খুরুমজরি !

থৌরম অসিদা ঐনা লোইননা লেংশিনবীরিবা গচ্ছাধিপতি জৈনাচার্য় শ্রী বিজয় নিত্যানন্দ সুরিশ্বরজী, আচার্য় শ্রী বিজয় চিদানন্দ সুরিজী, আচার্য় শ্রী জয়ানন্দ সুরিজী, মহোৎসব অসিবু লমজিংবীরিবা মুনি শ্রী মোক্ষানন্দ বিজয়জী, শ্রী অশোক জৈনজী, - শ্রীমান সুধীর মেহতাজী, শ্রী রাজকুমারজী, শ্রী ঘীসুলালজী অমসুং আচার্য় শ্রী বিজয় বল্লভ সুরিজীগী মতুং ইনবা খোংলোই পুম্নমক। অদোম পুম্নমক্তা য়ুগদৃস্তা, বিশ্ববন্দয় বিভুতি, কলিকাল কল্পতরু, পঞ্জাব কেসরী আচার্য় শ্রী বিজয় বল্লভ সুরিজীগী ১৫০শুবা মপোক কুমওনগী মহোৎসব অসিগীদমক হন্না হন্না য়াইফ-পাউজেল পীজরি। 

অনৌবা চহি অসি আধ্যত্মিক্না ঙান্থোইবা চহিনি, ইথিন পীনবীগদবা চহিনি। থৌরম অসিদা শরুক য়াজবা অসি ঐগী লাইবক ফবনি, অদোম পুম্নমক্তগী থৌজাল ফংজনবগী তাঞ্জা ফংজরে। মপোক কুমওনগী থৌরমগী থোংদা অমরোমদা ভগবান শ্রী মহাবীর স্বামীগী অহিংসা, অনেকান্ত অমসুং অপরিগ্রহগুমবা ফিদমশিং অসিবু শন্দোক্লি অদুগা লোইননা গুরু বল্লভগী পাউজেলশিংবুসু মীয়ামদা য়ৌহল্লি। অসিগুম্লবা অচৌবা থৌরমশিংগীদমক্তা ঐনা গচ্ছাধিপতি আচার্য় শ্রীমদ বিজয় নিত্যানন্দ সপরিশ্বরজী মহারাজবুসু অখন্ননা তৌবীমল খঙবা উৎচরি। অদোম্বু উজবা, অদোমগী থৌজাল অমসুং অদোমগা নক্নবগী লাইবক ফবা ঐনা বদোদরা অমসুং ছোতা উদয়পুরগী কনবাৎ খুঙ্গংদসু ফংজখি। ঙসি অমুক্কা হন্না মায় ওনশিন্নদুনা শরুক য়ামিন্নবগী খুদোংচাবা ফংজরে মসি ঐনা ঐগী লাইবক ফবনি হায়না লৌজৈ। সন্তজন আচার্য় শ্রীমদ বিজয় নিত্যানন্দ সুরিশ্বরজী মহারাজনা হায়বীরম্মি মদুদি গুজরাতকী লমদমনা বল্লভ অনি পীবীরে অমসুং হৌজিক হৌজিক মসিগী মতাংদসু হায়বীখ্রে। রাজনীতিগী লমদা সরদার বল্লভ ভাই পতেল অমসুং আধ্যাতমিক্কী লমদা জৈনাচার্য় বিজয় বল্লভ সুরিশ্বরজী মহারাজ। অদুবু ঐনা মহাপুরুশ অনিমক অসি চপ মান্ননা উজৈ। অনিমক্না ভারতকী অপুনবা অমসুং নুংশি-চান্নবা অদুগীদমক্তা মখোয়গী পুন্সি কৎথোকপীখি। ঐগী লাইবক ফবনি মদুদি ঐহাকপু লৈবাক অসিনা সরদার বল্লভ ভাই পতেলগী মালেমগী খ্বাইদগী ৱাংবা ‘স্তেচু ওফ য়ুনিতী’গী মায়খুম হাংদোক্নবা তাঞ্জা পীনবীখি, অমসুং ঙসি জৈনাচার্য় বিজয় বল্লভজীগী ‘স্তেচু ওফ পীচ’কী মায়খুম হাংদোক্নবগী খুদোংচাবসু ফংজরে।

