লৌমীশিংগী য়াইফ থৌরাং হেঙ্গৎনবা, কঞ্জুমর হেল্থ, ফুদ সেকুরিতী অমসুং ন্যুত্রিসন নিংথীনা ফংন্নবগীদমক নেচরেল ফামিংগী সোসিওইকোনোমিকশিং অমসুং ইনভাইরনমেন্তেলগী কান্নবশিং অদু শিজিন্ননবগীদমক মরী লৈনবা স্তেকহোল্দরশিংগা লোইননা নেস্নেল লেভেলদা নুমিৎ নিনিগী খন্না নৈনবগী থৌরম অমা(২৯-৩০ সেপ্তেম্বরদা) নিতি অয়োগনা পাংথোকখ্রে৷

খন্না নৈনবা অদুদা ৱা ঙাংলদুনা লৌমীশিংগী য়াইফ থৌরাংগী কেন্দ্রগী মন্ত্রী শ্রী নরেন্দ্র সিংহ তোমারনা অসুম্না ফোংদোকখ্রে মদুদি ভারততা নেচরেল ফার্মিং অসি চহি চা কয়াদগী তৌদুনা লাক্লি অমসুং লৈবাক শিনবা থুংনা নেচরেল ফার্মিং অসি মাংজিল থানা তৌনবা নিতি অয়োগনা হোৎনরিবা ময়াম অসি মহাক্না থাগৎখ্রে৷ থবক অসি হেন্না নিংথীনা তৌন্নবগীদমক কেন্দ্রগী লৌউ-শিংউ মন্ত্রালয়না শেনফম কাইথখ্রে হায়না মহাক্না মখাতানা ফোংদোকখি৷ আন্ধ্র প্রদেশ, কেলরা অমসুং ছত্তিশগরনা নেচরেল ফার্মিংগী মতাংদা পুখৎলকখিবা প্রোপোজেলশিং অদু খন্নখ্রে অমসুং চৎন্নবগীদমক অয়াবা পীখ্রে৷

লাক্কদৌরিবা চহি মঙা অসিদা রাজ্য অসিদা নেচরেল ফার্মিংগী মখাদা পুন্না লম হেক্তর লাখ ১২রোম লৈরগনি হায়না গুজরাতকী রাজ্যপাল অচরিয় দেববরতনা ফোংদোকখ্রে৷ চৎথরিবা খরিফ সিজন অসিগী মনুংদা গুজরাততা চাওরাক্না লৌমী লাখ ১.২০দি নেচরেল ফার্মিং তৌখি অমসুং অতোপ্পা লৌমী লাখ ৫.৫০না থবক অসিদা পামজখি হায়না মহাক্না ফোংদোকখি৷ লৌউবা মখল অসিনা পীবা কান্নবশিং খুদম ওইনা নেচরেল ফার্মিং অসিদা চংবা ইনপুত কোস্ত অদু ‘জেরো’গা মান্ননা হায়থখ্রে, কার্বোনগী চাং অদুসু ০.৫তগী ০.৯দা হেঙ্গৎলকপনা মরম ওইরগা হান্না চংলম্বা ইথৈ-লৌখোংগী চাং অদুসু ৬০-৭০%দা হায়থখ্রে৷ অসিগুম্বা পোত্থোকশিং অসি য়োনবা মতমদা অয়েৎপা খুদোংচাদবা অমতা লৈতে, খ্বাইদগী তাংবা ক্বালিতী লৈবা গেহু অদুগী মমল অদুসু কনভেনস্নেল রেততা ক্বুইন্তন অমদা লুপা ১৯০০ য়োল্লম্বা অদুগী মহুৎতা লুপা ৪০০০দা য়োনবা য়ারগনি৷

