জল শক্তি মন্ত্রালয়
২০২৩ ফাওবদা অরুনাচল প্রদেসকী খুঙ্গং পুম্নমক তোতি ঈশিং ফংহল্লগনি
লেদুম ৱাতর সপ্লাই প্রোজেকনা ঈশিং পীনবা অমুক হন্না শেমজিন্নবা লৈকাইগী মীয়াম থোরকখি
Posted On:
22 AUG 2020 4:46PM by PIB Imphal
হৌজিক নোংজু থা অসিদা অরুনাচল প্রদেসতা অমুক হন্না অকনবা নোং চুরে। ইচাউ, নোং কন্না চুবা অমসুং লৈবাক নিংখাইবদগী ঈশিং পীনবা লৈরিবা খুদোংচাবশিং অমাং-অতা থোক্লে। খঙহৌদনা নোং চুরকপদগী অরুনাচল প্রদেসকী ইস্ত সিয়াং জিলাগী বিলাত সর্কল, ওয়ান-সিল্লে সর্কল অমসুং রুকসিন হেদক্বাতরগী খুঙ্গং ১৯গী অপুনবা মীশিং ২১,২৮৭দা অফবা থক্নবা ঈশিং ফংহল্লিবা লেদুম মল্তি ভিলেজ ৱাতর সপ্লাই প্রোজেক শাথিনা অমাং-অতা থোকখ্রে। ঈশিং চিংখৎনবগী মফম অসি সমুদ্র ইমাইদগী ফিত ১৫০০ ৱাংবা মফমদা লৈ অমসুং গারি চঙবা য়াবা লম্বীদগী কিলোমিতর ৭ থাপ্না লৈবা মরম্না খুদোংচাবা কয়া মায়োক্নখি। তুরেল কয়া লান্দুনা ঈশিং পুরিবা মরুওইবা পাইপ লাইন (দাইমেতর ২৫০ এম.এম) অসিসু অমাং-অতা থোকখি।
হৈশিংবা শিন্মীশিং অমসুং অতৈ শিন্মীশিং নেক্নবা অরুনাচল প্রদেসনা অসাম অমসুং অতোপ্পা রাজ্যশিংগী মখা পোল্লি। কোবিদ-১৯ লাইচৎনা মরম ওইদুনা অথিংবশিং লৈবদগী থবক শুনবা শিন্মীশিং ফংবদা অৱাবা ওইরি। য়াম্না চাউনা অমাং-অতা থোকখিবদগী, ঈশিং পীনবা থবকশিং অমুক হেন্না শেমজিনবদা চয়োল কয়াগী মতম লৌগনি, অদুবু অমুক হন্না শেমজিনবগী থবকশিং অসিদা বিলাত সর্কলগী নহারোল ৭০না পব্লিক হেল্থ ইঞ্জিনিয়ারিং দিপার্তমেন্তগী মতেং পাংখি। তুরেল খোঙনুংদা নৎত্রগা লৈখোম মরক্তা ফুমজিনখ্রবা দি.আই পাইপশিং লৌখৎনবা শামু কয়া শীজিন্নখি। অমুক হন্না শেমজিনবগী থবকশিং অসিদা মীয়াম শরুক য়ারকপদগী খুঙ্গংশিংদা অফবা থক্নবা ঈশিং নুমিৎ ৩গী মনুংদা ফংহনবা ঙম্লে।
দিপার্তমেন্তগী ওফিসিএলশিংগী থবকশিং অমসুং লৈকাইগী মীয়াম্না অমুক হন্না শেমজিনবগী থবকশিং শরুক য়াবা অসিনা খুঙ্গংগী লমদা ঈশিং ফংহনবগী থবকশিং পাংথোকপা অমসুং শেমজিন-শাজিনবগী থবকশিংদা লৈকাইগী মীয়াম্না অচৌবা থৌদাং অমা লৌবা য়াই হায়বা উৎলে। জল জিবন মিসনগী পান্দমদি লৈকাইগী মীয়াম শরুক য়াহনবনি।
২০১৯গী অগস্ত ১৫দা প্রধান মন্ত্রীনা লাউথোকখিবা জল জিবন মিসনগী পান্দমদি রাজ্যশিংগা লোয়ন্না থবক তৌমিন্নদুনা ২০২৪ ফাওবগী মনুংদা লৈবাক অসিগী খুঙ্গংশিংগী য়ুমথোং খুদিংমক তোতি ঈশিং ফংহনবনি। মিসন অসিগী পান্দমদি খুঙ্গংগী য়ুম খুদিংমক চাংনাইনা নোংমদা মীওই অমদা ঈশিং লিতর ৫৫ ফংহনবনি অমসুং তুংকোইনা খুঙ্গংশিংগী মীয়ামগী পু্ন্সি মহিং ফগৎহনবনি।
অরুনাচল প্রদেসতা ঈশিং ফংবদগী অৱাবা লৈতে,অদুবু থবক পায়খৎপদা থেংনরিবা খুদোংচাদবদি চীংগী লম ওইবা, মী লন্না তাবা অমসুং নোং-চিংগী ফিবম ফত্তবা অসিনি। অদুবু রাজ্য অসিগী খুঙ্গং খুদিংমক তোতি ঈশিং ফংহন্নবা রাজ্য সরকারনা অকনবা থবকশিং পায়খৎলে। অফবা থক্নবা ঈশিং খুঙ্গংগী য়ুমশিং ফংহন্নবা অফবা খুদোংচাবা অমা জল জিবন মিসন্না পীরে, মসিনা নুপীশিং অমসুং নুপীমচাশিংগী পোৎলুম হন্থরগনি।
মিসন অসিগী মখাদা ২০২৩ ফাওবগী মনুংদা রাজ্য অসিগী য়ুমথোং চাদা ১০০ তোতি ঈশিং ফংহন্নবা অরুনাচল প্রদেস সরকারনা ৱারেপ লৌরে।
![](https://static.pib.gov.in/WriteReadData/userfiles/image/image001JBDA.jpg)
![](https://static.pib.gov.in/WriteReadData/userfiles/image/image002K1HA.jpg)
![](https://static.pib.gov.in/WriteReadData/userfiles/image/image003Z4US.jpg)
![](https://static.pib.gov.in/WriteReadData/userfiles/image/image004X63Q.jpg)
*****
(Release ID: 1647909)
Visitor Counter : 111