জল শক্তিগী কেন্দ্র মন্ত্রী শ্রী গজেন্দ্র সিংহ শেখাৱৎনা সিক্কীমগী মুখ্য মন্ত্রী শ্রী প্রেম সিংহ তমাংগা ভিদিও কনফরেন্সকী থোংদা রাজ্য অদুদা জল জীবন মিশন অসি চৎনহন্নবগী মতাংদা ঙসি খন্ন-মীফম পাংথোকখ্রে। দ্রিঙ্কিং ৱাতর অমসুং সেনিতেসন বিভাগকী সেক্রতরী, নেস্নেল জল জীবন মিশনগী এদিস্নেল সেক্রতরী অমসুং মিশন দিরেক্তর অমদি মন্ত্রালয় অসিগী অতোপ্পা ওফিসিএলশিংনা মীফম অদুদা য়াওখি। সিক্কীমদগী পি.দব্লয়ু.দি.গী চীফ সেক্রতরী অমসুং অতোপ্পা মকোক থোংবা ওফিসরশিংনা মীফম অদুদা য়াওখি।

লৈবাক অসিদা ২০২৪ ফাওবদা খুঙ্গং খুদিংদা তোতী ঈশিং শম্ননবগী পান্দমদা রাজ্যশিংগা খুৎশম্নদুনা কেন্দ্র সরকারগী ফ্লেগশিপ থৌরম, জল জীবন মিশন (জে.জে.এম.) অসি চৎনহন্নবনি। মিশন অসিগী পান্দমদি পুম্নমক্কী ওইবনি হায়বদি ইমুং খুদিংনা মখোয়গী ইমুংশিংদা তোতী ঈশিং শম্নবনি। সিক্কীমনা ২০২২ ফাওবদা চাদা ১০০ য়ৌনা রাজ্য অসিগী খুঙ্গং খুদিংগী ইমুং-মনুংশিংদা তোতী ঈশিং ফংহন্নবগী পান্দম অসি মপুং ফাহন্নবা থৌরাং তৌরি। 

কেন্দ্র মন্ত্রীনা রাজ্য অদুগী মুখ্য মন্ত্রীগা মিশন অদুগী থবক খুমাং চাউশিনবগী মতাংদা মরিক চুম্না ৱা খন্নমিন্নখ্রে। অওনবা পুরক্নবগী ওইবা মিশন অসিগী মরুওইবগী মতাংদা লুম্না লৌরদুনা কেন্দ্র মন্ত্রীনা লৈরিবা ঈশিং ফংহনবগী স্কীম অসি ফগৎহন্নবা অমদি অনৌবা শেমগৎনবদা হেন্না মিৎয়েং চংশিন্নবা হায়খ্রে।  রাজ্য অদুগী খুঙ্গং ৪১১দা পাইপকী ঈশিং ফংহনবগী স্কীমশিং লৈখ্রে অদুবু ইমুং লাক্ষ ১.০৫গী মনুংদা য়ুম ৭০,৫২৫(চাদা ৬৭)দা তোতী শমখ্রে। কেন্দ্র মন্ত্রীনা মুখ্য মন্ত্রীদা লাইরবা অমদি লাইরবগী পনখৈদা লৈবা মীওই কাংলুপশিং লৈবা খুন্নাইদা লৈরিবা লেমহৌরিবা ইমুংশিংদা খ্বাইদগী থুনা তোতী ঈশিং শম্নবা মিশন অসি মিশন মোদতা পাংথোক্নবা হায়খ্রে।  শ্রী শেখাৱৎনা রাজ্য অদুদা মলিগী পান্দম অসি মপুং ফাহনবদা পাংবা য়াবা তেংবাং খুদিংমক শোইদনা পাংগনি হায়বগী অচেৎপা থাজবা পীখ্রে। জল জিবন মিশনগী ওইনা ভারত সরকারনা তোতী শম্নবা অমদি কেন্দ্র সরকার অমসুং রাজ্য সরকারগী শরুকশিংদা মপা চানবা য়েংলগা আওতপত্তা য়ুম্ফম ওইরগা ফন্দশিং পীরি। 

