উপ রাস্ত্রপতি শ্রী ভেঙ্কয়া নাইদুনা পুম্নমক শুপচিল্লবা,  মরীক চুমবা অমদি তশেং তশেংবা পুৱারীগী থৌদোকশিংগী পাউদম অমা থমবা মথৌ তাই হায়বা ৱাফম ফোঙদোকখ্রে‍।

ৱাফম অসি উপ-রাস্ত্রপদি নিবাসতা পাঙথোকপা নেতাজি সুভাস চন্দ্র বোস-আই.এন.এ. ত্রস্তগী এসোসি এত মেম্বর অমা ওইরিবা দা: কল্য়ান কুমার দেনা ইবা ‘নেতাজি – ইন্দিয়াজ ইন্দিপেন্দেন্স এন্দ ব্রিতিশ অর্কাইভ্স; হায়না মিংথোনবা লাইরিক অমা ফোঙবগী থৌরমদা ৱা ঙাঙবদা মহাক্না ফোঙদোকখিবনি‍।

লাইরিক অসিদা ভারতকী নীংতম খোঙজঙদা নেতাজিনা লৌরমবা অচৌবা থৌদাংশিংগী মতাংদা ময়েক শেংনা তাকপা কান্নরবা চে-চাং কয়া য়াওরি হায়বা ৱাফম থম্লদুনা, উপ রাস্ত্রপতিনা ঐখোয়গী নহা ওইরিবা মীরোলনা ভারতকী পুৱারী মমুৎ তানা খঙবগী মথৌ তাবা ৱাফম ফোঙদোকখি‍।

অদুগা, লৈবাক শিনবা থুংবদগী নীংতম লান্মীশিংগী থৌনা অমদি মখোয়না কত্থোকখিবশিংগী মরমদসু লাইরিকশিংদা য়াওহনগদবনি, হায়না শ্রী নাইদুনা মখা তাখি‍।

উপ রাস্ত্রপতিনা হায়খিবদা নীংতম খোঙজঙগী তোঙান তোঙানবা মশক মওং কয়া লৈরি অমদি মখোয়শিংদু নহারোলশিংদা তম্বীবা মথৌ তাই‍। “ভারতকী তোঙান তোঙানবা মফমশিংদগী মীওই কয়ানা ঐখোয়গী নীংতমবগীদমক কত্থোকখি‍। মখোয়গী ৱারীশিংসু য়াওহনগবনি‍”, হায়না মহাক্না মখা তাখি‍।

নীংতম লানদা শ্রী সুভাস চন্দ্র বোসনা লৌখিবা মশক নাইবা থৌদাংগী মতাংদা পল্লদুনা, উপ রাস্ত্রপতিনা হায়খিবদা নীংতম খোঙজঙ মনুংদা মহাক্না মতিং লৈনা অমদি মথৌনা লৈনা লুচিংখিবা অদুনা মীয়ামগী, মরুওইনা মহাশিংগী পুক্নিংগী ইনোৎ হাপ্নবগী মরুওইবা মচাক অমা ওইদুনা লাক্লি‍।

আই.এন.এ.বু অমুক হিঙ্গৎহনবনা লুম্না লৌবা য়াবা লান্মী খুৎপু অমা ওইরকখি হায়না হায়রদুনা, শ্রী নাইদুনা হায়খিবদা লাইরিকসিদা য়াওরিবা চে-চাংশিংনা তাক্লিবদি আই.এন.এ.দা থমখিবা মীয়ামগী মিনুংশি হেনগৎলকখিবা অদুনা ব্রিতিশশিংদা ৱাখল চরাংনহনখি‍। মসি লৈবাকসিগী নীংতম লানগী মরুওইবা হীরমশিংগী মনুংদা অমা ওইখি‍।

