লৈবাক অসিদা অর্চেরি স্পোর্তস য়োকখৎনবা অমসুং কাংলোন শেম্নবা নেসনেল স্পোর্তস ফেদেরেসন অমা ওইনা য়ুথ এফেয়ার্স অমসুং স্পোর্তস মিনিস্ত্রিনা অর্চেরি এসোসিএসন ওফ ইন্দিয়া অমুক হন্না শকখঙলে। নেসনেল স্পোর্তস দিবলপমেন্ত কোদ ওফ ইন্দিয়া,২০১১(স্পোর্তস কোদ)গী মতুংইন্না এসোসিএসন অসিগী মীখলশিং পাংথোকপা ঙমদবদগী চহি ৮গী মমাংদা সরকারনা অর্চেরি এসোসিএসন ওফ ইন্দিয়া শকখঙবা তোকখিবনি। সরকারনা অর্চেরি এসোসিএসন ওফ ইন্দিয়া শকখঙবা অসি চহি অমা চৎনগনি।

য়ুথ এফেয়ার্স অমসুং স্পোর্তস মিনিস্ত্রিগী ৱারেপ অসি ত্রাইবেল এফেয়ার্সকী য়ুনিয়ন মিনিস্তর অমসুং অর্চেরি এসোসিএসন ওফ ইন্দিয়াগী প্রসিদেন্ত শ্রী অর্জুন মুন্দানা তরাম্না ওকখ্রে। শ্রী অর্জুন মুন্দানা হায়খি ২০১২গী দিশেম্বর ৭দা অর্চেরি এসোসিএসন ওফ ইন্দিয়াদা থমখিবা অথিংবা লৌথোকপগীদমক ঐনা মিনিস্ত্রি থাগৎলি। তাঞ্জা অসি পুৱারি ওইবা অমসুং সনাগী ময়েক্না ইদুনা লৈহৌরগদবা নুমিৎ অমনি অমসুং ৱারেপ অসিনা ভারতকী অর্চেরিগী অনৌবা তাঙ্কক অমা হৌরগনি। ৱারেপ অসিনা তোকিও ওলেম্পিক্সতা মকোক থোংবা অর্চরশিংগা লাম্বা তৌনবা ঙম্নবা থৌরাং তৌনবা লুরবা তানফম অসিদা হেন্না ফজনা শান্ননবা ভারতকী তিম পুক্নিং থৌগৎলগনি।

অর্চরশিং, কোচশিং অমসুং অর্চেরিগী ইমুং-মনুং পুম্নমক মহাক্না থম্মোয় শেংনা থাগৎলদুনা শ্রী মুন্দানা হায়খি মতম শাংনা কোর্তকী কেসশিং থেংনবগী মহৈ ওইনা শকখঙবা ঙমখিবনি। এসোসিএসন অসিনা ভারত্তা অর্চেরি অৱাংবা থাকশিংদা পুখৎকনি। অর্চেরি মশান্না য়াইফনবা অমসুং তুংদা শান্নরোয়শিং খ্বাইদগী ৱাংবা থাক্তা থম্নবা অর্চেরি এসোসিএসন ওফ ইন্দিয়ানা য়ুথ এফেয়ার্স অমসুং স্পোর্তস মিনিস্ত্রিগা নকশিন্ননা থবক তৌমিন্নগনি।

দিল্লি হায় কোর্তনা হাপ্পা রিতর্নিং ওফিসার শ্রী পি.কে ত্রিপাথিনা ২০২০গী জনুৱারি ১৮দা অর্চেরি এসোসিএসন ওফ ইন্দিয়াগী থৌ পুবশিং অমসুং ইজুকিউতিপ কম্মিতিগী মীখলশিং পাংথোকখ্রে। স্পোর্তস কোদকী প্রোবিজনশিংদা য়াওরিবা চহি অমসুং থবক পায়বগী মতমগী অথিংবশিং অমসুং নেসনেল স্পোর্তস ফেদেরেসনশিংদা সরকারগী থবক তৌবা মীওইশিংনা মীখল থেংনদুনা ফম পায়বগী মতাংদা মিনিস্ত্রিনা থম্লিবা অথিংবা অসি য়েংদুনা মীখলগী ফলশিং অমসুং রিতর্নিং ওফিসারগী পাউদম য়ুথ এফেয়ার্স অমসুং স্পোর্তস মিনিস্ত্রিনা য়েংশিনখি। অর্জুন মুন্দা(প্রসিদেন্ত), প্রমোদ চান্দুরকার(সেক্রেতরি) অমসুং আর.এস তোমার(ত্রেজরর) ওইনা খনখিবা ২০২০গী জনুৱারি ১৮দা পাংথোকখিবা অর্চেরি এসোসিএসন ওফ ইন্দিয়াগী মীখলশিং অদু য়ুথ এফেয়ার্স অমসুং স্পোর্তস মিনিস্ত্রিনা অয়াবা পীখ্রে।

অদুবু, শ্রী পি.বি ৱার নোংব্রি(ভাইস প্রসিদেন্ত ওইনা খনখিবা);শ্রী কে.বি গুরুং অমসুং শ্রী কুমজুম রিবা(অনিমক জোইন্ত সেক্রেতরি ওইনা খনখিবা)গী মীখলশিং স্পোর্তস কোদকী প্রোবিজনশিং মতুংইন্না পাংথোকখিদে। মীখল থেংন্নবা সরকারগী মরী লৈনবা ওথোরিতিদগী মাংজৌন্না এন.ও.সি য়াওদনা মীখল থেংনখি। করিগুম্বা মখোয়গী অপাম্বা লৈরবদি, হায়রিবা ওফিসিএলশিং অসি ওফিস থাদোক্নবা অমসুং হায়রিবা ফমশিং অসিগীদমক নৌনা মীখল থেংন্নবা অর্চেরি এসোসিএসন ওফ ইন্দিয়ানা পাউতাক পীখ্রে। অমুক হন্না শকখঙবগী চেরোল পীখিবা থা ৬গী মনুংদা এসোসিএসন অসিগী সংবিধান্দা য়াওদবা স্পোর্তস কোদকী প্রোবিজনশিং চৎন্নবা অর্চেরি এসোসিএসন ওফ ইন্দিয়াদসু পাউতাক পীখ্রে।

ৱার্ল্দ অর্চেরি(অর্চেরিগী ইন্তরনেসনেল ফেদেরেসন)না অর্চেরি এসোসিএসন ওফ ইন্দিয়াগী অথিংবা লৌথোকখ্রে অমসুং হৌজিক ইন্দিয়ান ওলেম্পিক্স এসোসিএসন অমসুং ৱার্ল্দ অর্চেরি অনিমক্না অর্চেরি এসোসিএসন ওফ ইন্দিয়া শকখঙলে।

*****