খাদি অমসুং ভিলেজ ইন্দস্ত্রীজ কম্মিসসন (কে.ভি.আই.সি.)না থা অনিগী মমাংদা ই.-কম্মর্স্তা চঙলক্তুনা পোৎ য়োনখিবা হৌখিবা অহানবা নুমিত্তগী প্লাস্তিক্কী পোল্ল্যুসন থীংনবা হায়দুনা পোত্থোকশিংবু চেনা য়োমদুনা খাদিগী “গ্রীন কেমিস্ত্রী”গী ৱাখল্লোন ইন্দুনা থবক পাঙথোকপা হৌখি।

কে.ভি.আই.সি.না মহিগী পোত্থোকশিংবু পুথোক পুশিন তৌবা মতমদা য়ুদনবা প্লাস্তিক্না য়োম্বা নত্তনা অতৈ পোৎলমশিংদা খুৎনা শাবা চেগী চেখাওশিংনা য়োম্বগী অখন্নবা থৌওং চত্থরি। কে.ভি.আই.সি.না ফেস মাস্কশিংবু অফবা হাইজিনগী য়েংদুনা প্লাস্তিক্না য়োম্লম্বা অদুসু অথুবা মতমদা লফোয়গী ফাইবরদগী অখন্নবা ওইনা শাবা খুৎনা শাবা চেনা য়োম্বা হৌরগনি।

পোৎ-চৈ য়োম্বদা প্লাস্তিক্না য়োম্লিবা অসিনা অকোয়বগী ফিভমদা য়াম্না শোকহনগদবা লৈবা অসি য়েংলগা নেস্নেল গ্রীন ত্রাইব্যুনেল (এন.জি.তি.)না ই.-কম্মর্সকী কম্পেনী কয়াদা পোৎ-য়োম্বদা প্লাস্তিক শিজিন্নবা থীংবগী থৌওংগা মরী লৈননা হায়রিবা থৌওং অসি পাঙথোকপনি। ত্রাইব্যুনেল অসিনা সেন্ত্রেল পোল্ল্যুসন কন্ত্রোল বোর্দ (সি.পি.সি.বি.)দা ই.-কম্মর্স কম্পেনীশিংনা প্লাস্তিক্কী পোল্ল্যুসন থোকহনবা থীংনবা তঙাই ফদবা থবকশিং পায়খৎনবসু হায়খ্রবনি।

কে.ভি.আই.সি.না খুৎনা শাবা চেগী চেখাও অমসুং বোক্সশিং শিজিন্নদুনা অকোয়ববু ঙাক শেনবা অমসুং থবক পীবগী থৌওং অনিমক পাঙথোক্লি। কে.ভি.আই.সি.না মসিগী জয়পুরগী কুমারপ্পা নেস্নেল হেন্দমেদ পেপর ইন্সতিত্যুৎ (কে.এন.ঐচ.পি.আই.)তা শাবা চেগী চেখাওশিং অসি শিজিন্নরি অমসুং মসিনা মখোয়শিং অসি শাবদা অহেনবা থবক্কী খুদোংচাবা কয়া অমা পীরি।

কে.ভি.আই.সি.গী চেয়রমেন শ্রী বিনয় কুমার সক্সেনানা হায়খি, “খাদিগী ফীরোলশিং অসি মালেমগী খ্বাইদগী ইকো-ফ্রেনলী ওইবা শেৎপা-চাবগী পোত্থোকশিংনি অমসুং কে.ভি.আই.সি.না পাঙথোকপা থবক খুদিংদা অকোয়ববু ঙাক শেনবগী ৱাখল্লোনশিংবু মরু ওইনা ইন্দুনা চৎলি”।

এন.জি.তি.গী হন্দক্কী থৌওং খরদা মীদিয়ানা হংবা ৱাহংশিংগী পাউখুম পীবা ওইনা সক্সেনানা হায়খি, “খাদিগী পোত্থোকশিং অসি মহৌশাগী পোত্থোক্নি অমসুং মসিবু ঐখোয়গী কস্তমরশিংদা চেনা য়োমদুনা পীবা অসিনা অকোয়বগী মতাংদা ঐখোয়গী চেকশিনবগী থৌওং তাক্লি। চেগী খাওশিং অসিনা প্লাস্তিক্তদগী হেন্না লুম্মি অমসুং মসিবু পুথোক পুশিন তৌবদা অহেনবা শেল চঙবতা নত্তনা মসি শাবদসু অহেনবা শেল চঙই। অকোয়বদা অকায়বা পীহন্দনবা হায়দুনা কে.ভি.আই.সি.না মসিদা চঙবা শেলশিং অসি পুথোক্লি”।

কে.ভি.আই.সি.না চেদা য়োমদুনা পোত্থোকশিং পীবদা মসিগী ওনলাইনগী কস্তমরশিংনা থাগৎপা ফোঙদোক্নরক্লি। “ঐহাক্না কে.ভি.আই.সি.দগী চেনা য়োম্বা পোৎ অমা ফংবদা নুংঙাইবা ফাওখি। ঐহাক্না থা অনিগী মনুংদা পোৎ কয়া অমা চেনখি অমসুং মসিগী মনুংদা প্লাস্তিক্না য়োম্লকপা অমত্তা থেংনখিদে,” হায়না জোধপুরদা লৈবা খাদিগী পোৎ য়াম্না তোয়না লৈবা সুমিৎ মাথুরনা হায়খি।

 “খাদি ইন্দিয়ানা চেখাও শিজিন্নবা অসি অকোয়বগী মতাংদা য়াম্না খনজবা থৌওং অমনি অমসুং মসিবু মীয়াম্না থাগৎফম থোকই। খাদিনা প্লাস্তিক শিজিন্নবগী চাং য়াম্না হন্থহনবা অসি প্লাস্তিক্কী পোল্ল্যুসন হন্থহনবগী চাউরবা খোঙথাং অমনি”, হায়না কে.ভি.আই.সি.গী ওনলাইন কঞ্জ্যুমর দেতাবেজতা দিল্লীগী মথংদা অনিশুবদা লৈরিবা করনাতাদগী খাদিগী কস্তমর ওইরিবী অল্কা ভারগবনা হায়খি।

******