ঙসি পাঙথোক্লিবা মালেমগী নহাশিংগী নুমিৎকী মতাংদা পল্লদুনা, উপ রাস্ত্রপতিনা নহাশিংদা নেতাজিগী পুন্সিদগী ইথিল লৌননবা অমদি অনৌবা ভারত অমা শেমগৎপগী লমদা চঙশিন্নবা ৱাফম থমখি‍।

নীংতমবা ফংলবা চহী ৭০গী মতুংদসু, লৈবাক অসিনা মায়কৈ কয়াদা শীংনবা কয়া থেংনা লেপ্ত্রি হায়না হায়রদুনা, মহাক্না নহাশিংবু লায়রবা, লাইরিক হৈতবা, শেঞ্জা-থুমজা, ফুরুপকী, পা-পীগী খেন্নবা লৈতবা অমদি ভারত মচা পুম্নমক চপ মান্নবা খুদোংচাবা ফংগদবা অনৌবা ভারত অমা শেমগৎপগী লমদা মাঙজিল থানবা ৱাফম থমখি‍।

ভারতকী খুন্থোক্লোনগী মমল, পুৱারী অমদি নাৎকীদমক নেতাজিনা চাউথোকচবা ফাওখি অমদি অচৌবা লৈবাকশিংনা মখোয়গী মরায়বক মশানা লেপচগদবনি হায়বা ৱাফমসিদা মহাক্না চেৎনা থাজখি হায়না মহাক্না হায়খি‍। “মহাক্না হায়রিবা ৱাখল্লোনসিগী মৈরী নহাশিংগী মফমদা অমুক হন্না চুখৎপা পাম্লমখি”, হায়না মহাক্না মখা তাখি‍।

ঐখোয় পুম্নমক অহানবদা ভারত মচানি অমদি লায়নিং, মফম, ফুরুপ অমদি লোনদা য়ুম্ফম ওইবা শক্লোন মচাশিংনা মরুওইরিবা ভারত মচা হায়রিবা মশক অসিবু কৈদৌঙৈদসু নমখায়দুনা চৎহল্লোইদবনি হায়বা ৱাফমদা শ্রী বোসনা চেৎনা থম্লমখি‍।

কোবিদ-১৯ লাইচৎনা ভারত অমসুং অতৌ লৈবাকশিংগী শেন্মিৎলোনদা পীরিবা শাফুগী মতাংদা পল্লদুনা, উপ রাস্ত্রপতিনা মহীক অসিবু মায়থিবা পীননবা অমদি মসিনা থোকহল্লিবা মনীং হনবগী ফীভম অসিদগী লান্থোক্তুনা চৎনবা খাংবা কনবগী মতৌ উত্থোক্নবা ৱাফমশিং মীপুম খুদিংদা থমখি‍।

শ্রী নাইদুনা হায়খিবদা কোবিদ-১৯না ভারতকুমবা লৈবাকশিংদা মপুং ফানা মরোমদোম লেপচবা ঙম্নবা হোৎনদুনা অমুক হান্নগী ফীভমদা হঞ্জিল্লকপা ঙমগদবা শেন্মিৎলোন অমা শেমগৎপগী তঙাইফদবদু উৎলি‍। প্রাইভেত সেক্তর য়াওনা স্তেকহোল্দর খুদিংমক্না অমদি একাদমিয়াশিংনসু থিজিন হুমজিন্দুনা আত্ম নিরভর কেম্পেনবু অচৌবা খোঙহৌ অমা পীবা হায়বসিনা হৌজিক তশেংনা মথৌ তারিবা ৱাফম্নি, হায়না মহাক্না মখা তাখি‍।

