লৈবাক অসিগী পাক-চাউরবা কৈথেল অমসুং ললোন-ইতিক পাংথোক্নবগী অফবা ফিবমগী খুদোংচাবা লৌদুনা ভারত্তা শেন থাদরক্নবা কমর্স অমসুং ইন্দস্ত্রি, রেলৱেজ, ফুদ অমসুং পব্লিক দিস্ত্রিবিউসনগী য়ুনিয়ন মিনিস্তর শ্রী পিয়ুস গোয়ালনা মালেমগী ইনভেস্তরশিংনা তকশিনখ্রে। ঙসি বেঙ্ক ওফ ইন্দিয়ানা শীনবা কনফরেন্স ‘ইন্দিয়া:দ্রাইভর্স ওফ চেঞ্জ’দা মহাক্কী মরুওইবা ৱারোলদা মহাক্না হায়খি ইনভেস্তরশিংনা থাদরকপা শেনফমশিংদা লৈবাক অসিনা ফজনা শেন্দোং ফংহল্লে।

শ্রী গোয়ালনা হায়খি মালেমগী ভেলু চেনশিংদা ভারত থাজবা মরুপ অমা ওইনা উরে। ভারতকী অরোন-অথুপ লৈতবা লৈঙাক অমা অমসুং মনিং তম্বা গনতন্ত্র লৈরি। লৈবাকশিংগী লুপ মনুংদা মতিক চাবা মফম ফংনবা ভারতনা পান্দম থম্লি। সরকারনা কাংবু অমা ওইনা থবক পায়খৎলি, দিপার্তমেন্তশিংগী মরক্তা পাউ ফাউনদবা অদু লৈহন্দ্রে। লৈবাক অসিদা অচৌবা ললোন-ইতিকশিংগী খুদোংচাবশিং লৈরি। অচৌবা ৱাখল খন্নবা অমসুং অনৌবা মফমশিং অমসুং ললোন-ইতিকশিং থিদোক্নবা ললোন-ইতিক্কী থবকশিংদা থৌনা পীনবা মরুওইবা ৱারেপশিং লৌরে।

ঙসিগী মন্ত্রীমন্দলগী ৱারেপশিংগী মতাংদা শ্রী গোয়ালনা হায়খি ভারতকী পোৎ-চৈ শাবগী থবকশিং হেনগৎহন্নবা অমসুং মপান্দা থাদোকপা-অত্মনির্ভর ভারত হেনগৎহন্নবা মরুওইবা সেক্তর ১০দা প্রদক্সন-লিঙ্ক ইন্সেনতিপ(পি এল আই) হৌদোক্নবা অয়াবা পীখ্রে। তেলিকোম, এ.পি.আইশিং অমসুং মেদিকেলগী খুৎলায়শিংগী মমাঙদা লাউথোকখিবা পি.এল.আইশিং নিংথিনা পাম্নখি। মতেংশিং অসিনা মপাঙ্গল কনবা, মশাগী ওক্নবা পুথোকপা, মশা-মরোমদোম লেপচবা ঙম্নবা অমসুং ঐখোয়গী লৈবাক মনুংগী দরকার ওইবশিং ফংহন্নবা অমসুং মপান্দা থাদোক্নবা ভারতকী মতেং পাংগনি।

মিনিস্তরনা হায়খি মথং চহি ৫ হেন্না হায়রিবা সেক্তরশিং অসিগা সরকারগা খুৎশম্নদুনা চৎমিন্নগনি। তোঙান-তোঙানবা সেক্তরশিংগী ক্লস্তর শেমগৎপা অমসুং পুথোক-পুশিনগী য়াওনা অতোপ্পা মতেংশিং পাংলে। সোসিএল সেক্তরশিংগী ভাইএবিলিতি গেপ ফন্দিং স্কিমগী মতাংদা মহাক্না হায়খি মসিনা মীয়াম থবকশিং হায়বদি থক্নবা ঈশিং, হকশেল অমসুং লাইরিক-লাইশু তম্বগী হিরমদা লনাই শেন থাদবা ঙমহনগনি অমসুং মীয়ামগী দরকার ওইবশিং ফংহনবদা মতেং পাংগনি।  

