ঙাকশেল মন্ত্রালয়

ভারত অমসুং ভিয়েতনামগী দিফেন্স মিনিস্তরশিংগী মরক্তা ৱারি শানখ্রে

Posted On: 27 NOV 2020 6:43PM by PIB Imphal

ঙসি ভিদিও কনফরেন্সকী খুৎথাংদা রাক্ষ মন্ত্রী শ্রী রাজনাথ সিংহ অমসুং ভিয়েতনামগী নেসনেল দিফেন্স মিনিস্তর জেনেরেল ঙো সুয়ান লিচ নাকল অনিগী ওইবা ৱাফমশিংদা ৱারি শানখ্রে।

লৈবাক অনিগী মরক্তা অচেৎপা মরুপ-মপাং ওইবগী মরুওইবা য়ুম্বী অমা ওইরিবা ভারত-ভিয়েতনাম ঙাক-শেনগী মতেং পাংনবা অসি মপাঙ্গল কনখৎহন্নবা ৱারি শানবা অদুদা লুচিংবা অনিমক্না অমুক হন্না থাজবা পীনখি। হৌজিক পায়খৎলিবা তোঙান-তোঙানবা প্রোজেকশিং অমসুং নাকল অনিগী ঙাক-শেনগী থবকশিংগী তুংগী ফিবমগী মতাংদা মখোয়না ৱা খন্নখি। কোবিদ-১৯ লাইচৎ লৈরবসু আর্মদ ফোর্স অনিমক্না ঙাক-শেনগী থবকশিং মতেং পাংনবা অসিদা দিফেন্স মিনিস্তর অনিমক অপেনবা ফোঙদোকখি। দিফেন্স ইন্দস্ত্রি ফগৎহনবা, ত্রেনিং অমসুং য়ু.এন পিছকিপ্পিং ওপরেসনশিংদা মতেং পাংন্নবা মিনিস্তর অনিমক্না ৱা খন্নখি।

লৈবাক অনি মতেং পাংনবা হেনগৎহন্নবা মখা তানা খোঙথাং অমা ওইনা, হায়দ্রোগ্রাফিগী লমদা মতেং পাংন্নবা নেসনেল হায়দ্রোগ্রাফিক ওফিস, ইন্দিয়া অমসুং ভিয়েতনাম হায়দ্রোগ্রাফিক ওফিসগী মরক্তা য়ানচে অমা মিনিস্তর অনিগী মমাংদা খুৎয়েক পীনখি। থৌরাং অসিনা নাকল অনিমক্না হায়দ্রোগ্রাফিক দেতা পীথোক-পীশিন তৌনগনি অমসুং নেভিকেসনেল চার্তশিং পুথোকপদা মতেং পাংনবা ঙমহনগনি।

দিফেন্স ইন্দস্ত্রিশিং য়াওনা মশাগী ওক্নবা পুথোকপা হেনগৎহন্নবগীদমক “অত্মা নির্ভর ভারত”কী প্রধান মন্ত্রীগী পান্দম অদু দিফেন্স মিনিস্তরনা ফোঙদোকখি। মপাঙ্গল কনবা অমসুং মশাগী ওক্নবা পুথোকপা ভারতনা মরুপ-মপাং ওইবা ভিয়েতনামগুম্বা লৈবাকশিংগী দরকার ওইবা ফংনবা মতেং পাংবা ঙমগনি হায়না মহাক্না ফোঙদোকখি। তুংদা ইন্সতিতুৎ অমগী মখাদা ফ্রেমৱার্ক এগ্রিমেন্ত অমা শেমগৎতুনা ভারত অমসুং ভিয়েতনামগী মরক্তা দিফেন্স ইন্দস্ত্রিগী মতেং পাংনবা হেনগৎহন্নবা মহাক্না তকশিনখি।

কোবিদ-১৯ লাইচৎ মরক অসিদা ভিয়েতনাম্না অসিয়ানগী প্রসিদেন্ত ওইবা মতমদা অসিয়ানদা দিফেন্সকা মরী লৈনবা থৌরমশিং মাইপাক্না লুচিংখিবগীদমক রাক্ষ মন্ত্রীনা ভিয়েতনাম থাগৎখি।

হুমেন রিছোর্সকী হিরম য়াওনা ভিয়েতনামগী দিফেন্স ফোর্সশিং ত্রেনিং পীবদা ভারতকী আর্মদ ফোর্সশিংনা মতেং পাংবগীদমক ভিয়েতনামগী দিফেন্স মিনিস্তরনা রাক্ষ মন্ত্রী থাগৎখি। ভারতকী দিফেন্স ইন্সতিতুৎশিংদা ভিয়েতনাম দিফেন্স ফোর্সকী সর্বিস অহুম ত্রেনিং পীবা হেনগৎহন্নবা ভারতকী অপাম্বা অদু রাক্ষ মন্ত্রীনা থমখি।

ভর্চুএল ওইনা ২০২০গী দিসেম্বর ১০দা ভিয়েতনামদা পাংথোক্কদবা এ.দি.এম.এম প্লস মীফমদা রাক্ষ মন্ত্রী শরুক য়ানবা ভিয়েতনামগী দিফেন্স মিনিস্তরনা চেবাউ পীখি।

****



(Release ID: 1676665) Visitor Counter : 45