নেসনেল সুক্যুরিতী এদভাইজর, শ্রী অজিৎ দোভাল, নেতাজি সুভাস চন্দ্র বোস-আই.এন.এ. ত্রস্তকী চেয়রমেন, ব্রিগেদিয়র আর.এস. ছিকারা, ত্রস্ত অসিগী ভাইস চেয়রমন, শ্রী সুর্য়া প্রকাশ, ত্রস্ত অসিগী এদভাইজরী বোর্দকী মেম্বর, দা: জে.এস. রাজপুত, নেতাজি সুভাস চন্দ্র বোস-আই.এন.এ. ত্রস্তকী ত্রস্তী অমসুং নেতাজিগী মশু, শ্রীমতি রেনুকা মলাকর অমসুং গরুর প্রকাসনদগী শ্রী অঙ্কুর পাথকনা লাইরিক ফোঙবগী থৌরমদুদা অতৈ লেঙবিরকপশিংগী মরক্তা শরুক য়াখি‍।

মখাদা পীরিবা অসি উপ রাস্ত্রপতিনা পীখিবা মপুং ফাবা ৱারোলনি –

“নেতাজি সুভাস চন্দ্র বোস-আই.এন.এ. ত্রস্তগী এসোসি এত মেম্বর অমা ওইরিবা দা: কল্য়ান কুমার দেনা ইবা ‘নেতাজি – ইন্দিয়াজ ইন্দিপেন্দেন্স এন্দ ব্রিতিশ অর্কাইভ্স’ হায়না মিংথোনবা লাইরিক অসি ফোঙবদা ঐঙোন্দা নুংঙাইবা ফাওই‍।

লাইরিক অসি ভারতকী নীংতম খোঙজঙগী মরমদা ফোঙখ্রবা য়াম্লবা লাইরিকশিংগী মরক্তা অমদি অতম্ননা নীংতম খোঙজঙ অদুদা নেতাজিনা  লৌরমবা থৌদাংশিংগী মতাংদা কান্নরবা অহেনবা পোৎশক অমনি‍।

নেতাজি মতিক লৈবা লুচিংবা অমা ওইরম্মী অমদি নীংতম ঈহৌগী মকোক থোঙবা মীওইশিংগী মরক্তা অমা ওইরম্মী‍। মহাক্কী মরৈবাক নীংবগী ৱাখল্লোন অমদি মমা লৈবাকপু মপা লৈতনা নুংশিবগী ইথিলনা মতমদুগী লেমজনিংঙাই ওইরবা ইন্দিয়ন সিভিল সর্ভিসতগী তোক্তুনা মহাকপু আই.সি.এস. পরিখ্যাদা শরুক য়ানবা থাখিবা ইংলন্দদগী ভারত্তা হল্লকখি‍।

নীংতম খোঙজঙদা মহাক্না লৌরমবা মশক নাইবা থৌদাং মীয়াম্না পাক শন্না খঙনরি‍। কমদৌনা নীংতমবা ফঙগদগে হায়বা মহাক্কী মীৎয়েং, নমদুনা ইংলন্দদা লোই থাখিবা, মহাকপু ফারবা মতুংদা জর্মনীদগী নান্থোরকখিবা, তোঙান তোঙানবা লোনশিংদা অজাদ হিন্দ রেদিও শন্দোকখিবা অমদি আই.এন.এ. অমুক হিঙ্গৎহনখিবনচিংবা মহাক্কী পুন্সিগী অতৈ মশকশিংসু মীয়াম্না নীংথিনা খঙনরি‍।

মরুওইরিবা ৱাফমদি মপাঙ্গল কনবা ভারত অমা শেমগৎনবগী মহাক্কী মীৎয়েং অমসুং ৱাখল্লোনবু নীংশিংবা অদুনি‍। নীংতমবগী পান্দম ফংননবা তোঙান তোঙানবা লম্বী কয়া লৈজরবসু মীৎয়েংদি চপ মান্নখি‍। পুক্নীংগী ইথিল অমসুং লেপখিবা খোঙফমদি চপ মান্নখি‍। লৈবাকসিগী নীংতম ঈহৌগী মতমদা মশেক নাইনা ঙানখিবা মীওই খুদিংমক্কী মফমদা অচেৎপা, পুক্নীং অনী লোঙদবা মমা লৈবাকপু নুংশিবগী ঈহুল লৈখি‍। মখোয়না লৈবাকসিগী মীয়ামগী চাংয়েং অমসুং পুনশিনবগী থৌওংশিং থোইদোক্না অৱাবা মায়োক্নদনা শমজিন্নখি অমদি মীপুম খুদিংমক্কী হেন্না ফবা পুন্সি মহিং অমগীমক নীংতমবা পুরকবা পামখি‍।

