লৌউ-শিংউ মন্ত্রালয়
আই.সি.এ.আর.- ইন্দিয়ন এগ্রিকলচরেল রিসর্চ ইন্সতিত্যুৎনা লৈবাক অসিগী মপা মহাত্মা গান্ধীগী মপোক কুওনগা মরী লৈননা চয়োল অমগী থৌরম পাঙথোক্কনি
Posted On:
02 OCT 2020 5:14PM by PIB Imphal
আই.সি.এ.আর.- ইন্দিয়ন এগ্রিকলচরেল রিসর্চ ইন্সতিত্যুৎনা লৈবাক অসিগী মপা মহাত্মা গান্ধীগী মপোক কুওনগা পাঙথোকপা ওইনা সেপ্তেম্বর ২৬তগী হৌদুনা ওক্তোবর ২ ফাওবগী ওইবা চয়োল অমগী থৌরম পাঙথোকখ্রে। নুমিৎ ৭নি চুপ্না পাঙথোকখিবা থৌরম অদু দাইরেক্তোরেৎ কেম্পস্তা আই.সি.এ.আর.-আই.এ.আর.আই.গী দাইরেক্তর দাঃ এ.কে. সিংহনা লুচিংদুনা সেপ্তেম্বর ২৬তা অয়ুক্কী পুং ৯.৩০দগী ১১.৩০ ফাওবগী মনুংদা লম-তু শেংবগী (স্বচ্ছতা অভিয়ান) থৌরম্না হৌদোকখি। মসিগী স্বচ্ছতা অভিয়ানগী অখন্নবা থৌরম অসিদা সাইন্তিস্ত, স্তাফ অমসুং মহৈরোয়শিংগা লোয়ননা বিভাগকী মকোক খুদিংনা মশানা য়ানা শরুক য়াদুনা পাঙথোকখিবা থৌরম অদুদা সোসিএল দিস্তেন্সিং অমসুং খ্বাইদগী ফবা হাইজিনগী কাঙলোন ইন্দুনা ইন্সতিত্যুৎ অসিগী তোঙান তোঙানবা দিবিজনশিংগী মফমশিং শেংবগী থৌওং পাঙথোকখি। থৌরম অসিগী অনিশুবা নুমিত্তা মীওই ১০০না শরুক য়াদুনা কিলোমীতর ৩.৫গী অরাপ্পা চৎকদবা ৱাকাথোন অমসু শিন-লাঙখি। আই.সি.এ.আর.-আই.এ.আর.আই.গী দাইরেক্তর দাঃ এ.কে. সিংহনা জোইন্ত দাইরেক্তরশিংগা লোয়ননা ৱাকাথোন চেনবা লোইশিন্দুনা মদুদা শরুক য়ারিবা মীওইশিংদা ইথিল পীখি। সেপ্তেম্বর ২৮দগী ৩০ ফাওবগী মথংগী নুমিৎ হুম্নিদা নহাশিংগী ৱাখল্লোন্দা ইথিল পীবা অমসুং লাই-য়েকপা, ৱাহং-পাউখুম অমসুং ৱা-ঙাংবগী হীরমদা হৈ-শিংবা উৎপগী খুদোংচাবা পীবা ওইনা মরী লৈনবা থৌরম কয়া ওনলাইনগী খুত্থাংদা পাঙথোকখি। তোঙান তোঙানবা চাংয়েংনবা অসিদা তোঙানবা স্কুলশিংগী ক্লাস ৫দগী ১২ ফাওবগী মনুংদা লৈবা মহৈরোয় ১০০মুক্না শরুক য়াখি। সেপ্তেম্বর ২৮দা ‘মহাত্মা গান্ধী জীবন দর্শন’গী মতাংদা লাই য়েকপগী চাংদম্নবা অমা মহৈরোয় কাঙলুপ অনিগী ওইনা পাঙথোকখি। জুনিয়র অমসুং সেনিয়রগী কাঙলুপ্তা তোঙান তোঙান্না পাঙথোকখিবা চাংয়েংনবা অদুদা অপুনবা মহৈরোয় ৬১না শরুক য়াখি অমসুং কাঙলুপ অমমমদগী মহৈরোয় ৪বু মনা পীবগীদমক্তা খনগৎখি। ‘মহাত্মা গান্ধী জীবন দর্শন গ্যান’ গী ওনলাইন ওইনা পাঙথোকপা ক্বিজগী থৌরম অমা সেপ্তেম্বর ২৯দা পাঙথোকখি অমসুং গান্ধী দর্শনঃ আত্মানির্ভর ভারতকী মতাংদা ওনলাইন্দা ৱা ঙাংবগী থৌরম অমনা সেপ্তেম্বর ৩০দা পাঙথোকখি অমসুং মসিদগী অপুনবা মহৈরোয় ৮বু তোঙান তোঙানবা মনা পীবগীদমক্তা খনগৎখি। আই.এ.