সন্তজন,

ভারতনা মতম পুম্নমক্তা মালেম পুম্ববু, মীওইববু, শান্তি, অহিংসা অমসুং মচিন-মনাও ওইবগী লম্বী তাক্তুনা লাক্লি। মসি মালেম্না ভারত্তগী ইথিল ফংবা পাউজেল অদুনি। লমজিং-লমতাক অসিগীদমক্তা মালেম্না ঙসি অমুক্কা হন্না ভারতকী মায়কৈদা য়েংলক্লি। ঐনা থাজৈ মদুদি ‘স্তেচু ওফ পীস’ অসি মালেমদা শান্তি, অহিংসা অমসুং সেবাগী ইতিলগী হৌরকফম ওইরগনি।

মরূপশা,

আচার্য় বিজয় বল্লভজীনা হায়বীরম্মি – “ধর্ম হায়বসি তোর্বান্দ কয়ানা কোইশিল্লিবা পুখ্রি নত্তে, চেন্থরিবা ইচেলনি, মসি পুম্নমক্না মান্না ফংফম থোকই।” মহাক্কী পাউজেল অসি মালেম অপুনবা অসিগীদমক অদুক্কী মতিক মরী লৈনৈ। মহাক্কী পুন্সিগী মতাংদা হন্না হন্না ৱারী শাবা মথৌ তাই, মহাক্কী পুন্সিগী মশক অদু হনগৎনা য়েংবা মথৌ তাই। মহাক ফিলোশোফী অমসুংনি, খুন্নাই শেম্বা অমসুনি। মহাক্না লাপ্না উবা অমসুনি, অমসুং মীয়ামগী সেবক অমসুনি। মহাক তুলসীদাস, আনন্দঘন অমসুং মীরাগী মতৌগুম্না পরমাত্মগী ভক্ত কবিসু ওইখি অমসুং অনৌবা ভারতকী মঙ মঙজরম্বা অমসুং ওইখি। মরম অসিনা মহাক্কী পাউজেল, মহাক্কী পাউতাক অমসুং মহাক্কী পুন্সি অসি ঐখোয়গী অনৌবা মীরোলদা য়ৌহনবা অসি অদুক্কী মতিক মথৌ তাই।

মরূপশা,

মহাপুরুশশিংগী, লম্বোইবশিংগী ৱাখল্লোন অসি মরম অসিদগী লোম্বা নাইদবা ওইরিবনি মদুদি মখোয়না হায়রম্বশি, মখোয়না তাক্লম্বশিং অদুদা মখোয়গী পুন্সিনা হিংখি। আচার্য় বিজয় বল্লভদীনা হায়বীরম্মি – “সাধু মহাত্মশিংগী থৌদাং শুপ্নগী মখোয়গী আত্মাগী য়াইফনবা তৌবদা লোইবা নত্তে”। মহাক্কী অসিগুম্বা খুন্নাইগী ওইবা ৱাখল্লোন অসিদগী ইথিল পোকচদুনা ঙসি মহাক্কী লাইনীং লম্বী অসিদা নহা ওইরিবা কয়ানা সমাজ সেবাগীদমক্তা পুল্লরি, সেবাগী ৱাশক শক্লরি। সন্তজন, অদোম পুম্নমকসু মসি তশেংনা খঙবীরিবদুনি মদুদি সেবা, মহৈ অমসুং আত্মনির্ভরতাদগী হিরম অসি আচার্য় শ্রীগী থমোইগা খ্বাইদগী নক্নবা ওইখি। মীনাই ওইরিঙৈগী মতমদা শিংনবা কয়া লৈজদুনসু মহাক্না মফম মফম চৎতুনা মহৈ-মশিং তম্বীখি। গুরুকুলশিং, স্কুলশিং অমসুং কোলেজশিং লিংখৎখি। মহাক্না খঙহনখি মদুদি – “ঘর-ঘর বিদ্যা দীপ জলে”। অদুবু মহাক্না মসিসু খঙখি মদুদি অংগ্রেজশিংনা শেম্লম্বা মহৈ-মশিংগী থৌরাং ভারতকী নীং তম্বা অমসুং চাউখৎপদা মতেং ওইরোই। মরম অসিনা লিংখৎখিবা স্কুল, কোলেজশিংদা ভারতকী ওইবা মওং মতৌদা মহৈ তম্বীখি, মহাত্মা গান্ধীনা গুজরাত বিদ্যাপিথকী মঙলান মঙখিবগুম্না গুরু বল্লভনা মঙজখি। ঙসি মহাক্কী থৌজালদগী মহৈ তম্ফম কয়া লৈবাক অসিগী কান্নবা ওইরি।

