কেমিকেল অমসুং ফর্তিলাইজর্সকী কেন্দ্রগী মন্ত্রী শ্রী দি. ভি. সদানন্দা গৌরানা ভারতকী ফার্মা ইন্দস্ত্রীনা কোবিদকী অৱাবা তানফম অসিগী মনুংদা লৌখিবা থৌদাং অদু থাগৎখি অমদি ভারতকী ফার্মা ইন্দস্ত্রীনা লায়চৎ অসিগী মমল হোংবা বেক্সিন পুথোকপা অমদি সপ্লাই তৌবশিংগী মরক্তা অহানবা ওইগনি হায়না থাজবা ফোঙদোক্লি।

শ্রী গৌরানা ইনবেস্ত ইন্দিয়া ফার্মা ব্যুরো অমসুং দিপার্তমেন্ত ওফ ফার্মাকোতিকেল্সনা শিনবা ৱেবিনার #ই.আই.এফ.২০২০ মেদিকেল দিবাইজ এন্দ ফার্মাকোতিকেল সেক্তর ইদিসন্দা- সেক্তর অসিদা ইন্বেস্তমেন্ত তৌবা ঙমহন্নবা, জি.ও.আই.গী থৌরাংশিং, ইনফ্রাস্ত্রকচর অমসুং থোরক্লিবা খুদোংচাবশিং ফংহন্নবা ঙরাং নুমিদাং ৱাইরম ভিদিও কনফরেন্সিংগী খুত্থাংদা ৱারোল পীখি।

কেন্দ্রগী মন্ত্রীনা হায়খি মদুদি ভারতকী ফার্মা অমসুং মেদিকেল দিবাইজ ইন্দস্ত্রীনা ফীভম অসি মাই পাক্না মায়োক্নবা ঙমগনি। মহাক্না মখা তারদুনা হায়খি, “মপালদগী অয়াম্বা পুশিল্লক্তুনা শীজিন্নরম্বদগী নোংমদা লাখ ৫ হেন্না পুথোকপা ঙম্বগা লোয়ননা মালেমগী ওইনা পি.পি.ই. কিৎশিং খ্বাইদগী য়াম্না পুথোকপদা অনিশুবা ওইরকপা অসি ঐহাক্কী অমদি ভারত মচা মিলিয়ন কয়াগী ওইনা য়াম্না চাউথোকচবা পোকনীংঙাই ওই।

মসিগা মান্নবা মওংদা ভেন্তিলেতরশিংগী ওইনা অতেনবা মতমগী মনুংদা লমদম অসিদা পুথোকচবা ঙমজদুনা চহি অমদা লাখ ৩দা হেনগৎহনখ্রে। মসিগী মথক্তা, ভারতনা হীদাক ফংদবগী অৱাৎপা অমত্তা মায়োক্নখিদে অমদি হীদাকশিংগী মমলশিং অসি অদুমক লেংদনা লৈখি। মাই পাকপা ঙমখ্রিবা অসি তোঙান তোঙানবা বিভাগশিং অমসুং কেন্দ্রগী সরকার, রাজ্য সরকার অমসুং লনাই সেক্তরশিংগী এজেন্সীশিংনা থৱায় য়াওনা পুন্না হোৎনবনা ওইখিবনি,” হায়না শ্রী গৌরানা ফোঙদোকখি।

লমদম অসিদা মেদিকেল দিবাইজশিং শাজবা ঙম্নবা হোৎনবা মথৌ তাবগী মতাংদা শ্রী গৌরানা হায়খি, "মরু ওইনা স্ক্রীনিং অমসুং দাইগনোসিসকীদমক মতিক চাবা খুৎলাই ফংহন্নবা, লায়েংবদা মথৌ তাবা মতমগা চান্নবা সর্জিকেল ইক্বিপমেন্ত অমসুং হকশেলগী ফীভমশিং য়েংশিন্নবা দিবাইজশিংগা মরী লৈনবা হেল্থক্যেরশিং ফংহন্নবা অমসুং মমল হোংদোকহন্নবা হোৎনরিবা অসিদা অচৌবা থৌদাং লৌবনা মরম ওইরগা মসি য়াম্না মরু ওই।"

মহাক্না মখা তারদুনা হায়খি প্রধান মন্ত্রী শ্রী নরেন্দ্র মোদীগী লুচিং মখাদা ফার্মাকোরিকেল্স বিভাগনা ফার্মা অমসুং মেদিকেল দিবাইজকী সেক্তরদা লমদম অসিদা শাজবা ঙম্বা হেনগৎহন্নবা ফীভম অমা ওইহন্নবা খোঙথাং কয়া লৌখৎখ্রে অমদি রাজ্য সরকারশিং অমসুং লনাই সেক্তরগা পুন্না থবক পায়খৎমিন্নদুনা লৈবাক্কী মফম কয়াদা বল্ক দ্রগ পার্ক অহুম অমসুং মেদিকেল দিবাইজ পার্ক মরি শাবদা মতেং পাংনবা ৱারেপ লৌখ্রে। মসিগী পান্দমদি মপাল লৈবাক্তগী পুশিল্লকবদা মীপান তাংলম্বা ক্রতিকেল এ.পি.আই. ৫৩ নত্রগা কী স্তার্তিং মেতরিহেলশিং (কে.এস.এম.শিং) অমসুং মেদিকেল দিবাইজশিং পুথোকপদা ভারত অসি মরোমদোম লেপচবা ঙম্বা ওইহন্নবা হায়বা অসিনি।

শ্রী গৌরানা হায় মসিগী পার্কশিং অসিনা অচৌবা ইনবেস্তমেন্তগা লোয়ননা খ্বাইদগী নৌবা তেক্নোলোজীশিং ফংহনবা ঙম্লগনি হায়না মহাক্না থাজবা থম্মি। চহি ২-৩গী মনুংদা শ্রী নরেন্দ্র মোদীগী লুচিং মখাদা কেন্দ্র সর্কারগী ললোন ইতিক্কী লমদা মরুপ ওইবগী থৌরাংশিংনা মরম ওইরগা ফার্মা সেক্তর অসি লৈবাক মনুংগী মথৌ তাবশিং ফংহনবা খক্তা নত্তনা অহোংবা মমলগী- অফবা ক্বালিতীগী হীদাক লাংথকশিং অমসুং মেদিকেলগী খুৎশু খুলাইশিং ফংহনবদসু আত্মানির্ভর ওইরগনি। মসিগী দ্রগ বল্কতা অমসুং মেদিকেল দিবাইজ পার্ক দিবেলপ তৌনবা কেন্দ্র সরকারগী স্কিমশিং অসিনা অপুনবা লুপা করোর ৭৮০০০ ইনবেস্তমেন্ত ফংলগনি অমসুং চাউরাক্না থবক লাখ ২.৫ পীবা ঙম্লগনি।  

*****