উপ রাস্ত্রপী শ্রী এম. ভেঙ্কনাইদুনা ঙসি নহা ওইরিবা আই.এ.এস. ওফিসরশিংদা মখোয়গী শিনফম অসিনা খন্দুনা লায়রা-ইনাক খুনবা, নুপা-নুপী অমসুং সহর-খুঙ্গং খায়দোক্লিবা অসি শমজিন্নবা মিসন অমা ওইনা লৌগদবনি অমসুং অনৌবা ভারত অমা শেমগৎপদা মাংজিল থানা অওনবা পুরক্নবা এজেন্তশিং ওইনবা হায়খি।

ভিদিও কনফরেন্সকী থোংদা লাল বহাদুর শাস্ত্র নেস্নেল একাদমী ওফ এদমিনিস্ত্রেসন (এল.বি.এস.এন.এ.এ.)দা ২০১৮ চেছকী আই.এ.এস. ওফিসরশিংগী চহি অনিগী ত্রেনিং প্রোগ্রাম অসি লোইশিনবগী ৱারোল পীরদুনা, মহাক্না হায় শোত্থরবা কাংলুপশিংগী সোসিও-ইকোনোমিক ফগৎহনবা হায়বা অসি মখোয়গী মরু ওইবা পান্দমনি।

ভারতপু পুনশিল্লম্বা সদর ভল্লা ভাই পতেলগী সিবিল সর্ভিস অমনা লায়রবা অমসুং খেৎনবশিং মুত্থতুনা অনৌবা লৈবাক অমা শেম্নবা থৱায় য়াওনা হোৎনবগী মঙলান অদু ওফিসরশিংদা নীংশিংহল্লদুনা উপ রাস্ত্রপতীনা মখোয়বু পুকচেল শেংবা, হৌনা লোনচৎ খঙবা, অচম্বা, থৌদাং লৈবা, অরোৎপা লৈতবা অমসুং থজবা য়াবা মীওই ওইনবা হায়খি।

হান্নগী প্রধান মন্ত্রী শ্রী লাল বহাদুর শাস্ত্রি জীবু মশক নাইরবা লুচিংবা অমনি হায়না হায়রদুনা ,শ্রী নাইদুনা হায় মহাকপু মশক তাক্লিবশিং অদুদি অপুনবগী শক্তম অমসুং পুকচেল শেংবা, মীনুংশি লৈবা অমসুং মতিং লৈবা, লৈবাক্কী ফীদমনীংঙাই ওইবা অমসুং লম্বা লৈতবা থৌনা-লিংজেলনি।

ওফিসর ত্রেনীশিংবু লেপ্তনা তমশিনবা, ৱাখল খন্নবা অমসুং অনৌবা পুথোক্নবা থৌগৎলদুনা শ্রী নাইদুনা হায় “ঙসি ঐখোয়না মথৌ তারিবা অসি অফবা লৈঙাক অমনি”।  মহাক্না হায় লৈঙাকপা হায়বা অসি মীয়ামগী খনগদবনি অদুবু অফবা সিস্তেম অমসু ওইগদবনি। মসি চাউখৎ থৌরাংগী ফীভম শেমগৎপা ঙম্বা সিস্তেম অমা ওইগদবনি।

উপ রাস্ত্রপতীনা হায় লৈবাক পায়রিবশিংনা মশিং য়াম্লবা পোলিসীশিং অমসুং আইন কয়া শেম্বা য়াই  অদুবু মরু ওইরিবদি মখোয় অদু তশেংনা ইমপ্লিমেন্ত তৌবা অদুনি।

সরকার অমা হায়বা অসি মখোয়না তৌরম্লিবা থবকশিং অদুনা নিংশীংনহৌগনি, হায়না মহাক্না থমখি অমসুং মহাক্না হায় সিবিল সর্বেন্ত অমগী মথৌ অসি মীয়ামগী ফংফম থোকপা হকশিং অদু থেংথবা তৌদনা ফংহনবা হায়বা অসিনি।

