ভারতনা নিংখা তমখিবগী ৭৪শুবা নুমিৎ পালন তৌনবা শেম শারবা অসিদা, তুরিজম মন্ত্রালয়গী দেখো অপনা দেশ ৱেবিনার সিরিজনা “লেসর নোন্ন স্তোরিজ ওফ ইন্দিয়া’স স্ত্রগল অগেন্স দি ব্রিতিশ” হায়না মিংথোনবা ৱেবিনার ওগস্ত ১২, ২০২০দা খুদোল তমখ্রে।

দেখো অপনা দেশ ৱেবিনারশিংগী ৪৬শুবা সিরিজ, “লেসর নোন্ন স্তোরিজ ওফ ইন্দিয়া’স স্ত্রগল অগেন্স দি ব্রিতিশ” অসি মিস অকিলা রামন অমসুং মিস নয়ন্তরা নায়রনা লান্থোকখ্রে। অঙাংশিং অমসুং অহলশিংগী ওইবা ৱারীদা য়ুম্ফম ওইবা খোঙনা কোইয়না চৎতুনা য়েংবা, ওদিও তুর, লোকেল এক্সপিরিয়েন্সশিং লৈনবা অমসুং লর্নিং প্রোগ্রামশিং দিজাইন তৌবা ওর্গনাইজেসন অমা ওইরিবা স্তোরীত্রেলস কৌবা কম্পনী অসিগী মখোয় অনিনা মীহুৎ ওইখি। মখোয়গী ৱারীশিং অসিনা ভারতকী ইতিহাস, নাৎ অমসুং হিংবগী মওংশিং উৎলি। ৱেবিনার অসিদা মখোয়গী থৌরম লান্থোক্লিবশিংনা ভারতনা ব্রিরিশকী মায়োক্তা হৌখিবা নিংতম লানগী মীয়াম্না খঙদবা ৱারীশিং খঙহল্লি। দেখো অপনা দেশ ৱেবিনার সিরিজ অসিনা এক ভারত শ্রেশথা ভারতকী মখাদা ভারতকী জাতি মখল কয়ানা খুন্দরিবা অসি উৎনবা হোৎনরি।                                           

১) সিবাগঙ্গা- ভেলু নচিয়ার

ৱারী অসি সিবাগঙ্গাদা মুথু ভদুগনাথা পেরিয়া ওদয়া তেভরনা পানবা মতমদা থোকখি। মহাক্না রামান্থাপুরমগী রাজকুমরী ভেলু নচিয়ারগা পুন্সি লৈপুন শেমখি। নিংথৌ মুথুনা মহাক্কা য়ুমলোন্নবা লৈবাক্কী শক্তি লৈরবা নিংথৌ আর্কোৎকা মুক্নখি। মতম অসিদা খা ভারত্তা ব্রিতিশকী শক্তি হেনগৎলকখি অমসুং আর্কোৎকী নৱাবকা ব্রিতিশকা অফবা মরী অমা লৈনখি। ১৭৭২দা, ব্রিতিশনা সিবাগঙ্গাদা লান্দারক্তুনা নৱাব অসিবু খুদুম চন্নবা হোৎনখি। মুথুনা মখোয়গা য়ানবা পুরক্নবা মীহুৎ থাখি। ব্রিতিশনা মখোয়গা ৱারী শাবদা অয়াবা পীরক্লে খন্দুনা সিবাগঙ্গাদা লান্মীশিংনা  লায়থোকখি। খুদোংচাবা অসি লৌদুনা ব্রিতিশ লান্মীনা খুদুম চনশিনখি অমসুং নিংথৌ মুথু য়াওনা পুম্নমক হাৎখি।

ৱারী অসিগী মরু ওইবা শরুক্তি ভেলু নচিয়ারনা থৌনা ফনা লান শোক্নখিবা অদুনি। মহাক্না মহাক্কী মপুংরোইবা হাৎখিবগী লমন শীংনিংখি। মথৌনা লৈবা লান্মী মরুদুগী মচিল-মনাওনা মশিং য়াম্লবা মরৈবাকনিংবশিংগা লোয়ননা মহাকপু মতেং পাংখি। ভেলু নচিয়ারবু মহাক্কী ঙাক শেন্নবা থম্লিবা লান্মীশিংগী লুচিংবনা ঙাকশেনখি। ব্রিতিশনা মহাকপু ফাখি অমদি ভেলু নচিয়ারগী মরমদা হায়দোরক্নবা ওৎনৈখি।

