ପ୍ରଧାନମନ୍ତ୍ରୀଙ୍କ କାର୍ଯ୍ୟାଳୟ

"ଏକବିଂଶ ଶତାବ୍ଦୀରେ ବିଦ୍ୟାଳୟ ଶିକ୍ଷା" ଶୀର୍ଷକ ଅଧିବେଶନକୁ ସମ୍ବୋଧିତ କରିବେ ପ୍ରଧାନମନ୍ତ୍ରୀ

प्रविष्टि तिथि: 10 SEP 2020 1:14PM by PIB Bhubaneshwar

ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ଆସନ୍ତାକାଲି (11.09.2020) ଦିନ 11ଟା ବେଳେ "ଏକବିଂଶ ଶତାବ୍ଦୀରେ ବିଦ୍ୟାଳୟ ଶିକ୍ଷା" ଶୀର୍ଷକ ଅଧିବେଶନରେ ତାଙ୍କର ଅଭିଭାଷଣ ରଖିବେ । ଜାତୀୟ ଶିକ୍ଷା ନୀତି 2020 (ଏନଇପି 2020) ଅଧୀନରେ ହେଉଥିବା ଏହି ଅଧିବେଶନକୁ ପ୍ରଧାନମନ୍ତ୍ରୀ ଭିଡିଓ କନଫରେନ୍ସ ଜରିଆରେ ସମ୍ବୋଧିତ କରିବେ । ଶିକ୍ଷା ପର୍ବର ଅଂଶବିଶେଷ ଭାବେ କେନ୍ଦ୍ର ଶିକ୍ଷା ମନ୍ତ୍ରଣାଳୟ ଆଜି ଓ ଆସନ୍ତାକାଲି ଦୁଇଦିନ ଧରି ଏହି ଅଧିବେଶନର ଆୟୋଜନ କରିଛି । ପୂର୍ବରୁ ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ଗତ 7 ତାରିଖ ଦିନ ତାଙ୍କର ଉଦଘାଟନୀ ଅଭିଭାଷଣ ଦେଇସାରିଛନ୍ତି । ଏହା ବ୍ୟତୀତ ଶ୍ରୀ ମୋଦୀ ଜାତୀୟ ଶିକ୍ଷା ନୀତି 2020 ଉପରେ ସେହିଦିନ ରାଜ୍ୟପାଳମାନଙ୍କ ସମ୍ମିଳନୀକୁ ମଧ୍ୟ ସମ୍ବୋଧିତ କରିଥିଲେ ।

ଏନଇପି 2020 ଏକବିଂଶ ଶତାବ୍ଦୀର ପ୍ରଥମ ଶିକ୍ଷା ନୀତି ଯାହାକି ଦୀର୍ଘ 34 ବର୍ଷ ପରେ ଘୋଷିତ ହୋଇଛି । ଏହାପୂର୍ବରୁ 1986ରେ ଜାତୀୟ ଶିକ୍ଷା ନୀତି ଘୋଷିତ ହୋଇଥିଲା । ଜାତୀୟ ଶିକ୍ଷା ନୀତି 2020ରେ ଉଭୟ ବିଦ୍ୟାଳୟ ଓ ଉଚ୍ଚ ଶିକ୍ଷା କ୍ଷେତ୍ରରେ ଅନେକ ପ୍ରମୁଖ ସଂସ୍କାର ଅଣାଯାଇଛି ।

ନୂତନ ଜାତୀୟ ଶିକ୍ଷା ନୀତି ଦେଶକୁ ପ୍ରଗତିଶୀଳ ଜ୍ଞାନଯୁକ୍ତ ସମାଜରେ ପରିଣତ କରିବାକୁ ଲକ୍ଷ୍ୟ ରଖିଛି । ଏହି ଶିକ୍ଷା ନୀତିରେ ନିହିତ କେତେକ ବିଷୟ ଭାରତକୁ ବିଶ୍ଵରେ ଏକ ସୁପର ପାୱାରରେ ପରିଣତ କରିବା ପାଇଁ ଉଦ୍ଦିଷ୍ଟ ।