নেতাজি অসি হায়রিবা লিশাং শিৎনা চত্থরকপা মতিং লৈবা লুচিংবশিংগী শরুক অমনি‍।

নীংতম খোঙজঙ মনুংদা মহাক্না মতিং লৈনা অমদি মথৌনা লৈনা লুচিংখিবা অদুনা মীয়ামগী, মরুওইনা মহাশিংগী পুক্নিংগী ইনোৎ হাপ্নবগী মরুওইবা মচাক অমা ওইদুনা লৈখিগনি‍। মহাক্না আই.এন.এ.বু অমুক হিঙ্গৎহনখি অমদি মশক থোকপা লান্মী খুৎপু অমা ওইনা শেমখি‍। লাইরিক অসিদা য়াওরিবা চে-চাংশিং অসিনা তাকপগী মতুং ইন্না আই.এন.এ.দা মীয়ামগী মিনুংশি হেনগৎলকপদা অসিদা ব্রিতিশশিংদা ৱাখল চরাংনবা পোকহনখি‍। ইং ১৯৪৫তা ব্রিতিশ লৈঙাক্কী ইন্তলিজেন্সকী পাউদম অমদা পনবগী মতুং ইন্না, “ইন্দিয়ন নেসনেল আর্মীগী মতাংদা লৈরিবা ফীভম অসি তুমিন্না লৈথোকপা য়াদবা ফীভম অমনি”‍। তশেংনমক আই.এন.এ.বু নেতাজিনা লুচিংলমবা অসিনা থাজবা য়াবা অমদি মশক থোকপা ফীভম অমা ওইহন্দুনা লূপ অসিবু ব্রিতিশশিংনা লূম্না লৌহনখি‍। মসিমক ভারতকী নীংতম খোঙজঙগী মরুওইবা থৌদাংশিংগী মরক্তা অমনি‍।

ঙসি অসি মালেমগী নহাশিংগী নুমিৎসু ওইরি‍। থৌরম অসিদা, ঐনা নহাশিংগী মফমদা নেতাজিগী পুন্সিদগী ইথিল লৌশিন্নবা অমদি অনৌবা ভারত অমগীদমক খোঙ থাংজিন্নবা হোৎনরসি হায়বা ৱাফম থমজরি‍। নীংতমবা ফংলবা চহী ৭০গী মতুংদসু, লৈবাক অসিনা তোঙান তোঙানবা মায়কৈশিংদা শীংনবা কয়া থেংনরি অমদি লায়রবা, লাইরিক হৈতবা, শেঞ্জা-থুমজা, ফুরুপকী, পা-পীগী খেন্নবা লৈতবা অমদি ভারত মচা পুম্নমক চপ মান্নবা খুদোংচাবা ফংগদবা অনৌবা ভারত অমা শেমগৎপগী লমদা মাঙজিল থানা নহাশিংনা হোৎনগদবনি‍।

নেতাজিগী মতিং লৈবা মীওই মীতৌ অমদি ৱাখল্লোন অসিগী হৌরকফমদি মহাক্না ভারতকী মশক নাইরবা পুৱারী, লৈবাক অমা ওইনা, খুন্থোক্লোন অমা ওইনা, অমসুং নাৎ-চৎনবী অমা ওইনা তুংগী লংলবা মরায়বক্তা লৈখিবা থাজবা অদুনি‍। ঐখোয়গী ইরৈবক্কী চাউথোকচবা অমদি অপুনবা ঈশানা থাজজবগী য়ুম্ফম ওইরিবা ভারতকী খুন্থোক্লোনগী মশক, পুৱারী অমসুং নাৎকীদমক মহাক্না চাউথোকচবা পোকখি‍। মতিং লৈবা লৈবাকশিংনা মখোয়গী মরায়বক লেপচগদবনি হায়বা ৱাফমদা মহাক্না চেৎনা  থাজখি অমদি মহাক্না ৱাখল্লোন অসিগী মৈরীবু মীয়ামগী থৎম্মোইদা চুখৎপা পামখি‍।