অদোমনা পায়নিং ফম অমা পায়রবসু মদুদা অদোমনা থবক ফজনা তৌরমগদবনি মদুনা মীয়াম্না তুংদা অদোমবু শোন্নহৌগনি, হায়না মহাক্না নহা ওইরিবা সিবিল সর্বেন্তশিংদা হায়খি।

সরদর পতেলনা পুন্না থবক তৌমিনবদা থাজবা থমখিবা অদু পল্লদুনা শ্রী নাইদুনা সিবিল সর্ভেন্তশিংদা মখোয়গী থবক তৌমিনরিবশিং অমসুং মখা তাবশিংবু মীয়ামগী শেবা তৌনবা ইথিল পোকহন্দুনা পুন্না থবক তৌমিন্নগদবনি হায়না পাউতাক পীখি।

শ্রী নাইদুনা হায় অদোমনা অনৌবা ৱাখল্লোন পুথোক্তুনা মালেমগী খ্বাইদগী ফবা লৈঙাক্লিবা লুচিংবশিং ওইবা হৌরবনিনা হোংদোকপা, পাংথোকপা, অ‌ওনবা পুরকপা প্রধান মন্ত্রীগী লায়ৱানা অদোম পুম্নমক্কী ইনোৎ হাপ্পা মচাক অমা ওইবা য়াই। 

ভারত অসি অচৌবা অওনবা অমগী মচিন্দা লৈরে হায়বা উরদুনা মহাক্না হায় হৌজিক ওইরিবা অকায়বা থোকহল্লবা লায়চৎ অসি লৈরবসু চাঊখৎনবা অমসুং মরোমদোম লেপ্নবা, খোজেং য়াংনা চাউখৎনবগী অনৌবা খুদোংচাবা কয়া লৈরে। মসিগী অনৌবা ভারত অসি হৌদোকপদা অদোম্না লুচিংগদবনি হায়না মহাক্না মখা তাখি।  

শ্রী নাইদুনা হায় অনৌবা ভারত অসি অমসুং পুন্না চাউখৎমিন্নবগী শাফুশিং হেনগৎহনবা, পু্ন্সি মহিং ফগৎহনবা, প্রজাতন্ত্রগী চৎনবীদা পুক্নিং চংবা অমসুং মীয়াম শেবা তৌরিবা লোয়শঙশিং ফগৎহনবদা য়ুম্ফম ওইগনি।

চমম্নবা মতমদা গান্ধীজীগী তালিস্মান নিংশিংনবা পাঊতাক পীরদুনা উপ রাস্ত্রপতীনা হায় করিগুম্বা অদোম্না মীনা ইনশিনবা লৌদনা অচুম্বগী তঙাইফদবা, অচুম্বা ৱায়েল, মীয়ামগী য়াইফনবা অমসুং অকোয়বগী ঙাক শেনবদা লেপ্পা ঙম্লবদি অদোম্না অচুম্বা ৱারেপ লৌবা ঙমগনি। 

মালেম অসি লেপ্তনা তম্বা ঙমদবা মওং অমদা হোংলক্লি হায়না হায়রদুনা মহাক্না মখোয়বু থোরক্লিবা খুদোংচাদবশিং অসি কোকহন্নবা মাংজৌননা অহোংবশিং খঙদোকপা অমসুং শেম শাদুনা লৈবা পামখি। “হোংবা নাইদবা পোৎ অমত্তা লৈতে অমসুং মীয়ামগী অপাম্বা অনিং থুংহন্নবা হোৎনরিবা লৈঙাকপা অমা ওইনা মীৎনা শিংবা তাই”, হায়না শ্রী নাইদুনা থমখি।

মফম অদুগী মীয়ামগী লোন্দা এদমিনিস্ত্রেসনগী লোল ওইহন্নবা মীৎয়েং চংলদুনা মখোয়গী ত্রেনিংগী মতমদা মফম মফমগী লোলশিং তম্বগী ওফিসরশিংবু উপ রাস্ত্রপতীনা থাগৎপা ফোঙদোকখি।

উপ রাস্ত্রপতী একেদেমী অসিনা পুথোকখিবা প্রধান মন্ত্রীগী মন কী বাত ৱারোলশিং য়াওবা “সিক্তী ফাইব কঞ্জর্বেসন্স” কৌবা লাইরিক অমসু ফোঙখি।

