চহীসিগী সেপ্তেম্বর ৭ – ৩০ ফাওবা পাঙথোকখিবা ৩শুবা রাস্ত্রিয় পোসন মাহ লোইশিনবগী থৌরম ঙসি ভর্চুএল মোদতা পাঙথোকখ্রে‍। পোসন অভিয়ানগী নোদেল মন্ত্রালয় ওইরিবা ৱুমেন অমসুং চাইল্দ দেভেলপমেন্ত মন্ত্রালয়না লৈবাক্কী, স্তেত/য়ু.তি., দিস্ত্রিক্ত অমসুং গ্রাসরুত থাক্তা খোঙবু ওইবা মন্ত্রালয়শিং অমসুং দিপার্তমেন্তশিংগা পুল্লগা পোসন মাহ খুৎশম্ননা পাঙথোকখি‍। ঙন্না খোম পীথকপগী মরুওইবা, পুন্সিগী অহানবা নুমিৎ ১০০০দা অফবা মচি ওইবা চীঞ্জাক্কী মথৌ তাবা, নহা ওইরিবা নুপীশিং অমসুং অঙাঙশিংদা ঈ ৱাৎপগী ফীভম হন্থহন্নবা থৌরাংনচিংবশিংগী মরমদা পাক শন্না খঙহন্নবা থৌরমশিংগা লোয়ননা, সেভিয়রলী এক্যুত মেনোরিস (এস.এ.এম.) অঙাঙশিং খঙদোকপা, মখোয়বু মেনেজ তৌবা অমদি পোসন ভাতিকাস- ন্যুত্রি গার্দেনশিং থাবনা পোসন মাহগী মপুং ওইবা থৌরমশিং ওইখি‍।

থৌরম অদুগীদমক পাঙথোকপা ৱেবিনারদা ৱা ঙাঙলদুনা ৱুমেন অমসুং চাইল্দ দেভেলপমেন্তকী কেন্দ্রগী রাজ্য মন্ত্রী সুশ্রী দেবস্রী চৌধুরিনা কোমিদ-১৯গী চৎন-পথাপশিং ঙাক্তুনা পোসন মাহ পাঙথোকখিববু তরাম্না ওকখি‍। কোবিদ লাইচৎনা মমা অমসুং অঙাঙগী মচি ওইবা চীঞ্জাক পীজবা, চাউখৎলকপা শেন্নবা অমদি মচি ওইবা চীঞ্জাক ৱাৎপগী ফীভম থেংনবগী লমদা শীংনবা কয়া পীজরবসু, মাঙজিন থাবা থৌমীশিংনা পুম্নমক্তু মায়োং য়ুদুনা মরু ওইবা সর্ভিসশিং পীবতা নত্তনা পোসন মাহসু পাঙথোকখি‍ হায়না মহাক্না হায়খি‍। ইকায়খুম্নরবা প্রধান মন্ত্রীনা অফবা মচি ওইবা চীঞ্জাক চাবা অমসুং হকচাঙ ফনা থম্বগী মরুওইবা অমদি লমদমসিগী দাইত চাদুনা মদুবু কমদৌনা ফংবা ঙমগনি হায়না হঞ্জিন হঞ্জিন হায়খিবা ৱাফম মহাক্না পনখি‍। সুপোসিত ভারত ফংনবগী খোঙজঙ অসি পোসন মাহ মতুংদা মান্নবা খোঙজেলদা অদুমক চঙশিনখিগনি হায়না মন্ত্রীনা থাজবা ফোঙদোকখি‍।‍

ভারত লৈঙাক্কী ৱুমেন অমসুং চাইল্দ দেভেলপমেন্তকী সেক্রেতরী শ্রী রাম মোহন মিস্রানা মহাক্কা তরাম্না ওকপা ৱারোলদা ইকায়খুম্নরবা প্রধান মন্ত্রীনা কুপোসন মুক্ত ভারতকী পান্দম থমখ্রে অমদি মসি ফংবা হায়বসি লৈবাক্কী, স্তেতকী অমদি লৈকায়গী থাক্তা মীয়ামগী, লৈঙাক্কী লোয়শঙশিংগী অমদি খুন্নাইগী লুপশিংগী থৌদাং চঙই‍ হায়না হায়খি‍। থা অসিদা তোঙান তোঙানবা লুপশিং অমসুং লনাই মীওইশিংনা লৌরকপা থৌদাংশিংবু ৱুমেন অমসুং চাইল্দ দেভেলপমেন্ত অমদি তেক্সতাইলগী কেন্দ্র মন্ত্রী শ্রীমতি জুবিন ইরানিনা তরাম্না ওক্লি হায়না পাউদম্লদুনা মহাক্না পোসন মাহগী থবক থৌরমশিং অসি শুপ্নতগী হৌবতা ঙায়রিবনি অমদি পান্দম ফংননবা মখা তানা হেনগৎহনবা মথৌ তাই হায়না হায়খি‍।

রুরেল দেভেলপমেন্ত, পঞ্চায়েতি রাজ, হকশেল অমসুং য়াইফ য়ুম্বাও, দিপার্তমেন্ত ওফ স্কুল এজুকেসন্নচিংবা কেন্দ্র লৈঙাক্কী তোঙান তোঙানবা মন্ত্রালয়শিং অমদি মহারাস্ত্র, জম্মু অমসুং কাস্মির, কর্নাতকা, গুজরাত অমদি মিজোরাম্নচিংবা স্তেত/য়ু.তি.শিংগী মীহুৎশিংনা পোসন মাহ মনুংদা মখোয়না পায়খৎখিবা থবক থৌরমশিংগী চাউরাকপা পাউদম পীখি‍। ৱুমেন অমসুং চাইল্দ দেভেলপমেন্তকী জোইন্ত সেক্রেতরী শ্রীমতি আস্থা এস. খত্বানিনা পোসন মাহ ২০২০ মনুংদা পায়খৎখিবা থবক থৌরমশিং অমসুং থৌরাং কয়াগী মরমদা পাউদম অমা পীখি‍।

*****