অদুগা অমরোমদসু, মতম মতমগী ওইবা অমদি অনৌবা চৎনবীশিংনা ঐখোয়গী পাঙ্গল কনখৎহনগনি অমদি খাংবা কনখৎহনগনি হায়বগা লোয়ননা মহাক্না ঐখোয়বু অসিগুম্বশিং অসিদগী কুপশিন্দুনা থম্লোইদবনি হায়না থাজখি‍।

ঐখোয় পুম্নমক অহানবদা ভারত মচানি অমসুং লাইনিং, লৈফম, ফুরূপ অমসুং লোনদা য়ুম্ফম ওইবা শক্লোন মচাশিংনা মরুওইবা ভারত মচা অমা ওইবগী শক্তম অদুবুদি কৈদৌনুংদসু নমখায়হল্লোইদবনি হায়বা ৱাখল্লোন বোসতা চেৎনা লৈখি‍।

নেতাজিনা থাজখি মদুদি মনীং তমবা ভারত্তা মীয়ামগী লৈঙাক মপুং ফানা লৈনবগীদমক, ঐখোয়গী মীয়ামদা হৌন-লোনচৎকী মমল, মথৌদাং য়াবা, লৈবাক্কী থৌগল অমদি মরৈবাক নীংবগী ৱাখল্লোন মপুং ফানা চেনবা মথৌ তাই‍। ভারত ইমাগী ৱাখল্লোন অসি তোপ তোপ্পা ভারতকী নাৎ-চৎনবীগী শক্লোন অমনি‍। মরম অসিনা মরৈবাক নীংবা অমদি ভারতনা নুংঙাই-য়াইফনা লৈনবগীদমক কত্থোকপগী ৱাখল্লোন অসি লাইনিং অমদি ৱাখল্লোন অতৈশিংগী মথক্তা লৈগদবা ভারত মচা খুদিংমক্কী তঙাই ফদ্রবা থৌদাং ওইগদবনি‍।

নেতাজিনা এসিয়াগী তুংগী ওইবা মংলান কয়া লৈখি‍। মহাক্না থাজখি মদুদি এসিয়াগী নাৎ, লাইনিং, অমদি পুৱারীগী মান্নবা ৱাফমশিংগা পুক্নীং অমদি থম্মোইগী ওইবা মরী অমা লৈ অমদি ভারতকী খুন্নাই, শেন্মিৎলোন, চাউখৎলোন অমসুং অতৌ থৌরাংশিংগী ওইবা হীরমশিংদা অতৈ লৈরিবা এসিয়া পুম্বগা য়াম্না নক্নবা মরী লৈ হায়না মহাক্না থাজখি‍। অপুনবগী ওইবা ঙাকশেল অমসুং নুংঙাই-য়াইফবগীদমক মপাঙ্গল কনবা পান-এসিয়াগী ওইবা মতেং পাংনবগী ৱাফম হৌদোক্লদুনা মহাক্না ভারত অসিবু এসিয়াগী মপাঙ্গল অমসুং নুংঙাই য়াইফবগী মপাঙ্গল কল্লপা য়ুম্বী অমা ওইনা উরম্মী‍।

নেতাজি অমসুং মতমদুগী অতৈ লুচিংবশিংনা ভারত মচা খুদিংমক্কী লোত্তুনা থম্লিবা তৌবা ঙমবা মতিংবু লোকখি‍। মখোয়না নমথবা ঙমদবা থৌনা অমসু কত্থোকপা, মশাবু থাজজবা অমদি মরোমদোম লেপচবগী শাফু অদুবু নীংতমবা ফংননবা মৈ ইকখি‍। নীংতম্লবা মতুংদা, ঐখোয়না অদুগুম্বা ইনোৎ অদুগা লোয়ননা লৈবাক্কী চাউখৎলোন পুরক্নবা হোৎনরি‍।