লাল বহাদুর শাস্ত্রী নেস্নেল একেদেমী ওফ এদমিনিস্ত্রেসনগী দিরেক্তর, শ্রী শঞ্জিব চোপ্রা অমসুং অতোপ্পা ফেকল্তী মেম্বরশিংনা ভর্চ্যুল ওইনা পাংথোকপা লোইশিনবগী থৌরম অদুদা শরুক য়াখি।

মখাদা পীরিবা অসি উপ রাস্ত্রপতীনা পীখিবা ৱারোল অদুনি –

“ভর্চ্যুল মোদতা নখোয়গী চহি অনিগী ত্রেনিং প্রোগ্রাম অসি লোইশিনবগী ৱারোল নখোয় পুম্নমক্কী নফমদা পীবা অসিদা ঐহাক নুংঙাইবা পোকই।

হৌখিবা চহি অনি অসি য়াম্না কান্নবা ফংলমগনি অমসুং অদোমগী মাংদা লৈরিবা শীংনবশিং অমসুং নখোয়গুম্বা হৌগৎলক্লিবা লুচিংবশিংদা ভারতনা খুদোল তগদবা খুদোংচাবশিংগী মরমদা ময়েং শেংনা খঙহনখ্রে হায়না ঐহাক্না থাজৈ।

নখোয় অসি হৌখিবা চহি হুম্ফু তরা-হুমদোই অসিদা ভারতকী চাউখৎ থৌরাংদা চাউনা কত্থোক্লিবা মশক নাইরবা সিবিল সর্বেন্তশিংগী চদা-নৌদানি।

পোলিসীশিং মওং মরিল তানা শেম্বা অমসুং মখোয়বা মপুং ফানা ইমপ্লিমেন্ত তৌবা ঙমহল্লিবা  অসি সিবিল সর্ভিস অমনা ওইরি।

সিবিল সর্ভিস অসি লোয়লম লৈঙাক্তগী হৌরকখি অদুবু ভারতনা নিংখা তম্লবা মতুংদা শাসন তৌবদা থেংনবা খুদোংচাদবশিং কোকহন্নবা ভারতকী তঙাই ফদবা কেদর অমা ওইনা ওন্থোকখি।

ঐহাক্না নখোয়দা ৱা ঙাংলক্লিবা অসি উপ রাস্ত্রপতি নিৱাসকী সদর পতেল কনফরেন্স হোলদগীনি অমসুং ঐহাক্না খনবদা মসি য়াম্না চান্নরি মরমদি নখোয় অসি সদর ভল্লা ভাই পতেলনা ওল ইন্দিয়া সর্ভিসেসকী  “য়োৎকী উচল”নি হায়না তাক্লম্বা কাংলুপ অদুদা চল্লি।

সদর পতেলনা মঙলম্বা সিবিল সর্বিসকী মঙলান অদুদি লায়রবা অমসুং খেৎনবশিং মুত্থতুনা অনৌবা লৈবাক অমা শেম্নবা থৱায় য়াওনা হোৎনবা লৈঙাকপা অমা ওইবা অমসুং ভারত অসি অফবা লৈবাক অমা ওইহন্না অসিনি।

নখোয়গী ত্রেনিং য়াম্না কন্না তৌই হায়না ঐঙোন্দা তম্মি অমসুং চহি অনি অসিগী মনুংদা পব্লিক এদমিনিস্ত্রেসন, ইকোনোমিক্স, লো, পোলিতিকেল সাইন্স অমসুং কন্সতিত্যুসন, মেনেজমেন্ত, হিস্তরী অমসুং কলচর অমসুং লেংগ্বেজ সবজেক্ত কয়া অসিদা নাখোয়বু তাক্লি

মসিগী মথক্তা ভারত দর্শন অমসুং জিলাগী থাক্তা পাঙথোকপা ত্রেনিং প্রোগ্রামগী মনুংদা নখোয়না সরকারগী অমসুং লৈবাক অসিগী মখল কয়াগী তোঙান তোঙানবা লমশিংদা থবক তৌবগী তোপ তোপ্পা খুদোংচাবা অমা ফংলি।

