মখোয়গী থবকশিংদা য়ুম্ফম ওইরগা মখোয়গী মীহুৎশিং অমসুং সরকার খন্নবা ঙসি ভারতকী উপ-রাস্ত্রপতি শ্রী এম. ভেনকিয়া নাইদুনা মীয়ামদা অপীল তৌখ্রে।

ঙসি ভিসাখাপাতনমদা ৱাই.পি.ও-গ্রেতর ইন্দিয়া চেপ্তরগী মেম্বরশিংগা ভর্চুএল ওইনা ৱারি শানবা অমদা উপ-রাস্ত্রপতিনা হায়খি রাজনিতিদা কাংলুপ-ফুরুপ নাইবা, মীহাৎ-মীপুন অমসুং শেন থাদবা হেনগৎলক্লিবা অসি অফবা নত্তে অমসুং মখোয়গী মীহুৎশিং খনবদা লমচৎ-শাজৎ, থবক তৌবা ঙম্বা অমসুং থৌনা য়েংগদবনি। রাজনিতি অসি মীয়ামগী থবক পাংথোক্নবা পান্দম অমনি অমসুং মতম কুইনা চৎগদবা অফবা থৌশিলশিংগী মহুত্তা পোপুলিজম হেনগৎহন্নবা হোৎনদুনা লৈরে।

সংসদ অমসুং রাজ্যগী লেজিসলেচরশিংদা অৱাংবা থাক্কী মরৈ য়েৎনবা হন্থরক্লিবা অসিগী মতাংদা নুঙনাংবা ফোঙদোক্লদুনা উপ-রাস্ত্রপতিনা হায়খি মফম খুদিংমক্তা ৱাখল তানা ৱারি শানবগী থাক হন্থরক্লে। মমাংঙৈদা মরৈ য়েৎনবা অসি শিংথানরম্মী অমসুং লৌশিং অমসুং নোক্নিংবা কয়া য়াওখি। লেজিসলেচরশিংনা মরৈ য়েৎনগদবনি অমসুং হাওসকী থবকশিং অয়েৎপা পীরোইদবনি। রাজনিতিৱালাশিংনা মখোয়গী লম্বাশিং য়েক্নবশিং ওইনা লৌরোইদবনি। রাজ্য সভাগী চিয়রমেন অমা ওইনা, মহাক্না লমজিংদুনা অমসুং ৱাখল তাহন্দুনা থকশি-খাসি লৈহন্নবা হোৎনরি।

সংসদতা মেম্বরশিংনা পুখৎলকপা অফবা ৱাফমশিং মেদিয়ানা লুম্না লৌদবা অসিগী মতাংদা সংসদনা পায়খৎলিবা অফবা থবকশিংদা হেন্না পুক্নিং চঙনবা উপ-রাস্ত্রপতিনা মেদিয়াদা খঙহনখি। মেদিয়াগী মগুন হন্থরক্লিবা অসিগী মতাংদা মহাক্না হায়খি “নিউজপেপর’ অসি ‘ভিয়ুজ-পেপর’ ওইরক্লে।

লৌমীশিংগী ৱাথোক অসিগী মতাংদা উপ-রাস্ত্রপতিনা হায়খি ৱারি শানদুনা চিংনবা খুদিংমক কোকহনবা ঙমগনি। মহাক মশাগী পুন্সিগী খোঙচৎ খুদম অমা ওইনা পীরদুনা উপ-রাস্ত্রপতিনা হায়খি রাজনিতিগী য়ুম্ফম লৈতবা লৌউ-শিংউগী ইমুং অমদগী লাকপা ওইরবসু, মহাক্কী থকশি-খাশি লৈবা, থবক কন্না শুবা, কৎথোকপা অমসুং থাজবা লৈবা অসিনা মরম ওইদুনা লৈবাক অসিগী অনিসুবা খ্বাইদগী চাউবা ফম মহাক্না পায়বা ঙম্বনি।

শ্রী নাইদুনা হায়খি অতোপ্পা মীওইশিংগী পুন্সি কয়াদগী মহাক্না তম্বা য়াবা তম্লে। মখোয়গা লৈমিন্নদুনা মহাক্না মীয়াম অমা থিজিনখি অমসুং নৈনখি। মসিদগী মহাক্না পুন্সিদা মাইপাকপদা মতেং ওইখি। নহা ওইরিবা ইন্দস্ত্রিগী লুচিংবশিংনা পুন্সিদা মাইপাক্নবা থবক কন্না শুগদবনি, থাজবা লৈগদবনি অমসুং অতোপ্পশিংগী তমগদবনি।

মহাক্না শ্রী ননাজি দেসমুখ ইকায়খুম্নবগা লোয়ন্না নিংশিংলদুনা হায়খি মহাক্কী পুন্সিনা শ্বরনা ভারত ত্রস্ত হৌদোক্নবা মঙোন্দা ইথিল পীখি।

মহাক্কী মরুপশিং মহাক্কী থৌনানি হায়না ফোঙদোক্লদুনা উপ-রাস্ত্রপতিনা হায়খি স্কুল মতমগী মহাক্কী মরুপশিংগা মহাক্কা মতম পুম্নমক্তা লেপ্তনা পাউ ফাওনরি।

নহা ওইরিবা ওন্ত্রেপ্রেনিউয়রশিং লৈবাক অসিগী তুংগী য়ুম্বীনি হায়রদুনা শ্রী নাইদুনা হায়খি ভারত্তা লৌশিংগী লমদা অৱাৎপা অমতা লৈতে। অদুবু ঐখোয়না হৈ-শিংবা মশক খঙদোক্কদবনি অমসুং হৈ-শিংবা হেনগৎহনগদবনি। লৈবাক অসিদা অখন্নবা খর লৈরি। হৌজিক মমিং লৈরবা এম.এন.সি কয়াগী অচৌবা ফমশিং ভারতমচাশিংনা পায়রে।

ললোনবশিং অসি লৈবাক্কী লন-থুম তানবা মীওইশিংনা হায়না ফোঙদোক্লদুনা মহাক্না হায়খি ভারতকী ইন্দস্ত্রিনা কোর্পোরেত লৈঙাক্কী চৎনবী ঙাক্কদবনি। মীওই খরনা মখোয়গী থবকশিংনা ললোন-ইতিক তৌরিবা মীওই কাংলুপশিংগী মিংচৎ থিহল্লে। চৎনবীশিং অমসুং মগুনশিং ঙাক্না থবক পাংথোক্কদবনি।

ইংলিস মেদিয়ম খক্তদা লাইরিক তম্লগা পুন্সিদা মাইপাকপা ঙমগনি হায়না খল্লিবা অদু য়ানিংদবা ফোঙদোকলদুনা উপ-রাস্ত্রপতিনা হায়খি দোক্তর অব্দুল কলাম য়াওনা শক্নাইরবা মীওই কয়া মমালোন্দা লাইরিক তম্লকখি। মীওই অমগী পুন্সিদা মমালোন অসি য়াম্না মরুওই। ইংলিস খঙবা দরকার ওই অমসুং কনাগুম্বা অমনা ঙম্লিবমখৈ লোন কয়া তমগদবনি , অদুবু ঐখোয়না কৈদৌঙৈদা ঐখোয়গী ইমালোন কাউরোইদবনি।

ওনলাইন থৌরম অদুদা ৱাই.পি.ও-গ্রেতর ইন্দিয়া চেপ্তরগী মেম্বরশিং য়াওনা ভারতকী ইন্দস্ত্রিগী শক্নাইরবা কয়া শরুক য়াখি।

****