উদাইয়লনা হনবা লৈখিদে অমসুং থৱায় থাখি। থৌনা লৈরবা ভেলুনা নুপীশিংগী ওইবা বত্তালিয়ন অমা শেমখি অমসুং উদাইয়ল রেজিমেন্ত হায়না থোনখি। মথৌনা লৈবা পুকচেল শেংবা কুয়িলিনা মসিবু লুচিংখি। ভেলু নচিয়ারনা মাইসুরগী নিংথৌ হায়দর অলিগা উন্নদুনা মহাক্কী মতেং পাংনবা হায়জখি। হায়দর অলিনা মহাক্কী লান্মী ৫,০০০ থাদুনা ভেলু নচিয়ারনা সিবাগঙ্গা ফংনবা হোৎনবদা মতেং পাংখি।

অদুবু মতম অদুদা সিবাগঙ্গা অসি ব্রিতিশতা খুশিন্নদুনা মফম অসিদা লানবন খাখিরম্মি। কুয়িলিনা নু্পী গুরিলাশিং থাজিনখি মখোয়না ব্রিতিশশিংবু ফাজিন্দুনা থম্লিঙৈদা , মহাক্না খুলাই থম্ফমদা চংখি অমসুং পুম্নমক মৈনা তুম্না চাকহনখি। থবক অসি পাঙথোকপদা মহাক্না থৱায় থাখি।

ভেলু নচিয়ারনা সিবাগঙ্গাগী মহারানী ওইনা চহি তরা পানখি। ১৯৪৭দা নিংথৌ পানবা লৈবাকশিং পুনশিনখিবা অদু ফাওবদা সিবাগঙ্গা অসি মহাক্কী ইমুং মনুংগী মখাদা লৈখি। ভারত সরকারনা ২০০৮তা মহাকপু ইকাই খুম্নবা উৎপা ওইনা স্তাম্প অমা শেমখি।

২) মুম্বাই- বেঞ্জামিন হোর্নিমন

হোর্নিমন সর্কল গার্দেন্স অসি মুম্বাইগী চিনখ্রবা ফোর্ত জিলাদা লৈবা সাউদ মুম্বাইগী খ্বাইদগী চাউবা লৈকোন অমনি। মসিগী মমিং অসি দি বোম্বে ক্রোনিকলস কৌবা পাউচে অমগী ব্রিতিশ ইদিতর বেঞ্জামিন হোর্নিমনবু ইকাই খুম্নবা উৎপা ওইনা ওনখিবনি।

দি বোম্বে ক্রোনিকলস অসি সর ফেরোজশাহ মেহেতানা হৌদোকখি। মসিগী ইদিতর ওইবনা হোর্নিমন্না কোলোনিএলিজমগী মায়োক্তা ৱা ঙাংখি। মহাক্না বোম্বে ক্রোনিকল শীজিন্নদুনা ইন্দিয়ন নেস্নেলিস্তকী মরমশিংদা ৱা ঙাংখি।

মতম অসিদা ১৯১৯দা জালিয়নৱালা বাঘ মাসক অমরিৎসরদা থোকখি। ব্রিতিশনা থৌদোক অসিগী মতুংদা ইরাং হৌরক্কনি খঙখি। মখোয়না খুদক্তা প্রেসশিং থিংজিনখি। হোর্নিমন্না অথিংবা অসিগী মায়োক্তা লৈখি। মহাক্না পঞ্জাবতগী মাসক অসিগী হকথেংননা থেংনহৌবদগী পাউ অদু লৌদুনা মদু ফোঙখি। মহাক্না থৌদোক অসিগী পাউ মথং মথং ফোঙখি অমদি মসিনা ব্রিতিশবু শাউহনখি। মখোয়না হোর্নিমনবু ইংলেন্দদা থাদোকখি। হোর্নিমন্না মহাক্কা লোয়ননা ব্রিতিশকী তমথিরবা মওং মতৌশিংগী রিপোর্তশিং অমসুং ফোতোশিং পুখি অমসুং ৱারীশিং অসি ব্রিতিশ মীয়ামদা ফোঙদোক্তুনা খঙহনখি। পুম্নমক অসিনা কোলোনিএল লৈঙাক্কী তমথিরবা অশেংবশিং অদু মীমাংদা পুথোকখি। জালিয়নৱালা বাঘ মাসক অসি পার্লিয়ামেন্তদা পুথোকখি অমসুং তোঙান তোঙানবা ব্রিতিশকী রাজনিতিৱালশিংনা য়ানিংদবা ফোঙদোকখি। হোর্নিমন্না ভারত্তা ব্রিতিশ লৈঙাকনা চত্থরিবা ওৎনৈবশিং অসিগী মতাংদা য়ানিংদবা ফোঙদোক্তুনা ইংলেন্দগী ইরকপা লেপখিদে। ১৯২৬তা মহাক্কী দিপোর্তেসন ওর্দর অদু অশোইবা অমা পুথোক্তুনা ভারত্তা অমুক হল্লক্তুনা মহাক্কী থবক মখা চত্থখি।

