শেহতীয়া সপ্তাহবোৰত নতুন ধৰণৰ পণ্য মূলতঃ ৰোগ প্রতিৰোধ ক্ষমতা বৃদ্ধি কৰা পণ্য আৰু বনাঞ্চলৰ সতেজ পণ্য আৰু জৈৱিক পণ্য বিক্রীৰ ওপৰত বিশেষ গুৰুত্ব আৰোপ কৰিছে ট্রাইফেড-এ। ট্ৰাইবছ ইণ্ডিয়াই অধিক নতুন সামগ্ৰী অন্তৰ্ভুক্ত কৰাৰ বাবে এক নতুন উদ্যোগ গ্ৰহণ কৰিছে। এই সামগ্ৰীসমূহ প্ৰস্তুত কৰিছে জগদলপুৰ কেন্দ্ৰীয় কাৰাগাৰৰ কয়দীসকলে।

ট্রাইফেডৰ পৰিচালন সঞ্চালক শ্ৰী প্রবীৰ কৃষ্ণই কয়, ট্রাইবছ ইণ্ডিয়াই দেশৰ জনজাতিসমূহৰ জীৱন ধাৰণৰ মান উন্নত কৰিবলৈ একাধিক পদক্ষেপ গ্রহণ কৰিছে। ছত্তিশগড়ৰ জগদলপুৰৰ কেন্দ্রীয় কাৰাগাৰৰ কয়দীসকলৰ সহযোগিতাত জনজাতীয় লোকসকলৰ হাতেৰে প্ৰস্তুত কৰা শিল্পকর্মসমূহ বজাৰলৈ নিয়া হৈছে। ইয়াৰ ফলত তেওঁলোক আৰু অধিক স্বাৱলম্বী হোৱাত সহায়ক হ’ব। আত্মনির্ভৰ ভাৰত গঢ়াৰ লক্ষ্যেৰে এই উদ্যোগ গ্রহণ কৰা হৈছে বুলিও তেওঁ জানিবলৈ দিয়ে। ট্রাইবছ ইণ্ডিয়াই তেওঁলোকৰ তালিকাভুক্ত পণ্যৰ অধীনত এই নতুন পণ্যসমূহকো অন্তর্ভুক্ত কৰিছে।

আজি ট্রাইবছ ইণ্ডিয়াই নতুন তালিকাভুক্ত পণ্য মুকলি কৰে। এই তালিকাত ছত্তিশগড়ৰ জগদলপুৰৰ কাৰাগাৰৰ জনজাতীয় কয়দীসকলৰ হাতেৰে তৈয়াৰী লক্ষ্মী, গণেশ, দুর্গাৰ মূর্তি আছে। এই মূর্তিসমূহ উপহাৰ সামগ্রী হিচাপে ব্যৱহাৰ কৰিব পৰা যাব। ইয়ে কাৰাগাৰৰ জনজাতীয় কয়দীসকলক স্বাৱলম্বী হোৱাত বিশেষ সহায়  কৰিব। ট্রাইবছ ইণ্ডিয়াই এই ধৰণৰ হস্তশিল্প কলাক বিশ্ব দৰবাৰত প্ৰতিষ্ঠা কৰিবলৈ একাধিক পদক্ষেপ গ্রহণ কৰিছে। দেশৰ ১২৫টা ট্রাইবছ ইণ্ডিয়াৰ বিপণন কেন্দ্রত এই সকলো নতুন পণ্য বিক্রী কৰা হৈছে। ভোকেল ফৰ লোকেল এই মন্ত্রকে গ্ৰহণ কৰি জনজাতীয় লোকসকলৰ জীৱন ধাৰণৰ মান উন্নত কৰা, জীৱন আৰু জীৱিকা নির্বাহৰ পথ দেখুওৱাৰ ক্ষেত্ৰত ট্রাইবছ ইণ্ডিয়া আগবাঢ়ি আহিছে। তেওঁলোকৰ ই-মার্কেট স্থানত জনজাতীয় লোকসকলে প্ৰস্তুত কৰা হস্তশিল্প কলা দাঙি ধৰা হৈছে। ইয়াৰ জৰিয়তে সুস্থায়ী আৰু প্রাচীন ঐতিহ্যশালী ভাৰতৰ এক নির্দশন প্ৰকট হৈ পৰিছে।

এই সামগ্ৰীসমূহৰ বাবে অনুগ্ৰহ কৰি market.tribesindia.comৱেবছাইট চাব পাৰে।

 ******

NB/SK/KG