মরূপশা,

আচার্য়জীগী মহৈ তম্ফম শঙশিং ঙসিদি উপবন (লৈতেংলবা উমং)গী মতৌনি। মসি ভারতকী মওংদা শেম্বা মহৈ তম্ফম ওইদুনা লৈবাক অসিগী সেবা তৌরি। চহি চাম্মাদগী হেল্লবা খোংচৎ অসিদা হৈথোই-শিংথোইরবা নহা কয়া মহৈ তম্ফমশিং অসিদগী থোকখ্রে। ওন্ত্রপ্রিনর কয়া, জজ কয়া, দোক্তর কয়া অমসুং ইনজিনীয়র কয়া মহৈ তম্ফমশিং অসিদগী থোকখিদুনা লৈবাক্কীদমক অমুক্তা ওইখিদ্রিবা থৌদাং কয়া পাংথোক্লি। মহৈ তম্ফমশিং অসিগী অতোপ্পা থোইদোকপা ৱাফমদি – নুপীগী মহৈ-মশিংনি। নুপীগী মহৈ-মশিংগী লমদা মহৈ তম্ফমশিং অসিনা লৌরিবা থৌদাং অসিগীদমক লৈবাক অসিনা ঙসি লমন তোনশিল্লবনি। মখোয়না লুরবা মতম অসিদসু নুপীগী মহৈ-মশিং অসিবু হৌদোক্লি। বালিকাশ্রম কয়া লিংখৎলি অমসুং নুপীশিংবু মরুওইবা ইচেলদা তিলহল্লি। জৈন লাইনীং চৎপা মীওইশিংনা মীফমদা ৱা ঙাংবগী চৎনবী অসি বিজয় বল্লভজীনা হৌদোকহনখি। মহাক্না হোৎবীখিবা অসিগী পাউজেলদি নুপীশিংবু খুন্নাইদা, মহৈ-মশিংদা মান্নবা থাক পীগদবনি। খেন্নবা ৱাখল্লোন অমদি চৎনবী লোইশিনগদবনি। ঙসি অদোম্না মুন্না খনবীরবদি থেংনবীগনি মদুদি লৈবাক অসিদা মায়কৈ অসোমদা কয়াদা অহোংবা পুর্লবনো। তীন তলাক্কুম্বা ফত্তবা চৎনবীশিংগী মায়োক্তা লৈবাক অসিনা কাংলোন শেমখ্রে। নুপীশিংগীদমক্তা হৌজিক ফাওবগী মনুংদা মখোয়না থবক তৌবা য়ারমদবা সেক্তরশিংসু হাংদোক্লে। হৌজিক লৈবাক অসিগী মমোমশিংবু লান্মীদা মখোয়গী থৌনা উৎননবা খুদোংচাবা হেন্না ফংলে। মসিগা লোইননা, অনৌবা ‘নেস্নেল এজুকেসন পোলিসী’ হৌজিক লৈবাক অসিদা চৎনগদৌরে। পোলিসী অসিনা মহৈ-মশিং অসি ভারতকী ওইবা মওংদা নৌথোকহনবগা লোইননা নুপীশিংগীদমক্তসু অনৌবা তাঞ্জা শেম শারগনি।

মরূপশা,

আচার্য় বিজয় বল্লভজীনা হায়বীরম্মি – লৈবাক্কীদমক্তা থৌদাং থৌওইদবা তৌরোইদবনি, পাংথোক্কদবনি। মহাকনা মহাক্কী পুন্সিদসু ‘এক ভারত শ্রেশ্থ ভারত’কী মন্ত্রদা হিংজখি। মীওইবগী অচুম্বা অসিদা চৎতুনা মহাক্না জাতি, কাংলুপ, ফুরুপকী ঙমখৈশিংগী ৱাংমদা থোরক্তুনা পুম্নমক্কী চাউখৎপা অসিগীদমক থবক তৌবীখি। ঙসি লৈবাক অপুনবা অসিদা আত্মবল্লভকী মিংদা ইন্সতিত্যুৎ কয়ানা লাইরবা অঙাংশিংগী তুংলমচৎকী থৌদাং য়ারি, মমাশিং মচে-মচনশিংগী পুন্সি হিংজনবা, লাইরবা অনাবা মীওইশিংগী লাইয়েংনবা মতেং পাংলি।

