য়ুথ এফিয়র্স অমসুং স্পোর্তস্কী কেন্দ্রগী মন্ত্রী শ্রী কিরেন রিজিজু অমসুং হরিয়ানাগী মুখ্য মন্ত্রী শ্রী মনোহর লাল খাত্তারনা হরিয়ানাবু তোকিয়ো ওলিম্পিক্সকী হেক মতুংদা পাঙথোক্নবা শেম শারিবা খেল্লো ইন্দিয়া য়ুথ গেমস্কী মরিশুবা তাংকক্কী য়ুম্বু ওইরগনি হায়না ঙসি লাউথোকখ্রে। গেমস অসি হরিয়ানাগী পঞ্চকুলাদা পাঙথোক্কনি। হায়রিবসি জুলাই ২৫কী থাংজ নুমিত্তা হরিয়ানাগী শান্ন-খোৎনবগী মন্ত্রী শ্রী সন্দীপ সিংহ, শান্ন-খোৎনবগী সেক্রেতরী শ্রী রবি মিতাল অমসুং স্পোর্ত ওথোরিতী ওব ইন্দিয়াগী দিরেক্তর জেনরেল শ্রী সন্দিপ প্রধান য়াওনা ভিদিও কনফরেন্সিংগী খুথাংদা লাউথোকখিবনি।

হরিয়ানানা কে.আই.ৱাই.জি.গী মথংগী তাংকক্কী য়ুম্বু ওইগদৌরিবা অসিগী মতাংদা পল্লদুনা শান্ন-খোৎনবগী মন্ত্রী রিজিজুনা হায়খি, "হরিয়ানাবু মরিশুবা খেলো ইন্দিয়া য়ুথ গেমস্কী য়ুম্বু ওইনা লাউথোকপদা ঐহাক য়াম্না হরাউবা পোকই। ঐখোয়গী প্রধান মন্ত্রীগী অশানবা মীৎয়েং, খেল্লো ইন্দিয়া গেমস অসিনা ভারতপু মহুৎ শিন্দুনা মালেমগী থাক্তা শান্নবা মশান্নশিংগী হৈথোই শিংথোইবশিং মখোংদগী হৌনা লৈবাক শীনবা থুংনা লৈরিবশিংদগী থিদোকপদা মরুওইবা অমা ওইরি। মসি শান্ন-খোৎনবগীদি মহাকুম্ভনি। হরিয়ানাদা শান্ন-খোৎনবগী চাউরবা নাৎ অমা লৈ, অমসুং মসিনা লৈবাক অসিগী থৌনা লৈরবা এথলেৎশিং পুথোকখ্রে। রাজ্য অসিদা গেমস অসি য়ূম্বু ওইরদুনা হরিয়ানাদগী হেন্না-হেন্না থৱাই য়াওবা এথলেৎশিংনা হেন্না চাংদম্ননিংঙাই ওইবা মশান্না কয়া লৌখৎলক্কনি হায়বগী থাজবা থম্লি। মহৌশানা খেল্লো ইনিদা য়ুথ গেমস অসি চহী খুদিংগী জনুৱারীদা পাঙথোকপনি। অদুবু হন্দক্তি ঐখোয়না মসি য়ৈথোকপা তারি। অদুমওইনমক, ঐখোয়না গেমস অসি পাঙথোক্নবা শীল্লকপা মতমদদি লাইচৎ অসিসু নেম্লগনি হায়না থাজৈ অমসুং ঐখোয়না মহৌশাগুম শান্নরোই ১০,০০০ হেনবনা শরুক য়াদুনা রাজ্য পুম্নমক্না শরুক য়াদুনা চাউনা পাঙথোকপা ঙমগনি হায়না থাজবা থম্লি।"

