ভারত্তা অফবা মখলগী পি.ভি. শাবগী থৌওংবু হেন্না খুমাং চাউশিলহন্নবা হায়দুনা নিতি আয়োগ, ন্যু অমসুং রিন্যুএবল ইনর্জী মন্ত্রালয় অমসুং ইনবেস্ত ইন্দিয়ানা শিন্দুনা বর্চুএলগী খুত্থাংদা ওক্তোবর ৬, ২০২০গী নুংথিল পুং ৫-৮.৪০গী মনুংদা ‘ইন্দিয়া পি.ভি. ই.দি.জি.ই. ২০২০’গী খন্ন-নৈনবগী থৌরম অমা পাঙথোক্কদৌরি।

 ‘ৱেফর অমসুং সেলশিং’, ‘মোদ্যুলস অমসুং প্রদক্সন ইক্বিপমেন্ত’ অমসুং ‘সপ্লাই চেন’গী মতাংদা শরুক য়াবা মীপুম খুদিং য়াওগদবা সেসন অমসুং মথং তারকপা সেসন কয়া পাঙথোক্কনি। মসিগী মনুংদা পি.ভি.গী পোত্থোক শাবগী মতাংদা ‘ইনবেস্তর কনক্লেব’ অমসু য়াওগনি। তমিল নাদু, মহারাস্ত্রা অমসুং আন্ধ্র প্রদেশনা কনক্লেবতা অসিদা শরুক য়াগনি। মসিগী মতুংদা ভারতকী সোলারগী পোত্থোক পুথোকপদা থেংনবা শিংনবশিং, হায়বদি মতিক চানা শেল থাদবা ঙম্বা, অফবা সোলারগী পোত্থোকশিংগী ইকোসীস্তেম শাবদা দিবেলপরশিংগী থৌদাং, অসিগী মতাংদা কুপ্না খন্নবগী ‘ইনবেস্তর রাউন্দতেবল’না মখা তাগনি।

কেন্দ্রগী পাৱর অমসুং ন্যু অমসুং রিন্যুএবল ইনর্জী মন্ত্রী শ্রী আর.কে. সিংহ; নিতি আয়োগকী ভি.সি. দাঃ রজিব কুমার; নিতি আয়োগকী সি.ই.ও. শ্রী অমিতাব কান্ত; ন্যু অমসুং রিন্যুএবল ইনর্জী মন্ত্রালয়গী জোইন্ত সেক্রেতরী শ্রী অমিতেশ কুমার; ইনবেস্ত ইন্দিয়াগী সি.ই.ও. অমসুং এম.দি. শ্রী দীপক বগলা অমসুং নিতি আয়োগকী সেক্রেতরী দাঃ রাকেশ সরৱালনা প্লেনরী সেসন অদুদা শরুক য়াগনি। ভারত অমসুং মালেমগী শক্নাইরবা সি.ই.ও. চাউরাক্না ৬০না বর্চুএলগী খুত্থাংদা থৌরম অসিদা শরুক য়াগনি।

কোবিদ-১৯গী লায়চৎ অসিনা মালেমগী শেন্মিৎলোন্দা অচৌবা চৈথেং অমা পীরি। ইং ২০০৮-০৯গী শেল-থুমগী ইরাংগী মতুংদা অশোয়বা চুম্থোকপগী খোঙথাংশিংগী ১৬%দি গ্রীনগী খোঙথাংশিংনা ওইখি। কোবিদনা শোকহল্লবা ফিভম অসিদগী ফগৎলক্নবা অমসুং গ্লোবেল ৱার্মিংগী অচৌবা শিংনবা অসিবু থেংননবা হায়দুনা সরকারশিংনা ক্লিন ইনবেস্তমেন্তকী মতাংদা ৱাখল চাউবা অমসুং ৱারেপ লৈবগী থৌওং পাঙথোকপগী তঙাই ফদবা লৈরি। মসিগী লুরবা মতম অসিদা মালেমগী ওইনা পুনশিন্নদুনা অপুনবা শক্তি শিজিন্নফম থোকই।

সোলার দিপ্লোইমেন্ত অসিনা হৌখিবা দিকেদ খরদগী ফ্লেগশিপ ওইবা গ্রীন গ্রোথকী পাম্বৈ ওইরি অমসুং মসিনা শাহৌ লৈবা অমসুং অইং-অশাগী মতাংদা নিংহন্নবা লৈতবা মালেম অমা শেম্বদা তেংবাংগনি। ভারত অসিনা মালেমগী খাইদগী অহুমশুবা চাউবা সোলারগী মতিক শিজিন্নবা ঙম্বা লৈবাক অমা ওইরি অমসুং মসিনা ইং ২০৩০ ফাওবগী মনুংদা সোলারগী জি.দবল্যু. ৩০০গী মতিক য়াওবা অপুনবা জি.দবল্যু. ৪৫০গী রিন্যুএবল কেপাসিতী পুথোকপগী পান্দম থম্লি।

