ঙসি নিউ দিল্লিদা নেসনেল হুমেন রাইতস কম্মিসন(এন ঐচ আর সি)না হুমেন রাইতস দে পাংথোকখ্রে। থৌরম অদুদা হোম এফেয়ার্সকী রাজ্য মন্ত্রী শ্রী নিত্যানন্দা রাইনা চীফ গেস্ত ওইনা শরুক য়াখি। ভর্চুএল ওইনা পাংথোকখিবা থৌরম অদুদা শ্রী রাইনা হায়খি বেদগী মতমদগী হৌনা ভারত্তা মীওইবগী হক লৈরক্লে। বেদগী লাইৱাশিং ‘সর্ভে ভবন্তূ সুখিনা সর্ভে সান্তূ নিরমায়া’দা অপুনবা মীওই খুন্নাইগী ৱাখল্লোন য়াওরি। মতম পুম্নমক্তা প্রধান মন্ত্রী শ্রী নরেন্দ্র মোদী মীওইবা খুন্নাইগী খল্লি অমসুং মীওইবা খুন্নাইগী থবক তৌবা অসি মহাক্কী পুন্সিগী পান্দমনি। হুমেন রাইতস কম্মিসনদা শক্তি শীন্নবদা য়ুনিয়ন হোম মিনিস্তর শ্রী অমিত সাহনা থাজবা থম্লি।

শ্রী রাইনা হায়খি খুন্নাইগী তোল্লবা কাংলুপশিংগী চাউখৎনবা অমসুং য়াইফনবা কেন্দ্র সরকারনা মরুওইবা মিৎয়েং চঙলি। মখোয়গী হকশিং লৈ হায়বা মখোয় খঙদ্রবসু, তোল্লবশিংগী হকশিং ঙাক্কদবনি অমসুং মখোয়গী খুদোংচাদবশিং কোকহনগদবনি। মীওইবগী হক ফংহনবা অমসুং ঙাকপদা পঞ্চায়তশিংগী থৌদাং য়াম্না মরুওই। মরম অদুনা মখোয়দা শক্তি পীনবা থবক পায়খৎলে।

মিনিস্তরনা মখা তানা হায়খি কোরোনা লাইচৎ মনুংদা, প্রধান মন্ত্রী গরিব কলয়ান য়োজনাগী মখাদা মীওই খুদিংমক্তা সরকারনা চেং ফংহল্লে, মরম অদুনা মীওই অমতা চারা হেন্দ্রে। মসিগী মথক্তা, খুঙ্গংগী শিন্মীশিংগী ফিবম ফগৎহন্নবা এম.জি.এন.আর.ই.জি.এগী মখাদা খুৎশুমলশিং হেনগৎলে। মখোয়গী হকশিং ঙাক্নবা দি.বি.তিগী খুৎথাংদা, কোবিদ-১৯না শোকহল্লবা কোইনা চৎতুনা থবক শুবা শিন্মীশিংগী একাউন্তশিংদা সরকারনা হকথেংন্না শেন হাপচিল্লে।

মীওইবগী হক কন্নবা নেসনেল হুমেন রাইতস কম্মিসন্না পায়খৎলিবা থবকশিং থাগৎলদুনা মিনিস্তরনা হায়খি অকিবা অমসুং অচান-মীরাই নাইবা লৈতনা নেসনেল হুমেন রাইতস কম্মিসন্না মীওইবগী হক ঙাক্নবা ক্বাসি জুদিসিএল লুপ অমগী থৌদাং লৌরি। মখোঙদগী হৌনা মীওইবগী হকশিং ফংহনবা অসি খুন্নাইগী অপুনবা থৌদাংনি।

শ্রী নিত্যানন্দা রাইনা হায়খি মীওইবগী হক ঙাক-শেনবদা সেকুরিতি ফোর্সশিংনা মরুওইবা থৌদাং অমা লৌরি। থৌনা ফনা মখোয়গী মথৌশিং পাংথোকপগী মথক্তা, সেকুরিতি ফোর্সশিংনা মীয়ামগী হক ঙাক-শেন্নবা মিকুপ-নাহুম শিংনা লৈরি।

কম্মিসনগী মেম্বর জজতিস পি.সি পন্তনা হায়খি কোরোনাভাইরস লাইচৎনা মরম ওইদুনা চহি অসি মালেমগী ওইনা মীওইবা খুন্নাই য়াম্না ৱারে। মসিদা সরকারগী অনা-লায়য়েংগী থবকশিং অমসুং মীয়াম্না পায়খৎফম থোকপা থবকশিং দরকার ওইরে। অরুবা ফিবম অসি থেংন্নবা সরকারগী হকশেলগী থবকশিংগী মাইপাকপা অসি মীওইবগী হকশিং ঙাক্নবা ঐখোয়না কয়া য়াম্না থবক পায়খৎলিবগে হায়বগী মখা পোল্লি। মীওইবগী হকশিংদা য়ুম্ফম ওইরগা রাজ্যশিংগী থৌশিলশিং শেমগদবনি।  

জজতিস পি.সি পন্তনা হায়খি হৌখিবা চহি ২৭ অসিদা কম্মিসন্না পায়খৎখিবা থবকশিংনা মসিগা মীয়ামগা শম্নবা ঙমহল্লে। কম্মিসনগী থবকশিং ওফলাইন্দা পাংথোক্লম্বদগী চহি অসিদা ওনলাইন্দা পাংথোক্তুনা কোবিদ-১৯ লাইচৎনা থোকহনবা অৱাবশিং থেংন্নবা কম্মিসন্না থবক পায়খৎলে।

থৌরম অদুদা নেসনেল হুমেন রাইতস কম্মিসনগী সেক্রেতরি জেনেরেল শ্রী বিম্বাধার প্রধান, নেসনেল হুমেন রাইতস কম্মিসনগী হান্নগী চিয়রপর্সনশিং অমসুং মেম্বরশিং, তোঙান-তোঙানবা স্তেৎ হুমেন রাইতস কম্মিসনশিংগী চিয়রমেন অমসুং মেম্বরশিং, কেন্দ্র অমসুং রাজ্য সরকারশিংগী মীহুৎশিং, দিপ্লোমেতশিং, সিবিল সোসাইতিগী মেম্বরশিং, এন.জি.ওশিংগী মীহুৎশিং অমসুং অতোপ্পা শক্নাইরবশিং শরুক য়াখি।

*****