ঙসিসু হোর্নিমন সর্কলদা গুজরাতিদা নম্বা পাউচে, বোম্বে সমাচারগী ওফিস ওইরম্বা অঙাংবা মচুগী দলান অমা উবা ফংগনি। এসিয়া পুম্বগী খ্বাইদগী লিরবা হৌজিক ফাওবা চল্লাইরিবা পাউচে অমনি। মসি ১৮২২দা হৌখি অমসুং হৌজিক চহি ২০০গী ময়া শুরক্লে, ঙসি মসিবু বোম্বে সমাচার হায়না খঙনরি। হায়রিবা দলান অসি বোম্বে ক্রোনিকল হৌদোকখিবা মফম অদুনি অমসুং মফম অসিদা হোর্নিমন্না থবক শুখি।

ভারতকী নিংখা তম্বা ফংলবা মতুংদা হোর্দিমন ১৯৪৮তা শীখি।  মরম অসিনা ভারত্তা ফ্রী প্রেসকী শক্তি তাক্লম্বা ইংলিশমেন অসিবু ইকাই খুম্নবা উৎতুনা - বোম্বে ক্রোনিকলনা মথৌ তৌখিবা সর্কল অসি হোর্নিমন সর্কল হায়না মমিং ওনখি।

৩) ভারতপু কন্ত্রোল তৌনবা লোয়শঙশিং

ব্রিতিশ ইস্ত ইন্দিয়া কম্পনী অসি ইন্দিয়ন সবকন্তিনেন্তগী শরুকশিংনা শাসন তৌরিবা লনাইগী কম্পনী অমনি। ইস্ত ইন্দিয়া কম্পনী অসি লন্দনগী বোর্দ ওফ দিরেক্তরশিংদা রিপোর্ত তৌরিবা প্রাইবেৎ লিমিতেদ কম্পনী অমনি। তপ্না-তপ্না মখোয়না ভারত্তা লৈবাক লৌশিনবা হেনগৎলক্তুনা, মখোয়না ভারত্তা শাসন তৌবা হেন্না খুদোংচাদবা থেংনখি। মরম অসিনা ভারতপু য়েংশিন্নবা অমদি শক্তি পায়নবা জুদিসিয়রী, রেলৱেজশিং, আর্মী অমসুং ইংলিশ এজুকেসন য়াওনবা মখোয়না ব্রিতিশকী লোয়শঙ খরা লিংখৎখি।

A) জুদিসিয়রী-

ব্রতিশনা ভারতকী লেগেল সিস্তেম অসি শীজিন্নবদা য়াম্না ৱারমখি। মরম অসিনা মখোয়না মখোয়গী মশাগী আইন অদু ভারত্তা পুরকখি অমসুং কোর্ত অহুম লিংখৎখি, মদ্রাস, বোম্বে অমসুং কলকত্তা প্রসিদেন্সীশিংদা অমমম লৈহনখি। কোর্তশিং অসিনা প্রসিদেন্সীশিং অসিগী সুপ্রিম কোর্ত ওইনা মথৌ তৌখি। সহর অহুম অসিদা ফজরবা কোর্তকী বল্দিংশিং ঙসিসু উবা ফংলি। 

কোর্তশিং অসিনা মীপুম খুদিংমক আইনগী মীৎয়েংদা চপ মান্নৈ হায়না লাউথোকখি। অদুবু ভারতকী জজ অমনা য়ুরোপীয়ন অমগী মহুত্তা ৱায়েল পীবা য়ারমখিদে। ভারতকী গভর্নর জেনরেল লোর্দ রিপোন্না ইলবর্ত বিলগা লোয়ননা মসি শেমদোক্নবা হোৎনখি, অদুবু মসি মায় পাকপদি ঙমখিদে।