নুংশিরবা ইচিল-ইনাওশিং,

অদোমনা তমখিবা, উখিবা অমসুং খঙখিবশিং অদুনা অফবা শিন্ফম অমগীদমক মপুং ফানা শেম শাবা ঙমহল্লগনি।

মসি লম অসিদা খ্বাইদগী নৌবা অদোমগী লৌশিং, অদোমগী স্কিল লৌশিনবা ঙম্বা অমসুং মীনুংশি লৈবা, মীওইবগী মওং মতৌগী অপুনবা অমনি, মসিনা অদোমনা খল্লিবা শিনফম অদুদা অদোম কয়াম মায় পাক্লবগে হায়বা লেপকনি।

অদোমনা তৌরিবা অদুদা খ্বাইদগী ফবা মওংদা ওন্থোকপদা গুন পুম্নমক অসি মথৌ তাই। মরমদি মীয়ামনা অদোমবু খ্বাইদগী ৱাংনা খল্লিবা সিবিল সর্ভিসকী মীহুৎ অমা ওইনা লৌরি।মখোয়না খল্লি অদোমনা তৌরিবা অমদি লৌখৎলিবা খোঙথাং অদু ফীদমনীংঙাই ওই হায়না লৌবগা লোয়ননা তমজনীংঙাই ওইবা মীওইনা হায়না লৌই। মখোয়না অদোমদগী অফবা খক্তা আশা তৌরি।

তম্বা ঙমদবা মওং অমদা মালেম অসি লেপ্তনা হোংলি। অদোমনা লৈঙাকপা অমা ওইনা থোরক্লিবা খুদোংচাদবশিং অসি কোকহন্নবা মাংজৌননা অহোংবশিং খঙদোকপা অমসুং শেম শাবা তাই। হোংবা নাইদবা পোৎ অমত্তা লৈতে অমসুং মীয়ামগী অপাম্বা অনিং থুংহন্নবা হোৎনরিবা লৈঙাকপা অমা ওইনা মীৎনা শিংবা তাই।

কোবিদ লায়চৎ অসি লাকশিন্নবা নখোয়না মাংজিল থানা হোৎনরি তাবদা ঐহাক নুংঙাইবা পোকই। নখোয়না হৈজিল হৌরিবা অদু তুংদা হেল্থ ইমর্জেন্সী অমা থোক্লকপদা মদুদা য়েংশিনবদা কান্নবা ওইরগনি।

নখোয় পুম্নমক্না হৌজিক লৌখৎলিবা স্বছ ভারত মিসন, এজুকেসন, হেল্থ, লো অমসুং ওর্দরগী খোঙথাং অসি ফজনা খঙলে অমসুং পঞ্চায়ৎ রাজ ইন্সতিত্যুসনশিংগা লোয়ননা থবক তৌরি তাবদা ঐহাকসু নুংঙাইবা পোকই।

নুংশিরবা ইচিল-ইনাওশিং,

অদোমগী কেরিয়রদা তোঙান তোঙানবা থাক্তা মীয়ামনা থাগৎলবা মীহুৎশিংগা লোয়ননা থবক তৌগনি। ঐখোয়গী লমদম অসিগী তোঙান তোঙানবা মফমদগী লাকপা মীওই কয়াগা পুনগনি। অদোমনা তৌরিবা পুম্নমক্তা অমগা অমগী মরক্তা ইকাই খুম্নবা ঙাক্না চৎলু অমসুং পুক্নিং ফাথনা তাবা তম্বা অমসুং তোঙান তোঙানবা ৱাখল্লোনশিং ইকাই খুম্নগদবনি।মসিনা অদোমবু হেন্না ফগৎহনগনি।

ফীদমনীংঙাই ওইরবা সদর পতেলগী মখাদা ভারত সরকারগী মিনিস্তর ওফ স্তেৎকী সেক্রেতরী ওইরম্বা শ্রী ভি.পি. মেনন্না নিংথৌ পানবা লৈবাক ৫৫০ ইন্দিয়ন য়ুনিয়নদা পুনশিনখিবা মতমদা মহাক্না সদর পতেলগী লুচিংবগী গুনশিংগী মতাংদা হায়খিবা অদু তমগে,

