মাইক্রো, স্মোল অমসুং মেদিয়ম ইন্তরপ্রাইজেসকী য়ুনিয়ন মিনিস্তর নিতিন গাদকারিনা ঙসি হায়খ্রে পোৎথোক পুথোকপদা চঙবা শেনফম হন্থহন্নবা ফার্মর প্রদুসর কম্পেনি(এফ পি সি)না পুথোকপা লৌউ-শিংউগী পোৎথোকশিং লৈবাক মনুংগী অমসুং মালেমগী কৈথেলশিংদা য়োনবা দরকার ওই। ‘লৌউ-শিংউগী এম.এস.এম.ই সেক্তরদা ক্লস্তর শেমগৎপা’ হায়বা হিরমদা নাগপুরদগী ৱেবিনার অমদা মহাক্না ৱা ঙাংখি। থৌরম অদুদা রাজ্য সভাগী এম.পি দোক্তর বিকাস মহাতমে, এম.এস.এম.ই দিবলপমেন্ত সেন্তর নাগপুরগী দিরেক্তর, দোক্তর পারলেৱার শরুক য়াখি।

পোৎথোক হেনগৎহন্নবা হোৎনবগা লোয়ননা মহৈ-মরোং পুথোকপদা , পুথোক-পুশিন তৌবদা অমসুং শিন্মীশিং নেকপদা চঙবা শেনফম কমদৌনা হন্থহনগদগে হায়বদা মিৎয়েং চঙনবা অমরাবদি জিলাগী এফ.পি.সিশিংগী মীহুৎশিংদা য়ুনিয়ন মিনিস্তরনা হায়জখি। মহাক্না হায়খি মগুন হন্থহন্দনা পোৎথোকশিং লৈবাক মনুংগী কৈথেলশিংদা ফংহনগদবনি। তুংদা, অহেনবা পোৎথোকশিং মপান লৈবাকশিংদা য়োনগদবনি।

মহাক্না হায়খি লৌমীশিংনা পোৎথোক পুথোকপদা চঙবা শেনফম হন্থহনগদবনি অমসুং পোৎথোকশিং শেম-শাবদা খরচ হন্থহনবনা ইন্দস্ত্রিগী কান্নবা ওইগনি। হৱাই তক্নবা মিলগী ক্লস্তর অমদা লৈরিবা ফার্মর প্রদুসর কম্পেনি অমনা সোলার ইনর্জি শীজিন্নদুনা, রেলদা পোৎ পুদুনা অমসুং দ্রাই-পোর্ত শীজিন্নদুনা খরচ হন্থনবা হোৎনগদবনি। খুৎশেমগী হার অমসুং তিলহাৎ হিদাকশিং শীজিন্নবগী মহুৎতা লৌমীশিংনা ওর্গনিক হার অমসুং লৌউ-শিংউগী লমহৌখাকশিং শীজিন্নদুনা পোৎথোক পুথোকপদা চঙবা শেনফম হন্থহনগদবনি।

মহাক্না হায়খি বিদরবাগী জিলা অমমমদা ফংলিবা মহৌশাগী লনশিং অসি খাদি অমসুং ভিলেজ ইন্দস্ত্রি দিপার্তমেন্তনা শীজিন্নবা য়াগনি অমসুং অসিগুম্বা ফার্মর প্রদুসর কম্পেনিশিংনা জিলা অমমমগী ওইনা পান্দম অমা শেমগদবনি। ফার্মর প্রদুসর কম্পেনিশিংনা খোহি, চান্দ্রপুরদা ফংলিবা সিল্কতগী পোৎথোক কয়া পুথোকপা য়াগনি, চান্দ্রপুর অমসুং গারচিরোলি জিলাশিংগী ৱা হৌরিবা মফমশিংদা অগরবতি শানবা ক্লস্তরশিং লিংখৎপা য়াগনি। এগ্রিকলচর দিপার্তমেন্তনা হাংদোক্লিবা ‘ইকুইপমেন্ত বেঙ্ক’ স্কিম অসিদগী অপুনবা লৌমীশিং অমসুং ফার্মর প্রদুসর কম্পেনিশিংনা খুৎলায়শিং লৈবা য়াগনি অমসুং মখোয়গী মরক্তা শেন লৌদুনা শীজিন্নবা য়াগনি।

মহারাস্ত্রাগী অমরাবতি জিলাদা ফার্মর প্রদুসর কম্পেনি ৫৫গী লৌমী ২০,০০০ হেন্না লৈরি অমসুং মখোয়গী পোৎথোকশিং য়োন্নবা তাতা ইন্তরনেসনেল অমসুং ৱালমার্তগুম্বা কম্পেনিশিংগা য়ানচেশিং খুৎয়েক পীনখ্রে। এম.এস.এম.ই দিবলপমেন্ত সেন্তর নাগপুরগী দিরেক্তর, দোক্তর পারলেৱারনা হায়খি বিদরবা লমদমদা ফার্মর প্রদুসর কম্পেনিশিংনা পোৎথোক পুথোক্নবা কম্মন ফেকসিলিতি সেন্তরশিং হাংদোক্লে।ৱেবিনার অদুগী অরোইবদা কোম্লা শেম-শাবগী ইন্দস্ত্রিগী মতাংদা ফার্মর প্রদুসর কম্পেনিশিংগী মীহুৎশিংনা হংলকপা ৱাহংশিংগী পাউখুমশিং নিতিন গাদকারিনা পীখি। এগ্রিকলচর দিপার্তমেন্ত অমসুং এম.এস.এম.ইদা লৈরিবা স্কিমশিংগী মতাংদা লোকদাউন লোইরবা মতুংদা ফার্মর প্রদুসর কম্পেনিশিংদা শন্দোক্না খঙহন্নবা মহাক্না মরী লৈনবা ওথোরিতিশিংদা খঙহনখি। ৱেবিনার অদুদা বিদারবাগী ফার্মর প্রদুসর কম্পেনি অমগী মীহুৎশিং অমসুং তাতা ইন্তরনেসনেলগী মীহুৎশিং শরুক য়াখি।

***