ইলবর্ত বিলনা ভারত মচাশিংনা মীৎ পাংহন্দুনা মখোয়দা তৌরিবা অরানবশিং অদু পুথোকখি। মসিনা ভারতকী নিংতম লান্দা অচৌবা মতেং অমা ওইখি।

b) রেলৱেজ-

ভারত পুম্বগী ওইনা চেনাইদা লৈরিবা রোয়াপুরম স্তেসন অসিনা খ্বাইদগী লিরবা রেলৱে স্তেসন অমা ওইরি। করিগীদমক ব্রিতিশনা রেলৱেজ সিস্তেম অসি ভারত্তা খুদোল তমখি? মরমদি মখোয়না মফম অসিদা ললোন ইতিক তৌনা অমসুং মখোয়গী পোৎলম-চৈরমশিং থুংনা অমদি মপুং ফানা হোন্দোকপা মথৌ তারমখি। মরম অমনা মখোয়গী লান্মীবু ঙাকশেলগীদমক হোন্দোক হোঞ্জিন তৌনবনি। ১৮৫০কী মতমদা ব্রিতিশনা মখোয়গী রেল লম্বীশিং শেমদুনা মখোয়গী অচৌবা হিথংফমশিংগা মনুং হঞ্জিনবা মফমশিংগা ফাওনহনখি। অদুবু ইন্দিয়ন রেলৱেজ সিস্তেম অসিনা থোকহন্নিংদবা কয়া থোকহল্লকখি।

মতম অদুগী ইন্দিয়ন ত্রেনশিং অসিদা ব্রিতিশশিংগী তোঙানবা কেরিয়েস খাক্তুনা থমখি। অতোপ্পা কেরিয়েজশিং অসিনা ভারতকী প্রজাশিংগী ওইখি – ক্লাস অমসুং কাস্তকী খেৎনবা লৈহন্দনা সোসিএল ক্লাস অমসুং কাস্ত খুদিংমক কম্পার্তমেন্ত অমদা পুন্না তোংহনখি। মসি পুম্নমক অসি ভারত মচাশিংনা য়াবা ঙমখিদে। মীপুম খুদিংমক চপ মান্নৈ হায়বা ৱাখল্লোন অসি অয়াম্বা ভারত মচাশিংদা অনৌবা অমা ওইখি। অদুবু ত্রেন অসিদা তোংদুনা চৎপনা মখোয়দা মসি তম্বীখি। ভারত মচাশিংনা মখোয় মশা অসি ভারত মচা অমনি হায়না খনবা হৌরকখিবা অসি রেলৱেজতগীনি।

য়াম্না নোক্নিংলিবদি, আইন অসিগী মখাদা চপ মন্নবগী ৱাখল্লোন অসি রেলৱেজ কেরিয়েজকী অনিশুবা ক্লাসতগী হৌরক্তুনা জাতি পুম্বদা য়ৌখি। অঙকপা ওইনা, ব্রিতিশশিংনা মখোয়না ভারত খুদুম চন্নবা শিনখিবা অসিনা মখোয়না মায়থিনবা মরম ওইখি।

c) আর্ম ফোর্সেস-

অদোম খঙলবরা মদ্রাস রেজিমেন্ত অসি ইন্দিয়ন আর্মীগী খ্বাইদগী লিরাবা রেজিমেন্ত অমনি হায়বা? মসি মজর স্ত্রিঞ্জর লৌরেন্সনা শেম্লমখি, মহাক্না ভারত মচাশিং খোমজিন্দুনা মখোয়বু লান্মী ওইনা শীজিন্নখি। আর্মী অসি চাউথোক্লক্তুনা ব্রিতিশকী অচৌবা ঙাকশেল ওইখি। অদুবু মফম খরদদি আর্মীশিংনা ব্রিতিশকী মকোক থোংবশিংগী মায়োক্তা চৎখি। ভেলোর মুতিনী অমসুং ১৮৫৭ রিভোল্ত ৱাখলদা লাকখি। অসুম তৌদুনা ১৮৫৭ রিভোল্ত মতুংদা ভারত অসি ব্রিতিশকী মখাদা লৈখি। শাংলবা চহি ৯০গী মতম অসিবু ব্রিতিশ রাজ হায়না ঙসি খঙনরি। আর্মীসু খুদুম চনশিনখি অদুবু মসি মসি মথৌ তৌবদি লেপখিদে। হুন্দোক্তুনা মাংহনবদা পম্মুবা খুৎলাই অমা ওইখি। অমসুং ৱারীদা ঐখোয়না তারি মদুদি ভারত মচা কোতি ২ হেনবনা ব্রিতিশকী মায়োক্তা অনিশুবা মালেমগী লাঞ্জাও শোক্নখি অমসুং থৌনা লৈনা শোক্নখি।

