ইলেক্ত্রোনিক্স অমসুং আই.তি, কমুনিকেসন অমসুং লো অমসুং জজতিসকী য়ুনিয়ন মিনিস্তর রবি শঙ্কর প্রাসাদনা হায়খি মনুং হুঞ্জিনবা, খুদোংচাদবা অমসুং ঙমখৈগী মরুওইবা মফমশিংগী মীয়াম অমসুং মফমশিং অদুদা থবক তৌরিবশিংদা হেন্না ফবা পুন্সি মহিং অমা ফংহন্নবা মোবাইল কন্নেক্সন ফংহন্নবা ভারত সরকারনা থবক পায়খৎলে।

ঙসি প্রধান মন্ত্রী নরেন্দ্র মোদীনা লুপা করোর ১,২২৪ চঙবা চেন্নাইদগী অন্দমান নিকোবর ফাওবা কিলোমিতর ২৩০০ শাংবা ঈশিং মনুংগী ওপ্তিকেল ফাইবর কেবল অমা হাংদোকখ্রবা মতুংদা মেদিয়াদা ৱা ঙাংবদা মিনিস্তরনা হায়খি, মনুং হুঞ্জিনবা অমসুং খুদোংচাদবা মফমশিংদা কন্নেক্সন ফংহন্নবা তেলিকমুনিকেসন দিপার্তমেন্তনা থবক কয়া পায়খৎলে। লৈবাক অসিগী মরুওইবা অমসুং ঙমখৈগী শরুকশিং লৈবা কন্নেক্সন ফংদ্রিবা খুঙ্গং ৩৫৪ কোনশিন্নবা তেন্দর অমা পীখ্রে অমসুং মসিগী থবকশিং অসি জে অমসুং কে, লাদাখ অমসুং বিহার, রাজাস্থান, উত্তরখান্দ, হিমাচল প্রদেস অমসুং গুজরাতকী খুঙ্গংশিংদা পায়খৎকনি। হায়রিবা খুঙ্গংশিং অসি ঙমখৈগী শরুক্তা মোবাইল কন্নেক্সন ফংহন্নবা খনখৎখিবনি। হায়রিবা খুঙ্গংশিং অসিদা কন্নেক্সন ফংহল্লবা মতুংদা, জে অমসুং কে অমসুং লাদাখ লমদমদা মোবাইল কন্নেক্সন ফংদবা খুঙ্গং অমতা লৈররোই। লান্মী, বি.আর.ও, বি.এস.এফ, সি.আর.পি.এফ, আই.তি.বি.পি, এস.এস.বিগী মফম ১৩৪৭দা সেতেল্লাইত্তা য়ুম্ফম ওইবা দি.এস.পি.তিশিং ফংহল্লে। মসিগী মনুংদা মফম ১৮৩ মাংজৌননা থবক হৌখ্রে অমসুং লেমহৌরবশিং থবক পায়খৎলি।

য়ুনিয়ন মিনিস্তরনা হায়খি বিহার, উত্তর প্রদেস, রাজাস্থান অমসুং মৈধ্য প্রদেসকী এস্পিরেসনেল দিস্ত্রিক ২৪গী খুঙ্গংশিংদা মোবাইল ফংহন্নবা তেলিকমুনিকেসন দিপার্তমেন্তনা থবক পায়খৎলি অমসুং লেমহৌরবা এস্পিরেসনেল দিস্ত্রিক ৪৪গী কন্নেক্সন ফংদ্রিবা ছতিসগর, ওরিসা, ঝারখান্দ অমসুং অন্ধ্র প্রদেসকী খুঙ্গং ৭২৮৭সু সরকারগী অয়াবা ফংলবা মতুংদা মোবাইল কন্নেক্সন ফংহল্লগনি।

*****