ভারত সরকারগী নুপী অমসুং অঙাং চাউখৎপগী মন্ত্রালয়না সেপ্তেম্বর ২০২০দা পাঙথোকপা অহুমশুবা পোশন মাহগী থৌরমগা মরী লৈননা ৱেবিনারগী পরিং কয়া পাঙথোক্কদৌরি। পোশন অভিয়ানগী খ্বাইদগী ফবা থৌওংশিং অমসুং মাই পাকপগী ৱারীশিংগী অহানবা ৱেবিনার অসি সেপ্তেম্বত ৭তা পাঙথোক্কনি। মমা ওইবী অমসুং মখোয়গী অঙাংশিংনা অহানবা নুমিৎ ১০০গী মনুংদা তঙাই ফদবা মচি ওইবা চিঞ্জাক্কী মতাংগী অনিশুবা ৱেবিনার অসিনা ঙসি পাঙথোকখ্রে। কেন্দ্রগী নুপী অমসুং অঙাং চাউখৎপা অমসুং তেক্সতাইলগী মন্ত্রী শ্রীমতি স্মৃতি ইরানিনা ৱেবিনারশিং অসিবু লুচিংদুনা পাঙথোকখি। থৌরম অসিদা শরুক য়াখিবশিংগী মনুংদা নুপী অমসুং অঙাং চাউখৎপগী রাজ্য মন্ত্রী শ্রীমতি দেবশ্রী চৌধুরি, ভারত সরকারগী নুপী অমসুং অঙাং চাউখৎপগী সেক্রেতরী শ্রী রাম মোহন মিশ্রা, খোঙলোই ওইবা মন্ত্রালয় অমসুং রাজ্য সরকারশিংগী মীহুৎশিং, মালেমগী লুপশিং অমসুং চাউখৎমিন্নবগী খোঙলোইশিংগী মীহুৎশিং, পি.আর.আই. মেম্বরশিং, আই.সি.দি.এস. ফংস্নরিশিং, রাজ্যগী দবল্যু.সি.দি.গী মীহুৎশিং, দোমেনগী অখঙ-অহৈশিং, ন্যুত্রিস্নিস্তশিং, মন্ত্রালয়গী ওফিসারশিং অমসুং অতোপ্পা মীওইশিংনি।

ৱেবিনার অসিদা ৱা ঙাংবদা কেন্দ্র মন্ত্রী শ্রীমতি স্মৃতি জুবিন ইরানিনা খুৎশম্নদুনা থবক পাঙথোকমিন্নরিবা মন্ত্রালয়শিংগী থবকশিংবু থাগৎপা ফোঙদোকখি অমসুং পোশন অভিয়ানগী থবক থৌরমশিংবু মাই পাকপা ওইহন্নবা জন ভাগিদারী খুমাং চাউশিলহন্নবা হায়খি। মহাক্না হায়খিবদা নুপী অমসুং অঙাং চাউখৎপগী মন্ত্রালয়না খ্বাইদগী ফবা থবকশিং অমসুং মাই পাকপগী ৱারী কয়া খোমজিন্দুনা ই-বুক অমা শেম্নবা থৌরাং তৌরি হায়খি।

ঙরাং পাঙথোকখিবা পোশন অভিয়ানগী খ্বাইদগী ফবা থৌওংশিং অমসুং মাই পাকপগী ৱেবিনার অদুগী মপুং ওইবা হীরমগী মনুংদা য়াওখিবশিং অদুদি কোবিদ-১৯গী মনুং অসিদা ন্যুত্রিসনগী মতাংদা অনৌবা থৌওং কয়া য়াওনা নৌহৌননা মিৎয়েং চংবা, খ্বাইদগী ফবা থৌওংশিংগী মরমদা অমগা অমগা পাউ ফাওনবা অমসুং লক্ষদ্বীপকী অঙ্গনৱাদি শেন্তরশিংদা ন্যুত্রি-গার্দেন শাবগী মাই পাকপগী ৱারীশিং, গুজরাত্তা লৈবা সিবিয়রলী এক্যুৎ মেলনৌরিশদ (এস.এ.এম.) অঙাংশিংবু ওনলাইন্দা থিগত্তুনা য়োকপগী থৌওং, সপ্লিমেন্তরী ন্যুত্রিসন প্রিপেরেসনবু অনৌবা মশক পীবা অমসুং ওরিশাগী রাজ্যদা মসিগী থৌওং অসিদা মিল্লেৎ মনুং চলহনবা, উত্তরাখন্দদা এস.এ.এম.গী অঙাংশিংবু সরকারনগী ওফিসিএলশিংনা য়োকপা অমসুং ত্রাইবেলগী মীশিংনা হেনবা অমসুং মচি ফংবা চিঞ্জাক ফংদা অঙাংগী মশিংনা হেনবা দদ্রা অমসুং নগর হবেলি অমসুং দামন দ্যুগী য়ু.তি.শিংদা এস.এ.এম.গী অঙাংশিংবু মশক খঙদোকপশিং অসিনি।

ঙসিগী ৱেবিনার অসিগী হীরমশিংগী মনুংদা মীথুংলেন ওইবা মশক নাইবা মেদিকেলগী প্রোফেস্নেল অনিনা ৱা ঙাংবা য়াওখি। “এপ্ত নরচরিং: অহানবা নুমিৎ ১০০ অসি য়াম্না মরু ওইবনি” হায়না মিংথোনবা অহানবা লেকচর অসি পেদিয়াত্রিক্স অমসুং ক্লিনিকেল ইপিদেমিওলোজীগী প্রোফেসর দাঃ ঐচ.পি.এস. সচদেবনা পীখি অমসুং মসিদা মহাক্না অঙাং হেক ওইবদগীনা চহি অনি ফাওবগী মনুংদা মচি লৈবা চিঞ্জাক চাখিবা অসিনা মশা খিঙ খিঙ লাওবা অমসুং মপুং মরৈ ফাবা পুন্সি অমা হিঙবদা তঙাই ফদবগী মতাংদা হায়খি। “অহানব নুমিৎ ১০০দা মমা অমসুং অঙাংগী মচি লৈবা তঙাই ফদবশিং” হায়না মীংথোনবা অনিশুবা লেকচর অসিনা সেন্ত জোহন মেদিকেল কোলেজকী হান্না ফিজিওলোজীগী মকোক ওইরম্বা প্রোফঃ এ.ভি. কুরপদনা পীখি অমসুং মসিদা মহাক্না তঙাই ফদবা মচি লৈবাক চিঞ্জাক ফংগে হায়রবদি মীয়াম্না অদুম চানবা, শেল য়াম্না চঙদবা, য়ুমদা থোংবা তোঙান তোঙানবা চিঞ্জাকশিং অসিনা অদুমক পীবা ঙম্মি অমসুং মসিবু ৱাৎনা নত্ত্রগা হেন্না পীজবগী মতাংদা নীংথিনা শেন্নগদবনি হায়খি। নৌনা পোকপা অঙাং অমগী পুন্সিগী অহানবা নুমিৎ ১৮০দা অপুনবা ওইনা খোম-পীথকপগী মতাংদা মহাক্না মিৎয়েং চঙখি।

*****