ଏନଇପି 2020 ଦେଶର ବିଦ୍ୟାଳୟ ଶିକ୍ଷାରେ ଏକ ବିରାଟ ସଂସ୍କାର ଆଣିବା ପାଇଁ ବ୍ୟବସ୍ଥା କରାଯାଇଛି । ବିଦ୍ୟାଳୟରେ 8 ବର୍ଷ ସ୍ତରର ପିଲାଙ୍କ ପର୍ଯ୍ୟନ୍ତ ଶିଶୁର ଯତ୍ନ ଓ ଶିକ୍ଷା ପାଇଁ ବ୍ୟବସ୍ଥା କରାଯାଇଥିବା ବେଳେ ବିଦ୍ୟାଳୟରେ ଥିବା 10+2 ପଦ୍ଧତିକୁ 5+3+3+4 ଶିକ୍ଷା ପଦ୍ଧତିରେ ପରିବର୍ତ୍ତିତ କରାଯାଇଛି । ଏକବିଂଶ ଶତାବ୍ଦୀ ପାଇଁ ଗାଣିତିକ ଓ ବୈଜ୍ଞାନିକ ଚିନ୍ତନ ଓ ଏକ ନୂତନ ଚିନ୍ତାଧାରା ବିଦ୍ୟାଳୟ ଶିକ୍ଷାରେ ଅନ୍ତର୍ଭୁକ୍ତ କରାଯାଇଛି । ଶିକ୍ଷକମାନଙ୍କ ପାଇଁ ଜାତୀୟ ବୃତ୍ତିଗତ ମାନ, ବିଭିନ୍ନ ସଂସ୍କାରର ଆକଳନ, ଶିଶୁର ପ୍ରଗତିର ସମୀକ୍ଷା ଏବଂ ଷଷ୍ଠ ଶ୍ରେଣୀଠାରୁ ବୃତ୍ତିଗତ ଶିକ୍ଷାକୁ ମୂଳ ଶିକ୍ଷା ସହ ସାମିଲ କରାଯାଇଛି । ପ୍ରଧାନମନ୍ତ୍ରୀଙ୍କ ଦ୍ଵାରା ଆହ୍ଵାନ ଦିଆଯାଇଥିବା ଆତ୍ମନିର୍ଭର ଭାରତର ଗଠନ ପାଇଁ ନୂତନ ଶିକ୍ଷା ନୀତିରେ ଥିବା ବ୍ୟବସ୍ଥାମାନ ବିଶେଷ ସହାୟକ ହେବ ।

ସେପ୍ଟେମ୍ବର 8 ରୁ 25 ପର୍ଯ୍ୟନ୍ତ ଶିକ୍ଷକ ପର୍ବ ପାଳନ କରାଯାଇ ଶିକ୍ଷକମାନଙ୍କୁ ସମ୍ବର୍ଦ୍ଧିତ କରାଯିବା ସହ ନୂତନ ଶିକ୍ଷା ନୀତି 2020କୁ ଆଗକୁ ବଢାଇବା ପାଇଁ ଉଦ୍ୟମ ଆରମ୍ଭ ହୋଇଛି । ୱେବିନାର, ଭର୍ଚୁଆଲ ସମ୍ମିଳନୀ ଓ ଅଧିବେଶନମାନ ନୂତନ ଶିକ୍ଷା ନୀତି 2020ର ବିଭିନ୍ନ ବିଷୟବସ୍ତୁ ଉପରେ ଦେଶବ୍ୟାପୀ ଆୟୋଜିତ ହେଉଛି ।   

 

**********


(रिलीज़ आईडी: 1653044) आगंतुक पटल : 250
इस विज्ञप्ति को इन भाषाओं में पढ़ें: Kannada , Tamil , Telugu , Marathi , Malayalam , English , Urdu , हिन्दी , Manipuri , Bengali , Assamese , Punjabi , Gujarati