 “লুচিংবা হায়বা অসি মখল অনি শুই। পোলিসী অমসুং অকুপ্পা ৱরোল খঙলবা নেপোলিয়ন গুম্বা লুচিংবা অমনা মহাক্কী য়াথং ঙাক্নবা খুৎলাই অদু খক্তা পাম্লম্মি। সদরকী লুচিংবগী মওং অসিনা অনিশুবা মখল অদুনি। মহাক্না মহাক্কী খোঙলোয় খনবদা, মহাক্না মখোয়না মহাক্কী পোলিসী অদু ইমপ্লিমেন্ত তৌগনি থাজখি। সদরনা মতম পুম্বদা মহাক্না পুম্নমক খঙলে হায়না লৌদে অমসুং পোলিসী অমা কুপ্না খন্নবা তৌদনা চৎনহন্দে। ঐখোয়না খন্ন-ন্নৈনবা মতম পুম্নমক্তা ঐখোয়না মিনিস্তর অমসুং সেক্রেতরী অমা ওইবগী মহুত্তা মরূপ ওইনা খন্নমিনখি।”

মখোয়না লৈনরিবা মরীশিং অদু ঐহাক্না ইকাই খুম্নৈ। অমসুং “মতম পুম্বদা পুম্নমক খঙহৈরে হায়না খন্দবা”লৈবাক অসিগী অহানবা উপ প্রধান মন্ত্রীগী নোলুকপা মওং অদু খঙজিল্লু।

অতোপ্পদগী তমশিনবা হায়বা অসি তঙাই ফতে। অদোমগী নাপলনা অদোমগী খোঙথাংবু শোইহল্লোইদবনি। অফবা লুপ অমবু লুচিংবা অমা ওইনা অদোমগা থবক তৌমিনরিবা মীপুম খুদিংমক্কী নুংগী ওইবা ৱাখল্লোন অদু অদোমনা খঙবা ঙম্বা মথৌ তাই।

ভারত অসি অচৌবা অওনবা অমগী মচিন্দা লৈরে অমসুং হৌজিক ওইরিবা অকায়বা থোকহল্লবা লায়চৎ অসি লৈরবসু চাঊখৎনবা অমসুং মরোমদোম লেপ্নবা, খোজেং য়াংনা চাউখৎনবগী অনৌবা খুদোংচাবা কয়া লৈরে। মসিগী অনৌবা ভারত অসি হৌদোকপদা অদোম্না লুচিংগদবনি।  

মসিগী অনৌবা ভারত অসি ঐখোয়গী প্রজাতন্ত্রগী চৎনবীদা পুক্নিং চংবদা অমসুং পুন্না চাউখৎমিন্নবগী শাফুশিং অমসুং পু্ন্সি মহিং ফগৎহন্দুনা মীয়াম শেবা তৌরিবা লোয়শঙশিং ফগৎহনবদা য়ুম্ফম ওইগনি।

নখোয়গী কেরিয়রগী লম্বেলদা অদোম্না ৱারেপ কয়া লৌগনি। করিগুম্বা অদোম্না মীনা ইনশিনবা লৌদনা অচুম্বগী তঙাইফদবা, অচুম্বা ৱায়েল, মীয়ামগী য়াইফনবা অমসুং অকোয়বগী ঙাক শেনবদা লেপ্পা ঙম্লবা, করিগুম্বা কন্সতিত্যুসন্না মাইকৈ তাক্নবা অমসুং লৈবাক মীয়ামগী অপাম্বনা লমজিংবগী মাইকৈ তাকপা ওইনা লৌবা ঙম্লবদি অদোম্না অচুম্বা ৱারেপ লৌবা ঙমগনি। 

চমম্নবা মতমদা গান্ধীজীগী তালিস্মান নিংশিংঙু অমসুং অদোম্না থেংনরকপা য়াবা খ্বাইদগী লায়রবা অমসুং তোল্লবা নুপা (নুপী) অদুগূ শক্তম অদু নিংশিংঙু অমসুং অদোম্না লৌগদৌরিবা ৱারেপ অদু মখোয়দা কান্নবা ওইগদরা হাববদু নথন্তা ৱাহং হংজৌ। 

