ঙসি ভর্চুএল ওইনা পাংথোকপা ব্রিক্স তুরিজম মিনিস্তরশিংগী মীফমদা কলচর অমসুং তুরিজম(ইন চার্জ)গী য়ুনিয়ন মিনিস্তর শ্রী প্রাহলাদ সিংহ পতেল শরুক য়াখ্রে। মীফম অদুদা অতোপ্পা ব্রিক্স লৈবাকশিংগী তুরিজম মিনিস্তরশিংসু শরুক য়াখি।

মীফম অদুদা শ্রী প্রাহলাদ সিংহ পতেলনা হায়খি কোবিদ-১৯ লাইচৎনা হিরম খুদিংমক্তা শেন-থুম তানবগী থবকশিংদা শাথিনা অকায়বা থোকহল্লে অমসুং মালেমগী ওইনা তুরিজমগী থবকশিংদা খুদোংচাদবা কয়া থোকহল্লে। ভারতসু মসিগা মান্নবা অৱাবা কয়া মায়োক্নরে। অদুবু, ঐখোয়গী প্রধান মন্ত্রী শ্রী নরেন্দ্র মোদীগী মিৎয়েং শানবা অমসুং লমজিংবা হৈবনা মরম ওইদুনা, ভারতনা লাইচৎ অসি মাইপাক্না থেংনবা ঙম্লে।

শ্রী পতেলনা হায়খি ফোরেন একচেঞ্জ তানবগী মরুওইবা লম্বী অমা ওইবগী মথক্তা জি.দি.পি অমসুং থবক ফংহনবা অনিমক য়াওনা লৈবাক অমগী শেন-থুমগী ফিবম ফগৎহনবদা তুরিজম ইন্দস্ত্রিনা শিংথাবা য়ানা মতেং পাংলি। তুরিজমগী থবকশিং য়াম্না চাউনা অৱাবা থেংনরে অমসুং ললোন-ইতিক্কী থবক হিংনবা, থবক মখা তানা পীনবা অমসুং অতোপ্পা হিরমশিং অমুক হন্না হিঙ্গৎহন্নবা ভারত সরকারনা শেন-থুমগী মতেং পাংনবা পেকেজ কয়া লাউথোকলে। রাজ্য সরকারশিংসু ললোন-ইতিক্কী থবকশিং মতেং পাংনবা মসিগা মান্নবা থবকশিং পায়খৎলে।

মহাক্না মখা তানা হায়খি ভারতকী তুরিজম, লমকোয়বা অমসুং লৈফম-চাফমগী ইন্দস্ত্রি অসি মখল য়াম্মি। হিরম অসি শীনবা থুংনা মাইক্রো, স্মোল, মেদিয়ম অমসুং অচৌবা ইন্তরপ্রাইজ কয়া লৈরি। ঐখোয়গী প্রধান মন্ত্রীগী অত্মনির্ভর ভারত অমগী পান্দম অমগী মখাদা ভারতকী তুরিজম সেক্তর য়াওনা শেন-থুমগী ফিবম অমুক হন্না ফগৎহন্নবা অমসুং অৱাবশিং কোকহন্নবা এম.এস.এম.ইশিংদা গরেন্তর য়াওদনা লোনশিং ফংহল্লে। লমকোয়বা মীওইশিংগী থাজবা হেনগৎহন্দুনা লৈবাক মনুংদা তুরিজমগী থবক ফগৎহন্দুনা তুরিজমগী শেন-থুমগী ফিবম অমুক হিঙ্গৎহন্নবা পাম্বৈশিং পুথোক্নবা তুরিজম অমসুং হোস্পিতেলিতি ইন্দস্ত্রিগী মরী লৈনবশিংগী মীহুৎশিংগা তুরিজম মিনিস্ত্রিগা মখা তানা ৱারি শান্নরে।