নেচরেল ফার্মিংগী কান্নবশিং অদু ময়ামদা খঙহন্নবা লৌউ-শিংউগী মন্ত্রালয়না হোৎনরিবা ময়াম অদুবু থাগৎলদুনা নিতি অয়োগকী ভি.সি. দা. রজিব কুমারনা অসুম্না ফোংদোকখ্রে মদুদি হৌজিক হৌজিক্কী ওইনা হায়রিবা থবক মখল অসি য়াবগী অমসুং চৎনবা হৌবগী ত্রাঞ্জিসন্নরী স্তেজতা লৈরি৷ অদুমওইনমক ভারত অসি নেত এগ্রি-এক্সপোর্তর অমা ওইন্নবগীদমক সাইন্সনা মনিংদা নাখল ওইনা শিজিন্নদুনা নেচরেল ফার্মিং অসি জন অন্দোলন অমা ওইনা চৎন্নবা ভারতনা য়াম্না কন্না হোৎনরি৷ ইনভাইরনমেন্তগী অনৌবা পোলিসী শেম্বা, প্রদক খন্দোকপা, ভেল্যু চেন অমসুং মার্কেতিংগা মরী লৈনবা ইসুশিং অসি তুংগী থবক অমা ওইনা চেকশিন্না লৌখৎকদবনি হায়দুনা নিতি অয়োগকী মেম্বর(লাউ-শিংউ) প্রোফেসর রামেশ চান্দনা ফোংদোকখ্রে৷ ইকোনোমিক দিভেলপমেন্তদা মরু ওইবা কান্নবশিং অদু পল্লদুনা নিতি অয়োগকী সি.ই.ও. শ্রী অমিতাভ কান্তনা অসুম্না ফোংদোকখ্রে মদুদি ফুদ সপ্লাই সিস্তেম অসি লেপ্পা লৈতনবগীমক নেচরেল ফার্মিং হেন্না হেন্না তৌনবা ইনখৎপীবা ওইনা ময়াম য়ান তামিন্নবা অমসুং ৱর্কএবল ওইবা স্ত্রাতিজীশিং শেমগৎপগী তঙাই ফদে৷

নিতি অয়োগকী মেম্বর(লৌউ-শিংউ) প্রোফেসর রামেশ চান্দ, অচরিয় দেববরত অমসুং কদসিদেশ্বর স্বামি জি , কনেরি মাথ, তোলহপুরনা লমজিংদুনা নুমিৎ নিনিগী খন্না নৈনবগী থৌরম অদুদা তেক্নিকেল সেসন মরি লৈ- নেচরেল ফার্মিং(নেস্নেল মালেমগী য়েংলগা), ভারততা চৎথরিবা নেচরেল ফার্মিং অমসুং মাই পাকপগী ৱারিশিং, নেচরেল ফার্মিং( পাংথোকপা অমসুং মদুদা থোকলকপা ফলশিং নৈনবা) অমসুং নেচরেল ফার্মিং( লৌমীশিংগী ওর্গনাইজেসন, এক্সপিরিয়েন্স অমসুং চেলেঞ্জশিং)৷

নেচরেল ফার্মিং অসি ফার্ম লেভেলদা পাংথোক্নবা অমসুং চৎন্নবা, ক্রিশি বিগ্যান কেন্দ্রস, রাজ্যগী লোউ-শিংউগী দিপার্তমেন্তশিং, প্রাইভে সেক্তর, কোওপরেতিবশিংগী মখাদা ইন্দিয়ন কাউন্সিল ওফ এগ্রিকলচরেল রিসর্সনা পাংথোক্লিবা ত্রনিং প্রোগ্রামশিং অসি য়েংশিন্নবা অমসুং মহৈ-মরোং অদু মাই পাক্না পুথোকখিবগী ৱারিশিং অমসুং থবকশিং অদুগী মতাংদা দোকুমেন্ত অমা শেম্নবা খন্না নৈনবা অসিদা সিস্তেমেতিক ওইবা এপ্রোচ পীনবা খন্নখি৷

কেন্দ্র অমসুং রাজ্য সরকারগী ওফিসিয়েলশিং, এগ্রিকলচরেল য়ুনিভর্সিতীশিং অমসুং ইন্সতিত্যুসনশিংগী সাইন্তিসশিং অমসুং এক্সপর্তশিং, ত্রস্তশিং অমসুং নেচরেল ফার্মিংগা মরী লৈনবা এন.জি.ও.শিং অমসুং ইন্তরনেস্নেল ওর্গনাইজেসনশিংগী মীহুৎশিং অমসুং লৌমীশিংগী ওর্গনাইজেসনশিংনা খন্না নৈনবগী থৌরম অদুদা শরুক য়াখি৷

*****