সিক্কীমনা ২০২০-২১ ফাওবদা ইনুংশিংদা তোতী ১৬,৮৭৯ শম্নবা থৌরাং তৌরি। ২০২০-২১ ফাওবদা রাজ্য অসিদা লুপা কোতী ৩১.৩৬ ফংহনখ্রে।  রাজ্য অসিনা ফিজিকেল অমসুং ফাইনান্সিএলগী ওইবা থবক পাংথোকপদা য়ুম্ফম ওইরগা অহেনবা ফন্দগীদমক্তা মতিক চাবা ওইগনি। সিক্কিমনা ফাইনান্স কমিশন গ্রান্তসকী মখাদা খুঙ্গংগী লুপশিংদা লুপা কোতী ৪২ পীখ্রে অমদি মসিদগী চাদা ৫০দি ঈশিং ফংহন্নবা অমসুং মহিক-মতাই লৈহনম্দনবগীনি।  কেন্দ্র মন্ত্রীনা মুখ্য মন্ত্রীদা মসিগী ফন্দ অসি খুঙ্গংদা ঈশিং ফংহন্নবা, গ্রে-ৱাতর ত্রীত্মেন্ত তৌনবা অমদি অমুক হন্না শিজিন্নবা য়ানবা অমদি খ্বাইদগী মরু ওইনা ঈশিং ফংহন্নবগী স্কীমশিং অসি তুং কোইনা থবক পাংথোকহন্নবা অমদি য়েংশিন্দুনা থবক শিন্দোক-শিঞ্জিন তৌবদা শিজিন্ননবা তকশিনখ্রে।

কেন্দ্র মন্ত্রীনা ভিলেজ এক্সন প্লানশিং অমসুং ভিলেজ ৱাতর অমসুং সেনিতেসন কম্মিতী/পানী সমিতীগা লোয়ননা খুঙ্গংগী ঈশিং পীবগী ইনফ্রাস্ত্রকচর অসি থৌরাং তৌনবা, মওং শেম্নবা, চৎনহন্নবা অমদি  থবক পাংথোক্নবা নুপী মীহুৎনা চাদা ৫০ ওইহন্দুনা গ্রাম পঞ্চায়েৎকী সব কম্মিতী শেম্নবা মখা তানা হায়খি। খুঙ্গং খুদিংমক্না ঈশিং ফংফম, ঈশিং পীফম, গ্রে ৱাতর মেনেজমেন্ত অমসুং য়েংশিন্নবগী ওইগদবশিং ফগৎহনদগদবা/হাপচিনগী থবক অসি মরুওইনা য়াওগদবা ভিলেজ এক্সন প্লান(ভি.এ.পি.) শেমগদনি।  জল জীবন মিশন অসি মীয়ামগী অশেংবা খোংজং অমা ওইহন্নবা মী কাংলুপশিং চুংশিন্নদুনা আই.ই.সি. কেম্পেন তৌনবসু হায়খি।

জল জীবন মিশনগী মখাদা মফমদুগী মীশিংনা নিংথিনা থৌদাং লৌদুনা ঈশিং ফনবা য়েংশিন-থিজিন্নবদা মরু ওইনা তৌগদবা হায়খ্রে। মীওই ৫ মরুওইনা নুপীশিং অসি খুঙ্গং খুদিংদা খুঙ্গং অসিদা পীরিবা ঈশিং অদুগী অফ-ফত্ত য়েংনবা ফীল্দ তেস্ত কীৎশিং শিজিন্নবা তম্বিখ্রে। ঈশিং ফংফম খুদিংমক্না ফিজিকেল অমসুং কেমিকেলগী পেরামিতরশিংগী ওইনা ঈশিং ফংফম খুদিংমক চহি অমদা অমুরক অদুগা বেক্তরিয়ানা মোৎশিল্লকপা অসিগীদমক্তা অনিরক তেস্ত তৌগদবনি।  রাজ্য অসিদা রাজ্য অমসুং জিলাগী লেবোরেতরীশিং অসিগী এক্রিদেসন অসি মপুং ফাহন্নবা অমদি য়াম্না অতাবা মমলদা পীরিবা ঈশিং অদু তেস্ত তৌবা ঙম্নবা হাংদোকপিনবা পাউতাক পীখি। জল শক্তিগী মন্ত্রীনা জে.জে.এম., সিক্কীমগী মখাদা থবক পায়খৎপশিং অসিনা খুঙ্গংদা ঈশিং ফংহন্নবদা য়ুম্ফম ওইবা অসি শিজিন্ননবদা লুচিংবা ঙমগনি হায়নসু পনখি।

রাজ্য অসিদা খুদোংথিনিংঙাই ওইবা চিংমায়, মী য়াম্না তাদবা, কনেক্তিবিতী ৱাৎপা অমসুং ময়াম্না খংনরবা কোবিদ-১৯গুম্বা মখল-মখাগী শিংনবশিং অসিগী মতাংদা পল্লদুনা সিক্কীমগী মুখ্য মন্ত্রীনা জল জীবন মিশন অসি চাং নাইনা য়েংশিনগনি হায়না পনখি। অকক্নবা মতমগী মনুংদা খুঙ্গংগী মফমশিংদা য়ুমগী তোতী শম্ননবগী পান্দম অসি ফংনবা মহাক্না মিশন অসি রাজ্য অসিদা থুনা-য়াংনা চৎনহনগনি হায়না মহাক্না থাজবা পীখি। 

****