D) ব্রিতিশ ইন্দিয়াদা ইংলিশ এজুকেসন -

ব্রিতিশনা ভারতকুম্বা অচৌবা লৈবাক অমা লৈঙাকপদা অৱাবা থেংনরম্মি। মরম অদুনা মখোয়না ভারত মচাশিং মহৈ তমহল্লগা শিজিন্ননবা ৱারেপ লৌরম্মি। মখোয়না ইংলিশনা মেদিয়ম ওফ ইন্সত্রক্সন ওইনা শিজিন্ননবা ৱারেপ লৌখি। মখোয়না মদ্রাস, কোলকতা অমসুং বোম্বেদা য়ুনিভর্সিতীশিং লিংখৎখি - হৌজিকসু মসিশিং অসি লৈরি।

মতমগী মতুং ইন্না ইংলিশ ঙাংবা অমসুং ফজনা ঙাংবা ভারত মচাশিংগী চারোন শুরোন অনৌবা অমা লাকখি। মখোয়না ওফিসশিং, বেঙ্কশিং, আর্মি, রেলৱেজ- মফম খুদিংমক্তা সরকারগী থবকশিং পাইখি। মখোয়না ভারত মচাশিং অসি নমথবীরে হায়বা থুনা খঙলকখি। মমিং লৈরবা নিংতম লান্মীশিং অসিনা অচুম্বা ইংলিশ ঙাংবা খক্তা নত্তনা মখোয়গী মরক্তা খরদি ইংলেন্দদা ত্রেন তৌখি: গান্ধী, নেহরু, জিন্নাহ, বোস অমসুং অতোপ্পা ময়াম অমা। মরম অদুনা ব্রিতিশনা ভারত্তা লিংখৎখিবা এজুকেসন সিস্তেম অসিনা ইখং খংহৌদনা মখোয়গী মায়োক্তা লাকখি।

4) মদুরাই - মাসি স্ত্রিৎ

খাদিগী ফীরোলদা ময়াং কংনা উরিবা মহাত্মা গান্ধীগী ফোতো অসি তোপ-তোপ্পা মশক অমনি। মহাক্না ফৈজো, সাল অমসুং শেন্দল তোংলগা ইংলেন্দদা নিংথৌ জোর্জ ভি. ফাওবা উনবা চৎখি। গান্ধীনা মহাক্কী ফীরোলনা ৱারোল অমা ফোঙদোক্লি, ভারতকী শেলথুমগী ফীভমগী ওইবা ৱারোল অমা। ভারত অসি মতম পুম্বদা মহাক্কী লশিংগী ফীরোলগী মমিং চৎখি। ব্রিতিশনা মফম অসিদা লাক্লবা মতুং হনখিবদা মখোয় লোয়ননা লশিং ময়াম অমা পুখি। তপ্না তপ্না মখোয়না মফম অসিদগী শুংদ্রোক্ত্রিবা লশিং পুরগা ইংলেন্দদা ফী শারগা ফীশিং অদু ভারত্তা শেন্দোং লৈনা য়োনখি। মসিনা তাকপদি লং নাইবশিং অমসুং ফী শাবশিং ভারত্তা থবক ফংখিদে। তপ্না তপ্না মপুং ফানা চাউখৎলবা লশিংগী ইন্দস্ত্রী পুম্বা পুংমুৎ মুৎখি।

