প্রধান মন্ত্রী শ্বনিধি স্কিম হন্না য়েংশিন্নবা ঙসি রাজ্য সরকারশিংগী হাওসিং অমসুং অর্বান দিবলপমেন্ত মিনিস্তরশিং, চীফ সেক্রতরিশিং, স্তেৎ প্রিন্সিপাল সেক্রেতরিশিং, দি.জি.পিশিং, মিউনিসিপাল কমিসন্নরশিং, কল্লেক্তরশিং, দিস্ত্রিক মেজিস্ত্রেতশিং অমসুং অতোপ্পা মরী লৈনবশিংগা লোয়ননা পাংথোকখিবা মীফমদা লম্বী মতাইদা পোৎ য়োল্লিবশিংগী মতাংদা মখোয়গী মখা থাবা ওফিসারশিং ৱাখল তাহন্নবা হাওসিং অমসুং অর্বান এফেয়ার্সকী রাজ্য মন্ত্রী(ইন-চার্জ) হারদিপ সিংহ পুরিনা মখোয়দা তকশিনখি।মহাক্না হায়খি নোংমগী হিংনবদা লানফমদা লান্থেংনদুনা লাক্লবা লম্বী মতাইদা পোৎ য়োল্লবশিংগী পোৎ-চৈশিং চৈখাইবা নৎত্রগা শেন লৌবা নৎত্রগা মখল অমগী মীওৎ-মীনৈ চৎথবা অসি য়াম্না তমথিবা থবক্নি। লম্বী মতাইদা পোৎ য়োল্লবশিং অসি হান্ননা শেন্দোয় চাবশিংগী শেন্দোয় হুন্নবা হোৎনবদা শেন্দোলনা খ্বাং য়ৌরবা মীওই ঙাক্তনি। সরকারগী মাইকৈদগী মখোয়দা মখল অমতগী অৱাবা পীবা অসি অফবা নত্তে। ভর্চুএল ওইনা পাংথোকখিবা মীফম অদুদা হাওসিং অমসুং অর্বান দিবলপমেন্ত মিনিস্ত্রিগী সেক্রেতরি দুর্গা সনকার মিশ্রা, হোম সেক্রেতরি অজয় বাল্লা অমসুং লৈবাক শীনবা থুংবদগী সেনিয়র ওফিসারশিং শরুক য়াখি।

প্রধান মন্ত্রী শ্বনিধি স্কিম হৌদোক্তুনা, অহানবা ওইনা লম্বী মতাইদা পোৎ য়োল্লবশিং লেপ্পা লৈতনা শেন তোনবদগী মনিংতম্নবা অকনবা থবক অমা পায়খৎলে। মখোয়না সরকারগী তোঙান-তোঙানবা য়াইফ-থৌরাংশিংগী খুদোংচাবশিং ফংবা ঙম্নবা প্রধান মন্ত্রী শ্বনিধি স্কিমগী কান্নবা ফংগদবা মীওইশিংগী খুন্নাই অমসুং শেন-থুমগী ফিবম খঙদোক্নবা থৌরাং অমা মিনিস্ত্রিনা পায়খৎলে হায়না মহাক্না মখা তাখি।

মিনিস্তরনা হায়খি হান্নগী মতমশিংদসু লম্বী মতাইদা পোৎ য়োল্লবশিং ৱানা হিংলি অমসুং কোবিদ-১৯ লাইচৎ মনুং অসিদনা হেন্না মখোয় ৱারে। মরম চাদনা অৱাবা পীবা নৎত্রগা তান্থোকপদগী কন্নবা লম্বী মতাইদা পোৎ য়োল্লবশিং ঙাকপী-শেনবীবা দরকার ওই। মসিগী পান্দম অসি ফংনবা মরী লৈনবা ওথোরিতিশিংনা পুকচেল শেংনা থবক তৌগদবনি। লম্বী মতাইদা পোৎ য়োল্লিবশিংগী হিংনবগী লম্বী পীবদা পুলিস অমসুং মিউনিসিপালিতিশিংগী য়াম্না মরুওই। সহরগী অপুনবা মীশিংগী চাদা ২ লম্বী মতাইদা পোৎ য়োল্লবশিংনি অমসুং শেন-থুমগী ফিবম ফগৎহনবদা মখোয়না অচৌবা মতেং পাংলি।

মিনিস্তরনা হায়খি হৌজিক ফাওবদা লোন এপ্লিকেসন ৫,৭০,০০০ ফংলে ,মসিগী মনুংদা লোন ১,৩৫,০০০ সেঙ্কসন তৌখ্রে অমসুং লোন ৩৭,০০০ য়েন্থোকখ্রে। স্কিম অসি লম্বী মতাইদা পোৎ য়োল্লবশিংদা লোন পীনবা খক ওইনা উবা য়ারোই, মসি মখোয়গী খুন্নাইগী অমসুং শেন-থুমগী ফিবম ফগৎহন্নবা অপুনবা থৌরাং অমনি।

অর্বান স্ত্রিত ভেন্দরস(এস য়ু এস ভি)গী খুৎথাংদা অর্বান লোকেল বোদিশিংনা দরকার ওইবা মচাক-মথুমশিং শেমগৎনবা হাওসিং অমসুং অর্বান এফেয়ার্স মিনিস্ত্রিনা দিনদয়াল অন্তয়োদয়া য়োজনা-নেসনেল অর্বান লাইফলিহুদ মিসন পায়খৎলে। লম্বী মতাইদা পোৎ য়োল্লবশিংগী হিংনবা লম্বী কন্নবা অমসুং সহরগী লম্বীদা পোৎ য়োন্নবগী আইন শেম্নবগী মতাংদা ২০১৪গী মে থাদগী স্ত্রিদ ভেন্দরস এক্স, ২০১৪ চৎনবা হৌরে।

মিনিস্তরনা হায়খি, কোবিদ-১৯ লাইচৎ অসিনা মরম ওইদুনা লম্বী মতাইদা পোৎ য়োল্লবশিংবা থেংনরিবা অৱাবশিং কোকহন্নবা ২০২০গী জুন ১দা প্রধান মন্ত্রী শ্বনিধি স্কিম হৌদোক্লে, মসিগী মখাদা চহি অমগী ওইনা লুপা ১০,০০০ ফাওবা গরেন্তি য়াওদনা ভেন্দরশিংদা লোন পীগনি। স্কিম অসিনা দিজিতেল পেমেন্ত প্লেতফোর্মশিংগী খুৎথাংদা লম্বী মতাইদা পোৎ য়োল্লবশিংগী ক্রেদিৎ প্রোফাইল অমা শেমগৎপদা মতেং পাংগনি। ‘নানো-ওন্ত্রেপ্রেনিউয়রশিং’ অসিগী থোংজিলদা বেঙ্কশিং লাক্নবা স্কিম অসিনা থবক পায়খৎলে।

মীফম অদুদা মিনিস্তরনা হায়খি, লম্বী মতাইদা পোৎ য়োল্লবশিংদা শেন থাদবা পুক্নিং থৌগৎনবা ক্রেদিৎ গরেন্তি ফন্দ ত্রস্ত ফোর মাইক্রো এন্দ স্মোল ইন্তরপ্রাইজেস(সি জি তি এম এস ই)গী খুৎথাংদা শেন থাদগদৌরিবা ইন্সতিতুৎশিং গরেন্তি পীরে। প্রধান মন্ত্রী শ্বনিধি পোর্তেল নৎত্রগা মোবাইল এপ্পকী খুৎথাংদা লোন এপ্লিকেসন পীশিল্লকপা য়াগনি।

*******