লেসিস কেরোলগী এলিসনা মহাক্কী অঙকপা মফমদা পাক চাউবা অম হেক্তগী লম্বীদা চৎপা য়ানবা মহাকপু পীকথহনবা য়াবা থক্নবা মহী অমা ফংখি‍। ৱাখলনা শাগৎপা ঙম্বা মতিক লৈবা অঙাঙশিংনা মখোয়গী  অকোয়বদা লৈরিবা ৱাফমশিংগী অনৌবা পাম্বৈ কয়া পুথোকপা ঙম্ম‍ী‍।

লৈঙাক্কী থৌরাংনা অসিগুম্বা ৱাখলনা শাগৎপা অসি পোকহন্দুনা নুংতিগী থেংনরিবা খুদোংচাদবা ৱাফমশিংগী পাম্বৈ সাইন্স অমসুং তেক্নোলোজীদা য়ুম্ফম ওইদুনা পুথোক্ননবা অঙাঙশিংদা পুক্নীং থৌগৎলিবা ইনোভেসনগী পিরামিদ পাকথোকহল্লি‍। অসিগুম্বা ৱাখল্লোনশিং অসি দিপার্তমেন্ত ওফ সাইন্স অমসুং তেক্নোলোজীনা তরাম্না ওক্লি, অমদি মচং ওইবা ৱাখল্লোনশিং দিস্ত্রিক, স্তেত, অমদি লৈবাক্কী থাক্তা পাঙথোকপা একজিবিসনশিংদা লমজিংবিবগী ঙাক্লৌগা লোয়ননা লুপা ১০,০০০গী শেন্ফমগী মনা পীরি‍।

ভারতকী খ্বাইদগী মনুং হঞ্জিনবা মফমশিংদগী অঙাঙ লাখ কয়ানা – শাফবা চাকখুমগী খুৎলায়শিং, তুং কোইবা বাইও-তোইলেতশিং নৎত্রগা ফত্ত-হৌদি মেনেজমেন্তকী পাম্বৈনচিংবা – মখোয়না থেংনরকপা প্রোব্লেমশিংগী অনৌবা পাম্বৈ কয়া পুথোরক্লি‍।

মিলিয়ন মাইন্দ্স ওগমেন্তিং নেসনেল এস্পিরেসন্স এন্দ নোলেজ (মানক) প্রোগ্রাম দিপার্তমেন্ত ওফ সাইন্স এন্দ তেক্নোলোজী (দি.এস.তি.)না নেসনেল ইনোভেসন ফাউন্দেসন (এন.আই.এফ.)কা খুৎশম্নরগা ২০১৭দা হৌদোকখিবনি‍। প্রোব্লেমশিং মশক খঙদোক্তুনা পাম্বৈ পুথোকপা ঙমগদবা ইনোভেতিব ওইবা মহৈরোইশিংগী পাইপলাইন অমা শেম্নবা মসিনা নহা ওইরিবা পুক্নীংশিংগী ৱাখল্লোনগী পাঙ্গলদা অহেনবা মীৎয়েঙ থম্লি‍।

লৈবাকসিদা লৈরিবা মহৈ তম্ফমশঙ লাখ ৬তগী হৈথোই শিংথোইরবা পুক্নীং কয়াগী পাঙ্গল লোকশিন্নবা পান্দমদা, দি.এস.তি.না লৈঙাক্কী অমদি লনাই মহৈ তম্ফমশঙশিংদগী মহৈরোইশিংবু কমন ওইবা প্রোব্লেমশিংগী ৱারোইশিন পীবা ঙমগদবা মশাগী ওইবা অমদি অনৌবা ৱাখল্লোনশিং থারক্নবা কৌরি‍।

হায়রিবা ৱাখল্লোনশিং অসি মহৈ তম্ফমশঙ, দিস্ত্রিক অমদি স্তেতকী থাক্তা চেকশিন্না খন্দোক খঞ্জিন তৌদুনা অমদি তাকপী তম্বিদুনা লৈবাক্কী থাক্কী অথোই অহেন তান্নবদা য়াওনবগীদমক খল্লকপনি‍।