মহাক্না হায়খি লমকোয়বা মীওইশিং ওক্নবা ভারতনা তপ্না-তপ্না থবক পায়খৎপা হৌরে। ভারতনা লৈবাক ১৮গা লোয়ন্না ববলগী থৌরাং তৌরে। হৌজিক চৎনরিবা ললোন-ইতিক, কনফরেন্স, থবক শুনবা, লাইরিক তম্নবা, রিছর্স অমসুং মেদিকেলগী থবকশিংগী ভিসাশিং হন্না পীবা হৌরে। মালেমগী ওইনা তুরিজমগী থবকশিং অথুবদা হিঙ্গৎলক্লগনি হায়বগী থাজবা থম্লি। লমকোয়বা মীওইশিং অমসুং স্তাফশিং অশোই-অঙাম থোকহন্দনবা লমকোয়বা অমসুং লৈফম-চাফমগী খুদোংচাবশিং পীরিবশিংগী কোবিদ-১৯ অমসুং হকশেলগী চৎন-পথাপশিং হেল্থ মিনিস্ত্রিগা লোয়ন্না তুরিজম মিনিস্ত্রিনা পীরে। হোস্পিতেলিতি ইন্দস্ত্রিনা কোবিদ-১৯গী চেকশিন-থৌরাংগী থৌরাং তৌবদা মতেং পাংনবা অমসুং ত্রেনিং পীনবা হন্দক মিনিস্ত্রিনা সাথি(সিস্তেম ফোর এসেসমেন্ত,এৱারনেস এন্দ ত্রেনিং ফোর হোস্পিতেলিতি ইন্দস্ত্রি)কৌবা থবক অমা পায়খৎলে।

শ্রী পতেলনা হায়খি লৈবাক শীনবা থুংনা মপুংফানা ত্রেনিং পীরবা অমসুং শীনফম অমা ওইনা থবক তৌরবা লমকোয়বা মীওইশিংদা খুদোংচাবশিং পীগদবা মীওইশিংগী কাংবু অমা শেমগৎনবা তুরিজম মিনিস্ত্রিনা ওনলাইন্দা তম্নবা মফম অমা শেমগৎনবা পান্দমদা ইনক্রেদিবল ইন্দিয়া তুরিস্ত ফেসিলিতেতর(আই আই তি এফ) থৌরম অমা পায়খৎলে। লৈবাক মনুংগী তুরিজম য়োকখৎনবা অমসুং মফম অমগী শেন-থুমগী ফিবম ফগৎহন্নবা তোঙান-তোঙানবা কলচর, হেরিতেচ, অনৌবা মফমশিং উৎনবা অমসুং মমিং লৈরবা লময়েংফমশিংগী মহৌশাগা মান্নদবা মশকশিং উনবা মিনিস্ত্রিনা দেখো অপ্না দেস পান্দমগী মখাদা ৱেবিনারশিং পরিং নাইনা পাংথোক্লি।

থবকশিং দিজিতেলদা ওন্থোকপা অমসুং অনৌবা থবকশিং পায়খৎপনা তুরিজম অমসুং হোস্পিতেলিতিগী থবকশিং চাউখৎহনবদা মতেং পাংগনি। লমকোয়বশিংনা পাম্নবা মফমশিং য়োকখৎনবা অমসুং মীয়ামদা খঙহন্নবা দিজিতেল মেদিয়া শীজিন্নরে। দিজিতেল তেক্নোলোজিশিং শীজিন্ননবা অমসুং অনৌবা থবকশিং পায়খৎনবা সরকারনা ইন্দস্ত্রিগা লোয়ন্না থবক তৌমিন্নরে হায়না মিনিস্তরনা মখা তাখি।

অৱাবা তারবা মতম অসিদা মাইপাক্না ব্রিক্সকী প্রসিদেন্ত ওইবগীদমক মিনিস্তরনা রুসিয়ান ফেদেরেসন থাগৎখি অমসুং ২০২১দা ভারতনা প্রসিদেন্ত ওইবা মতমদা ব্রিক্স লৈবাকশিংগা পুন্না থবক তৌমিন্ননবা থাজবা থমখি।

*****