নুংশিরবা ইচিন ইনাউশিং,

নীংতম্লবা মতুংদগী হৌজিকফাওবদা, ভারতনা চিংনবা লৈতনা হীরম কয়াদা নীংথিনা খুমাঙ চাউশিল্লে অমদি খ্বাইদগী খোঙজেল য়াঙবা শেন্মিৎলোন অমা ওইরক্লি‍। লাইবক থিবদি, কোবিদ-১৯ লাইচৎ অসিনা খোঙজেল অসিবু  কায়হল্লে অমসুং ভারত অমদি অতৈ লৈবাকশিগী শেন্মিৎলোনদা শাফু পীরি‍। তাঞ্জা অসি  ঐখোয় পুম্নমক্না হেন্না খাংবা কনবা উত্তুনা মহীক অসিবু মায়থিবা পীবা অমদি মসিনা মনীং হলহল্লিবা অসিবু  লান্থোক্তুনা চৎনবগীদমক লেপমিন্নবা মতমদু ওইরে‍।

ভারত অসি অতোপ্পা লৈবাকশিংগা চাংদম্নবদা মহাক্কী নহাগী মীশিং – চহী ৩৫গী মখাদা লৈবা চাদা ৬৫ অমদি চহী ২৫গী মখাদা লৈবনা চাদা ৫০ ওইরিবা – অসিনা তোপ তোপ্না কান্নবা অমা ফংলি‍। অসিগুম্বা ফীভম অসিনা পীরিবা খুদোংচাবা অসি মপুং ফানা লোকশিন্দুনা শাফম অসিবু লৈবাকসিগী খোঙজেল হেন্না য়াঙখৎহন্নবা অমদি তশেং তশেংবা মরোমদোম লেপচবা ভারত অমা শেমগৎপদা শীজিন্নবা মথৌ তাই‍।

লাইচৎ অসিগী মতুংগী মালেম অদু হান্নগা মান্নদবা ফীভম অমা ওইরগনি হায়বসিমদি নাখৈ শেংলে‍। কোবিদ-১৯না তুংদা অসিগুম্বা লাইচৎ থোরক্তনবা মালেমগী ওইনা পুন্না চৎমিন্নবা অমদি হোৎনমিন্নবগী মথৌ তাবদু মাঙদা পুথোক্তুনা থম্লবগা লোয়ননা মসিনা ভারতকুমবা লৈবাকশিংদা মপুং ফানা মরোমদোম লেপচবা ঙমবা ফীভম পুরক্তুনা খাংবা কনবা হান্নগী ফীভমদা হঞ্জিল্লকপা ঙমবা শেন্মিৎলোন অমা শেমগৎপগী তঙাইফদবদু থিন্দুনা তাক্লি‍।

মরুওইবা পান্দমদি মপান্দগী পুশিল্লকপা পোৎলমশিংদা তাংবগী ফীভম হন্থহন্দুনা, ভারতকী ব্রান্দ অমসুং পোত্থোকশিং য়োকখত্তুনা, পোত্থোক শীজিন্নবগী মতুং ইন্না ইরমদমসিদা পুথোকচদুনা চাউখৎপা পুরক্তুনা, মালেমগী থাক্তা লৈবা মচাক মথুমশিং শেনগৎ-শাগত্তুনা, ভারতকী ইন্দস্ত্রীশিং মালেমগী থাক্তা চাংদম্নিংঙাই ফীভমদা শেগত্তুনা, লল্লোন ইতিক তৌবদা হেন্না নুংঙাইহন্দুনা, মপান্দগী শেন থাদবশিং পুক্নীং চিংশিন্দুনা অমদি ভারতপু মপুং ফানা মনীং তমবা অমদি মরোমদোম লেপচবা ঙমবা শেন্মিৎলোন অমা শেমগত্তুনা ইরমদমগীদমক খোঞ্জেল থোকপদুনি‍। ইরোমদোম লেপচবা হায়রগা লল্লোন ইতিক্কী পল খাগৎপা নৎত্রগা ঙাকথোক কন্থোক তৌবগী চৎনবী য়োকখৎপদু নত্তে, তৌইগুম্বসুং ভারতকী মশাগী পীথোকচরকপা মপাঙ্গল লোকশিনবা অমদি হীরম কয়াদা মালেমগী ওইনা চাংদম্নবা য়াবা ফীভমদা শেমগৎপা অদুবুনি‍।

