মাইগোব প্লেৎফোর্মদা লৈবাক্কী থাক্তা পাঙথোকপা আয়ুশ সঞ্জিবনি ক্বিজ কন্তেস্তকী মকোক-মথং তারবশিংগী মমিং ঙসি লাওথোকখ্রে। মসিগী কন্তেস্ত অসি আয়ুশ মন্ত্রালয়না মে-জুন, ২০২০গী মনুংদা পাঙথোকখিবনি।

থাক অহুম লৈবা মনাগীদমক্তা অপুনবা ওইনা মকোক-মথং তারবা মীওই ৯গী মমিং লাওথোকখি। নিশা তামালদা লুপা ২৫০০০গী খ্বাইদগী মকোক ওইবগী মনা পীখি। অনিশুবা মকোক তাখিবা অসিনা মীওই অহুমদা, দাঃ ম্রিন্মায়ী, রোহিৎ অমসুং হিমানশু গুপ্তদা লুপা ১০,০০০/১০,০০০গা লোয়ননা পীখি। অহুমশুবা মকোক তাখিবা অসিনা মীওই মঙাদা, ইমিলী বসন্ত মনোগারী, দাঃ নিধি গার্গ, বেদিকা গুপ্তা, পুজা গোস্বামি অমসুং অন্সু তিৱারীদা লুপা ৫০০০/৫০০০গা লোয়ননা পীখি।

কোবিদ-১৯গী তাল্লক অসিদা আয়ুশ সঞ্জিবনি ক্বিজ অসিনা লায়না শন্দোকপা অমসুং লায়না নাবদগী ঙাকথোকপগী থৌওংশিংদা আয়ুশকী থৌওংশিংগী কান্নবগী মতাংদা মীয়ামদা খঙহনবগী থৌওং অমা পাঙথোকপা ঙম্লি। আয়ূশ মন্ত্রালয়না হৌদোকপা লৈবাক শিনবা থুংনা পাঙথোকপা ক্বিজ কন্তেস্ত অসিদা লৈবাক পুম্বগী মীয়াম্না থৱাই য়াওনা শরুক য়ানখি। ক্বিজ অসিনা আয়ূশনা পীবা কোবিদ-১৯দগী ঙাকথোক্নবগী পাউতাকশিংবু মীয়াম্না পাম্নবগী মওং য়েংশিন্নবা শিজিন্নরিবা আয়ুশ সঞ্জিবনি এপ অসিবু মীয়ামদা য়ৌহনবগী পান্দমসু থম্লি।

মাইগোব প্লেৎফোর্মদা পাঙথোকপা ক্বিজ কন্তেস্তকী কেম্পেন অসিনা কান্নরবা ৱাফম কয়া অমা পীরি। মসিদা শরুক য়ারিবা মীওইশিংগী চাউরাক্না ৪৫%দি চহি ১৮-২৪গী মনুংদগীনি অমসুং মসিনা তাকপদি আয়ুশনা পীরিবা কোবিদকা মরী লৈনবা ৱারোইশিন অসিদা খুন্নাইদা লৈরিবা মখোয়গী কাঙলুপ অসিনা য়াম্না থৱাই য়াওই হায়বনি। সোসিএল মীদিয়ানা শৌগত্তুনা মাইগোব প্লেৎফোর্মদা পাঙথোক্লিবা চাংয়েংনবা অসিদা শরুক য়ারিবা মীওই অয়াম্বদি উত্তর প্রদেশ, মধ্য প্রদেশ, মহারাস্ত্রা, রাজস্থান অমসুং দিল্লীদগীনি।

চাংয়েংনবা অসি মাইগোবতা পাঙথোকপদা নত্তনা আয়ুশ সঞ্জিবনি এপ অসিসু নীংথিনা পাঙথোকপা ওর্গানিক কেম্পেন অমসুং ই.-সম্পর্ক ন্যুজলেত্তরগী খুত্থাংদা মীয়ামদা খঙহন্নবা কন্না হোৎনখি। অফঙবা দেতাগী মতুং ইন্না মে ২৩, ২০২০দা ক্বিজ কন্তেস্ত অসি হৌদোকখিবা নুমিত্তা শরুক য়াখিবা মীওইগী মশিংনা খ্বাইদগী য়াম্বা ওইখি। মসিদা শরুক য়াবশিংগী মনিংদা নুপীগী মশিংদগী নুপাগী মশিংনা হেন্না য়ামখি। শরুক য়াখিবা মীওইশিং অসি মহৈরোয়দগী হৌদুনা লৌউবা, কারবার তৌবা মীওিদগী হৌদুনা য়ুম পুবা মীওই অমসুং অতোপ্পা তোঙান তোঙানবা শিনফমগী মীওইশিংনি। খংজিনবদা কান্নবা অহেনবা ৱাফম খরদি আয়ুশ সঞ্জিবনি অসি ভারত সরকারগী আয়ুশ মন্ত্রালয়না লায়চৎ অসিগী মনুংদা পুথোকখিবা মোবাইলগী এপ অমনি। এপ অসিনা ভারতকী ওইবা মীয়ামগী হকশেলগী মতাংদা থিজিন হুমজিনবগী হীরমদা মশক থোকপা থবক কয়া পাঙথোক্লি। মীয়ামগী হকশেলগী ফিভম ফগৎহন্নবা হায়দুনা লায়চৎ অসিগা মরী লৈননা মন্ত্রালয়না ফোঙবা ওফিসিএল ওইবা কাঙলোনশিংদা য়াওরিবা আয়ুশতা য়ুম্ফম ওইবা থৌওং কয়াগী কান্নবগী মতাংদা এপ অসিনা য়েংশিনবগী থবক তৌরি। মসিদা পল্লিবা ইম্যুন কনখৎহন্নবা কাঙলোনশিং অসি কোবিদ-১৯গী লুরবা তাঞ্জা অসিদা থোক্লক্লি অমসুং মসিনা লুরবা তাঞ্জা অসিদা মীওই কয়া অমগী হকশেলগী খুদোংচাদবশিংবু কোকহনবদা মতেং পাংলি হায়না থাজনরি। কোবিদ-১৯দগী ঙাকথোক্নবগী মতাংদা হায়রিবা কাঙলোনশিং অসিনা কয়া য়াম্না কান্নবা পীবগে হায়বা খঙনবা ৱাহং কয়া অমা এপ অসিদা মরু ওইনা য়াওরি। আয়ুশ সঞ্জিবনি ক্বিজ অসিদা শরুক য়াবা অসিনা মীওই কয়া অমনা আয়ুশকী অনা-লায়েংবগী পথাপ অমসুং মসিনা পীবা ৱারোইশিন কয়াগী মরমদা হেন্না খঙহনবা ঙম্লে।