খ্বাইদগী ফজবা ৱাখল্লোনশিং খ্বাইদগী মনুং হঞ্জিনবা মফমশিংদগী হেক হেক লাকই‍। হৌখিবা চহীদা মনা ফংখিবা ৱাখল্লোন অমা মধ্য প্রদেশকী ছিন্দ্বারা দিস্ত্রিক্তা লৈবা গোভর্নমেন্ত এম.এস. (নুপীমচাশিংগজী) আস্রম বিছুৱাদগী ক্লাস ৮গী মহৈরোই সুলোচনা ককোদিয়ানা থাজিল্লকখি‍। লু নান্দবা মওংদা  তোইলেত শেংদোকপনা মীয়ামগী হকশেলগী ওইবা খুদোংচাদবা ফীভম কয়া থেংনরিবসি খঙলবা মতুংদা মহাক্না মশা মথন্তা তোইলেত শেংদোকচনবা মেচিন অমা শেম্নবগী ৱাখল্লোন অমা পুথোরকখি‍। তোইলেত শেংদোক্নবা ব্রস অদু তোইলেত মশাদা পানশিল্লগা মদু লৈদুনা মশা মথন্তা তোইলেত শেংদোকহল্লি‍।

মশাগী ওইবা খুদোংচাদবা ফীভম অমনা খা অন্দমানগী নিল ইথৎতা লৈবা গোভর্নমেন্ত সিনিয়র সেকেন্দরী স্কুলগী ক্লাস ৯গী মহৈরোই সয়ান অখতর সৈখকী মফমদা অনৌবা ৱাখল্লোন অমা পোকহনখি‍। মহাক্কী মমাদু এল.পি.জি. সিলিন্দরগী মখুম হাংদোক্নবা নাইলোনগী লং চিংথোক্লুবদা খুৎশা শোকখি। হায়রিবা খুদোংচাদবা ৱাফম অসি কোকহন্নবগীদমক্তা মহাক্না এল.পি.সি. সিলিন্দরগী মখু হাংদোক্নপা প্লাস্তিক (সেফতী) কেপ ওপনর অমা শেমখি‍।

লৈবাকসিগী স্তেত অমসুং য়ুনিয়ন তেরিতরী পুম্নমক্তগী মহৈরোই লাখ ৩.৮ হেনবনা মখোয়গী ৱাখল্লোনশিং ২০১৯দা থাজিল্লকখি, অমদি হায়রিবা মশীং অসি চহী খুদিংগী হেনগৎলক্লি‍। মসিগী মনুংদা খরখক্তমক প্রোতোতাইপ শেমগৎনবা লুপা ১০,০০০গী শেনগী তেংবাঙ পীরি‍। দি.এল.ই.পি.সি.) (দিস্ত্রিক লেভেল একজিবিসন এন্দ প্রোজেক্ত কম্পিতিসন) অমসুং মখা তাবা এস.এল.ই.পি.সি. (স্তেত লেভেল একজিবিসন এন্দ প্রোজেক্ত কম্পিতিসন) মথাঙ কয়া লান্থোক্লবা মতুংদা মখোয়গী মরক্তগী খরা লৈবাক্কী থাক্কী অথোই অহেন তান্নবদা শরুক য়ানবা খনগৎলি‍।

চহী অসিদা ২০২০-২১গী ওইনা ওনলাইন নোমিনেসন জুন ১, ২০২০দগী হৌরে‍। মহৈরোইশিং কোবিদ-১৯না মরম ওইদুনা মহৈ তম্ফমশঙশিংদা কাবা য়াদবনা, দি.এস.তি.না মখোয়দা হায়রিবা মতম অসি অনৌবা ৱাখল্লোনশিং পুথোক্তুনা ওনলাইন পোর্তেল www.inspireawards-dst.gov.in. দা থাজিল্লক্নবা পুক্নীং থৌগৎলি‍।

ভারতনা মালেমগী ইনোভেসন ইন্দেক্সতা খোঙজেল য়াঙনা কাখৎলকপগা লোয়ননা লৈঙাক্না মখোয়গী ৱাখল্লোনশিং চাংয়েং তৌবা পাম্বা নহা ওইরিবা মীয়াম মরক্তা অনৌবা ৱাখল্লোনগী চৎনবী অমা থুনা য়াঙনা য়োকখৎনবগীদমক হোৎনরি‍। হায়রিবা ইহৌ অসি ভারতকী তরং তরংবা তুংগী ফীভম অমগী মঙলানগা লোয়ননা লৈবাকসিগী মনুং হঞ্জিনবা মফমশিংদা থুনা শন্দোরক্লি‍।

*****