হৌখিবা চহী কয়াসিদা, ভারত অসি আই.তি. অমসুং ফার্মাসিউতিকেল সেক্তরদা মালেমগী মাঙজিন থাবা অমা ওইরে‍। মালেমগী থাক্কী ওইবা মেদিকেলগী খুৎশু খুৎলায়শিং পুথোকপনচিংবা অতোপ্পা লমশিংদসু লৈরিবা মঙম অসি মপুং ফানা লোকশিনবা মথৌ তাই‍।

ইরোমদোম লেপচবগী ৱাখল্লোনবু য়োকখৎপগী শরুক অমা ওইনা লৈঙাক অসিনা দিফেন্সিকী পোৎলম ১০১দা মপান্দগী পুশিল্লকপদা অথিংবা থমবগী ৱাফম লাউথোকখিবদু পনবদা ঐঙোন্দা নুংঙাইবা ফাওই‍। আর্তিলরী নোংমৈদগী হৌরগা রাদরশিং পুশিল্লকপগী থৌওং অসি ২০২৫ ফাওবা খুমাঙ চাউশিন্না চত্থখিগনি‍। ওগস্ত ১০দগী হৌরগা আত্ম নিরভর চয়োল  হৌদোক্লিবা অসিসু তরাম্না ওক্নিংঙাই ওইবা খোঙথাঙ অমনি‍। প্রাইভেত সেক্তর য়াওনা স্তেকহোল্দর খুদিংমক্না অমদি একাদমিয়াশিংনসু থিজিন হুমজিন্দুনা আত্ম নিরভর কেম্পেনবু অচৌবা খোঙহৌ অমা পীবা হায়বসিনা হৌজিক তশেংনা মথৌ তারিবা ৱাফম্নি‍।

লোইশিন্দ্রিঙৈ মমাঙদা, ঐনা ঐখোয়গী নহারোলশিংদা মখোয়না ভারতকী পুৱারীবু মমুৎ তানা খঙবগী মথৌ তাবদু থম্বা পাম্মী‍। পুৱারীগী থৌদোকশিংগী পুম্নমক শুপচিল্লবা, মরীক চুম্বা অমদি তশেং তশেংবা পাউদম অমা পীবা মথৌ তাই‍। লৈবাক শিনবা থুংবদগী নীংতম লান্মীশিংগী থৌনা অমদি কত্থোকপশিং লাইরিকশিংদা য়াওহনবা মথৌ তাই‍।

লাইরিক অসিদা ভারতকী নীংতম খোঙজঙদা নেতাজিনা লৌরমবা অচৌবা থৌদাংশিংগী মতাংদা ময়েক শেংনা তাকপা কান্নরবা চে-চাং কয়া য়াওরি‍। মসিনা থিজিল্লোয়শিং অমসুং মীচম মীয়ামদা চাউনা কান্নবা পীগনি হায়না ঐনা থাজৈ‍। ঐনা লাইরিক অসি ইরিবা অমদি ফোঙলিবা মীওইশিংবু কান্নরবা পব্লিকেসন অসি পুথোরকপগীদমক থাগৎপা ফোঙদোক্লি‍।

জয় হিন্দ!”

****