১৯২১দা তামিল নাদুগী মদুরাইদা গান্ধীনা খোংচৎ অমা চৎখি। লম্বীদা উখিবা লাইরবগী ফীভম অদু উবদা মহাক্না থমোয় শোকখি। মী ময়াম অমা য়াম্না লায়রম্মী মদুদি মখোয়গী খ্বাং ফাওবা খক্তগী ফী শেৎনবা লৈরম্মি। গান্ধীনা য়াম্না শাউনিংলম্মি। মদুদগী মহাক্না লৈবাক অসিগী খ্বাইদগী লায়রবা মীওইনা শেৎপা ফীরোল অদু শেৎনবা ৱারেপ লৌখি। মথংগী অয়ুক ১৯২১ সেপ্তেম্বর ২২দা গান্ধীনা মদুরাইগী মহাক্কী কাদগী অতেনবা ফৈজোম অমা, মখোংদা চপল অমসুং শাল অমগা লোয়ননা থোরক্লম্মি। মদুগী মতুংদগী মসিগী ফীরোল অসিনা মহাক্না নোঙ্গাদ্রি ফাওবা মহাক্কী ফেসন অমসুং মহাক্কী শক্লোন ওইখি।

গান্ধীনা ভারতকী প্রজাশিংদা মখোয়গী মশাগী লং নাইদুনা মসিদগী খাদিগী ফীরোলশিং শানবা তরেং অমা –চর্খা অমা শিজিন্ননবা অপাম্বা ফোঙদোকখি। লৈবাক অসিদা লৈরিবা মীওই কাংলুপ খুদিংমক্না মসিবু থৱায় হকচাং য়াওনা পাঙথোকখি। মসিগী থৌওং অসিনা গান্ধীনা নিংতম্বগী ইহৌ অসি লাইরিক হৈবা কাংলুপ্তগী মীয়ামদা খুৎশিন্নখি। মদুগী মতুংদগী খাদি হায়না কৌবা খুৎনা শাজবা লশিংগী ফী অসি নিংতম লান্মীশিংগী ফিজোল অমসুং নিংতম ইহৌগী সিম্বল অমা ওইখি।

গান্ধীনা মহাক্কী ফীজোল হোংখিবা য়ুম অদু হৌজিকসু মদুরাইদা লৈরি। ঙসিদি গ্রাউন্দ ফ্লোর অসি খাদিগী ক্রাফ স্তোর অমা ওইরে। মসিগী ইতিহাসিক ওইরবা ইহৌ অসি হকপা নুংগী তেব্লেৎ অমগা লোয়ননা অহানবা ফ্লোরদা অপীকপা ম্যুজিয়ন অমা লৈরি।

কুমারী রুপিন্দর ব্রারনা মহাক্কী লোয়শিনবগী ৱারোলদা প্রজাশিংনা ওনলাইন তম্বা য়াবা অমসুং সর্তিফাইদ ফেসিলেতেতর অমা ওইহন্দুনা ঐখোয়গী ফজরবা লৈবাক অসি ময়ামদা উৎনবা খুদোংচাবা অমা পীগদবা তুরিজম মন্ত্রালয়গী ইনক্রিদিবল ইন্দিয়া তুরিস্ত ফেসিলিতেতর প্রোগ্রামগী মরমদা ফোঙদোকখি। মসিনা মখাতানা মখোয়বু থৌদাং লৌবা অমসুং মখোয়গী মশাগী মথৌশিং ফজনা পাঙথোকপদা থৌনা হাপলগনি। 

দেখো অপনা দেস ৱেবিনার সিরিজ অসি নেস্নেল ই-গভর্নেন্স দিপার্তমেন্ত, মিনিস্ত্রী ওফ ইলেক্ত্রোনিক্স এন্দ ইনফোর্মেসন তেক্নোলোজীগা লোয়ননা তেক্নিকেল ওইনা পুন্না পাঙথোকমিন্নবনি। ৱেবিনার অসিগী সেসনশিং অসি হৌজিক https://www.youtube.com/channel/UCbzIbBmMvtvH7d6Zo_ZEHDA/featuredদা অমসুং ভারত সরকারগী তুরিজম মন্ত্রালয়গী সোসিএল মেদিয়া হেন্দলশিংদা ফঙগনি। 

জালিয়নৱালা বাঘ: এ তর্নিং পোইন্ত ইন দি ফ্রীদম স্ত্রগল হায়না মমিং থোনবা ৱেবিনার অসিগী মথংগী তাঙ্কক্না ২০২০গী অগস্ত ১৪গী ১১.০০ এ.এম.দা পাংথোক্লগনি অমসুং ৱেবিনার অসিগী রেজিস্ত্রেসন তৌবা হৌরে: https://bit.ly/JallianwalaBaghDAD

*******