কমর্স অমসুং ইন্দস্ত্রিগী য়ুনিয়ন মিনিস্তর পিয়ুস গোয়ালনা হায়খি ওতোগী মচাকশিং অমসুং ওতোমোবাইলশিংগী লমদা মালেমগী মাংজিল থানবা ঐখোয় মাঙলোমদা চঙশিনগদবনি। সোসাইতি ওফ ইন্দিয়ান ওতোমোবাইল মেনুফেকচরস( এস আই এ এম)গী চহিগী মীফমদা মহাক্না হায়খি মশিং য়াম্না অমসুং মগুন লৈনা পুথোক্নবগী থবক ফগৎলক্লি অমসুং মালেমগা থেংন্নবা কমদৌনা চাংদম্নবা হেনগৎহনগনি হায়বা ঐখোয়না য়েংলি।

মিনিস্তরনা হায়খি, মগুন লৈহনবা, মমল হোংহনবা অমসুং অফবা শেন-থুমগী ফিবমশিংনা ঐখোয়না মালেমগী ওইনা থেংনবদা মতেং পাংগনি। করিগুম্বা ঐখোয়না ঐখোয়গী পোৎথোকশিং মালেম শীনবা থুংহনবা পাম্লবদি দিজাইন, পেকেজিং অমসুং ব্রান্দ বিল্দিং অসি য়াম্না মরুওই। ভারতনা লৈবাক অসিগী তৌবা ঙম্বশিং অমসুং মসিগী মশাগী শেন-থুমগী ফিবম পাকথোক-চাউথোকহন্নবা অমসুং মালেমগা থেংন্নবা মিৎয়েং থম্লি।

মহাক্না হায়খি খুদোংচাবা ময়াম অমা পীনবা ভারতনা থৌরাং তৌরি। অফবা ভেলু চেনশিং থিরিবা কম্পেনি কয়া ঐখোয়গা উনরে। অতোপ্পা লৈবাকশিংগা চাংদম্নবদা ঐখোয়না খুদোংচাবা হেন্না লৈগদবা সেক্তরশিং ঐখোয়না মশক খঙদোক্লগনি। মালেমগী লৈবাকশিংনা থবক তৌমিন্ননবা থাজবা মরুপশিং থিরকপদা ভারত শোইদনা ওইগনি হায়না ঐনা থাজবা থম্লি।

মিনিস্তরনা হায়খি, ঐখোয়গী মীয়ামগী ৱা তাবা সরকারনি অমসুং ভারত্তা পুথোকপা মচাকশিং শীজিন্নবা হেনগৎহন্নবা অমসুং মপান্দা থাদোকপগী খুদোংচাবশিং লৌনবা পাম্বৈশিং পুথোক্নবা অমসুং পুন্না থবক তৌমিন্ননবা হোৎনবা ঐখোয়না পাম্মি। কম্পেনি অমনা ভারত্তা থবক তৌবা মতমদা ভারতকী অচৌবা কৈথেল অমা মখোয়না ফংগনি।

মিনিস্তরনা হায়খি ওতোমোবাইল সেক্তরদা অত্মানির্ভর ভারত অমা শেমগৎনবা ঐখোয় চঙশিল্লি। মালেমগী থাক্তা হেন্না থবক পাংথোক্নবা দরকার ওইবা পাম্বৈশিং থিনবা সরকারগী অপাম্বা লৈরি। অকক্নবা সেক্তর অমদা মিৎয়েং থম্বা অসিনা মালেমগী সপ্লাই চেনশিংদা ঐখোয়গী পোৎ য়োনবা হেনগৎহনবদা মতেং পাংগনি।

শ্রী গোয়ালনা হায়খি হৌজিক ভারত্তা লৈরিবা ওতোমোবাইল কম্পেনিশিংনা মখোয়গী মপুশিংদা রোয়ালতিশিং হন্থহন্নবা হায়গদবনি। মসিনা হায়রিবা কম্পেনিশিং অসিগী ভারত্তা লৈরিবা য়ুনিতশিং অৱাবা তারকপদা লাইনা থেংনগনি। ওতোমোবাইল কম্পেনিশিংনা মখোয়গী পরেন্ত কম্পেনিশিংদা দোল্লর মিল্লিয়ন কয়া রোয়ালতি ওইনা পীরি , মসি হন্থহনবা অসিনা গারিশিংগী মমল হন্থগনি অমসুং লৈবাক অসিদা মখোয়গী পোৎশিৎ হেনগৎহনবদা মতেং পাংগনি।

