱারোল অদু লোল্লি।

মখোয়শিং অসিনা লৌমীশিংগী শেংলবা পুক্নীং অদুবু মখোয়গী নত্তবা ৱাখল্লোন অমসুং লৌনম-লাং অদুনা শেংদবা অমদি অমোৎপা ওইহন্নবা হোৎনরি।

ঐখোয়গী লৌমী ইচিল-ইনাওশিংনা ঙসি মুন্না খন্থবীগদবনি মদুদি মখোয়না খোংজং অসি হৌখিবা মতমদা, মখোয়গী পান্দম করি ওইখি, অমসুং ঙসিনা করি করি ৱারী শানরিবগে?

ঐনা চিথী অসিগী থোংদা অদোমদা খুৎ লোন্নদুনা মসি হায়জরি মদুদি অসিগুম্বা থৌইনশিন অমত্তদা চৎপীগনু, চানবীদুনা অচুম্বা অদুদা য়ুম্ফম ওইরগা খন্ন-নৈনবীয়ু।

অদোমগী চিংনবা খুদিংমক কোকহনবা, মদুগী পাউখুম পীবা ঐখোয়গী সরকারগী থৌদাংনি। ঐখোয়না থৌদাং অসিদগী কৈদৌনুংদসু খোংফম লৈখিদ্রি অমসুং কৈদৌনুংদসু লৈরোই।

‘সবকা সাথ সবকা বিকাস সবকা বিশ্বাস’কী মন্ত্র অসিদা চৎতুনা প্রধান মন্ত্রী নরেন্দ্র মোদীজীগী মিৎয়েং মখাদা ঐখোয়গী সরকারনা খেন্নবা থমদনা পুক্নমক্কী কান্নবা ওইননবা হোৎনরি। হৌখিবা চহি ৬কী পুৱারীনা মসিগী শাখিনি।

অদোম থাজবীয়ু, লৌমীশিংগী য়াইফনবা তৌখিবা রিফোর্ম অসিনা ভারতকী লৌউ-শিংউদা অনৌবা তাঙ্কক অমগী য়ুম্বী ওইরগনি, লৈবাক অসিগী লৌমীশিংবু হেন্না মনীং তমহল্লগনি, মপাঙ্গল কলহল্লগনি।

ফার্ম রিফোর্মশিং অসিগী পাঙ্গলদগী ঐখোয়না পুন্না ভারতকী লৌউ-শিংউবু চাউখৎপা ওইহনগনি, মপুং ফাহনগনি।

অদোমগী,

নরেন্দ্র সিংহ তোমর

অন্নদাতাশিংদা থাজবা পীবা

এম.এস.পি.গী মতাংদা সরকরনা থাজবা পীনবা শেম-শারি।

এ.পি.এম.সি.গী মপান্দা লনাইগী কৈথেলশিংদা রাজ্যশিংনা তেক্স লৌবগী অয়াবা পীবা য়াই।

করিগুম্বা মখল অমা হেক্তগী চয়েৎনবগী ৱারোইশিন পুরক্নবা লৌমীশিংনা কোর্ত্তা চৎপগী থৌওংসু লৈগনি।

রাজ্যশিংনা লৌউ-শিংউগী এগ্রীমেন্ততা রেজিস্তর তৌবগী হক লৈগনি।

কনাগুম্বা লৌমী অমত্তগী লৌফম/লম লৌশিনবা য়ারোই, মরমদি কাংলোন অসিনা লৌফম/লম অমত্তা, মখল অমা হেক্তগী ত্রান্সফর, য়োনবা, লীজ নত্ত্রগা বন্ধপ থম্বগী অয়াবা পীদে।

কোন্ত্রেক্তরশিংনা লৌমীশিংগী লৌফমদু করিগুম্বা মখল অমত্তগী ওইবা মতম চুপ্পগী ওইনা অহোংবা পুরকপা য়াদে।

কোন্ত্রেক্তরশিংবু লৌমীশিংগী লৌফমদা মখল অমা হেক্তগী ওইবা মতম খরগী ওইনা শেমগৎ-শাগৎনবগীদমক লোন পীবা য়াদে।

ফিভম অমা হেক্তদা, কাংলোন্না লৌমীশিংগী হক মৎনবগী থৌওং অমত্তদা অয়াবা পীদে।

*****