মরূপশা,

আচার্য় বিজয়বল্লভজীগী পুন্সি অসি পুন্সি পুম্নমক্কী মৈরা, মীনুংশি অমসুং নুংশিবতনা থনবা ওইখি। মরম অসিনা, মহাক্কী থৌজালদগী ঙসি জীবদয়াগীদমক্তা উচেক্কী হোস্পিতাল অমসুং শঙ্গোন কয়াসু লৈবাক অসিদা লৈরি। মসি অচম্বা ইন্সিত্যুৎ নত্তে। মসি ভারতকী ৱাখল্লোন অদুগী খুদম্নি। মসি বারত অমসুং ভারতকী ওইবা মগুং অদুগী শক্তাক্নি।

মরূপশা,

ঙসি লৈবাক অসিনা আচার্য় বিজয় বল্লভজীগী মদুগীদমক্তা মহাক্না মশামকপু কৎথোকচখিবা অদুগুম্বা মীওইবগী মগুন অদুবু মপাঙ্ল হাপ্লরি। কোরোনা লাইচৎকী অৱাবগী মতম অসি ঐখোয়গী সেবাভাও, ঐখোয়গী অমত্তা ওইবা অসিগীদমক্তা চাংয়েং অমগুম্বনি। অদুবু ঐহাক পেঞ্জৈ মদুদি লৈবাক অসিনা চাংয়েং অসিদা মায় পাক্লে। লৈবাক অসিনা লাইরবশিংগী য়াইফ-থৌরাংগী ৱাখল্লোন অসিবু হিংহনবতা নত্তনা মালেমগী মাংদা খুদমসু উৎখি।

মরূপশা,

আচার্য় বিজয় বল্লভ সুরিজীনা হায়বীরম্মি – “থৱাই পানবা পুম্নমক্কী সেবা তৌবা অসি ভারত মচা পুম্নমক্কী ধর্মনি।” ঙসি মহাক্কী ৱাহৈ অসিবু ঐখোয়না ঐখোয়গী মন্ত্র ওইজদুনা মাংদা চখৎকদবনি। ঐখোয়না ঐখোয়গী হোৎনবা খুদিংদা মসি খনগদবনি মদুদি মসিনা লৈবাক অসিদা করি কান্নবা পুরক্কনি, লৈবাক অসিগী লাইরবশিংগীদমক করম্না কান্নগনি। ঐনা হৌরকপদা হায়খিবা ‘ভোকেল ফোর লোকেল’ অসি মসিগী খ্বাইদগী চাউবা পাম্বৈ অমনি অমসুং মসিবু সন্ত জগৎনা লুচিংবীগদবনি। লাকলো, আচার্য় বিজয় বল্লভজীগী ১৫০শুবা মপোক কুমওন অসিদা ঐখোয় ৱাশক লৌরসি মদুদি মহাক্না মহাক্কী পুন্সিদা হৌদোকপীরমখিবা থবকশিং অদু ঐখোয় মপুং ফাহল্লসি। ৱাশক অসিগা লোইননা, অদোম পুম্নমক্তা হন্না হন্না য়াইফ-পাউজেল পীজরি। অদোম পুম্নমক হকচাং ফনা লৈবীয়ু, নুংঙাইনা লৈবীয়ু। আচার্য় পুম্নমকপু, ভগবন্তশিংবু ঐনা খুরুমজবগা লোইননা, সাধবী মহারাজ পুম্নমকপুসু, ঐনা মফম অসিদগী উবা ফংজরিবা পুম্নমকপুসু খুরুমজবগা লোইননা ঙসিগী শেংলবা থৌরম অসিদা ঐহাক অদোম ময়ামগী নরক্তা লাকচবগী তাঞ্জা ফংজরে, মসি ঐগী লাইবক ফবনি। ঐনা অমুক্কা হন্না সন্ত, মহন্ত, আচার্য় পুম্নমকপু খুরুমজবগা লোইননা ঐগী ৱাহৈ লোশিঞ্জরি।

হন্না হন্না থাগৎচরি।

*****