মহাক্না হায়খি ভারতনা লৈবাক অসিগী তৌবা ঙম্বশিংদা মিৎয়েং থম্লি অমসুং অত্মানির্ভর ভারত খোঙজংগী মখাদা তৌবা ঙম্বশিং পাকথোক-চাউথোকহনগনি। মালেমগী লৈবাকশিংনা থবক তৌমিন্ননবা থাজবা মরুপশিং থিরকপদা ভারত শোইদনা ওইনবা কম্পেনিশিংনা পামগদবা ফিবমশিং শেমগৎনবা ভারতনা হোৎনরি। অতোপ্পা লৈবাকশিংদগী হেন্না খুদোংচাবা ফংগদবা সেক্তরশিং ঐখোয়না থিরি। ওতো ইন্দস্ত্রিগী খুদোংচাবা কয়া লৈরি। ঐখোয়গী চাউরবা কৈথল অমা লৈরি অমসুং মসিগী কান্নবা কম্পেনিশিংনা লৌগদবনি।

ক্বালিতি কন্ত্রোল ওর্দর(ক্বিউ সি ও)গী মতাংদা য়ুনিয়ন মিনিস্তরনা হায়খি, মখোয় অসি অপনবশিং ওইনা লৌরোইদবনি। মগুন লৈহন্নবা য়েংশিনবা অমসুং মালেম থাক্কী মগুন লৈবা পোৎথোকশিং পুথোক্নবা ভারতনা থবক পায়খৎপা হৌনবগী মতম চপ চারবনি। লৈবাক অসিদা মগুন লৈহন্নবা থবক হেক পায়খৎপা হৌবদা, ঐখোয়না ভারতকী তুংগী ফিবম অহোংবা পুরক্কনি অমসুং মসি ঐখোয়না পায়খৎকদবা থবক্নি। মগুন লৈহনবা শেন য়াম্না চঙবা নত্তে। মসিনা পোৎ পুথোকপদা চঙবা শেন হন্থহনগনি। মগুন লৈহনবনা কম্পেনি অমদা চৎনবী অমা শেমগৎলি: হেন্না মতিক চাবা, হেন্না ফবা পোৎথোক পুথোকপা অমসুং চুনবা মমলদা পুথোকপা অসিনি। পোৎ লৈরিবশিংনা হরাওগদবা, লৈবাক অসিদা মগুন লৈবা পোৎ শাবগী চৎনবগী অমা শেমগৎপা ঐখোয়না দরকার ওই। মদু পাংথোক্লবা মতমদতা ঐখোয় মালেমগী মনুং চনবা ঙমগনি।

শ্বামি বিবেকানন্দগী ৱারোল “ করিগুম্বা পুক্নিংনা কন্না খৌরাংলবদি, খুদিংমক পাংথোকপা ঙমগনি-চীংজাউশিং এতোম ওইনা থুগাইবা ঙমগনি” হায়বা অসি পল্লদুনা মিনিস্তরনা হায়খি মেনুফেকচরিংগী হৌজিক ওইরিবা ফিবমশিংগা চুশিন্নবা ঙম্নবা শিন্মীশিং রি-স্কিল্লিং অমসুং রে-ত্রেনিং পাংথোক্নবা ওতো ইন্দস্ত্রিনা হোৎনরিবা অসিদা মহাক অপেনবা পোকই।

মিনিস্তরনা হায়খি  ওতো ইন্দস্ত্রিনা হৌখিবা চহি কয়া অৱাবা কয়া থেংদুনা লাক্লে অমসুং ফিবম হেন্না ফগৎলক্লি। হৌখিবা চহি কয়া অসিদা ঐখোয়গী ওতো ইন্দস্ত্রিনা খুদোংচাদবশিং থেংনদুনা লাক্লি অমসুং মখোয়না পান্দম ফংনবা কন্না হোৎনবদগী হেন্না ফিবম ফগৎলকখি। তশেংনা ইন্দস্ত্রি অসি ঐখোয়গী চাউথোকচফমনি। কোবিদকী অৱাবা মতুংদা হেন্না ফিবম ফগৎলক্নবা অমুক হন্না মতেং পাংগনি। কোবিদ-১৯ থেংন্নবা মখোয়না মতেং পাংবগীদমক গারি শাবা কম্পেনিশিং ঐনা থাগৎলি।

মিনিস্তরনা হায়খি ভারত রেলৱেজনা মসিগী ফ্রেদ চার্জশিং হন্থহন্দুনা ওতো ইন্দস্ত্রি মতেং পাংগনি। শেন থাদবা মীওইশিংনা শেন থাদনিংগদবা মওংশিং পুথোক্নবা গারি পুথোকলিবশিংনা অনৌবা শেন থাদবগী পাম্বৈশিং থিদোক্কদবনি। মরুওইনা মপান্দা গারি য়োল্লিবশিং মতেং পাংনবা সরকার অসিনা অনৌবা ক্রেদিৎ গরেন্তি স্কিমশিং পায়খৎলগনি।

*****

(Release ID: 1651514)