ঙসি ভিদিও কনফরেন্সকী খুৎথাংদা রোদ ত্রান্সপোর্ত, হাইৱেজ অমসুং এম.এস.এম.ইগী য়ুনিয়ন মিনিস্তর নিতিন গাদকরিনা মনিপুরদা হাইৱেজ প্রোজেক্ত ১৩ উরেপ-উয়ুং তমখ্রে অমসুং রোদ সেপ্তি প্রোজেক্ত অমা শঙ্গাখ্রে। চীফ মিনিস্তর এন বিরেন্না প্রেসাইত তৌখিবা ভর্চুএল ওইনা পাংথোকপা থৌরম অদুদা দোনরগী রাজ্য মন্ত্রী(মনিংতম্বা) দোক্তর জিতেন্দ্র সিংহ, রোদ ত্রান্সপোর্ত অমসুং হাইৱেজগী রাজ্য মন্ত্রী জেনেরেল(পোথারবা)ভি.কে সিংহ, মনিপুরগী মিনিস্তরশিং, এম.পিশিং, এম.এল.এশিং অমসুং কেন্দ্র অমসুং রাজ্যগী সেনিয়র ওফিসারশিং শরুক য়াখি।

প্রোজেক্তশিং অসিগী অপুনবা অশাংবনা কিলোমিতর ৩১৬ন অমসুং লুপা করোর ৩০০০ রোম চঙগনি। লম্বীশিং অসিনা মনিপুরগী চাউখৎপগী লম্বী শেম্লগনি অমসুং অৱাং-নোংপোক রাজ্যশিংগী শেন-থুমগী ফিবম ফগৎহনগনি।

থৌরম অদুদা নিতিন গাদকরিনা হায়খি, প্রধান মন্ত্রীনা অৱাং-নোংপোক চাউখৎহন্নবা পাম্লিবা অসিগা লোয়ননা, লমদম অসিদা ঐখোয়না প্রোজেক্ত কয়া পায়খৎলে। তুংদা মনিপুরদা অনৌবা লম্বীশিংগী প্রোজেক্ত কয়া পায়খৎকনি। ইম্ফালদা পায়খৎকদবা মথক্তা লৈগদবা লম্বী অমগী দি.পি.আর মিনিস্তরনা লাউথোকখি অমসুং প্রোজেক্ত অসি থা ২-৩গী মনুংদা থবক হৌরগনি হায়রি।

লম্বীগী প্রোজেক্তশিং অথুবদা লোইশিন্নবা লম লৌশিনবগী থবক অথুবদা লোইশিন্নবা গাদকরিনা চীফ মিনিস্তরদা খঙহনখি। রাজ্য অসিদগী য়ুতিলাইজেসন সর্তিফিকেদ হেক ফংবগা লুপা করোর ২৫০রোমগী অহেনবা সেন্ত্রেল রোদ ফন্দ পীগনি হায়না মহাক্না থাজবা পীখি।

মিনিস্তরনা হায়খি, ব্রাহ্মাপুত্র অমসুং বারাক তুরেলশিং খোঙনুং তেংবা লোইরে অমসুং ঈশিং লম্বীদা পোৎ পুবা অমসুং মী চৎথোক-চৎশিনবা তৌবা য়ারগনি। মসিগী তুরেলগী লম্বী অসিগা ইম্ফালগা শম্নরবদি রাজ্য অসিগী শেন-থুমগী ফিবম য়াম্না ফগৎকনি। লমদম অসিদা মীয়ামগী চৎথোক-চৎশিনগী ওইনা মমল হোংবা অমসুং অকোয়বগী ফিবম কাইহন্দবা থাউ শীজিন্নগদবনি।

মহাক্না হায়খি, মনিপুরদা থবক ফংহনবা অমসুং শেন-থুম ফগৎহনবদা এম.এস.এম সেক্তরনা মরুওইবা থৌদাং লৌরি। মীওই মশিং য়াম্না থবক ফংহল্লিবা হেন্দিক্রাফ,হেন্দলুম অমসুং খোইহি, ৱাগী পোৎথোকশিং অসিগী কান্নবশিং লৌনবা মহাক্না চীফ মিনিস্তরদা তকশিনখি।

চীফ মিনিস্তর বিরেন সিংহনা হায়খি, মনিপুর অসি নোং কন্না চুবা চীংনা কোইশিনবা রাজ্য অমা ওইবনা অফবা লম্বী দরকার ওই। মিনিস্ত্রিনা ইম্ফালদা কিলোমিতর ২৫ শাংবা মথক্তা চৎগদবা লম্বী শানবা মিনিস্ত্রিনা ৱারেপ লৌবদা মহাক্না থাগৎখি। মীয়াম্না পাম্না লমকোয়ফম অমা ওইবনা ইম্ফাল-লোক্তাক হাইৱেজ অসি লেন মরিদা শেমগৎপগী তঙাইফদবা অদু চীফ মিনিস্তরনা পনখি।

দোক্তর জিতেন্দ্র সিংহনা হায়খি, অৱাং-নোংপোক লমদম চাউখৎহনবা অসি সরকার অসিনা মখা তানা মরুওইনা লৌগনি অমসুং লৈবাক অসিদা মচাক-মথুমশিং শেমগৎনবা লুপা করোর লাখ ১০০ লাল কিলাদগী প্রধান মন্ত্রীনা লাউথোকখ্রে।

রাজ্য মন্ত্রী জেনেরেল(পোথারবা) ভি.কে সিংহনা হায়খি এক্ত ইস্ত পোলিসিগী মখাদা অৱাং-নোংপোক চাউখৎহন্নবা সরকারনা অকনবা মিৎয়েং চঙলি। ম্যান্মারগা য়ুম্লোন্নবা মরম্না মনিপুরনা মরুওইবা থৌদাং লৌরি। মনিপুরদগী হৌখিবা ত্রাইলেতেরেল হাইৱেজনা ভারত, ম্যন্মার অমসুং থাইলেন্দ শম্নরে। লৈবাক অহুম অসিগী মরক্ত অপনবা লৈতনা চৎথোক-চৎশিন তৌনবা থবক পায়খৎলে। মথং চহিগী মার্চ ফাওবগী মনুংদা এন.ঐচ ৩৭দা বারাক অমসুং মকু তুরেলশিংগী মথক্তা শারিবা থোঙশিং লোইশিল্লগনি।

মসিদা য়াওরিবা প্রোজেক্তশিং অসিদিঃ

***