শ্রী গোয়ালনা হায়খি ভারতকী শেন-থুমগী ফিবম কোবিদনা শোকহনবদগী ফগৎলক্লে অমসুং লৈবাক অসিগী মহৌশাগী ফিবমদা হল্লক্লে হায়বা তোঙান-তোঙানবা দেতাশিংনা উৎলে। মতম কুইনা উরুদ্রবা, পি.এম.আই ইন্দেক্স অৱাংবা থাক অমদা লৈরে। সর্বিসেস ইন্দেক্সসু ফিবম ফগৎলে। ওক্তোবর থা অসিদা খোমগৎপা জি.এস.তি মমাং চহিগী ওক্তোবর থাদগী চাদা ১০ হেল্লে। মসিগা চপ মান্নবা মওংদা, সেপ্তেম্বরদা ভারতনা মপান্দা থাদোকপা চাদা ৫ হেনগৎলে। ওক্তোবরদা ময়েং খর তারুরবা মতুংদা, নবেম্বরগী অহানবা চয়োলদা মপান্দা থাদোকপা চাদা ২২ হেনগৎপা উখি। মপান লৈবাকশিংদগী পোৎ-চৈ পুশিল্লকপসু হেনগৎলক্তুনা শেন-থুম তানবগী থবকশিং মহৌশাগী ফিবমদা হঞ্জিল্লকপা উরে। হৌখিবা থা অনিদা রেলৱেজগী ফ্রেদ মমাং চহিগী হায়রিবা থা অনি অসিদগী চাদা ১৫ হেনখি। হৌখিবা ক্বাতরদা ভারতকী কম্পেনিশিংনা উৎখিবা ফলশিংনা মহৌশাগী ফিবমদা হঞ্জিল্লক্লে হায়বা উৎলে।   

শ্রী গোয়ালনা হায়খি লৈবাক অসিদা তশেংনা স্তার্দ-অপ কলচর খোঙজেল য়াঙখৎলে, অনৌবা পুথোকপা অমসুং ওন্ত্রেপ্রেনিউয়রসিপকী ৱাখল্লোন্দা থৌনা পীরে অমসুং হৌজিক ভারতকী মীয়াম থবক থিবগী মহুৎতা থবক পীবা মীওই ওইবা ঙম্নবা থাজবা লৈরে।

সি ৪- করেজ, কনফিদেন্স, কম্পেতেন্স অমসুং কম্পেসনদা শ্রী গোয়ালনা তকশিলখি। মহাক্না হায়খি ২০২৫ ফাওবগী মনুংদা দোল্লর ত্রিল্লিয়ন ৫গী ইকোনোমি লৈনবা ভারতনা পান্দম থম্লি অমসুং মথং চহি ৭দগী ৮ফাওবগী মনুংদা দোল্লর ত্রিল্লিয়ন ১০ য়ৌনবা ঙম্নবা পান্দম থম্লি।

অত্মনির্ভরভারত কেম্পেনগী মতাংদা মহাক্না হায়খি মসি ভারত মশা মরোমদোম লেপচনবা খক নত্তে, মপাঙ্গল কনবা ফিবম অমদগী মালেমগা থবক তৌমিন্নবা খোঙজং অমসুনি। প্রধান মন্ত্রী শ্রী নরেন্দ্র মোদীগী লুচিং মখাদা, দিফেন্স, লৌউ-শিংউ, কোয়লা, মাইনিং, স্পেস তেক্নোলোজি য়াওনা সেক্তর কয়া ঐখোয়না কোমথোক্লে। হায়রিবা সেক্তরশিং অসিদা লনাই কাংবু শেন হেন্না থাদনবা তরাম্না ওক্লি। পোৎ-লৈরিবা মীওইশিং খক্তদা মিৎয়েং থম্বা ললোন-ইতিকশিং অমসুং নন-কোর সেক্তরশিংদগী সরকারনা মপান থোরক্কদবনি।

*****