সোলার দিপ্লোইমেন্ত তৌবগী চাংদা চাউনা হেনগৎলক্লিবা অসিগী মরমদি গিগা-সোলার মেন্যুফেকচরিং অমসুং মমল হন্থনবা অনৌবা থৌওং কয়া অমা লেপ্তনা শিজিন্নবা হৌরকপা অসিনি। মতৌ অসুম্না সোলার পি.ভি. মেন্যুফেকচরিং অসি কোবিদকী মতুংদা পাঙথোক্কদবা আত্মানির্ভর ভারতকপু নৌহৌননা হিংগৎহনবগী শরুক অমা ওইনা ভারত সরকারনা লাউথোকখিবা স্ত্রেতজিক সেক্তর অমগী মনুংদা য়াওরিবনি। মসিগা লোয়ননা ভারত অসি সোলার পি.ভি. মেন্যুফেকচরিংগী মালেমগী হব অমা ওইহন্নবা থবক কন্না পায়খৎলি অমসুং লৈবাক্কী অমসুং মালেমগী ফর্মশিংনা মশক থোকপা গিগা-ফেক্তরী কয়া অমগী মতাংদা লাউথোকখ্রে। ভারত সরকারসু ভারত্তা অফবা মওংগী সোলার মেন্যুফেকচরিং তৌবদা খুমাং চাউশিলহন্নবা অনৌবা থৌওং কয়া অমসু পায়খৎলক্লি।

মসিগী মতম অসি মালেমগী, অফবা মখলগী তেক্নোলীজী পীবশিং, খুৎলায় শাবশিং অমসুং মাই-পাকপা পি.ভি. কম্পেনীশিংনা মখোয়গী তেক্নোলোজীবু পি.ভি. মেন্যুফেকচরিং প্লান্ত শানবা থৌরাং য়াৎলিবা ভারতকী মফমদা লান্থোকপগী খ্বাইদগী মতম চাবা পুংফম্নি। কম্পেনীশিং অসিনা মেন্যুফেকচরিং স্কিম অসিগী থৌরাং য়াৎপদা য়াওরিবা ভারতকী পোলিসী শেম্বশিংগী পাউতাক কয়া তাবগী খুদোংচাবশিংসু ফংগনি।

অফবা মখলগী গিগা-স্কেল সোলার মেন্যুফেকচরিংগী থৌওং অসি য়ুম্বী অহুমগী মখা পোল্লিঃ (১) দিসরপ্তিব পি.ভি. কেমিস্ত্রী, (২) অপাম্বগী মতুং ইন্না শেমদোক্লবা পোত্থোক পুথোকপগী থাক ৱাংবা খুৎলায়শিংনা শাবা, (৩) অখন্নবা অমসুং গ্লাস অমসুং কুপ্পগী অনৌবা বি.ও.এম. কম্পোনেন্তশিং শিজিন্নবা। মসিগী মরম অসিনা য়ূম্বী অহুম অসিগা মরী লৈনবা কম্পেনীশিংনা খন্ন-নৈনবগী থৌরম অসিদা মখোয়গী ৱারোলশিং ফোঙদোকপগী পাউজেল পীরিবনি অমসুং মসিনা মখা তাবা ৱারী-ৱাতাই শাবা অমসুং খুৎশম্নবগী থৌওংশিংদা খোঙজেল থুহনগনি।

পেরিস এগ্রীমেন্ত ২০১৫দা ভারতকী এন.দি.সি.গী ৱারোল অসিনা অইং-অশা হোংবগী ফিভম অসিবু থেংননবা তোখায়বা মিৎয়েং য়েংবা, লুচিংবা, ৱাখল তাবা অমসুং লৌশিং শিজিন্নবগী মতাংদা পল্লি। ইন্দিয়া পি.ভি. ই.দি.জি.ই. ২০২০ অসি হায়রিবা পান্দম অসিবু ফংনবা হোৎনবা অপিকা খোঙথাং অমনি।

করিগুম্বা অদোম্না খন্ন-নৈনবা অসিদা অদোমগী ৱাখল্লোন ফোঙদোক্নিংলবদি pvedge2020[at]gmail[dot]com অসিদা ইবীরকউ।

করিগুম্বা অদোম্না খন্ন-নৈনবা অসিদা শরুক য়ানিংলবদি https://www.investindia.gov.in/pv-edge-2020-registration অসিদা রেজিস্তর তৌবীয়ু।

*****