হকশেল অমসুং য়াইফ-য়ুম্বাল মন্ত্রালয়গী কেন্দ্রগী মন্ত্রী দা. হর্শ বর্ধন্না ঙসি তামিল নাদুগী হেল্থ অমসুং মেদিকেল এজুকেসন মন্ত্রী দা. সি. বিজেয়াবাস্কর অমসুং রাজ্য সরকার অসিগী অতোপ্পা মকোক থোংবা ওফিসিএলশিংগা লোয়ননা কোবিদ-১৯গী শেম শারিবা অমসুং কোবিদকা চুনবা চৎন-লোচৎকী লৌখৎলিবা খোঙথাংশিং য়েংশিন্নবা ঙসি ভিদিও কনফরেন্সকী থোংদা মীফম অমা পাংথোকখ্রে। 

প্রধান মন্ত্রীনা কোবিদকী মায়োক্তা জন-অন্দোলন অমা হৌনবা অপাম্বা ফোঙদোকখিবা অদু নৌহৌনা নীংশিংদুনা দা. বর্ধন্না  হায়খি, “রাজ্য অসিনা প্রজাশিংগী মরক্তা মাস্কশিং/মাইখুমশিং শীজিন্নবা, ফিজিকেল দিস্তেন্সিং থম্বা অমসুং চাং নায়না খুৎশা হাম্বগী তঙাই ফদবা অমসুং কান্নবশিংগী মতাংদা এৱের্নেস পীবা হেনগৎপা মথৌ তাই।” “লাক্কদৌরিবা হরাও কুম্মৈগী শাংলবা পন্থা অসিনা হৌজিক কোবিদ-১৯গী মায়োক্তা ফগৎলক্লিবা অসিদা চাউনা শীংনরকপা য়াই। লাক্কদৌরিবা থা অহুম অসি ঐখোয় পুম্বনা চেকশিনগদবনি। অচম্বা কোবিদকা চুনবা চৎন-লোনচৎ ঙাক্না চৎপনা কোরোনা শন্দোকপা হন্থহনবদা কান্নগনি। মাস্ক/মাইখুম শীজিন্ননবা, ফিজিকেল দিস্তেন্স থম্নবা অমসুং খুৎশা তোয়না হাম্নবা প্রধান মন্ত্রীগী পাউজেল অসি প্রজা পুম্নমক্তা য়ৌহনগদবনি”, হায়না মহাক্না ফোঙদোকখি।

দা. হর্শ বর্ধন্না হায়খি, “লৈবাক অসিনা কোবিদকী পেরামিতরশিংদা চাউনা ফগৎলক্লি। কেসশিং অমসুং লৈখিদবশিংগী মশিং অসি হন্থরকপগী ফেজতা লৈরি। কেসশিং অসি চাউনা হন্থরক্লি। এক্তিব কেসকী মশিং ৬,১০,৮০৩দা লৈরি। ভারতকী নাবা ফগৎলকপগী চাং অসি ৯০.৮৫% ওইদুনা মালেমদা খ্বাইদগী ৱাংলি। কেস ফেতেলিতী রেৎ অসিসু হন্থরক্লি অমসুং ১.৫০%দা লৈরি। ঙসিদি লৈবাক অসিদা লেব ২০০০গী মথক্তা লৈরে।”

তামিল নাদুগী কোবিদকী পেরামিতরগা লৈবাক অসিগী পেরামিতরগা চাংদম্নরদুনা দা. হর্শ বর্ধন্না হায়খি, “তামিল নাদুগী নাবা ফগৎলকপগী চাং অসি ৯৪.৬% ওইদুনা লৈবাক অসিগী নাবা ফগৎলকপগী চাংদগী হেল্লি। কেস ফেতেলিতী রেৎ অসি ১.৫৪% ওইদুনা লৈবাক্কী লৈরিবা চাংচৎ অসিগা চপ মান্নরি।”