অদোমনা অনৌবা ৱাখল্লোন পুথোক্তুনা মালেমগী খ্বাইদগী ফবা লৈঙাক্লিবা লুচিংবশিং ওইবা হৌরবনিনা হোংদোকপা, পাংথোকপা অ‌ওনবা পুরকপা প্রধান মন্ত্রীগী লায়ৱানা অদোম পুম্নমক্কী ইনোৎ হাপ্পা মচাক অমা ওইবা য়াই।  

তমশিনবা লেপকনু, খনবা লেপকনু, অনৌবা ৱাখল্লোন পুথোকপা লেপকনু।

ঐখোয়না ঙসি মথৌ তারিবা অসি অফবা লৈঙাক্নি। মীয়ামগী ওইবা লৈঙাক অদুবু অফবা, মীয়ামগী মথৌ তাবা অমসুং অপাম্বদা চৎকদবা সিস্তেম অমা, মনুং মপান ফাওনা উবা অমসুং পান্দম লৈবা সিস্তেম অমা, চাউখৎ থৌরাংগী ফীভমশিং শেমগৎকদবা সিস্তেম অমা।

ঐনা অদোম্বু মতিং লৈবা, মাংজিন থানা অওনবা পুরক্কদবা এজেন্তশিং- মতিক চাবা, থাজবা অমসুং কত্থোকপা—খোয়না উবা পাম্বা অনৌবা ভারত অমা পুরক্নবা খৌরাংবা অমা ওইনা উই।

অদোম অওনবা ভারতকী মচা অমা ওইরিবা শ্রী লাল বাহাদুর শাস্ত্রীগী মমিং থোল্লিবা মমিং লৈরবা ত্রেন্নিং ইন্সতিত্যুৎ অসিগী এলুম্নি ওইরগনি। শাস্ত্রী জী অসি অপুনবগী শক্তম অমসুং পুকচেল শেংবা, মীনুংশি লৈবা অমসুং মতিং লৈবা, লৈবাক্কী ফিদমনীংঙাই ওইবা অমসুং লম্বা লৈতবা থৌনানা মশক তাকপা মশক নাইরবা লুচিংবা অমনি। মসিগী ফিদমনীংঙাই ওইরা লুচিংবা অসিদগী লেপ্তনা অফবশিং তমশিনবা ঙম্লগনি হায়না ঐনা থাজৈ।

অদোমগী থবক নত্রগা শিনফম অদু মিসন অমা ওইনা লৌনবা ঐহাক্না হায়জরি। ঐখোয়গী লৈবাক অসি পুকচেল শেংবা, কত্থোকপা অমসুং ঐখোয়গী লৈবাক্তা ইনাক খুনবা অমসুং লাইরবগী মরক্তা, নুপা অমসুং নুপীগী মরক্তা, খুঙ্গং অমসুং শহরগী লমগী মরক্তা লৈরিবা খেন্নবা কয়া অসি শমজিন্নবা থৱাই য়াওনা হোৎনগদবা মিসন অমা। শোত্থরবা কাংলুশিংগী সোসিও-ইকনোমিক্স ফগৎহনবনা অদোমগী পান্দম ওইগদবনি।  

লোইশিন্দ্রিঙৈদা ঐনা লাল বহাদুর শাস্ত্রী নেসনএল একেদেমী ওফ এদমিনিস্ত্রেসন (এল.বি.এস.এন.এ.এ.)বু নহা ওইরিবা সিভিল সর্ভেন্তশিং মালেমগী ওইবা থাক্তা ত্রেনিং পীবা অমসুং মালেমদা লৈরিবা খ্বাইদগী ফবা এদমিনিস্ত্রেতিব লুচিংবশিংগী অমা ওইনবা ঞ্জান, স্কিলশিং অমসুং এতিচুদশিং ফংহনবগীদমক থাগৎপা ফোঙদোকচরি।

জয় হিন্দ!”

*********