হঙ্গাম থাও পীনবা আই.তি.বি.পিগা খুৎশম্নদুনা ভারত “অত্মানির্ভর’ ওইহন্নবা অতোপ্পা অচৌবা থবক অমা খাদি এন্দ ভিলেজ ইন্দস্ত্রি কমিসন(কে ভি আই সি)না পায়খৎলে। মসি থবক হৌনবা ঙসি কে.ভি.আই.সি অমসুং আই.তি.বি.পি এম.ও.য়ু অমা খুৎয়েক পীনখ্রে। এম.ও.য়ু অদু কে.ভি.আই.সিগী দিরেক্তর ভি.কে নাগর অমসুং আই.তি.বি.পিগী দি.আই.জি রামা কান্ত শর্মনা কে.ভি.আই.সিগী চেয়রমেনগী মমাংদা খুৎয়েক পীনখি।

প্রধান মন্ত্রী নরেন্দ্র মোদীনা হৌদোকখিবা “অত্মানির্ভর ভারত অভিয়ান” শৌগৎনবা থবক অমা ওইনা লমদম অসিদা পুথোকপা পোৎথোকশিং শীজিন্ননবা য়ুনিয়ন হোম মিনিস্তর অমিৎ সাহনা পেরামিলিতরি ফোর্সশিংদা য়াথং পীরকপদগী থবক অসি পায়খৎলকপনি হায়না কে.ভি.আই.সিগী ৱারোল অমনা হায়রি। খোঙথাং অসি এম.এস.এ.ইগী য়ুনিয়ন মিনিস্তর নিতিন গাদকরিনা তরাম্না ওকখি।

ভারত শীনবা থুংনা লৈরিবা সি.এ.পি.এফ কান্তিনশিংদা লৈবাক অসিদা শাজবা পোৎলমশিং খক য়োন্নবা অমিৎ সাহনা খঙহনখ্রে। পেরামিলিতরি ফোর্স পুম্নমক্কী দরকার ওইবশিং লৈনবগী নোদেল এজেন্সি ওইনা হোম মিনিস্ত্রিনা আই.তি.বি.পি হাপখ্রে।

আই.তি.বি.পিনা অফবা মখলগী কাচচি ঘনি হঙ্গাম থাও কুইন্তল ১২০০ কে.ভি.আই.সিগী মখাদা লৈবা পি.এম.ই.জি.পি য়ুনিতিশিংদগী লৈরগনি।

থবক অসিগীদমক য়ুনিয়ন হোম মিনিস্তর থাগৎলদুনা কে.ভি.আই.সিগী চেয়রমেন বিনাই কুমার সক্সেনানা হায়খি পেরামিলিতরি ফোর্সশিং পোৎলম অমা হেক্ত পীনবা কে.ভি.আই.সিগা য়ানচে খুৎয়েক পীনবা অসি হন্দক্কী অসিনা অহানবনি । মসিনা লমদম অসিগী মীওইশিং থবক য়াম্না ফংহন্নবগী অচৌবা খোঙথাং অমনি। ঐখোয়গী ঙমখৈশিং ঙাক্লিবা ঐখোয়গী লান্মীশিংদা খ্বাইদগী ফবা থাও মতম চানা পীবা অসি ঐখোয়গী মরুওইবা থবক ওইগনি।

কে.ভি.আই.সি অমসুং আই.তি.বি.পি এম.ও.য়ু খুৎয়েক পীনরিবা অসি চহি অমগী ওইগনি অমসুং মখা তানা শাংদোক্কনি। তুংদা দরি, ফৈজুপশিং, মোনপাক ফিদক, মোনখুম, অচার, খোইহি, পপর অমসুং অকে-অমৌগী পোৎলমশিং পীনবা থৌরাং তৌরি। অপুনবা ওইনা থাও অমসুং দরিগী শেনফম লুপা করোর ১৮ রোম ওইগনি।

**********