দা. বর্ধন্না তামিল নাদুনা আরোগ্যা সেতু এপ অমসুং ইতিহাস শীজিন্নদুনা রাজ্য অসিগী হোৎস্পোৎশিং খঙদোক্নবা হোৎনরিবা অসিবু থাগৎপা ফোঙদোকখি। রাজ্য অসিনা এক্তিব কেস হন্থহন্নবা হোৎনরিবা অসি থাগৎলদুনা দা. হর্শ বর্ধন্না লাইনা অসিগী চাং য়াম্না ৱাংলিবা চেন্নাই, কোইম্বতুর, তিরুভলুর, সেলম, কঞ্চিপুরম অমসুং কুদলুর জিলাশিং অসইগী কোবিদ ত্রেজেক্তরী অসিগী মতাংদা নুংনাইবা ফোঙদোকখি। এক্তিব কেসশিং হেনগৎলক্লিবা নত্ত্রগা ফেতেলিতী রেৎ ৱাংখৎলক্লিবা জিলাশিং অসিগী ওফিসিএলশিংগা লোয়ননা দা. হর্শ বর্ধন্না ৱারী শাখি।

রাজ্য অসিগী হেল্থ ওথোরিশিংনা মখোয়না ঙসি ফাওবদা কন্সল্তেসন লাখ ২গী মথক্তা ফংহন্দুনা রাজ্য অসিনা খ্বাইদগী ৱাংবা ওইরি হায়না কেন্দ্রগী মন্ত্রীদা খঙহনখি। রাজ্য অসিদা তৌখিবা অপুনবা তেস্ত অসি ৯৬,৬০,৪৩০নি তেস্তশিং অসিগী মনুংদা ৯৮.৯৯%দি আর.তি.-পি.সি.আর.নি। তেস্ত তৌবা হেনগৎনবা স্পেসিএল স্ক্রীনিং সেন্তরশিং অমসুং তেস্তিং কেম্পশিং লিংখৎখি। লৈখিদবগী ওদিৎ চয়োল অমদা অহুমরক পাঙথোকই। অফবা ওক্সিজেন ফেসিলিতীশিং য়াওবা দেদিকেতেদ কোবিদ এম্বুলেন্সশিং, রাজ্যগী অখন্নবা সর্ভিলেন্স রিপোর্ত তৌনবা প্লেৎফোর্ম (স্তোপ কোরোনা পোর্তেল) অমসুং ফিভর ক্লিনিকশিং হায়রিবা অফবা খোঙথাং খরা অসি রাজ্য অসিনা ঙাক্না চৎলি। জন অন্দোলনগী পাউজেল শন্দোক্নবা লৌখৎলিবা খোঙথাংশিং অসিগী মতাংদা কেন্দ্রগী মন্ত্রীদসু খঙহনখি।

কেন্দ্রগী হেল্থ সেক্রেতরী শ্রী রাজেশ ভুশন্না লাইনা অসি নাবগী চাং ৱাংলিবা অমসুং রাজ্য অসিগী শীবগী ৩০%গী ময়া ওইরিবা চহি ৪১-৬০গী কাংলুপ্তা লৈবা মীশিংদা মীৎয়েং চংবগী তঙাই ফদবা অদু ফোঙদোকখি। কো-মোর্বিদিতী ওইবা মীওইশিংদা মীৎয়েং চংবগী মথৌ তাই অমসুং কোবিদকী লাইয়েংগী প্রোতোকল অসিদা খুদোংথিবগী চাং ৱাংবা কাংলুপশিংসু য়াওহনবা মথৌ তাই হায়নসু মহাক্না ফোঙদোকখি।

মীফম অসিদা এদিস্নেল সেক্রেতরী (হেল্থ) শ্রীমতি আর্তি অহুজা অমসুং নেস্নেল সেন্তর ফোর দিজিজ কন্ত্রোলগী দিরেক্তর দা. সুজীৎ কে সিংহসু শরুক য়াখি। রাজ্য অসিগী অতোপ্পা মকোক থোংবা ওফিসিএলশিংসু ভর্চ্যুএল ওইনা য়াওখি।

****