মমাংগী তাংকক্তা পাঙথোকখিবগুম হন্দক্কীসিদসু, স্তার স্পোর্তস্না খেল্লো ইন্দিয়া য়ুথ গেমস্কী ওফিসিএল ব্রোদকাস্তিং পার্তনর ওইগনি। পার্তনরশিপ অসিগী মতাংদা পল্লদুনা শান্ন-খোৎনবগী মন্ত্রীনা হায়খি, "খেল্লো ইন্দিয়া য়ুথ গেমস অসি লৈবাক অসিগী চহীগী ওইনা পাঙথোকপা শান্ন-খোৎনবশিংগী মনুংদা ওন্থোক্নবা হোৎনবদা স্তার স্পোর্তস্না অচৌবা থৌদাং লৌদুনা হোৎনখি। নহা ওইরিবা এথলেৎ অমনা মহাক মশামকপু লৈবাক অসিগী তেলিবিজন চেন্নেলশিংদা থোক্লকপা মতমদা এথলেৎ মশামকপু পুক্নিং থৌগৎচবদা নত্তনা ব্রোদকাস্ত অদুবু য়েংলিবা অতোপ্পা নহাশিংসু শান্ন-খোৎনববু মরুওইবা কেরিয়র অমা ওইনা লৌখৎনিংবগী ইথিল পোকহল্লি। পার্তনরশিপ অসিনা মখা তানা চত্তুনা লৈবসিদা ঐহাক্না হরাউবা পোকই।"

লাউথোকপদুগী মনুংদা শ্রী মনোহর লাল খাত্তারনা হায়খি, "হরিয়ানা রাজ্য অমা ওইনা শান্ন-খোৎনববু চাউনা পুক্নিং থৌগৎলক্লি অমসুং শান্নরোই কয়াগী মতেং পাংলক্লি। খেল্লো ইন্দিয়া য়ুথ গেমস্কী য়ুম্বু ওইবসিনা ঐখোয়না শান্ন-খোৎনবগী মপাঙ্গল লৈরবা মফম অমা ওইনবা হোৎনরিবসিদা হেন্না থৌনা হাপ্লগনি। হরিয়ানানা হৌখিবা খেল্লো ইন্দিয়া য়ুথ গেমস্কী তাংককশিংদা মতীং থোক্না উৎখি অমসুং ঐখোয়গী শান্নরোই কয়ানা খেল্লো ইন্দিয়া স্কিমগী মখাদা ত্রেনিং লৌবা হৌখ্রে। লাক্লিবা গেমস অসিগী তাংকক অসি অচৌবা অমা ঐগনি হায়না ঐহাক্না থাজৈ অমসুং খেলো ইন্দিয়া য়ুথ গেমস, হরিয়ানাদা ময়াম পুম্নমকপু তরাম্না ওকচরি। পঞ্চকুলাদা খ্বাইদগী ফরবা শান্ন-খোৎনবগী ইনফ্রাস্ত্রকচর লৈ অমসুং মসিদা খেলো ইন্দিয়া য়ুথ গেমস্কুম্বা মখল য়াম্না শান্ন-খোৎনবগী গেমস পাঙথোকপা য়াগনি অমসুং শরুক য়ারগদবা শান্নরোই কয়ানা লৈফম চাফম নীংথীনা মফম অসিদা লৈ।"

হরিয়ানানা হৌখিবাই কে.আই.ৱাই.জি.গী তাংকক অহুমদা লেপতনা মশক থোক্না শরুক য়ারক্লি।  কে.আই.ৱাই.জি. ২০১৯ অমসুং কে.আই.ৱাই.জি. ২০২০দা অনীশুবা তারক্লবসু (২০২০দা তক্মান ২০০ অমসুং ২০১৯দা তক্মান ১৫৯), মখোয়না ২০১৮গী কে.আই.ৱাই.জি.দা তক্মান ১০২ ফংদুনা (শনা ২৮, লুপা ২৬, শেঞ্জেং ৩৮) মকোক্তা লৈখি।

হরিয়ানানা মকোক থোংবা শান্নরোই কয়া পুথোকখ্রে, মখোয়গী মরক্তা য়োগেশ্বর দত্ত, বজ্রং পুনিয়া, সকশি মালিক অমসুং ভিনেস ফোগতনি, পেরা এথেলৎশিংগী মরক্তা দীপা মালিক, নীরজ চোপ্রা, বোক্সর অমিৎ পাংঘল, অমসুং শুতর সঞ্জীব রাজপুৎ, মনু ভাকর, অনিশ ভানৱলা, অমসুং অন্তর্জাতীগী থাক্তা ভারতকী মহুৎ শিন্দুনা শরুক য়াখ্রবা অমসুং তক্মান লৌরকখ্রবশিংনি।

********