আর.আই.গী স্তাফ, মহৈরোয়, রিসর্চ ফেল্লো অমসুং সাইন্তিস্তশিংগী ওনলাইন্দা ৱা-ঙাংবগী চাংয়েংনবা অমা হীরম অনিঃ ১) গান্ধী দর্শনঃ আত্মানির্ভর ভারত অমসুং ২) বদলতে পরিবেশ মে গ্রাম স্বরাজ কা স্বারুপ, অসিগী মতাংদা ওক্তোবর ১দা পাঙথোকখি। গান্ধী জিগী পুন্সিদা য়ূম্ফম ওইবা ওনলাইন স্কিৎকী চাংয়েংনবা অমা আই.এ.আর.আই.গী পি.জি. মহৈরোয়শিংগী ওইনা সেপ্তেম্বর ২৬ অমসুং ৩০গী মনুংদা পাঙথোকখি অমসুং মসিগী মতাংদা খ্বাইদগী ফজবা থাজল্লকপা অহুম্বু মনা পীবগীদমক্তা খনখি।
চয়োল অমা চুপ্না পাঙথোরকপা থৌরম অসিগী মনা পীবগী থৌরম অমা ওক্তোবর ২গী নুংথিলগী পুং ২.৩০দা বর্চুএলগী খুত্থাংদা দি.এ.আর.ই. অমসুং দি.জি. আই.সি.এ.আর.গী সেক্রেতরী দাঃ ত্রিলোচান মহাপাত্রা অমসুং মমিং লৈরবা গান্ধিয়ান ফিলোসোফর পদ্মাশ্রী দাঃ রবিন্দ্র কুমার য়াওনা পাঙথোকখি। থৌরম অসি ইমা সরস্বতি বন্দনা অমসুং অতিনবা মীওইনা গান্ধীজিদা লৈ কৎপগী থৌওংগা লোয়ননা হৌদোকখি। আই.সি.এ.আর.-আই.এ.আর.আই.গী দাইরেক্তর দাঃ এ.কে. সিংহনা অথোইবা মীথুংবু অমসুং অতোপ্পা ইকায় খুম্ননিংঙাই ওইবা মীথুং অমসুং থৌরমদা শরুক য়ারিবা মীওইশিংবু তরাম্না ওকখি। শক্নাইরবা গান্ধীয়ান ফিলোসোফর অমা ওইরিবা মীরুৎকী চৌধরী চরন শিংন য়ুনিবর্সিতীগী হান্নগী ভাইস চান্সেল্লর ওইরম্বা দাঃ রাবিন্দ্র কুমারনা ৱাখল খলহন্নিংঙাই ওইবা “গান্ধীগী লৌ উবগী মওং অমসুং হৌজিক্কী মতমদা মসিগা চান্নবা”গী মতাংদা ৱা ঙাংখি।
মহাক্না গান্ধীগী ফিলোসোফীগী তোঙান তোঙানবা ৱাখল্লোন অমসুং মসিনা ভারতকী লৌউ-শিংউবা অমসুং অকোয়বদা পীরিবা কন্নবশিং অমসুং মসিবু তুং কোইনা চৎহনবগী মতাংদা মিৎয়েং চঙবা ৱাফম কয়া থমখি। দি.এ.আর.ই.গী সেক্রেতরী অমসুং আই.সি.এ.আর.গী দাইরেক্তর জেনেরেল দাঃ ত্রিলোচান মহাপাত্রানা সাইন্তিস্ত অমসুং মহৈরোয়শিংদা গান্ধীগী ৱাখল্লোন্দগী পরা তম্নবা হায়খি অমসুং ভারতকী খুঙ্গংশিংদা লৌউ-শিংউবা অসিবু তুং কোইবা অমসুং শেন্দোং লৈবা ওইহন্নবা অনৌবা থৌওং পুথোক্নবা হায়খি। তোঙান তোঙানবা স্কুলশিংগী মহৈরোয়শিংদা শরুক য়াবগী সর্তিফিকেৎ পীখি অমসুং তোঙান তোঙানবা চাংয়েংনবগী অপুনবা মনা ২০সু অথোয়বা মীথুংলেন্না য়েন্থোকখি। মসিগী চয়োল অমা শাংনা পাংথোকপা গান্ধীগী ৱাখল্লোনগী থৌরম অসিনা মহৈরোয়শিং, স্তাফশিং, ওজাশিং অমসুং রিসর্চ তৌরিবা মীওইশিংদা অনৌবা ইথিল হাপখি। থৌরম অসি জোইন্ত দাইরেক্তর (এক্সতেন্সন) দাঃ ভি.কে. সিংহনা থাগৎ ৱাহৈ পীরগা লোইশিনখি।
*****
(Release ID: 1661166)
Visitor Counter : 88